1. Oshike Jehova a ningila keshe umwe womufye?

JEHOVA okwa nanena keshe umwe womufye kuye. (Joh. 6:44) Natu diladile moule kutya osho osha hala okutya shike. Eshi Jehova a konakona noukeka ovanhu omabiliyona ovo ve li mounyuni, okwa mona oshinima shi na ondilo mwoove, kutya oto dulu okukala u mu hole nomutima aushe. (1 Omaf. 28:9) Jehova oku ku shii nawa, e udite ko eenghalo odo to piti mudo noku ku hole. Osho itashi hekeleke tuu!

2. Efaneko lilipi Jesus a longifa, opo e tu kwafele tu mone nghee Jehova a lenga odi yaYe keshe?

² Jehova oku na ko nasha filufilu naave. Oku na ko nasha yo nOvakriste aveshe. Opo Jesus e tu kwafele tu ude ko nawa oshitwa osho, okwa yelekanifa Jehova nomufita weedi. Mbela omufita oha ningi po shike, ngeenge odi yaye imwe yomeedi 100 oya kana? Oha “fiye odo 99 keemhunda, ndele ta i a ka konge oyo ya kana.” Omufita iha kala a handukila odi oyo, ngeenge okwe i mono. Ponhele yaasho, oha kala a hafa. Oshilihongomwa oshilipi? Odi keshe yaJehova oya fimana kuye. Jesus okwa ti: “Tate womeulu ina hala pa kane nande oumwe womwaava vanini.” — Mat. 18:12-14.

3. Oshike hatu ka kundafana moshitukulwa eshi?

³ Inatu hala nande ofye tu kale odjo yetekomukumo, hatu shololifa ovamwatate novamwameme. Ongahelipi hatu dulu okuhenuka okupundukifa vakwetu? Noshike tu na okuninga po, ngeenge otwa udifwa nai kuumwe? Ohatu ka mona omanyamukulo  omapulo oo moshitukulwa eshi. Ashike tete, natu ka tale kutya oolyelye ‘vomwaava vanini,’ ovo va tumbulwa muMateus etukulwa 18.

4. Oolyelye ‘vomwaava vanini’?

⁴ Ovahongwa aveshe vaJesus, vomido adishe, ove li ‘vomwaava vanini.’ Kashi na nee mbudi kutya ove na omido ngapi, ove li “ounona” meityo olo kutya ova halelela okuhongwa kuJesus. (Mat. 18:3) Nonande otashi dulika va dja momaputuko e lili noku lili, momihoko, ve na omaukwatya nomataleko a yoolokafana, aveshe ove na eitavelo muKristus. Osho osho sha ningifa Kristus a kale e va hole neenghono. — Mat. 18:6; Joh. 1:12.

5. Jehova oha kala e udite ngahelipi, ngeenge umwe okwa pundukifa umwe womovapiya vaye, ile e mu udifa nai?

⁵ Aveshe ‘vomwaava vanini’ ove na ondilo momesho aJehova. Opo tu mone kutya oha kala e udite ngahelipi, natu taleni nghee hatu kala tu uditile ounona. Ounona ove na ondilo kufye. Ohatu va amene, molwaashi kave na eenghono, ounongo nowino ngaashi ovakulunhu. Ngaashi ashike tuhe hole okutala umwe ta hepekwa, ohashi tu udifa nai neenghono nohatu kala twa handuka, ngeenge umwe ta hepeke okaana. Sha faafana, Jehova okwa hala oku tu amena. Oha udu nai noha handuka, ngeenge umwe ta pundukifa umwe womovapiya vaye, ile te mu udifa nai. — Jes. 63:9; Mark. 9:42.

6. Metwokumwe no 1 Ovakorinto 1:26-29, ounyuni owa tala ko ngahelipi ovahongwa vaJesus?

⁶ Omonghedi imwe vali ilipi ovahongwa vaJesus ve li ‘vomwaava vanini’? Oolyelye va talika ko kounyuni va fimana? Ovanhu ovo va punapala, ovanamadina nosho yo ovanaenghono. Mepingafano naasho, ovahongwa vaJesus ova talika ko inava fimana nove li ‘vomwaavo vanini,’ ovo va talika ko vehe na oshilonga. (Lesha 1 Ovakorinto 1:26-29.) Ashike Jehova hasho e va tala ko ngaho.

7. Jehova okwa hala tu kale tu uditile ngahelipi ovamwatate novamwameme?

⁷ Jehova oku hole ovapiya vaye aveshe, kashi na nee mbudi kutya ova kala tave mu longele omido dihapu, ile opo ve uya moshili. Ovamwatate novamwameme aveshe ova fimana kuJehova. Onghee hano, ove na yo okukala va fimana kufye. Otwa hala okukala tu ‘hole ovamwatate aveshe,’ ndele katu na okukala tu hole po vamwe. (1 Pet. 2:17) Otwa hala okuninga ngaashi hatu dulu, opo tu va amene noku va fila oshisho. Ngeenge otwa didilike kutya otwa ehameka umwe, ile twe mu udifa nai, inatu shi lipwililikila, hatu diladila kutya oha udu nai diva nokwa pumbwa okudimbwa osho sha ningwa po. Ndele mbela omolwashike vamwe hava udu nai diva? Ovamwatate novamwameme vamwe otashi dulika va kale ve litala ko inava fimana omolwonakudiwa yavo. Vamwe opo ve uya moshili. Kave shii nghee ve na okuungaunga nokuhawanenena kwovanhu vakwao. Otwa pumbwa okuninga ngaashi hatu dulu, opo tu kaleke po ombili, kashi na nee mbudi kutya oshike sha holoka po. Shikwao vali, omunhu oo luhapu ha udifwa nai kuvakwao, okwa pumbwa okukaleka momadiladilo kutya ke na okukala ha udu nai kokanima keshe. Osho otashi ke mu kwafela a kale e na ombili yopamadiladilo nekwatafano liwa nOvakriste vakwao.

8. Ovanhu vopefimbo laJesus ova li ve na oikala ilipi, oyo ya nwefa mo ovahongwa vaye?

⁸ Oshike sha ningifa Jesus a popye kombinga ‘yomwaava vanini’? Ovahongwa vaye ova li ve mu pula tava ti: “Olyelye hano munenenene mOuhamba womeulu?” (Mat. 18:1) Ovajuda vahapu vopefimbo opo ova li va tala ko eendodo di li oshinima sha fimanenena. Omuhongwanhu umwe okwa ti: “Okukala wa fimanekwa kuvamwe nokukala u shiivike keshe pamwe osho oshinima sha li sha fimanenena monghalamwenyo yavo.”

9. Ovahongwa vaJesus ova li ve na okuninga po shike?

 ⁹ Jesus okwa li e shii kutya ovahongwa vaye ova li ve na okulonga noudiinini, opo va efe po oukwatya wefiyafanepo, oo wa li wa lengwa meputuko lOvajuda. Okwe va lombwela ta ti: “Ou munene mokati keni na kale ngaashi ou munininini, nomuwiliki weni na kale ngaashi omuyakuli.” (Luk. 22:26) Ohatu litale ko tu ‘vanininini,’ ngeenge ohatu ‘tale ko vakwetu ve tu dule.’ (Fil. 2:3) Ngeenge otwa kala tu na etaleko la tya ngaho, ohatu ka henuka okupundukifa vakwetu.

10. Omayele aPaulus elipi twa pumbwa okutula moilonga?

¹⁰ Ovamwatate novamwameme aveshe ove tu dule monghedi yonhumba, ile yongadi. Oshipu oku shi mona, ngeenge ohatu yandje elitulemo komaukwatya avo mawa. Otu na okutula moilonga omayele omuyapostoli Paulus, oo a li a pa Ovakorinto, taa ti: “Oshike u na she ku ningifa u diladile kutya ou dule vamwe? Ile, oshike u na ino shi pewa? Ngeenge owe shi pewa, omolwashike to litange wa fa ino shi pewa?” (1 Kor. 4:7) Otwa pumbwa okulungama tuha kale hatu yandje elitulemo lihapu kufye vene, ile tu diladile kutya otu dule vamwe. Ngeenge omumwatate oha yandje oipopiwa iwa, ile omumwameme oku na owino wokuhovela omakonakonombiibeli, oku na okuyandja olupandu kuJehova.

11. Oshike hatu lihongo mefaneko laJesus li na sha nohamba nosho yo omupiya wayo?

¹¹ Diva ashike eshi Jesus a londwela ovashikuli vaye vaha pundukife vakwao, okwa popya efaneko li na sha nohamba nomupiya wayo. Ohamba oya li ya kufila po omupiya wayo oikolo ihapu, oyo a li e na okufuta. Lwanima, omupiya oye tuu oo, ka li a hala okukufila po omupiya mukwao, oo a li e na oikolo yaye inini. Konima yaasho, ohamba oya ka tulifa modolongo omupiya omukwanyanya, oo ehe na onghenda. Oshilihongomwa? Jesus okwa ti: “Tate womeulu naye ota ka ungaunga nanye monghedi ya faafana ngeenge keshe umwe womunye ita dimine po omumwaxe tashi di komutima.” — Mat. 18:21-35.

12. Ongahelipi hatu ka ehameka vamwe, ngeenge inatu hala oku va dimina po?

¹² Omupiya oo haye ashike a li a ehamekwa keenghatu daye, ndele oda ehameka yo vamwe. Shotete, okwa li a ehameka omupiya mukwao, eshi e “mu tulifa modolongo fiyo osheshi a futa oikolo yaye.” Oshitivali, okwa li a ehameka ovapiya vakwao, ovo va didilika osho a ninga. Eshi “ovapiya vakwao va mona osho sha ningwa po, ova uda nai neenghono.” Sha faafana, eenghatu detu ohadi ehameke vamwe. Mbela oshike tashi ka ningwa po, ngeenge umwe okwe tu udifa nai, ndele inatu hala oku mu dimina po? Shotete, otwe mu ehameka eshi inatu hala oku mu dimina po, twe mu lidimbika noinatu hala oku mu ulikila ohole. Oshitivali, ohatu ka ningifa vamwe meongalo vaha kale va manguluka, ngeenge ova didilike kutya katu na ombili nomunhu oo.

13. Oshike hatu lihongo moshimoniwa shomukokolindjila umwe?

¹³ Ohatu mono ouwa nosho yo vakwetu, ngeenge otwa dimine po ovamwatate novamwameme. Omukokolindjila umwe wedina Crystal, oku na oshimoniwa sha fela oko. Okwa li a udifwa nai komumwameme umwe meongalo. Crystal okwa ti: “Elaka laye la honga ola li hali ehameke nge, nda fa ashike nda tuwa nombele. Kanda li ndi hole okweenda mohauto imwe naye ngeenge hatu i moukalele. Onda li nda hovela okukanifa ouladi nosho yo ehafo.” Crystal okwa li ta diladila kutya oku na etomheno la femba lokukala a handuka. Ashike osho kasha li she mu ningifa e mu kwatele onghone, ile aha yavelele omaliudo aye. Okwa tula moilonga omayele opaMishangwa, oo taa hangwa moshitukulwa “Dimina po tashi di komutima woye,” shi li mOshungonangelo ye 1 Novemba 1999. Crystal  oshe mu kwafela a dimine po omumwameme oo. Okwa ti: “Ondi shii kutya atushe ohatu kondjifa okudjala omunhu mupe. Jehova ohe tu dimine po nehalo liwa efiku keshe. Ondi udite kutya onda kufwa omutengi, oo nda li nda humbata. Paife onda hafa ngaashi nale.”

14. Metwokumwe naMateus 18:21, 22, oupyakadi ulipi tashi dulika omuyapostoli Petrus a li e na, noshike hatu lihongo kenyamukulo laJesus?

¹⁴ Otu shii kutya otwa pumbwa okudimina po vakwetu nosha yuka okuninga ngaho. Ashike otashi dulu okukala eshongo okuninga ngaho. Omuyapostoli Petrus otashi dulika naye a li ha kala e udite ngaho. (Lesha Mateus 18:21, 22.) Ndele mbela oshike tashi dulu oku tu kwafela? Tete, dilonga kutya olungapi Jehova he ku dimine po. (Mat. 18:32, 33) Oushili oyoo kutya inatu wana okudiminwa po kuJehova, ashike ohe tu dimine po nehalo liwa. (Eps. 103:8-10) Sha faafana, “nafye otu na okukala tu holafane.” Okudimina po kashi fi ehoololo. Otu na oshinakuwanifwa shokudimina po ovamwatate novamwameme. (1 Joh. 4:11) Oshitivali, dilonga kutya ouwa ulipi hau etifwa kokudimina po vakwetu. Otashi dulika tu kwafele omunhu oo e tu udifa nai a kale a manguluka okweendafana noilyo yeongalo, tu amene oukaume wetu naJehova notuha kale twa humbata omutengi. (2 Kor. 2:7; Kol. 3:14) Xuuninwa, kala ho ilikana kuKalunga, oo e tu lombwela tu kala hatu dimine po vakwetu. Ino efa Satana a nyone po ombili oyo tamu hafele novamwaxo. (Ef. 4:26, 27) Otwa pumbwa ekwafo laJehova, opo tu dule okuhenuka omwiyo oo waSatana.

15. Metwokumwe nOvakolossi 3:13, oshike twa pumbwa okuninga, ngeenge otwa udifwa nai komumwatate, ile komumwameme?

¹⁵ Ongahelipi ngeenge omumwaxo okwa ninga oshinima osho she ku udifa nai neenghono? Oshike wa pumbwa okuninga? Ninga ngaashi to dulu, opo u kaleke po ombili. Lombwela Jehova nghee u udite meilikano. Mu pula a nangeke noupuna omunhu oo e ku udifa nai noku ku  kwafele u mone omaukwatya mawa momunhu oo. Osho otashi ke ku kwafela u kale ho mu tale ko ngaashi Jehova. (Luk. 6:28) Ngeenge ito dulu okudimbwa osho sha ningwa komumwaxo, diladila komesho yefimbo nghee to ka popya naye. Kala alushe u shii kutya omumwaxo ke na efiku e ku ehameke, te shi ningile owina. (Mat. 5:23, 24; 1 Kor. 13:7) Eshi to popi naye, mu kwafela a mone kutya ine shi ninga nelalakano loku ku udifa nai. Ongahelipi ngeenge ina hala okupanga ombili? Ombiibeli oya ti: “Twikileni okulididimikilafana.” Kala noku mu lididimikila. (Lesha Ovakolossi 3:13.) Naasho sha fimanenena, ino mu kwatela onghone, molwaashi osho otashi ka kuma ekwatafano loye naJehova. Ino efa nande oshinima shimwe shi ku pundukife. Ngeenge owa ningi ngaho, oto ka ulika kutya ou hole Jehova shi dulife keshe shimwe. — Eps. 119:165.

16. Keshe umwe womufye oku na oshinakuwanifwa shilipi?

¹⁶ Otwa lenga oufembanghenda wokulongela Jehova twa hangana, tu li “moshiunda shimwe” nohatu lifwa ‘komufita umwe.’ (Joh. 10:16) Embo Nghee twa unganekwa tu longe ehalo laJehova, pepandja 165, ola ti: “Opo u mone ouwa moukumwe oo, ou na oshinakuwanifwa shoku u kaleka po.” Onghee hano, otwa pumbwa ‘okulideula tu kale hatu tale ko ovamwatate novamwameme ngaashi Jehova he va tale ko.’ Jehova okwe tu lenga atushe, tu li ‘vomwaava vanini.’ Mbela naave osho wa tala ko ngaho ovamwaxo? Jehova oku wete nokwa lenga keshe osho to ningi, opo u va kwafele nou va file oshisho. — Mat. 10:42.

17. Otwa tokola toko okuninga shike?

¹⁷ Otu hole ovaitaveli vakwetu. Onghee hano, otwa “tokola tuha pundukife omumwatate, ile tu tule emanya lepundukifo mondjila yaye.” (Rom. 14:13) Otwa tala ko ovamwatate novamwameme ve tu dule notwa hala oku va dimina po tashi di komutima. Inatu efa vamwe ve tu pundukife. Ponhele yaasho, “natu lalakanene oinima oyo tai eta ombili notai tungu vakwetu.” — Rom. 14:19.