1. Jehova oha kala e udite ngahelipi ngeenge odi yaye imwe oya alukile kuye?

MOSHITUKULWA sha dja ko, otwa kundafana nghee Jehova a faafanifwa nomufita omunahole oo ha file oshisho odi yaye keshe. Oha kongo keshe oyo ya kana. Jehova okwa li a lombwela Ovaisrael ovo va li ve mu fiya po a ti: ‘Alukileni kwaame, opo ndi alukile kunye.’ Nokunena, Jehova okwa hala ovo inave lipyakidila vali va alukile kuye molwaashi okwa ti: “Ihandi lunduluka.” (Mal. 3:6, 7) Jesus okwa ti kutya Jehova novaengeli ohava kala va hafa neenghono ngeenge omupiya waYe umwe ta alukile kuYe. — Luk. 15:10, 32.

2. Oshike hatu ka kundafana moshitukulwa eshi?

² Ohatu ka kundafana omafaneko atatu aJesus oo tae tu kwafele tu dule okukwafela ovo va fiya po Jehova. Ohatu ka kundafana omaukwatya amwe kondadalunde oo twa pumbwa opo tu dule okukwafela eedi odo da kana di alukile kuJehova. Ohatu ka mona yo kutya omolwashike sha fimana okuyambidida ovo va nghundipala.

3-4. Omolwashike omukainhu oo a tumbulwa muLukas 15:8-10 a li a konga oshimaliwa shaye nelitulemo osho sha li sha kana?

³ Otwa pumbwa okulonga noudiinini opo tu dule okumona ovo va hala okwaalukila kuJehova. MEvangeli laLukas, Jesus okwa popya nghee omukainhu oo a li ta kongo oshimaliwa shaye shoshisiliveli shi na ongushu eshi sha kana. Efaneko olo otali tu kwafele tu mone kutya omukainhu oo okwa longa noudiinini eshi a li ta kongo oshimaliwa shaye. — Lesha Lukas 15:8-10.

⁴ Jesus okwa popya nghee omukainhu oo a li e udite eshi a mona oshimaliwa shaye shoshisiliveli osho sha li sha kana. Pefimbo laJesus, ovakainhu vamwe vOvajuda ova li hava yandje oimaliwa yoisiliveli omulongo kovanakadona vavo mefiku loshivilohombolo shavo. Otashi dulika oshimaliwa osho osha li she likalekelwa molwaashi otashi dulika omukainhu oo a li e shi pewa kuina. Omukainhu oo okwa li ta diladila kutya oshimaliwa shaye osha wila pedu. Onghee okwa kufa olamba, ndele te shi kongo, ashike ka li e shi mona. Olamba oyo otashi dulika kaya li i na ouyelele wa twa, oo  tau dulu oku mu kwafela a mone oshimaliwa shaye osho sha kana. Hauxuuninwa, okwa ka komba eumbo alishe noukeka. Oshimaliwa shaye osho she likalekelwa okwa li e shi toola mondwi, tashi vilima kouyelele wolamba oyo ya li ya tema. Ka li tuu a hafa eshi e shi mona! Okwa li a ifana ookaume kaye novashiinda e va lombwele onghundana iwa.

5. Omolwashike tashi dulika hashi kala shidjuu okumona ovo inave lipyakidila vali?

⁵ Ngaashi twe shi mona mefaneko laJesus, ohashi pula ombuda okumona oshinima osho sha kana. Sha faafana, otashi dulika nafye twa pumbwa okutula ombuda moshixwa opo tu dule okukonga ovo inave lipyakidila vali. Otashi dulika pa pita omido dihapu ihava endafana neongalo. Vamwe otashi dulika va tembukila keenhele dimwe, novamwatate vomoshitukulwa osho kave va shii. Ashike kape na omalimbililo kutya vamwe ovo inave lipyakidila vali ova hala okwaalukila kuJehova. Ova hala okulongela Jehova pamwe nomaukwaneumbo avo, nova pumbwa ekwafo letu.

6. Ongahelipi eongalo alishe tali dulu okukwafela mokukonga ovo inave lipyakidila vali?

⁶ Oolyelye ve na okukonga ovo inave lipyakidila vali? Ovaudifi aveshe meongalo otava dulu okukwafela mokukonga ovo inave lipyakidila vali, mwa kwatelwa ovakulunhuongalo, ovakokolindjila nosho yo ovapambele vaavo inave lipyakidila vali. Mbela ou na kaume ile omupambele oo ine lipyakidila vali? Mbela owa shakeneka umwe oo ine lipyakidila vali eshi wa li to longo eumbo neumbo ile to udifile meenhele daaveshe? Ngeenge omunhu oo okwa halelela okuyandja ouyelele waye oko ta dulu okukwatafanwa naye, oto dulu oku u yandja kovakulunhuongalo vomoshitukulwa sheni.

7. Oshike hatu lihongo kwaasho sha popiwa komukulunhuongalo wedina Thomas?

⁷ Eenghatu dokondadalunde dilipi ovakulunhuongalo va pumbwa okukatuka opo va kwafele oo a hala okwaalukila kuJehova? Diladila kwaasho sha popiwa komukulunhuongalo wedina Thomas, * oo ha kala moSpain. Okwa kwafela Eendombwedi di dulife po 40 odo da kala inadi lipyakidila vali di alukile kuJehova. Thomas okwa ti: “Tete, ohandi pula ovamwatate novamwameme va yoolokafana ngeenge ove shii Ondombwedi imwe oyo inai lipyakidila vali. Ile ohandi pula ovaudifi ngeenge ove shii umwe oo ihe uya vali kokwoongala. Ovaudifi vahapu ohava lombwele nge nondjungu molwaashi ove shii kutya navo otava kufa ombinga mokukonga eedi odo da kana. Opo nee ngeenge handi talele po ovamwatate novamwameme ovo inave lipyakidila vali ohandi pula kombinga younona vavo nosho yo ovapambele vavo vamwe. Vamwe ovo inave lipyakidila vali ova li have uya nounona vavo kokwoongala, navamwe ova li ovaudifi. Ounona va tya ngaho navo ova pumbwa okukwafelwa.”

8. Metwokumwe nefaneko lomumati a kanene olo tali hangwa muLukas 15:17-24, xe okwa ungaunga ngahelipi nomonamati oo e livela ombedi?

⁸ Omaukwatya ilipi twa pumbwa okukala tu na ngeenge otwa hala okukwafela ovo inave lipyakidila vali va ulikile kuJehova? Natu ka taleni osho hatu lihongo mefaneko laJesus lomumati oo a li a fiya po eumbo. (Lesha Lukas 15:17-24.) Jesus okwa yelifa kutya lwanima omumati oo okwa ka didilika kutya oinima oyo ta ningi oya puka nokwa li a tokola toko okushuna keumbo. Xe okwa tondoka a ka shakeneke omonamati, e mu papatela noku mu shilipaleka kutya oku mu hole. Omonamati okwa li e udite ondjo kombinga yaasho a ninga nokwa li e wete kutya ina fa vali omudalwa. Xe okwa li a fila onghenda omonamati waye eshi e mu mbubulila nghee e udite. Onghee okwa li a katuka eenghatu dokondadalunde opo a shilipaleke kutya omonamati waye okwe mu tambula ko meumbo, ine mu tala ko ngaashi omupiya, ndele ongaashi oshilyo shoukwaneumbo.  Opo e shi ulike, okwa li a longekida oshivilo nokwa li a pa omonamati oikutu iwa, oo a li e livela ombedi.

9. Oshike twa pumbwa okuninga opo tu kwafele ovo inave lipyakidila vali va alukile kuJehova? (Tala oshimhungu “ Nghee hatu dulu okukwafela ovo va hala okwaalukila kuJehova.”)

⁹ Jehova okwa fa xe womefaneko olo. Oku hole ovamwatate novamwameme ovo inave lipyakidila vali nokwa hala va alukile kuye. Ngeenge otwa kala hatu hopaenene Jehova, ohatu ke va kwafela va alukile kuye. Opo tu ninge ngaho, otwa pumbwa okukala tu na elididimiko, hatu udile ovanhu oukwao wananghali novanahole. Ongahelipi hatu dulu okuulika omaukwatya oo kondadalunde, nongahelipi hatu dulu oku shi ninga?

10. Omolwashike twa pumbwa okukala ovalididimiki eshi hatu kwafele ovo inave lipyakidila vali va alukile kuJehova?

¹⁰ Otwa pumbwa okukala ovalididimiki molwaashi ohashi pula efimbo opo omunhu a alukile kuJehova. Vahapu ovo va li inave lipyakidila vali ova popya kutya ovakulunhuongalo nosho yo vamwe meongalo ova kala noku va talela po lwoikando ofimbo inava hovela vali okulongela Jehova. Omumwameme wedina Nancy, wokoushilolukadi laAsia, okwa popya a ti: “Onda kwafelwa neenghono kukaume kange kopofingo womeongalo. Oku hole nge nonda fa ashike omukulu waye. Okwa kala ha dimbulukifa nge omafimbo mawa oo twa li hatu hafele. Oha pwilikine kwaame nelididimiko eshi handi mu lombwele nghee ndi udite noiha ongaonga okupa nge omayele. Okwa ulikila nge kutya oku li kaume kashili nokwe lilongekida okukwafela nge efimbo keshe.”

11. Omolwashike twa pumbwa okuudila omunhu oo a handuka oukwao wananghali ngeenge hatu mu kwafele?

¹¹ Ngeenge omunhu a handuka oha kala a fa ashike oshipute osho tashi ehama neenghono.  Oukwao wananghali owa fa omuti oo tau loteke ouyehame. Ovanhu vamwe ovo va kala inave lipyakidila vali oule womido otashi dulika va udifwa nai kuvamwe meongalo. Molwaashi ova uda nai, otashi dulika vehe na ehalo lokwaalukila kuJehova. Vamwe otashi dulika ve udite inava ungaungiwa navo pauyuki. Ova pumbwa omunhu oo ta pwilikine kuvo nokuuda ko omaliudo avo. (Jak. 1:19) María, oo a kala ine lipyakidila oule wefimbo, okwa ti: “Onda li nda pumbwa omunhu oo ta pwilikine kwaame, ta hekeleke nge, ta pe nge omayele mawa nokukwafela nge.”

12. Omeityo lilipi ohole yaJehova ya faafanifwa nongodi?

¹² Ombiibeli oya faafanifa ohole yaJehova yokuhola ovanhu nomwiya ile nongodi. Omeityo lilipi ohole yaKalunga ya faafana nongodi? Diladila kefaneko eli: Kala nee ngeno to ningine u li mefuta la pindjala, ndele umwe te ku kupula okandjafa koku ku kaamifa. Osha yela kutya oto ke shi pandula neenghono molwaashi okandjafa oko otake ku kwafele u kale wa kaama. Ashike okandjafa oko hako take ku kaleke nomwenyo. Omeva okwa talala noito ka xupa okuninga shapo wa ya mombautu omo mu na ovanhu ovo hava xupifa ovanhu. Owa pumbwa umwe oo te ku umbile ongodi, ndele te ku shilile kombautu oyo. Jehova okwa popya shi na sha nOvaisrael ovo va li ve mu fiya po a ti: “Onde va shila momapando ovanhu nomiya dohole.” (Hos. 11:4) Nokunena, Kalunga okwa hala ovanhu ovo va efa po oku mu longela nosho yo ovo va wililwa po komaupyakadi nokoshisho va alukile kuye. Okwa hala va shiive kutya oku va hole nokwa hala oku va kwafela va alukile kuye. Jehova ota dulu oku ku longifa opo u va ulikile ohole yaye.

13. Ongahelipi oshimoniwa shaPablo tashi ulike kutya ohole yetu otai dulu okukwafela ovanhu va alukile kuJehova?

¹³ Osha fimana okushilipaleka ovo inave lipyakidila vali kutya Jehova oku va hole nosho  yo kutya nafye otu va hole. Omumwatate Pablo, oo a popiwa moshitukulwa sha dja ko, okwa kala ine lipyakidila oule womido di dulife po 30. Okwa ti: “Ongula imwe fimbo nda li handi di meumbo, onda li nda shakeneka omumwameme umwe omunamido omunalukeno nokwa li a popya naame pahole. Onda li nda hovela okulila nda fa okaana. Onda li nde mu lombwela kutya Jehova okwa fa oye e mu tuma a popye naame. Pomhito oyo opo nda li nda tokola okwaalukila kuJehova.”

14. Metwokumwe nefaneko olo tali hangwa muLukas 15:4, 5, oshike omufita ha ningi ngeenge a mono odi yaye oyo ya li ya kana?

¹⁴ Ovo inave lipyakidila vali ova pumbwa eyambidido tali twikile. Ngaashi omumati a kanene womefaneko laJesus, otashi dulika hava kala va wililwa po pamaliudo oule wefimbo. Molwaashi ova kala mounyuni waSatana, otashi dulika inava kala ve na ekwatafano naJehova ngaashi nale eshi va li ve lipyakidila. Otwa pumbwa oku va kwafela va pameke eitavelo lavo muJehova. Mefaneko laJesus li na sha nodi ya kana, okwa yelifa nghee omufita a humbata odi yaye komapepe noku i shunifa koufita. Osha pula efimbo lihapu nosho yo eenghono komufita oo opo a mone odi oyo ya li ya kana. Oku shii kutya okwa pumbwa okuhumbata odi opo e i shunife koufita molwaashi kai na eenghono i ye yo vene. — Lesha Lukas 15:4, 5.

15. Ongahelipi hatu dulu okuyambidida ovo va nghundipala nova hala okwaalukila kuJehova? (Tala oshimhungu “ Oshilongifo sha denga mbada.”)

¹⁵ Otwa pumbwa okulongifa efimbo nosho yo eenghono opo tu kwafele ovo inave lipyakidila vali va finde omaupyakadi oo tae va imbi okulongela Jehova. Ohatu dulu oku va kwafela va kale ve na ekwatafano liwa naJehova kekwafo lomhepo yaye iyapuki, Eendjovo daye nosho yo oishangomwa oyo hatu mono meongalo. (Rom. 15:1)  Ongahelipi hatu dulu okuninga ngaho? Omukulunhuongalo umwe a pyokoka okwa ti, “Vahapu ovo inave lipyakidila vali ohava kala va pumbwa ekonakonombiibeli ngeenge ova hala okwaalukila kuJehova.” * Itashi ka kala tuu oufembanghenda ngeenge owa pulwa u konakone naao ine lipyakidila vali! Omukulunhuongalo oo okwa weda ko a ti: “Omuudifi oo ta konakona nomunhu oo ine lipyakidila vali oku na okukala kaume muwa nomulineekelwa.”

16. Otu shi shii ngahelipi kutya ovaengeli ohave tu yambidida?

¹⁶ Oimoniwa ihapu otai ulike kutya ovaengeli ohava longo pamwe nafye moku tu kwafela eshi hatu kongo ovo va halelela shili okwaalukila kuJehova. (Eh. 14:6) Pashihopaenenwa, Silvio wokuEcuador okwa li a ilikana a mana mo opo a kwafelwe a alukile keongalo. Ofimbo a li ta ilikana, ovakulunhuongalo vavali ova li va denga okangendjo kopomuvelo weumbo lavo. Petalelepo olo, ova li va hafa eshi ve mu pa ekwafo olo a li a pumbwa.

17. Ohatu ka kala tu udite ngahelipi ngeenge otwa kwafele ovo inave lipyakidila vali?

¹⁷ Ohatu ka kala twa hafa neenghono ngeenge otwa kwafele ovo inave lipyakidila vali va alukile kuJehova. Salvador, oo e li omukokolindjila nokwa ninga eenghendabala a kwafele umwe oo ine lipyakidila vali, okwa ti: “Omafimbo amwe ohandi kala handi lili kehafo. Onda hafa neenghono eshi handi longo pamwe naJehova mokukwafela ovapiya vaye ovo va li va ya mounyuni waSatana va alukile keongalo.” — Oil. 20:35.

18. Oto dulu okukala noushili ulipi ngeenge ino lipyakidila vali?

¹⁸ Ngeenge owa efa po okweendafana noshiwana shaJehova, oto dulu okukala noushili kutya Jehova oku ku hole natango. Okwa hala u alukile kuye. Ashike owa pumbwa okukatuka eenghatu donhumba opo u alukile kuye. Ngaashi xe womefaneko laJesus, Jehova okwa halelela u alukile kuye note ke ku tambula ko nomutima aushe.