OSHITUKULWA SHOKUKONAKONWA 23
“Edina loye nali yapulwe”
‘Jehova, edina loye ohali kala po fiyo alushe.’ — EPS. 135:13.
EIMBILO 10 Jehova Kalunga na fimanekwe!
EXUKU LOSHITUKULWA *
1-2. Oikundafanwa ilipi ya fimanenena kEendombwedi daJehova?
OIKUNDAFANWA ya fimanenena kufye ounamapangelo waJehova nosho yo okuyukipalifwa kwedina laye. Tu li Eendombwedi daJehova otu hole okukundafana kombinga yoikundafanwa oyo. Ndele mbela ounamapangelo waKalunga nokuyukipalifwa kwedina laye oi li oikundafanwa ya yoolokafana? Ahowe.
2 Atusheni otwa mona kutya edina laKalunga ola pumbwa okuyapulwa. Otwe lihonga yo kutya ounamapangelo waJehova, ile onghedi yaye yokupangela oya denga mbada. Onghee hano, oikundafanwa oyo yopavali oya fimana.
3. Edina Jehova ola kwatela mo shike?
3 Edina Jehova ola kwatela mo oinima aishe i na sha naKalunga ketu, mwa kwatelwa onghedi yaye yokupangela. Onghee hano, ngeenge hatu ti kutya okuyapulifa edina laJehova oshinima sha fimanenena, ohatu dimine yo kutya onghedi yaye yokupangela oya denga mbada. Edina Jehova ola pambafana nonghedi yaye yokupangela e li omupangeli Omunaenghono adishe. — Tala oshimhungu “ Oikundafanwa ya fimana i na sha nomhata.”
4. Epsalme 135:13 ola popya shike shi na sha nedina laKalunga, nomapulo elipi hatu ka kundafana moshitukulwa eshi?
4 Edina Jehova ole likalekelwa. (Lesha Epsalme 135:13.) Oshike sha ningifa edina laKalunga li kale la fimana? Edina olo ola li la nyatekwa ngahelipi pehovelo? Ongahelipi Kalunga te ke li yapulifa? Nongahelipi hatu dulu okupopila edina olo? Natu ka kundafaneni omapulo oo.
EDINA LAKALUNGA OLA FIMANA
5. Vamwe otashi dulika ve lipule shike shi na sha nokuyapulifwa kwedina laKalunga?
5 “Edina loye nali yapulwe.” (Mat. 6:9) Jesus okwa popya kutya osho osho shimwe shotete shomoinima ya fimanenena oyo twa pumbwa okwiilikana kombinga yasho. Ndele mbela eendjovo odo daJesus oda hala okutya ongahelipi? Okuyapulifa oshinima shonhumba oku shi ninga shiyapuki, sha yela ile sha koshoka. Vamwe otashi dulika ve lipule kutya, ‘Edina laJehova ka liyapuki nale, la yela nola koshoka?’ Opo tu nyamukule epulo olo, otwa pumbwa okutala kutya edina ola kwatela naanaa shike.
6. Oshike hashi ningifa edina li kale la fimana?
6 Edina ola kwatela mo shihapu shihe fi ashike okushangwa pombapila ile okutumbulwa kwalo. Ombiibeli oya ti: “Edina li nondilo li dule oupuna uhapu.” (Omayel. 22:1; Omuud. 7:1) Omolwashike edina la fimana neenghono? Omolwaashi ola kwatela mo elihumbato lamwene walo, nonghee ovanhu hava diladila kombinga yaye. Onghee, onghedi omo edina hali shangwa ile hali tumbulwa hayo naanaa ya fimanenena, ndele osho sha fimanenena oshosho hashi uya momadiladilo ovanhu ngeenge taku tumbulwa mwene wedina olo.
7. Ovanhu ova nyateka ngahelipi edina laKalunga?
7 Ngeenge ovanhu tava popi oipupulu kombinga yaJehova, kungaho otava nyateke edina laye. Ngeenge ova udu oinima oyo ii ohava pe Kalunga ombedi noku mu lundila. Edina laKalunga ola nyatekwa tetetete pehovelo londjokonona yovanhu. Natu ka taleni kutya osho otashi tu hongo shike.
NGHEE EDINA LA LI LA NYATEKWA PEHOVELO
8. Adam naEva ova li ve shii shike, nomapulo elipi hatu dulu okulipula?
8 Adam naEva ova li ve shii edina laJehova nosho yo oshili i na sha naye. Pashihopaenenwa, ova li ve shii kutya Omushiti wavo okwe va pa omwenyo, onhele iwa Oparadisa nokwe va shita va wanenena. (Gen. 1:26-28; 2:18) Ndele mbela ova li ngoo va twikila mokulongifa omadiladilo avo mokudilonga kwaashishe osho Jehova e va ningila? Mbela ova li ngoo va kulika ohole yavo nosho yo olupandu lavo li na sha naJehova? Omanyamukulo omapulo oo okwa yela nawa okutala kwaasho va nyamukula eshi omutondi waKalunga a li te va yeleke.
9. Metwokumwe naGenesis 2:16, 17 nosho yo 3:1-5, Jehova okwa li a lombwela shike ovalihomboli votete, nongahelipi Satana a li a pengifa oshili?
9 Lesha Genesis 2:16, 17 nosho yo 3:1-5. Satana okwa li e lifefa eyoka, ndele ta pula Eva ta ti: “Kalunga okwa ti shili: ‘Inamu lya komiti adishe domoshikunino?’” Epulo olo ola li li na oipupulu yomonanguwi oyo ya li ya hondama ya fa oudiyo. Kalunga okwa li e va lombwela paulelalela kutya otava dulu okulya komiti adishe, kakele ashike komuti umwe womudo. Adam naEva ova li tava dulu okulya komiti dihapu domaludi a yoolokafana. (Gen. 2:9) Oshoshili kutya Jehova oKalunga omuyandji. Ndele Kalunga okwa li a lombwela Adam naEva vaha lye komuti umwe. Onghee epulo laSatana ola li la pengifa oshili. Satana okwa li e li pula la fa ngeno tali ulike kutya Kalunga omuluva. Otashi dulika Eva a li te lipula kutya, ‘Mbela Kalunga ota ngungunine nge oshinima shiwa?’
10. Ongahelipi Satana a li a nyateka edina laKalunga, nosha li sha eta oidjemo ilipi?
10 Pomhito oyo, Eva natango okwa li a tala ko Jehova e li Omupangeli waye. Eshi Satana a pula epulo olo, Eva okwa li natango a dulika kuJehova. Okwa li a weda ko ta ti kutya katu na okukuma nokuli omuti oo. Okwa li e shii elondwelo laKalunga olo kutya ngeenge ova kala inava dulika otava ka fya. Ashike Satana okwa li a nyamukula ta ti: “Nye itamu fi shili.” (Gen. 3:2-4) Satana okwa li ta ti lelalela Kalunga omunaipupulu. Okwa li a nyateka edina laKalunga sha yukilila eshi a lombwela Eva kutya Jehova omunaipupulu. Kungaho, Satana okwa li a ninga ondiaboli, ile tu tye omulundili. Eva okwa li a pukifwa filufilu e shi a itavela Satana. (1 Tim. 2:14) Okwa li a pwilikina kuSatana ponhele yokulineekela Jehova. Naasho osha li she mu ningifa a ninge etokolo lihe li pandunge. Okwa li a tokola okuhadulika kuJehova, nokulya oshiimati osho Jehova a li e mu kelela aha lye. Konima yaasho, okwa ka pa yo Adam. — Gen. 3:6.
11. Oshike ovadali vetu votete va li ve na okuninga, ndele ova dopa okuninga shike?
11 Diladila oule wokafimbo shi na sha naasho Eva a li e na okulombwela Satana. Okwa li ta dulu okutya: “Nghi ku shii, ondi shii ashike Tate Jehova, ondi mu hole nonde mu lineekela. Fye naAdam okwe tu pa keshe shimwe. Oyo oipolopolo to lombwele nge kombinga yaye! Inda, dja po pwaame!” Ngeno eendjovo doudiinini da tya ngaho ngeno inadi hafifa tuu Jehova okuuda komonakadona waye omudiinini. (Omayel. 27:11) Ashike Adam naEva kava li ve hole Jehova. Molwaashi kava li ve hole Xe, ova li va dopa okupopila edina laye komalundilo oo.
12. Satana okwa li a kuna omalimbililo elipi momadiladilo aEva, na Adam naEva ova li va dopa okuninga shike?
12 Ngaashi twe shi mona, Satana okwa li a hovela okukuna omalimbililo momadiladilo aEva. Epulo olo a pulwa kuSatana ola li le mu etela omalimbililo e na sha naJehova. Ashike Adam naEva ova li va dopa okupopila edina laJehova koipupulu yaSatana, naasho osha li she va ningifa va pwilikine kuSatana nokutukululila Xe oshibofa. Nokunena, Satana oha longifa eemwiyo da faafana. Oha nyateke edina laJehova moku mu lundila. Ovo va itavela oipupulu yaSatana ihashi kala shipu kuvo okutambula ko onghedi yaJehova yokupangela.
JEHOVA OHA YAPULIFA EDINA LAYE
13. Ongahelipi Hesekiel 36:23 a divilika etumwalaka la fimana lOmbiibeli?
13 Mbela Jehova okwa li ngoo te ke lididimikila oipupulu ya tya ngaho nopehe na okulipopila? Hasho nandenande! Ombiibeli oye tu lombwela kutya Jehova okwa ninga po sha opo a ulike kutya oinima ii oyo ya popiwa shi na sha naye moshikunino shaEden, oipupulu yoo venevene. (Gen. 3:15) Ohatu dulu okungonga pauxupi etumwalaka la fimana lOmbiibeli monghedi ei: Jehova ota yapulifa edina laye okupitila mOuhamba oo tau pangelwa kOmona waye, oo tau ka etulula ouyuki nosho yo ombili kombada yedu. Ombiibeli oi na ouyelele oo tau tu kwafele tu ude ko nghee Jehova ta ka yapulifa edina laye. — Lesha Hesekiel 36:23.
14. Jehova okwa li e linyenga ngahelipi kounashibofa womuEden opo a yapulife edina laye?
14 Satana okwa ninga eenghendabala opo a ye moshipala elalakano laJehova. Ashike okwa velela pedu. Ombiibeli oya ulika nghee Jehova a katuka, noya ulika kutya Jehova oku li Tate omunahole nomupangeli a denga mbada. Oshoshili kutya ounashibofa waSatana nosho yo wovayambididi vaye owa yahameka neenghono Jehova. (Eps. 78:40) Ndele nande ongaho, okwa ungaunga neshongo olo nounongo, nelididimiko nosho yo pauyuki. Okwa ulika yo eenghono dinene meenghedi dihapu. Komesho yaaishe, ohole yaye oi li wetikile mwaashishe osho a longa. (1 Joh. 4:8) Jehova ota twikile okulonga opo a yapulife edina laye.
Satana okwa lombwela Eva oipupulu kombinga yaJehova, nomomukokomoko womafelemido okwa kala nokulundila Kalunga (Tala okatendo 9-10, 15) *
15. Ongahelipi Satana ta nyateke edina laKalunga kunena, nosha eta oidjemo ilipi?
15 Satana ota nyateke edina laKalunga kunena. Ota kendabala okupukifa ovanhu kutya Kalunga ke fi omunaenghono, omuyuki, omunaendunge noke fi omunahole. Pashihopaenenwa, Satana ota kendabala okwiitavelifa ovanhu kutya Jehova haye Omushiti. Nongeenge ovanhu ova itavele kutya Kalunga ke ko, Satana oha kendabala oku va itavelifa kutya omifikamhango daKalunga odidjuu nokadi li pauyuki. Satana oha hongo ovanhu kutya Jehova omukwanyanya noha xwike ovanhu momundilo woheli. Ngeenge ovanhu ova itavele oipupulu ya tya ngaho inyanyalifa, ohashi va ningifa vaha tambule ko omifikamhango daye douyuki. Satana ota twikile okulundila Jehova, nota kendabala oku ku amuna ko kuJehova, fimbo ina hanaunwa po filufilu. Mbela ota ka pondola ngoo?
ONGHANDANGALA OYO TO DANA MOMHATA INENE
16. Oshike to dulu okuninga osho Adam naEva va dopa oku shi ninga?
16 Jehova okwa pitika ovanhu inava wanenena va kufe ombinga mokuyapulifwa kwedina laye. Onghee ohatu dulu okuninga osho Adam naEva va dopa okuninga. Nonande otu li mounyuni u yadi ovanhu ovo hava nyateke nohava sheke edina laKalunga, otu na omhito yokupopila edina laye nokulombwela ovanhu kutya Jehova omuyapuki, omuyuki, ha longo ouwa nomunahole. (Jes. 29:23) Oto dulu okuyambidida ounamapangelo waye nokukwafela ovanhu va shiive kutya onghedi yaJehova yokupangela oyo aike tai dulu okweetela oishitwa aishe ouyuki, ombili nehafo. — Eps. 37:9, 37; 146:5, 6, 10.
17. Ongahelipi Jesus a shiivifa edina laXe?
17 Ngeenge hatu popile edina laJehova, kungaho ohatu shikula oshihopaenenwa shaJesus Kristus. (Joh. 17:26) Jesus ina shiivifa ashike edina laXe, ndele okwa honga yo ovanhu osho Jehova e hole. Pashihopaenenwa, okwa nyaneka pomutenya oipupulu yOvafarisai, ovo va li va ninginifa ovanhu va diladile kutya Jehova omukwanyanya, ehe na ondjele, e li kokule novanhu noke na onghenda. Ashike Jesus okwa kwafela ovanhu va mone kutya Xe oha tifuka, e na elididimiko, omunahole noha dimine po. Natango okwa kwafela ovanhu va shiive Jehova mokuhopaenena omaukwatya aXe monghedi ya wanenena mokukalamwenyo kwaye. — Joh. 14:9.
18. Ongahelipi hatu dulu okunyaneka pomutenya oipupulu nomalundilo e na sha naJehova?
18 Ngaashi Jesus, ohatu dulu okuudifila ovanhu va shiive kombinga yaJehova, nova mone kutya oku li Kalunga omunahole nomunanghenda. Kungaho, ohatu ka nyaneka pomutenya oipupulu nomalundilo e na sha naJehova. Ohatu yapulifa edina laJehova noku li kaleka liyapuki momitima nomomadiladilo ovanhu. Nafye ohatu dulu yo okuhopaenena Jehova. Ohatu dulu okuninga ngaho nonande inatu wanenena. (Ef. 5:1, 2) Ngeenge eendjovo neenghatu detu otadi ulikile ovanhu nghee Jehova e li shili, kungaho ohatu va kwafele va yapule edina laye. Ohatu yukipalifa edina olo mokukwafela ovanhu va efe po omitotolombo di na sha naKalunga. * Natango ohatu ulike kutya ovanhu inava wanenena otava dulu okukala ovadiinini. — Job 27:5.
Otwa hala okukwafela ovakonakonimbiibeli vetu va shiive omaukwatya aJehova ngaashi onghenda nohole (Tala okatendo 18-19) *
19. Ongahelipi Jesaja 63:7 te tu kwafele tu mone elalakano la fimana lehongo letu?
19 Ope na vali oshinima shimwe osho twa pumbwa okuninga opo tu dule okuyapula edina laJehova. Ngeenge hatu hongo vamwe oshili yOmbiibeli, ohatu divilike ounamapangelo waKalunga kutya Jehova oye e na oufemba wokupangela eshito alishe, naasho oshoshili. Nonande osha fimana okuyandja elitulemo keemhango daKalunga, elalakano letu la fimanenena okukwafela ovanhu va kale ve hole Tate yetu Jehova, nova kale ovadiinini kuye. Onghee hano, otwa pumbwa okukala hatu divilike omaukwatya aJehova a denga mbada, hatu divilike kutya omunhu a tya ngahelipi. (Lesha Jesaja 63:7.) Eshi hatu hongo ovanhu monghedi ya tya ngaho, ohatu va kwafele va kale ve hole Jehova nokudulika kuye shaashi ova hala okukala ovadiinini kuye.
20. Oshike hatu ka kundafana moshitukulwa tashi shikula ko?
20 Ongahelipi hatu dulu okushilipaleka kutya elihumbato nosho yo onghedi yetu yokuhonga otai fimanekifa Jehova nokukwafela vamwe va ehene popepi naye? Oshitukulwa tashi shikula ko otashi ka nyamukula epulo olo.
EIMBILO 2 Jehova olo edina loye
^ okat. 5 Omhata ya fimana ilipi ya taalelwa kovanhu aveshe nosho yo kovaengeli. Oshike sha ningifa omhata oyo i kale ya fimana, notwa kwatelwa mo ngahelipi? Ngeenge otwa shiiva omanyamukulo omapulo oo nosho yo amwe oo e a pamba otashi ke tu kwafela tu pameke ekwatafano letu naJehova.
^ okat. 18 Nale oishangomwa yetu imwe oya kala hai popi kutya edina Jehova inali pumbwa okuyukipalifwa. Omolwashike mbela? Omolwaashi kape na umwe a limbililwa shi na sha nedina olo. Ashike pokwoongala kwokomudo kwomo 2017 opa li pa yelifwa eudeko la pepalekwa. Omunashipundi okwa ti: “Onghee hano, osha yuka okwiilikana ounamapangelo waJehova nedina li yukipalifwe molwaashi kungaho otashi yapulifa edina laye.” — Tala o-JW Broadcasting yaJanuali 2018 ko jw.org®. Inda opo pa shangwa ONGULUMAMBO > OUVIDIO > O-JW BROADCASTING®.
^ okat. 62 OMASHANGELO OMAFANO: Ondiaboli oya lundila Kalunga mokulombwela Eva kutya Kalunga omunaipupulu. Oule womido omafele, Satana okwa kala ta xumifa komesho oipupulu ngaashi kutya, Kalunga omukwanyanya nosho yo kutya haye a shita ovanhu.
^ okat. 64 OMASHANGELO OMAFANO: Omumwatate ta divilike oukwatya waKalunga eshi ta konakona Ombiibeli naumwe.
