1. Oshike tu na okuninga, opo tu ka xupe mefiku laJehova?

 NGEENGE Ombiibeli tai popi “efiku laJehova” otai ulike kefimbo olo, eshi Jehova ta ka tokola ovatondi vaye nokuxupifa oshiwana shaye. Mefimbo lonale, Jehova okwa li a tokola oiwana imwe. (Jes. 13:1, 6; Hes. 13:5; Sef. 1:8) Pefimbo letu, “efiku laJehova” otali ka hovela nokuponokelwa kwaBabilon Shinene notali ka xula poita yaArmagedon. Opo tu xupe ‘mefiku’ olo, otwa pumbwa okulilongekida paife. Jesus okwa honga kutya inatu pumbwa ashike okulilongekidila “oudjuu munene,” ndele otu na yo ‘okukala twe u lilongekidila.’ — Mat. 24:21; Luk. 12:40.

2. Omolwashike hatu dulu okumona ouwa mOvatessalonika votete?

² Omuyapostoli Paulus monhumwafo yaye yotete ya nwefwa mo, oyo a shangela Ovatessalonika, okwa longifa mo omafaneko mahapu a kwafele Ovakriste va kale ve lilongekidila efiku linene laJehova letokolo. Paulus okwa li e shii kutya efiku laJehova itali uya pefimbo opo. (2 Tes. 2:1-3) Ndele nande ongaho, okwa li a ladipika ovamwaxe ve lilongekidile efiku olo onga tali uya mongula. Nafye ohatu dulu okutula moilonga omayele aye. Natu ka kundafaneni nghee a yelifa shi na sha noinima ei tai shikula: (1) nghee efiku laJehova tali ke uya, (2) ovo itava ka xupa mefiku olo nosho yo (3) nghee hatu dulu okulilongekida, opo tu ka xupe.

3. Ongahelipi efiku laJehova tali ke uya ngaashi ombudi hai uya oufiku? (Tala yo efano.)

³ “Ngaashi ombudi hai uya oufiku.” (1 Tes. 5:2) Oo ou li omupopyofano wotete womomipopyofano nhatu odo da longifwa tadi yelifa nghee efiku laJehova tali ke uya. Eembudi luhapu  ohadi uya mepakumo leisho nosho yo oufiku, efimbo olo ovanhu inave shi teelela. Efiku laJehova nalo otali ke uya ombadilila, tali ka kumwifa ovanhu vahapu. Nokuli nOvakriste vashili otashi dulika va ka kumwe kunghee oiningwanima tai ka ningwa mepakumo leisho. Ndele mepingafano novakolokoshi, fye itatu ka hanaunwa po.

4. Omonghedi ilipi efiku laJehova la fa ouyahame woshifeta shokudala?

⁴ “Ngaashi omufimba ta hangwa kouyahame woshifeta shokudala.” (1 Tes. 5:3) Omukainhu oo e li meteelelo iha kala e shii efimbo lokondadalunde olo oshifeta tashi ke uya. Ashike iha kala a limbililwa, oha kala e shii kutya oshi na okuuya. Ngeenge osha ningwa, oshifeta otashi dulu okuuya ombadilila, tashi yahama noitashi dulu okukelelwa. Sha faafana, nafye katu shii efiku novili oyo efiku laJehova tali ka hovela. Ashike otwa tomhwa kutya otali ke uya nosho yo kutya etokolo laKalunga lokutokola ovakolokoshi otali ke uya ombadilila noitava ka dula okuya onhapo.

5. Omonghedi ilipi oudjuu munene wa fa ouyelele wetango?

⁵ Ngaashi ouyelele wetango tali piti. Mefaneko laye etitatu, Paulus okwa tumbula mo natango eembudi odo hadi vake oufiku. Ashike pomhito opo, Paulus okwa lundulula omadiladilo aye nokwa fa a li ta yelekanifa efiku laJehova nouyelele wetango. (1 Tes. 5:4) Eembudi, odo hadi uya oufiku, ohadi kala de lipyakidila neenghono noihadi nongele efiku eshi tali piti po. Ouyelele wefiku otau dulu oku di hanga, ndele tadi monika. Sha faafana, oudjuu munene otau ka nyaneka pomutenya ovo va fa eembudi, ovo hava kala momilaulu notava twikile okulonga oilonga oyo tai nyemateke Kalunga. Mepingafano navo, fye ohatu dulu okulilongekida mokuhenuka elihumbato olo tali nyemateke Jehova nokulalakanena okulonga “ouwa, ouyuki nokukala metwokumwe noshili.” (Ef. 5:8-12)  Lwanima, Paulus okwa ka longifa omafaneko avali a pambafana, opo a yelife kombinga yaavo itava ka xupa.

6. Omeityo lilipi ovanhu vahapu va kofa? (1 Ovatessalonika 5:6, 7)

⁶ “Ovo hava kofa.” (Lesha 1 Ovatessalonika 5:6, 7.) Paulus okwa yelekanifa ovo itava ka xupa mefiku laJehova novanhu ovo va kofa. Ihava kala ve shii osho tashi ningwa momidingonoko davo, ile nghee efimbo tali piti po. Onghee ihava didilike oiningwanima ya fimana, ile ve linyenge kuyo. Ovanhu vahapu kunena ova kofa meityo lopafaneko. (Rom. 11:8) Kave na ko nasha noumbangi, oo tau ulike kutya otu li “momafiku axuuninwa” nosho yo kutya oudjuu munene otau uya mafiku. Ngeenge mounyuni tamu ningwa oiningwanima inene, ovanhu vamwe ohava kala ve na ohokwe metumwalaka letu lOuhamba. Ashike vahapu ohava shuna meemhofi, ponhele yokukala oupafi. Nokuli navamwe ovo va itavela mefiku letokolo ohava diladila kutya oli li kokule. (2 Pet. 3:3, 4) Ndele fye otwa didilika kutya omayele oo a nwefwa mo e na sha nokukala oupafi, okwa fimana kufye efiku keshe.

7. Ongahelipi ovo va taalela ehandu laKalunga va faafanifwa neengholwe?

⁷ ‘Ovo hava kolwa.’ Omuyapostoli okwa faafanifa ovo tava ka hangwa kehandu laKalunga, neengholwe. Eengholwe ihadi linyenge meendelelo kwaasho tashi ningwa momidingonoko dado nohadi ningi omatokolo ehe li pandunge. Sha faafana, ovakolokoshi ihave linyenge komalombwelo aKalunga. Ova hoolola onghedi yokukalamwenyo oyo tai va twala mehanauno. Ashike Ovakriste ova lombwelwa va kale hava diladila pandunge nokukala oupafi. (1 Tes. 5:6) Omuhongwanhu umwe wOmbiibeli okwa popya shi na sha nomunhu oo ha diladila pandunge kutya “oha kala a ngungumana noiha mbadapala. Oha diladila pandunge, opo a ninge omatokolo a yuka.” Omolwashike tu na okukala twa ngungumana noihatu tengauka? Opo tuha kufe ombinga meepolotika dokunena nosho yo momalipumomumwe oiwana. Efininiko lokukufa ombinga moinima oyo otali ka hapupala, eshi efiku laJehova tali ehene popepi elela. Ashike inatu pumbwa okukala tu na oshisho shi na sha nanghee hatu ke linyenga. Omhepo yaKalunga otai ke tu kwafela tu kale twa ngungumana noitatu tengauka, opo tu ninge omatokolo e li pandunge. — Luk. 12:11, 12.

8. Ongahelipi 1 Ovatessalonika 5:8 tava ulike omaukwatya oo tae tu kwafele tu kale oupafi notu li ovanaendunge? (Tala yo efano.)

⁸ ‘Djala oshipapa shoshivela ponhulo nosho yo embale.’ Paulus okwe tu yelekanifa novakwaita ovo hava kala oupafi nove lilongekidila olwoodi. (Lesha 1 Ovatessalonika 5:8.) Ovanhu ova teelela omukwaita a kale e lilongekida okulwa efimbo keshe, ngeenge pe na oita. Osho osha faafana shi na sha nafye. Ohatu kala twe lilongekidila efiku laJehova mokukala twa djala oshipapa shoponhulo sheitavelo, ohole nosho yo eteelelo li li ngaashi embale. Omaukwatya oo otaa dulu oku tu kwafela neenghono.

9. Ongahelipi eitavelo letu hali tu amene?

⁹ Oshipapa shoponhulo osha li hashi amene omutima womukwaita. Eitavelo nosho yo ohole ohai amene omutima wetu wopafaneko. Otai ke tu kwafela tu twikile okulongela Jehova nokushikula Jesus. Eitavelo otali tu shilipaleke kutya Jehova ote ke tu pa ondjabi, eshi hatu mu kongo nomutima wetu aushe. (Heb. 11:6) Otali ke tu linyengifa yo tu kale ovadiinini kOmuwiliki wetu, Jesus, nokuli nonande ohatu lididimikile eenghalo didjuu. Ohatu dulu okupameka eitavelo letu tu taalele omashongo  monghalamwenyo mokulihonga koihopaenenwa yokunena yavamwe ovo va kanyatela oudiinini wavo, nonande otava hepekwa, ile tava kondjo nouxupilo. Ohatu ka henuka yo omwiyo wokuhola oinima yopamaliko mokuhopaenena ovo va kaleka onghalamwenyo yavo paunafangwa, opo va pitife komesho oinima yOuhamba. b

10. Ongahelipi ohole yokuhola Kalunga nosho yo ovanhu vakwetu tai tu kwafele tu lididimike?

¹⁰ Osha fimana yo okukala tu na ohole, opo tu kale tu li oupafi novanaendunge. (Mat. 22:37-39) Ohole yokuhola Kalunga otai tu kwafele tu lididimike moilonga yokuudifa, kashi na nee mbudi kutya ohatu shakeneke omaupyakadi elipi. (2 Tim. 1:7, 8) Molwaashi otu hole yo ovo ihava longele Jehova, ohatu twikile okuudifa nokulonga nawa oitukulwa yetu, hatu yandje nokuli oundombwedi okupitila mongodi nosho yo mokushanga eenhumwafo. Otu na elineekelo kutya ovanhu otava ka ninga omalunduluko nokuhovela okulonga osho sha yuka. — Hes. 18:27, 28.

11. Ongahelipi ohole yokuhola ovaitaveli vakwetu tai tu kwafele? (1 Ovatessalonika 5:11)

¹¹ Ohole yetu yokuhola ovanhu oya kwatela mo yo Ovakriste vakwetu. Ohatu ulike ohole ya tya ngaho ‘mokutwaafana omukumo nokutungafana.’ (Lesha 1 Ovatessalonika 5:11.) Ngaashi ovakwaita ovo hava yambididafana molwoodi, nafye ohatu twaafana omukumo. Oshoshili kutya omukwaita otashi dulika a ehameke omukwaita mukwao molwoodi la kwata moiti, ashike ite ke shi ningila owina. Sha faafana, katu na okweehameka ovamwatate novamwameme owina, ile oku va shunifila owii. (1 Tes. 5:13, 15) Ohatu ulike yo ohole mokukala twa fimaneka ovamwatate ovo tava kwatele komesho meongalo. (1 Tes. 5:12) Eshi Paulus a shanga onhumwafo ei, eongalo lokuTessalonika kala li la wanifa odula. Ovalumenhu ovo va li va nangekwa po, otashi dulika kava li ve na owino notashi dulika va li hava ningi omapuko. Ashike ova li va wana okufimanekwa. Eshi oudjuu munene tau ehene popepi, otwa pumbwa  okukala twe lineekela ovakulunhuongalo vomomaongalo etu shi dulife nale, opo ve tu pe ewiliko. Otashi dulika itatu ka mona ewiliko okudja keembelewa detu da kula nosho yo koshitaimbelewa; onghee osha fimana okulihonga okukala tu hole notwa fimaneka ovakulunhuongalo vetu paife. Kashi na nee mbudi kutya oshike tashi ka ningwa po, natu twikileni okukala ovanaendunge. Katu na okuyandja elitulemo kokuhawanenena kwavo, ndele natu yandjeni elitulemo koushili oo kutya Jehova oye ta wilike ovalumenhu ovo ovadiinini okupitila muKristus.

12. Eteelelo letu ohali amene ngahelipi omadiladilo etu?

¹² Ngaashi ashike embale hali amene omutwe womukwaita, eteelelo letu lexupifo ohali amene omadiladilo etu. Eteelelo la twa ohali tu kwafele tu mone kutya osho hashi yandjwa kounyuni ou oshongaho elela. (Fil. 3:8) Eteelelo letu ohali tu kwafele tu kale twa ngungumana notuha tengauke. Osho osho sha li sha ningilwa Wallace naLaurinda, ovo hava longele muAfrica. Aveshe ova li va filwa keshe umwe omudali momukokomoko woivike itatu. Omolwomukifi wekomba o-COVID-19, kava li va dula okuya keumbo va ka kale pamwe nomaukwaneumbo avo. Wallace okwa ti: “Eteelelo lenyumuko ola kwafela nge ndi va diladile, hamonghedi omo va li momafiku avo axuuninwa ounyuni ou, ndele omonghedi omo tava ka kala mefiku lavo lotete mounyuni mupe. Eteelelo olo ohali ngungumaneke nge, ngeenge nda wililwa po koluhodi, ile komaliudo okukala nda filwa.”

13. Oshike tu na okuninga, opo tu pewe omhepo iyapuki?

¹³ “Inamu dima omundilo womhepo.” (1 Tes. 5:19, esh.) Paulus okwa yelekanifa omhepo iyapuki nomundilo u li mufye. Ngeenge tu na omhepo yaKalunga, ohatu kala tu na ouladi wa xwama, ondjungu yokulonga osho sha yuka nosho yo eenghono dokulongela Jehova. (Rom. 12:11) Oshike hatu dulu okuninga, opo tu pewe omhepo iyapuki? Ohatu dulu okwiilikana tu i pewa, okukonakona Eendjovo daKalunga da nwefwa mo nokweendafana nehangano laye olo tali wilikwa komhepo yaye. Okuninga ngaho, otaku ke tu kwafela tu kulike “oiimati yomhepo.” — Gal. 5:22, 23.

14. Oshike tu na okuhenuka, ngeenge otwa hala okutwikila okupewa omhepo yaKalunga? (Tala yo efano.)

 ¹⁴ Ngeenge Kalunga okwe tu pe omhepo yaye iyapuki, otwa pumbwa okulungama, opo tuha ‘dime omundilo womhepo.’ Kalunga oha yandje ashike omhepo yaye kwaavo va koshoka pamadiladilo nove na elihumbato la koshoka. Ita ka twikila oku tu pa omhepo yaye, ngeenge otwa kanyatela omadiladilo inaa koshoka nohatu katuka metwokumwe nao. (1 Tes. 4:7, 8) Opo tu twikile okupewa omhepo iyapuki, otwa pumbwa yo ‘okuhakala twa dina ovaprofeti.’ (1 Tes. 5:20) Apa “ovaprofeti” otava ulike komatumwalaka a nwefwa mo komhepo yaKalunga, mwa kwatelwa oo e na sha nefiku laJehova nanghee efimbo letu la endelela. Ihatu diladila kutya efiku laJehova, ile Armagedon ite ke uya pefimbo letu. Ponhele yaasho, ohatu li endelelifa moku li kaleka momadiladilo, okukala tu na elihumbato liwa nokukala twe lipyakidila ‘noilonga yometilokalunga’ efiku keshe. — 2 Pet. 3:11, 12.

15. Ongahelipi hatu dulu okuhenuka okupukifwa kouyelele wa puka nosho yo komitotolombo deendemoni? (1 Ovatessalonika 5:21)

¹⁵ Monakwiiwa i li popepi, ovapataneki vaKalunga otava ka popya tava ti: “Ope na ombili neameno.” (1 Tes. 5:3) Omitotolombo da nwefwa mo keendemoni otadi ke lihanena kombada yedu nokupukifa vahapu. (Eh. 16:13, 14) Ongahelipi shi na sha nafye? Itatu ka pukifwa, ngeenge otwa ‘konakona oinima aishe.’ (Lesha 1 Ovatessalonika 5:21.) Oshitya shOshigreka osho sha tolokwa ‘konakona’ osha li sha longifwa tashi ulike konghedi omo ovanhu hava konakona oitenda yoshingoli noisilveri, opo va tale ngeenge oyolela. Onghee hano, nafye otwa pumbwa okukonakona osho hatu udu, ile osho hatu lesha, opo tu tale ngeenge oshoshili. Osho osha li sha fimanenena kOvatessalonika notashi ka kala sha fimanenena kufye, eshi oudjuu munene tau ehene popepi. Ponhele yokwiitavela keshe osho vamwe tava popi, ohatu longifa omadiladilo etu, opo tu yelekanife osho hatu lesha, ile osho hatu udu naasho Ombiibeli nosho yo ehangano laJehova tali ti. Ngeenge otwa ningi ngaho, itatu ka pukifwa komitotolombo deendemoni. — Omayel. 14:15; 1 Tim. 4:1.

16. Otu na eteelelo la twa lilipi, notali tu linyengifa tu ninge shike?

¹⁶ Ovapiya vaJehova ve li ongudu otava ka xupa poudjuu munene. Ashike pauhandimwe katu shii kutya efiku lomongula otali ka kala la tya ngahelipi. (Jak. 4:14) Kakele kaasho, kutya nee otwa kala nomwenyo fiyo opoudjuu munene, ile otwa fya fimbo inau uya, ohatu ka pewa ondjabi yomwenyo waalushe, ngeenge otwa kala ovadiinini. Ovavaekwa otava ka kala pamwe naKristus meulu. Eedi dimwe otadi ka kala meduparadisa. Onghee atusheni natu yandje elitulemo keteelelo letu litunhula nokukala twe lilongekidila efiku laJehova!