Opo tu hafife Jehova, otu na okukala tu na eitavelo. Ndele Ombiibeli oya ti kutya “havanhu aveshe ve na eitavelo.” (2 Tes. 3:2) Eshi omuyapostoli Paulus a popya eendjovo odo, okwa li ta popi kombinga ‘yovakolokoshi,’ ovo va li have mu pataneke. Ashike ovanhu vamwe kunena navo kave na eitavelo. Ohave lipwililikile oumbangi wa yela, oo kutya oku na Omushiti, Kalunga. (Rom. 1:20) Vamwe otashi dulika va tye kutya ova itavela moshinima, ile momunhu oo e na eenghono dinene. Ashike eitavelo olo, halo la pumbiwa opo omunhu a hafife Jehova.

Otwa pumbwa okukala twa tomhwa kutya Jehova oko e li shili, nonokutya oha nangeke noupuna ovo ve na eitavelo la kola. (Heb. 11:6) Eitavelo oli li oshiimati shomhepo yaye iyapuki. Opo tu mone omhepo iyapuki, otwa pumbwa okwiindila Jehova e i tu pe. (Luk. 11:​9, 10, 13) Onghedi imwe ya fimana omo hatu dulu okumona omhepo iyapuki omokulesha Eendjovo daKalunga. Opo nee hatu dilonga kwaasho twa lesha nokutula moilonga osho twe lihonga. Ngeenge otwa ningi ngaho, ohatu ka pitika omhepo yaJehova i tu kwafele tu kale tu na eitavelo, opo tu mu hafife.