1-2. Jehova okwa pa ovalongeli vaye ovadiinini oufembanghenda ulipi?

 JEHOVA ota dana onghandangala ilipi monghalamwenyo yoye? Otashi dulika u nyamukule to ti: ‘Jehova oTate, Kalunga kange naKaume kange.’ Ashike ope na yo omadinafimaneko amwe oo to dulu okwiifana Jehova. Ndele mbela oho mu tale ko ngoo yo e li Omushivi woye?

² Ohamba David oya popya kombinga yanghee Jehova ta shivi ovapiya vaye ovadiinini. Oya pula ya ti: “Omwene, olyelye ta itavelelwa okukala monduda yoye? Olyelye ta itavelelwa okukala komhunda yoye iyapuki?” (Eps. 15:​1, KB-13) Eendjovo odo da nwefwa mo otadi tu hongo kutya ohatu dulu okukala metwali laJehova, sha hala kutya, okuninga ookaume kaye. Osho kashi fi tuu oufembanghenda wa denga mbada!

JEHOVA OKWA HALA TU KALE METWALI LAYE

3. (a) Olyelye a li a shivwa tete kuJehova? (b) Jehova nosho yo oo a shiva ova li ve liuditile ngahelipi?

³ Ofimbo Jehova ina hovela okushita oinima aishe, okwa li oye aeke. Opo nee okwa shita Omonamati waye woshiveli. Jehova okwa li a hafa neenghono, eshi a shiva tete Omonamati waye metwali laye lopafaneko. Ombiibeli oya ti kutya Jehova okwa li a ‘nyakukilwa pombada’ Omona waye. Omonamati waye okwa li a ‘danauka moipafi yaJehova alushe.’ — Omayel. 8:30.

4. Oolyelye lwanima va ka kala metwali laJehova?

⁴ Lwanima, Jehova okwa ka shita oishitwa imwe yopamhepo, ndele te i shivi yo nayo i kale metwali laye. Ovaengeli vaye ohava ifanwa ‘ovanamati vaKalunga,’ nova popiwa kutya ova hafa, eshi ve li pamwe naye. (Job 38:7; Dan. 7:10) Oule womido, oishitwa yomeulu oyo ashike ya li ookaume kaKalunga. Lwanima okwa shita ovanhu, ndele navo tava kala metwali  laye. Vamwe vomuvo ova li Henok, Noa, Abraham naJob. Ovalongelikalunga vashili, ovo va popiwa kutya ova li ookaume kaKalunga, ova “enda pamwe naKalunga kashili.” — Gen. 5:24; 6:9; Job 29:4; Jes. 41:8.

5. Oshike hatu lihongo mexunganeko olo li li muHesekiel 37:​26, 27?

⁵ Oule womafelemido, Jehova kwa kala ta twikile okushiva ookaume kaye va kale metwali laye. (Lesha Hesekiel 37:​26, 27.) Pashihopaenenwa, mexunganeko laHesekiel otwe lihonga kutya Kalunga okwa hala ovalongeli vaye ovadiinini va kale ve na ekwatafano lopofingo naye. Okwa udaneka kutya ota “ka ninga ehangano navo.” Exunganeko olo ola li tali ulike kefimbo olo ovo ve na eteelelo loku ka kala meulu nosho yo ovo ve na eteelelo loku ka kala kombada yedu tava ka kala va hangana metwali lopafaneko ve li ‘oshiunda shimwe.’ (Joh. 10:16) Naasho otashi ningwa kunena.

KALUNGA OHE TU FILE OSHISHO KESHE A PA TU LI

6. (a) Ohashi ende ngahelipi, opo omunhu a ye metwali laJehova? (b) Mbela etwali laJehova ola ngabekelwa ponhele yonhumba?

⁶ PaMbiibeli, etwali ola li onhele omo omunhu ha dulu okufuwila nokwaamenwa konghalo yomhepo. Omunhu ngeenge e li metwali, okwa li ha kala a teelela a filwe oshisho. Ngeenge twe liyapulila Jehova, ohatu i metwali laye lopafaneko. (Eps. 61:4) Ohatu hafele eendja dopamhepo dihapu, nohatu pange oukaume navakwetu, ovo yo ve li metwali laye. Etwali laJehova lopafaneko inali ngabekelwa ponhele imwe. Otashi dulika wa li wa ya koshilongo shonhumba, tashi dulika koshoongalele she likalekelwa, nowa shakeneka ko ovo tava hafele okukala metwali laKalunga. Etwali laJehova otali hangwa keshe opo pe na ovalongeli vaye ovadiinini. — Eh. 21:3.

7. Omolwashike hatu dulu okutya ovapiya vaJehova ovadiinini, ovo va fya, ove li natango metwali laye? (Tala yo efano.)

⁷ Ongahelipi shi na sha novapiya vaye ovadiinini, ovo va fya? Mbela ohatu dulu okufika pexulifodiladilo kutya ove li natango metwali laJehova? Heeno! Omolwashike hatu tile ngaho? Omolwaashi Jehova natango okwe va tala ko ve na omwenyo. Jesus okwa ti: “Moses naye okwa holola mehokololo li na sha noshixwa sheno kutya ovafi otava ka nyumuka, eshi a popya kutya Jehova ‘oKalunga kaAbraham naKalunga kaIsak naKalunga kaJakob.’ Oye Kalunga kovanamwenyo, ndele ke fi  Kalunga kovafi, molwaashi okwe va tala ko ve na omwenyo.” — Luk. 20:​37, 38.

OMAUWA NOSHO YO OITEELELWA YOKUKALA METWALI LAJEHOVA

8. Ovo ve li metwali laJehova ohava mono ouwa ngahelipi?

⁸ Ngaashi ashike etwali lovenevene tali dulu okukala onhele yokufuwila nokwaamena omunhu konghalo yomhepo, etwali laJehova nalo ohali amene ovo ve li mo koiponga oyo tai dulu okunyona po ekwatafano lavo naye, noku va kwafela va kale ve na eteelelo. Ngeenge otwa kala popepi naJehova, Satana ita dulu oku tu ningila owii tau kalelele. (Eps. 31:23; 1 Joh. 3:8) Mounyuni mupe, Jehova ota ka twikila okwaamena ookaume kaye ovadiinini koiponga yopamhepo, nota ka xulifa po yo efyo. — Eh. 21:4.

9. Jehova okwa teelela ovo va hala okukala metwali laye ve lihumbate ngahelipi?

⁹ Oshi li oufembanghenda munene okukala metwali laJehova. Ohatu dulu okuhafela oukaume wopofingo naye tau kalelele. Otu na okulihumbata ngahelipi, ngeenge otwa hala okutwikila okukala metwali laye? Ngeenge owa shivwa kuumwe keumbo laye oto ka kala wa hala okushiiva kutya okwa teelela u ninge shike. Pashihopaenenwa, otashi dulika e ku pule u dule ko eenghaku doye ofimbo ino ya mo meumbo, ile u wanife po oiteelelwa imwe vali, noto ka dulika nehalo liwa. Sha faafana, otwa hala okushiiva kutya Jehova okwa hala ovo va hala okutwikila okukala metwali laye va ninge shike. Ngeenge otu hole Jehova, otashi ke tu linyengifa tu ninge ngaashi hatu dulu, opo tu “mu hafife moinima aishe.” (Kol. 1:10) Oshoshili kutya Jehova oKaume ketu, ndele oku li yo Kalunga ketu naTate yetu, oo a wana okufimanekwa. (Eps. 25:14) Otu na alushe okukala twe mu fimaneka. Etilofimaneko la tya ngaho otali ke tu kwafela tu henuke elihumbato olo tali mu nyematifa. Otwa halelela ‘okweenda nelininipiko’ pamwe naKalunga ketu. — Mika 6:8.

JEHOVA OKWA LI A UNGAUNGA NOVAISRAEL NOPEHE NA OKATONGO

10-11. Jehova okwa li a ungaunga ngahelipi nOvaisrael, eshi va li mombuwa yaSinai, naasho osha ulika ngahelipi kutya ke na okatongo?

¹⁰ Jehova oha ungaunga nookaume kaye nopehe na okatongo. (Rom. 2:11) Osho otu shi liwetele monghedi omo a li a ungaunga nOvaisrael nopehe na okatongo, eshi va li mombuwa yaSinai.

¹¹ Konima eshi Jehova a mangulula oshiwana shaye moupika waEgipiti, okwa li a nangeka po ovapristeri va longe metwalihangano. Ovalevi navo ova li va pewa oinakuwanifwa va longe metwalihangano. Mbela ovo va li hava longo metwalihangano, ile ovo va li va onga onhanda popepi nalo ova li hava filwa oshisho kuJehova shi dulife vamwe? Hasho nandenande! Jehova ke na okatongo.

12. Onghedi oyo Jehova a li a ungaunga nOvaisrael, eshi va li mombuwa, oya ulika ngahelipi kutya Jehova ke na okatongo? (Exodus 40:38) (Tala yo efano lokombada.)

¹² Omuisrael keshe okwa li ta dulu okukala e na oukaume wopofingo naJehova, kutya nee oha longo ketwalihangano, hadi popepi nalo, ile hasho. Pashihopaenenwa, Jehova okwa li a shilipaleka kutya oshiwana ashishe osha dula okumona oshilemo nosho yo omundilo wopashikumwifilonga oo wa li kombada yetwalihangano. (Lesha Exodus 40:38.) Ngeenge oshilemo sha li sha hovela okuyuka kombinga imwe, nokuli naavo va li va onga onhanda kokule netwalihangano ova li hava dulu oku shi mona, hava ongele po oinima yavo nokudikulula po omatwali omaukwaneumbo avo, ndele tava endele pamwe noshiwana ashishe. (Num. 9:​15-23) Oshiwana  ashishe osha li hashi dulu okuuda omanghuma avali a longwa moshisiliveri taa shikwa, shi li euliko kutya nashi hovele okuya molweendo. (Num. 10:2) Onghee osha yela kutya okukala popepi netwalihangano hasho sha li tashi ufa kutya omunhu oku na oukaume wopofingo naJehova e dulife ava ve li kokule nalo. Ponhele yaasho, Omuisrael keshe okwa li ta dulu okukala e na oukaume wopofingo naJehova nokukala a tomhwa kutya Jehova ote mu wilike note mu amene. Sha faafana kunena, kashi na neembudi kutya otu li peni kombada yedu, Jehova oku tu hole, he tu file oshisho nohe tu amene.

OIHOPAENENWA YOKUNENA OYO TAI ULIKE KUTYA JEHOVA KE NA OKATONGO

13. Omonghedi imwe ilipi omo Jehova ha ulike kutya ke na okatongo kunena?

¹³ Vamwe vomoshiwana shaKalunga shokunena ohava di popepi neembelewa da kula, ile noitaimbelewa yEendombwedi daJehova. Vamwe omo hava longele. Ohava longo oilonga ihapu, oyo hai longwa meenhele odo, nohava endafana naavo tava kwatele komesho. Vamwe ove li ovapashukili ovaendi, ile ve li moilonga imwe yefimbo liyadi ye likalekelwa. Ngeenge ou li umwe womwaavo vehe na oinakuwanifwa oyo, kala wa shilipalekwa kutya Omushivi wetu, Jehova, oku hole aveshe ovo ve li metwali laye. Aveshe ohe va file oshisho. (1 Pet. 5:7) Jehova oha pe keshe umwe womovapiya vaye eendja dopamhepo, he va wilike nohe va amene.

14. Omonghedi vali imwe ilipi Jehova ha ulike kutya ke na okatongo?

¹⁴ Onghedi vali imwe omo Jehova ha ulike kutya ke na okatongo, omokushilipaleka kutya ovanhu aveshe mounyuni otava dulu okumona Ombiibeli. Omishangwa Diyapuki oda li da shangwa tete momalaka atatu, mOshiheberi, mOshiaramia nomOshigreka. Mbela ovo hava dulu okulesha omalaka oo mwa li  mwa shangwa tete Ombiibeli, ove na ekwatafano lopofingo naJehova ve dulife vakwao? Hasho nandenande. — Mat. 11:25.

15. Oumbangi ulipi tau ulike kutya Jehova ke na okatongo? (Tala yo efano.)

¹⁵ Jehova ihe tu shivi tu ninge ookaume kaye, molwaashi ashike twa hongeka, ile tu shii omalaka opehovelo omo mwa li mwa shangwa Ombiibeli. Ponhele yaasho, okwa pa omhito ovanhu aveshe mounyuni va mone ounongo waye, kutya nee ovahongwa, ile hasho. Eendjovo daye da nwefwa mo, Ombiibeli, oda tolokwa momalaka omayovi, nokungaho ovanhu mounyuni aushe otava dulu okumona ouwa momahongo ado, nokulihonga nghee tava dulu okupanga oukaume naye. — 2 Tim. 3:​16, 17.

TWIKILA OKUKALA METWALI LAJEHOVA

16. She likolelela kOilonga 10:​34, 35, ongahelipi hatu dulu okukala metwali laJehova?

¹⁶ Oshi li oufembanghenda munene okutambulwa ko kuJehova metwali laye lopafaneko. Oku li Omushivi wetu e na onghenda nomunahole kuhe na vali. Shikwao vali, ke na okatongo. Ohe tu tambula ko atushe, kashi na nee mbudi kutya otu li peni, otwa dja meputuko lilipi, otwa hongwa, ile inatu hongwa, otwa dja momuhoko ulipi, omoshiwana shilipi, otu na eedula ngapi, ile otwoukashike kookanhu wa tya ngahelipi. Ndele ovovo ashike hava dulika kuJehova tava dulu okukala metwali laye. — Lesha Oilonga 10:​34, 35.

17. Openi hatu hange ouyelele wa wedwa po u na sha nokukala metwali laJehova?

¹⁷ Ngaashi sha popiwa mEpsalme 15:​1, David okwa pula omapulo a ti: “Omwene, olyelye ta itavelelwa okukala monduda yoye? Olyelye ta itavelelwa okukala komhunda yoye iyapuki?” Omupsalme okwa li a nwefwa mo a nyamukule omapulo oo. Moshitukulwa tashi landula ko, ohatu ka kundafana imwe yomoiteelelwa yokondadalunde oyo tu na okuwanifa po, opo tu twikile okukala metwali laJehova.