Paul okwa ti: “Eshi omumwamememati a li ta lwifa nge, onda li nde mu kwata pofingo handi mu pondo. Onda li nda hala oku mu dipaa.”

Marco okwa ti: “Keumbo ohandi handuka diva nonande inandi ningwa sha. Onda li handi tataula oipundi, oudanaukifo nakeshe osho shi li komesho yange.”

Vahapu vomufye ihatu longo ominyonena ngaashi ovo va popiwa moihopaenenwa oyo yopavali. Ashike atusheni ohashi kala shidjuu okulipangela omafimbo amwe. Etomheno la fimana omolwaashi otwa fyuulula oulunde komulumenhu wotete, Adam. (Rom. 5:12) Ngaashi Paul naMarco, vamwe navo ove na oupyakadi wokupangela ehandu lavo. Vamwe otashi dulika hava mono shidjuu okupangela omadiladilo avo. Pashihopaenenwa, otashi dulika hava kala tava diladila kombinga yoinima oyo hai va tilifa ile hai va teya omukumo. Vamwe otashi dulika tava kondjifa eamo lokuya momilele, okulongifa oingangamifi ile okunwa sha pitilila oikunwa yoalkoholi.

Ovo ihava dulu okupangela omadiladilo, omahalo nosho yo eenghatu davo otava dulu okulietela omaupyakadi monghalamwenyo yavo. Ashike ohatu dulu okuhenuka oidjemo ya tya ngaho. Ngahelipi mbela? Omokukulika elipangelo. Natu ka kundafaneni omapulo atatu oo tae ke tu kwafela tu ninge ngaho: (1) Elipangelo oshike? (2) Omolwashike la fimana? (3) Ongahelipi hatu dulu okukulika oukwatya oo u li ‘oshiimati shomhepo’? (Gal. 5:22, 23) Ohatu ka kundafana yo osho hatu dulu okuninga pauhandimwe ngeenge otwe ke lihanga tuhe na elipangelo.

Omunhu oo e na elipangelo iha shikula omahalo aye mwene. Ndele ponhele yaasho, oha henuka okupopya ile okukatuka monghedi oyo tai nyemateke Kalunga.

Jesus okwa ulika kutya elipangelo ola kwatela mo shike. Ombiibeli oya ti: “Eshi a li ta tukwa, ine va shunifila omatukano. Eshi a li ta hepekwa, ka li e va ningila omatilifo, ndele okwa li e lineekela filufilu Kalunga oo ha tokola pauyuki.” (1 Pet. 2:23) Jesus okwa li a ulika elipangelo eshi a li ta shekwa kovapataneki vaye eshi a li a endjelela komuti womahepeko. (Mat. 27:39-44) Okwa li yo a ulika elipangelo monghedi ya denga mbada eshi ovawiliki vomalongelokalunga va li tava kendabala oku mu yula meendjovo. (Mat. 22:15-22) Ina tula po tuu oshihopaenenwa shiwa eshi Ovajuda vamwe va handuka va li tave mu kupula nomamanya! Ponhele yoku va shunifila owii, “Jesus okwa hondama, ndele ta di mo motembeli.” — Joh. 8:57-59.

Mbela nafye ohatu dulu okushikula oshihopaenenwa shaJesus? Heeno, ohatu dulu. Omuyapostoli Petrus okwa ti: “Kristus naye okwe mu hepekelwa nokwe mu tulila po oshihopaenenwa mu shikule filufilu eenghatu daye.” (1 Pet. 2:21) Nonande otu li ovalunde, ohatu dulu okushikula oshihopaenenwa shaJesus filufilu shi na sha nelipangelo. Omolwashike sha fimana okuninga ngaho?

Opo tu kale twa hokiwa kuJehova, otwa pumbwa okukala tu na elipangelo. Nonande otwa kala hatu longele Jehova noudiinini oule womido, ohatu dulu okukanifa ekwatafano letu naye ngeenge ihatu pangele osho hatu ningi ile hatu popi.

Diladila kuMoses oo a li “omulumenhu omulininipiki unene e dule ovanhu aveshe kombada yedu” pefimbo lonale. (Num. 12:3) Ashike okwa kala nokulididimikila okungongota kwOvaisrael, ndele efiku limwe okwa li a kanifa elipangelo. Okwa li a handuka eshi Ovaisrael va li tava ngongota kombinga yokuhe na omeva. Okwa popya navo a handuka a ti: “Udeni hano ovanandubo nye! Otu noku mu kungulukifila omeva memanya eli.” — Num. 20:2-11.

Moses okwa li a dopa okukala nelipangelo. Ka li a fimaneka Jehova, oo a li a yandja omeva oo pashikumwifilonga. (Eps. 106:32, 33) Noshidjemo, Jehova ka li e mu pitika aye mEdu lEudaneko. (Num. 20:12) Fiyo okefyo laye, Moses otashi dulika a kala nokulivela ombedi eshi a li a dopa okupangela ehandu laye. — Deut. 3:23-27.

Osho otashi tu hongo shike? Nonande otwa kala moshili oule wefimbo lile, inatu pumbwa okupopya nodino naavo have tu ningile nai ile ovo va pumbwa okupukululwa. (Ef. 4:32; Kol. 3:12) Oshoshili kutya ngeenge hatu kulu ohashi kala shidjuu okulididimika omafimbo amwe. Ndele dimbuluka oshihopaenenwa shaMoses. Inatu hala nandenande okunyona po edina letu liwa kuJehova omolwokuhe na elipangelo. Oshike tu na okuninga opo tu dule okukulika oukwatya oo wa fimana?

Ilikana u pewe omhepo iyapuki. Omolwashike mbela? Omolwaashi elipangelo oli li oshiimati shomhepo yaKalunga, na Jehova ota ka yandja omhepo yaye iyapuki kwaavo tave mu indile. (Luk. 11:13) Jehova ota dulu oku tu pa eenghono odo twa pumbwa okupitila momhepo yaye iyapuki. (Fil. 4:13) Ota dulu yo oku tu kwafela tu kulike oiimati yomhepo ngaashi ohole oyo tai dulu oku tu kwafela tu kale tu na elipangelo. — 1 Kor. 13:5.

Henuka keshe shimwe osho tashi ku imbi u kale u na elipangelo. Pashihopaenenwa, henuka oinima oyo hai kala kointaneta ile omalihafifo oo taa ulike elihumbato inali koshoka. (Ef. 5:3, 4) Shikwao vali, otwa pumbwa okuhenuka keshe shimwe osho tashi dulu oku tu yeleka tu longe osho inashi yuka. (Omayel. 22:3; 1 Kor. 6:12) Pashihopaenenwa, omunhu oo a yelekwa diva okuninga oinima inai koshoka, otashi dulika a tokole  filufilu aha leshe omambo, ile aha tale eemuvi da nyika oihole.

Otashi dulika tu mone shidjuu okutula moilonga omayele oo. Ndele ngeenge otwa ningi eenghendabala da mana mo, Jehova ote ke tu pa eenghono odo twa pumbwa opo tu kale tu na elipangelo. (2 Pet. 1:5-8) Ote ke tu kwafela tu dule okupangela omadiladilo etu, eendjovo neenghatu detu. Paul naMarco ovo va popiwa pehovelo, ova li ve lihonga okupangela ehandu lavo. Natu ka taleni koshihopaenenwa shimwe shomumwatate oo a li ha nyengwa lwoikando okupangela ehandu laye, nomafimbo amwe okwa li ha tanguna novashingi vakwao veehauto. Oshike mbela a li a ninga po? Okwa ti: “Ohandi ilikana nda mana mo efiku keshe. Ohandi konakona oitukulwa i na sha nelipangelo, nohandi koneke yo Omishangwa dimwe di na sha nelipangelo. Nonande onda longa oilonga oyo oule womido, ongula keshe ohandi ilikana opo ndi kale nda ngungumana. Ohandi i diva ngeenge ndi na edjepo lonhumba opo ndiha shingilile.”

Omafimbo amwe, otashi dulika shi kale shidjuu okukala tu na elipangelo. Ngeenge osho osha ningwa, otashi dulika tu kale twa fya ohoni okupopya naJehova meilikano. Ashike pomhito oyo, opo twa pumbwa okwiilikana twa mana mo. Onghee ilikana diva kuJehova ngaashi tashi dulika. Ilikana e ku dimine po, e ku kwafele nokukala wa tokola toko uha endulule epuko la faafana. (Eps. 51:9-11) Ino diladila kutya Jehova ita ka pwilikina keilikano loye. (Eps. 102:17) Omuyapostoli Johannes okwa popya kutya ohonde yOmona waKalunga “otai ke tu koshola omanyono etu aeshe.” (1 Joh. 1:7; 2:1; Eps. 86:5) Dimbuluka kutya Jehova okwa lombwela ovapiya vaye va kale hava diminafana po lwoikando. Onghee hano, ohatu dulu okukala nelineekelo kutya ote ke tu ningila sha faafana. — Mat. 18:21, 22; Kol. 3:13.  

Jehova okwa li a nyemata eshi Moses a li a kanifa elipangelo mombuwa. Ashike nande ongaho, Jehova okwa li e mu dimina po. Eendjovo daKalunga onda popya kutya Moses okwa li omulumenhu e na eitavelo. (Deut. 34:10; Heb. 11:24-28) Jehova ka li a efa Moses a ye mEdu lEudaneko, ashike ote ke mu efa a ka kale nomwenyo waalushe mOparadisa kombada yedu. Nafye ohatu dulu oku ka hafela omwenyo waalushe kombada yedu ngeenge otwa twikile okuulika elipangelo. — 1 Kor. 9:25.