OSHITUKULWA SHOKUKONAKONWA 25
“Ame ohandi ka konga eedi dange”
“Ame ohandi ka konga eedi dange noku di kalela noshisho.” — HES. 34:11.
EIMBILO 105 “Kalunga Oye ohole”
EXUKU LOSHITUKULWA *
1. Jehova okwa faafanifwa ngahelipi nomwali?
“OPE NA tuu omwalikadi ta dulu okudimbwa okahanana kaye?” Jehova okwa li a pula epulo olo pefimbo lomuprofeti Jesaja. Okwa lombwela oshiwana shaye a ti: “Nande ngeno ye te ka dimbwa, Ame itandi ku dimbwa.” (Jes. 49:15) Jehova ihe lifaafanifa luhapu nomwali. Ashike pomhito opo okwa li e lifaafanifa naye. Jehova okwa longifa ohole oyo hai kala pokati kokaana naina opo a ulike nghee e hole ovapiya vaye. Ovadalakadi vahapu otava tu kumwe naasho sha popiwa komumwameme Jasmin oo a ti: “Ngeenge u na okahanana, ohamu kulike ekwatafano le likalekelwa olo hali kala po fiyo alushe.”
2. Jehova oha kala e udite ngahelipi ngeenge umwe womovana vaye e mu fiya po?
2 Jehova oha kala e shi shii ngeenge umwe womovana vaye a efa po okweendafana neongalo lopaKriste noiha kufa ombinga moilonga yokuudifa. Diladila ashike nghee ha kala e udite ngeenge ta tale ovapiya vaye omayovi ovo inave lipyakidila vali * omudo keshe.
3. Oshike osho Jehova a halela ovapiya vaye ovo ve mu fiya po?
3 Itatu ka kala tuu twa hafa ngeenge ovamwatate novamwameme ovo inave lipyakidila vali ova alukile keongalo! Jehova okwa hala va alukile keongalo, ashike nafye osho twa hala. (1 Pet. 2:25) Ongahelipi hatu dulu oku va kwafela? Ofimbo inatu nyamukula epulo olo, oshiwa tete okutala kutya oshike sha ningifa ovamwatate novamwameme ovo va efa po okuuya kokwoongala nosho yo okukufa ombinga moukalele.
OMOLWASHIKE VAMWE HAVA EFA PO OKULONGELA JEHOVA?
4. Oilonga yokulikongela omboloto oya kuma ngahelipi vamwe?
4 Vamwe ova pitifa komesho oilonga yokulikongela omboloto mokukalamwenyo kwavo. Hung, * omumwatate wokoushilolukadi laAsia, okwa ti: “Ohandi longifa efimbo lihapu nosho yo eenghono dihapu moilonga yokulikongela omboloto. Onda li handi lifufya kutya ngeenge onda kala ndi na oimaliwa ihapu ohandi ka dula okulongela Jehova. Onghee onda li handi longo eevili dihapu. Onda hovela okukala handi faula kokwoongala omafimbo nomafimbo, nohauxuuninwa onda ka efa po okweendafana neongalo. Satana okwa unganeka ounyuni waye u ehenife kanini nakanini ovanhu kokule naKalunga.”
5. Omumwameme umwe okwa li a kumwa ngahelipi komaupyakadi a shikulafana?
5 Ovamwatate novamwameme vamwe ova wililwa po komaupyakadi. Omumwameme umwe wokuBritain wedina Anne oku na ounona vatano. Anne okwa ti: “Okaana kange kamwe oka dalwa oshingudu. Lwanima, okamonakadona kange kamwe oka ka kondwa, nomonamati wange umwe okwa ka kwatwa koudu wopamadiladilo. Onda li nda polimana nonda li nda efa po okuya kokwoongala nokuudifa. Mokweendela ko kwefimbo, onda ka kala inandi lipyakidila vali.” Otu uditile oukwao wananghali Anne noukwaneumbo waye nosho yo ovamwatate novamwameme ovo va taalela eenghalo da fa daye.
6. Omolwashike tashi dulika vamwe va fiye po oshiwana shaJehova ngeenge inava tula moilonga Ovakolossi 3:13?
6 Lesha Ovakolossi 3:13. Ovapiya vaJehova vamwe ova udifwa nai kovaitaveli vakwao. Omuyapostoli Paulus okwa li a didilika kutya omafimbo nomafimbo otashi dulika ovamwatate novamwameme va ‘ningafane nai.’ Otashi dulika nokuli tu ungaungiwe nafye shihe li pauyuki. Nongeenge inatu lungama, otashi dulika tu kwate onghone. Ehandu inali pangelwa otali dulu okuningifa omunhu a fiye po oshiwana shaJehova. Natu ka taleni koshihopaenenwa shaPablo, omumwatate wokoSouth America. Okwa li a lundilwa kutya okwa nyona enyono la kwata moiti nokwa li a kanifa oinakuwanifwa meongalo. Okwa li e linyenga ngahelipi? Pablo okwa ti: “Onda li nda tetwa ko kehandu, nohauxuuninwa onda li nda fiya po eongalo.”
7. Omunhu oo e na eliudo tali mu vele ombedi ohashi mu kumu ngahelipi?
7 Omunhu oo a li a nyona enyono la kwata moiti monakudiwa otashi dulika eliudo laye li kale tali mu vele ombedi oule wefimbo, notashi dulika a kale e udite ehe holike vali kuKalunga. Nonande otashi dulika a kale e livela ombedi nokwa diminwa po, otashi dulika a kale e udite kutya ina wana vali okukala e li omupiya waKalunga. Omumwatate Francisco osho a li e udite ngaho. Okwa ti: “Onda li nda handukilwa eshi nda ya moluhaelo. Nonande pehovelo onda li handi i kokwoongala, onda hovela okukala nda polimana nonda li ndi udite kutya inandi wana okukala mokati kovapiya vaJehova. Eliudo lange ola kala tali vele nge ombedi nonda li nda tomhwa kutya Jehova ina dimina nge po. Mokweendela ko kwefimbo, onda ka efa po okweendafana neongalo.” Mbela oho kala u uditile ngahelipi ovamwatate novamwameme ovo va taalela eenghalo ngaashi odo twa dja nokukundafana? Mbela oho kala u va uditile olukeno? Mbela Jehova oku va uditile ngahelipi?
JEHOVA OKU HOLE EEDI DAYE
Omufita Omuisrael ta file oshisho neenghono okadjona kaye oko ka li ka kana (Tala okatendo 8-9) *
8. Mbela Jehova oha dimbwa ovo va li have mu longele? Shi yelifa.
8 Jehova iha dimbwa ovo va kala noku mu longela nonande ova efa po okweendafana noshiwana shaye oule wokafimbo; iha dimbwa yo oilonga yavo. (Heb. 6:10) Omuprofeti Jesaja okwa longifa efaneko tali wapalele olo tali tu kwafele tu mone nghee Jehova ha file oshisho oshiwana shaye. Jesaja okwa ti: “Ngaashi omufita ta lifa oimuna yaye, ta ongele oudjona momaoko aye ndele te va papatele ponhulo yaye.” (Jes. 40:11) Mbela Omufita Munene oha kala e udite ngahelipi ngeenge odi yaye imwe ya fiya po oufita? Jesus okwa li a ulika nghee Jehova ha kala e udite eshi a pula ovahongwa vaye a ti: “Otamu ti ngahelipi? Ngeenge omunhu oku na eedi 100, ndele imwe yomudo tai kana, mbela ita fiye odo 99 keemhunda, ndele ta i a ka konge oyo ya kana? Oshili ohandi mu lombwele, ngeenge okwe i mono, ota ka kala e i hafela neenghono shi dulife 99 odo inadi kana.” — Mat. 18:12, 13.
9. Ovafita ovo va li ko eshi Ombiibeli ya li tai shangwa ova li hava ungaunga ngahelipi needi davo? (Tala efano kombada yoshifo.)
9 Omolwashike tashi wapalele okuyelekanifa Jehova nomufita? Omolwaashi ovafita ovanahole, ovo va li ko pefimbo Ombiibeli ya li tai shangwa, ova li hava file oshisho neenghono eedi davo. Pashihopaenenwa, David okwa li a lwifa onghoshi nemwangha opo a amene oufita waye. (1 Sam. 17:34, 35) Omufita omunahole oha mono kutya odi imwe kai po. (Joh. 10:3, 14) Omufita a tya ngaho oha fiye po eedi daye 99, te di fiye koshiunda ile e di fiile omufita mukwao, opo a ka konge ei ya kana. Jesus okwa longifa efaneko olo opo e tu honge oshili ya fimana eshi a ti: “Tate womeulu ina hala pa kane nande oumwe womwaava vanini.” — Mat. 18:14.
Omufita wopefimbo lonale ta file oshisho odi yaye oyo ya li ya kana (Tala okatendo 9)
JEHOVA OHA KONGO EEDI DAYE
10. Metwokumwe naHesekiel 34:11-16, Jehova okwa udaneka oku ka ningila shike eedi daye odo da kana?
10 Jehova oku hole keshe umwe womufye, mwa kwatelwa ‘naavo vanini’ va fiya po oshiunda shaye. Jehova okwa udaneka okupitila momuprofeti Hesekiel kutya ota ka konga eedi daye odo da kana noku di kwafela di kale vali ndi na ekwatafano liwa naye. Okwa popya eenghatu dokondadalunde odo ta ka katuka opo e va xupife ngaashi ashike eenghatu odo da li hadi katukwa komufita Omuisrael ngeenge odi yaye imwe ya kana. (Lesha Hesekiel 34:11-16.) Shotete, omufita oha ka konga odi yaye, naasho ohashi pula efimbo lihapu neenghendabala. Opo nee, oha alulile koufita odi yaye oyo ya li ya kana ngeenge okwe i mono. Shikwao vali, ngeenge odi oyo oya lemana ile oya fya ondjala, omufita ohe i yambidida pahole, ha mange oipute yayo, he i humbata po nokwiipalula. Ovakulunhuongalo ove li ovafita ‘voufita waKalunga’ nova pumbwa okukatuka eenghatu da faafana opo va kwafele odi keshe oyo ya fiya po eongalo. (1 Pet. 5:2, 3) Ovakulunhuongalo ohave di kongo, have di kwafele di alukile koufita noku di ulikila ohole moku di kwafela di kale vali di na ekwatafano naJehova. *
11. Omufita omunahole oha kala e shii shike?
11 Omufita omunahole oha kala e shii kutya odi otai dulu okukana. Nongeenge odi oya fiye po oufita, omufita iha ungaunga nayo nai. Natu ka taleni koshihopaenenwa osho sha tulwa po kuKalunga eshi a li a kwafela eedi daye dimwe odo da li de mu fiya po oule wokafimbo.
12. Jehova okwa li a ungaunga ngahelipi naJona?
12 Omuprofeti Jona okwa li a faduka po oshinakuwanifwa shaye. Ashike nande ongaho, Jehova ka li e mu ekelashi. Ngaashi ashike omufita omunahole, Jehova okwa li e mu xupifa noku mu kwafela vali a kale a pama opo a dule okuwanifa po oshinakuwanifwa shaye. (Jona 2:7; 3:1, 2) Lwanima, Jehova okwa li a longifa oshimeno opo a kwafele Jona a ude ko kutya eemwenyo dovanhu odi na ondilo. (Jona 4:10, 11) Oshilihongomwa? Ovakulunhuongalo kave na okusholola diva ngeenge tava kwafele ovo inave lipyakidila vali. Ponhele yaasho, ovakulunhuongalo ove na okukendabala okuuda ko osho sha ningifa odi oyo i fiye po oshiunda. Nongeenge odi oyo oya alukile kuJehova, ovakulunhuongalo ove na okutwikila oku i ulikila ohole nokuulika kutya ove na ko nasha nayo.
13. Oshike hatu lihongo kunghee Jehova a li e linyenga komushangi wEpsalme 73?
13 Omushangi wEpsalme 73 okwa li a teka omukumo eshi a mona ovakolokoshi tava monika va fa tave shi endifa nawa. Okwa li te lipula ngeenge okulonga ehalo laKalunga ohashi etele ngoo omunhu ouwa. (Eps. 73:12, 13, 16) Jehova okwa li e linyenga ngahelipi? Ka li a tokola omulumenhu oo. Ponhele yaasho, Kalunga okwa shangifa eendjovo domupsalme oo mOmbiibeli. Mokweendela ko kwefimbo, omupsalme oo okwa li a didilika kutya kape na oshinima shimwe sha denga mbada shihe fi okukala kaume kaJehova. (Eps. 73:23, 24, 26, 28) Oshilihongomwa? Ovakulunhuongalo kave na okutokola diva ovo va limbililwa ouwa oo hau di mokulongela Jehova. Ponhele yoku va tokola, ova pumbwa okuuda ko kutya omolwashike va popila ile va katuka monghedi ya tya ngaho. Ovakulunhuongalo otava dulu okulongifa Ombiibeli opo ve va twe omukumo.
14. Omolwashike Elia a li a pumbwa ekwafo, na Jehova okwa li e mu kwafela ngahelipi?
14 Omuprofeti Elia okwa li a ya onhapo ohambakainhu Isabel. (1 Eeh. 19:1-3) Okwa li ta diladila kutya oye aeke omuprofeti ta longele Jehova nokwa li e wete kutya oilonga yaye kai na ekwafo lasha. Elia okwa li a polimana neenghono nokwa li a hala okufya. (1 Eeh. 19:4, 10) Ponhele Jehova a tokole Elia, okwa li e mu lombwela kutya haye aeke a fyaala po nonokutya ota dulu okulineekela meenghono daYe nosho yo kutya oku mu nine oilonga ihapu. Jehova okwa li a pwilikina nolukeno kwaasho Elia a li te lipula nasho nokwa li e mu pa oinakuwanifwa ipe. (1 Eeh. 19:11-16, 18) Oshilihongomwa? Atusheni, unene tuu ovakulunhuongalo, otwa pumbwa okuungaunga needi daJehova nonghenda. Kashi na nee mbudi kutya omunhu okwa handuka, ile oku udite kutya Jehova ke na efiku e mu dimine po, ovakulunhuongalo ove na okupwilikina kuye nelitulemo eshi ta mbubula omutima waye. Ovakulunhuongalo ove na okushilipaleka odi oyo ya kana kutya Jehova okwe i lenga.
OTU NA OKUKALA TU UDITILE NGAHELIPI EEDI DAKALUNGA ODO DA KANA?
15. Metwokumwe naJohannes 6:39, Jesus okwa li ha kala e uditile ngahelipi eedi daXe?
15 Jehova okwa hala tu kale tu uditile ngahelipi eedi daye odo da kana? Ohatu dulu okulihonga koshihopaenenwa shaJesus. Okwa li e shii kutya eedi adishe daJehova odi na ondilo kuYe. Onghee okwa li ha ningi ngaashi ta dulu opo a kwafele ‘eedi odo da kana domeumbo laIsrael’ ndi alukile kuJehova. (Mat. 15:24; Luk. 19:9, 10) Molwaashi Jesus okwa li omufita omunahole, okwa li ha ningi ngaashi ta dulu opo aha kanife nande odi imwe yaJehova. — Lesha Johannes 6:39.
16-17. Ovakulunhuongalo ngeenge tava kwafele ovo va fiya po oshiunda ove na okukala ve udite ngahelipi? (Tala oshimhungu “ Nghee odi oyo ya kana hai kala i udite.”)
16 Omuyapostoli Paulus okwa ladipika ovakulunhuongalo vomeongalo laEfeso va shikule oshihopaenenwa shaJesus. Okwa ti: ‘Omu na okukwafela oingone. Omu na yo okudimbuluka eendjovo dOmwene Jesus eshi a tile: “Okuyandja ohaku eta ehafo shi dulife okupewa.”’ (Oil. 20:17, 35) Osho otashi ulike kutya ovakulunhuongalo vokunena ove na oshinakuwanifwa sha kwata moiti. Omukulunhuongalo umwe wedina Salvador, wokoSpain, okwa ti: “Ngeenge handi diladila nghee Jehova ha file oshisho eedi daye odo da kana, ohashi linyengifa nge ndi di kwafele ngaashi handi dulu. Onda tomhwa kutya Jehova okwa hala ndi di file oshisho.”
17 Aveshe ovo va tumbulwa moshitukulwa eshi va li va fiya po oufita ova kwafelwa nova alukila kuJehova. Oshoshili kutya ovo va fiya po eongalo navo ova hala okuninga sha faafana. Moshitukulwa tashi shikula ko, ohatu ka kundafana moule osho tu na okuninga po opo tu va kwafele va alukile kuJehova.
EIMBILO 139 Kala wa fa u liwete mounyuni mupe
^ okat. 5 Omolwashike ovapiya vamwe vaJehova ovo va kala noku mu longela oule womido va fiya po eongalo? Kalunga oku va uditile ngahelipi? Oshitukulwa eshi otashi ka nyamukula omapulo oo. Ohatu ka kundafana yo nghee Jehova a li a kwafela ovanhu vamwe ovo va li va efa po oku mu longela oule wokafimbo, ovo va li ko pefimbo Ombiibeli ya li tai shangwa.
^ okat. 2 OUTUMBULILO WA YELIFWA: Omuudifi ine lipyakidila omunhu oo a kala ine lipyakidila noilonga yokuudifa nokuninga ovanhu ovahongwa oule weemwedi hamano ile di dulife po. Ashike nande ongaho, ovanhu ovo ove li ovamwatate novamwameme notu va hole.
^ okat. 4 Omadina oo hao ovanhu ovo lelalela.
^ okat. 10 Oshitukulwa tashi shikula ko otashi ka kundafana eenghatu dokondadalunde odo ovakulunhuongalo ve na okukatuka.
^ okat. 60 OMASHANGELO OMAFANO: Omufita Omuisrael te lipula nodi yaye oyo ya kana, te i kongo noku i kwafela i alukile koufita. Ovakulunhuongalo vokunena ohava ningi yo sha faafana.
^ okat. 64 OMASHANGELO OMAFANO:Omumwameme ine lipyakidila vali a teelela obesa i ye, nota tale Eendombwedi mbali odo tadi hafele okuudifila meenhele daaveshe.
