Inda koshikalimo

Inda koshikalimo

Ovadali, otamu kwafele ngoo ovana veni opo va dule okuninginifwa?

Ovadali, otamu kwafele ngoo ovana veni opo va dule okuninginifwa?

“Oto teelele vali shike? Fikama ashike, u ka [ninginifwe, NW].” — OIL. 22:16.

OMAIMBILO: 51, 135

1. Ovadali Ovakriste ohava kala va hala okushilipaleka shike ofimbo ovana vavo inava ninginifwa?

BLOSSOM BRANDT okwa ti: “Oule weemwedi onda kala handi lombwele tate nameme kutya onda hala okuninginifwa, nova kala hava popi naame pandjikilile kombinga yasho. Ova li va hala okushilipaleka kutya ondi shii kutya etokolo olo nda hala okuninga ola kwata moiti. Mo 31 Desemba 1934, omo nda li nda ninginifwa, nola li efiku la fimana monghalamwenyo yange.” Blossom Brandt okwa popya kutya oshike she mu linyengifa a ninge etokolo lokuninginifwa. Kunena, ovadali Ovakriste navo ova hala okukwafela ovana vavo va ninge omatokolo opandunge. Okukaleka eninginifo ile okwoongaonga otaku dulu okweetifa omaupyakadi opamhepo. (Jak. 4:17) Ashike ovadali ohava kala va hala okushilipaleka kutya ovana vavo ove lilongekida okutambula ko oshinakuwanifwa shokukala Omukriste ofimbo inava ninginifwa.

2. (a) Omolwashike ovapashukilishikandjo vamwe hava kala va limbililwa? (b) Oshike hatu ka kundafana moshitukulwa eshi?

2 Ovapashukilishikandjo vamwe ohava kala va limbililwa molwaashi ohava shakeneke ovanyasha ovo ve na omido omulongo nasha naavo ve na 20 nasha nova kulila momaukwaneumbo opaKriste ashike inava ninginifwa. Luhapu, ovanyasha ovo ohava kala pokwoongala nohava kufa ombinga moukalele. Ohave litale ko ve li Eendombwedi daJehova. Ashike omolwomatomheno onhumba, ohava kwata olule okuliyapulila Jehova nokuninginifwa. Omolwashike mbela? Omafimbo amwe, ovadali ohave va ladipike vaha ninginifwe diva. Moshitukulwa eshi, ohatu ka kundafana oitwa ine oyo hai imbi ovadali vamwe Ovakriste va kwafele ovana va ninginifwe.

MBELA OKAANA KANGE OKA KULA NGOO NOKUNINGINIFWA?

3. Ovadali vaBlossom ova li tave lipula nashike?

3 Ovadali vaBlossom, ovo va popiwa mokatendo kotete, ova li tave lipula ngeenge okamonakadona kavo oka kula nokuuda ko efimano lokuninginifwa nonokutya osha kwata moiti shi fike peni. Ongahelipi ovadali tava dulu okushiiva kutya ovana ova wana okuliyapulila Jehova?

4. Ongahelipi oshipango shaJesus osho shi li muMateus 28:19, 20 tashi dulu okukwafela ovadali eshi tava hongo ovana?

4 Lesha Mateus 28:19, 20. Ngaashi sha popiwa moshitukulwa sha tetekela, Ombiibeli inai popya kondadalude kutya omunhu oku na okuninginifwa e na omido ngapi. Ashike, ovadali otava dulu okumona ouwa mokutala kutya osha hala okutya shike okuninga omunhu omuhongwa. Oshitya shOshigreka osho sha tolokwa ‘ningeni ovanhu ovahongwa’ muMateus 28:19 oshi na eityo lokuhonga nelalakano lokuninga ovanhu ovahongwa. Omuhongwa omunhu oo he lihongo nokuuda ko omahongo aJesus nokwa tokola oku a tula moilonga. Onghee hano, elalakano lovadali aveshe Ovakriste na li kale okuhonga ovana okudja kounona nelalakano loku va kwafela va ninge ovahongwa vaKristus va ninginifwa. Okahanana inaka wana okuninginifwa. Kakele kaasho, Ombiibeli oya ulika kutya nokuli nounona ovo vanini otava dulu okutambula ko nokukala ve na olupandu loshili yOmbiibeli.

5, 6. (a) Ehokololo lopaMbiibeli li na sha naTimoteus ole tu ningifa tu fike pexulifodiladilo lilipi kombinga yeninginifo laye? (b) Ongahelipi ovadali ovanaendunge tava dulu okukwafela ovana nomupondo?

5 Timoteus okwa li omuhongwa oo a ninga oshili yaye mwene okudja kounona. Omuyapostoli Paulus okwa popya kutya Timoteus okwe lihonga oshili yOmishangwa okudja kounona. Nonande Timoteus okwa kulila moukwaneumbo wa tukauka palongelokalunga, ina nainakulu Ovajuda ove mu kwafela a kulike olupandu li na sha nOmishangwa, ngaashi Ovajuda va li ve di udite ko. Oshidjemo, eitavelo laye ka la li hali tengauka. (2 Tim. 1:5; 3:14, 15) Eshi Timoteus a li e na omido omulongo nasha ile 20 nasha, okwa li Omukriste oo a li ta dulu okupewa oinakuwanifwa ye likalekelwa meongalo. — Oil. 16:1-3.

6 Ounona ova yoolokafana; ihava kulile shimwe. Vamwe ohava kala ve na eendunge notava dulu okuninga omatokolo nonande ovanini, nomolwaasho tashi dulika va tokole okuninginifwa. Vamwe otashi dulika va kale inava wana okuninginifwa fiyo osheshi va kula. Ovadali ovanaendunge ihava fininike ovana vavo va ninginifwe. Ponhele yaasho, ohava kwafele keshe okaana ka ninge exumokomesho lopamhepo kuko vene. Ovadali otava dulu okukala va hafa eshi okaana taka tula moilonga Omayeletumbulo 27:11. (Lesha.) Ndele nande ongaho, ovadali inava dimbwa nande elalakano lavo lokukwafela ovana va ninge Ovakriste. Ovadali ve na osho momadiladilo, otava dulu okulipula epulo e li kutya, ‘Mbela okaana kange oke na ngoo eshiivo la wana lokuliyapulila Kalunga nokuninginifwa?’

MBELA OKAANA KANGE OKE NA NGOO ESHIIVO LA WANA?

7. Mbela omunhu oo a hala okuninginifwa okwa pumbwa okukala e na eshiivo lOmbiibeli lihapu unene? Shi yelifa.

7 Ovadali ve li ovahongi ova pumbwa okukwafela ovana vavo va kale ve na eshiivo la wana olo tali dulu oku va kwafela ve liyapulile Kalunga. Ndele itashi ti omunhu okwa pumbwa eshiivo lihapulihapu opo a dule okuliyapulila Kalunga nokuninginifwa. Konima yeninginifo, ovahongwa aveshe ove na okutwikila okuhapupalifa eshiivo lavo. (Lesha Ovakolossi 1:9, 10.) Mbela omunhu okwa pumbwa eshiivo li fike peni opo a dule okuninginifwa?

8, 9. Oilihongomwa ilipi hatu dulu okulihonga mehokololo laPaulus nosho yo lomunangeli wodolongo?

8 Ovadali otava dulu okumona omayele moshimoniwa shoukwaneumbo umwe womefelemudo lotete. (Oil. 16:25-33) Paulus okwa li ta talele po Filippi molweendo laye olutivali loutumwa lwomo 50 O.P. Eshi ye nomweendi pamwe naye, Silas, va li oko, ova li va kwatwa po nokutulwa modolongo omolwomalundilo. Mokati koufiku, odolongo oya kakama fiyo okomakanghameno, noivelo aishe oya yeuluka. Omunangeli wodolongo okwa li a tila molwaashi okwa li ta diladila kutya ovakwatwa aveshe ove livaka mo, nokwa li e li pokulidipaa eshi Paulus e mu ifana. Paulus naSilas ova li va dula okuyandja oundombwedi muwa komunangeli wodolongo noukwaneumbo waye. Olupandu lavo li na sha noshili oyo va li tave lihongo kombinga yaJesus ola li le ve linyengifa va katuke onghatu ilipi? Ova li va ninginifwa diva nopehe na okwoongaonga. Oshike hatu dulu okulihonga mehokololo olo?

9 Omunangeli wodolongo otashi dulika a li nale omukwaita waRoma. Ka li e shii Omishangwa. Opo a kale e na eshiivo la wana, okwa li a pumbwa okulihonga omahovelohongo oshili yOmbiibeli, okuuda ko kutya osha hala okutya shike okukala omupiya waKalunga nokukala a tokola okudulika komahongo aJesus. Eshiivo laye lomahovelohongo oshili yOmbiibeli nosho yo olupandu laye li na sha nayo ola li le mu linyengifa a ninginifwe meni lefimbo lixupi. Kape na omalimbililo kutya okwa twikila okuweda ko keshiivo laye konima eshi a ninginifwa. U na oshihopaenenwa osho momadiladilo, mbela oto ka ninga po shike ngeenge okaana koye oka ulike olupandu lako momahovelohongo oshili Ombiibeli, mwa kwatelwa eityo nosho yo efimano leliyapulo neninginifo? Otashi dulika ovadali Ovakriste va fike pexulifodiladilo kutya oke na okukwatafana novakulunhuongalo meongalo opo va tale ngeenge oka wanifa po oiteelelwa yokuninginifwa. * Ngaashi ashike ovahongwa vamwe ovo va ninginifwa, otaka ka twikila okuhapupalifa eshiivo lako li na sha nelalakano laJehova mokukalamwenyo kwako akushe fiyo alushe. — Rom. 11:33, 34.

MBELA EHONGO LILIPI LA DENGA MBADA KOKAANA KANGE?

10, 11. (a) Ovadali vamwe ohava fiki pexulifodiladilo lilipi? (b) Oshike osho ovadali ve na okukala va halela ovana?

10 Ovadali vamwe ohava fiki pexulifodiladilo kutya oshi li pandunge ovana va kaleke manga eninginifo opo va dule okumona ehongo la wedwa po nokukala ve na eifano lonhumba. Otashi dulika omalinyengotomheno a tya ngaho mawa, ndele mbela osho otashi ka kwafela ngoo ovana va pondole shili? Mbela osho oshi li ngoo metwokumwe nOmishangwa? Mbela Eendjovo daJehova otadi tu ladipike tu lalakanene shike? — Lesha Omuudifi 12:1.

11 Osha fimana okudimbuluka kutya ounyuni ou, naashishe osho shi li mo kashi li metwokumwe nehalo laJehova. (Jak. 4:7, 8; 1 Joh. 2:15-17; 5:19) Ekwatafano lopofingo naJehova otali dulu okwaamena okaana koye kuSatana, kounyuni waye nosho yo kokudiladila ngaashi ounyuni. Ngeenge omudali oha komangele unene shi na sha nomaifano omounyuni, otashi dulu okulyalyakaneka okaana nokutula moshiponga osho ke na ohokwe musho. Mbela ovadali Ovakriste ovanahole ova hala ounyuni ou u nwefe mo etaleko lovana vavo li na sha nokupondola? Ohatu dulu ashike okumona ehafo lashili nosho yo okupondola ngeenge otwa pitifa komesho Jehova monghalamwenyo yetu. — Lesha Epsalme 1:2, 3.

ONGAHELIPI NGEENGE OKAANA KANGE OKA NYONO?

12. Omolwashike ovadali vamwe va li hava kala va hala ovana va kaleke eninginifo?

12 Omudali umwe Omukriste okwa li a popya kutya omolwashike a li a shololifa okamonakadona kaha ninginifwe, a ti: “Oshi fifa ohoni oku shi popya, ashike etomheno limwe ola li li na sha nelongekido lokukondwa.” Ngaashi omumwameme oo, ovadali vamwe ohava tomhafana kutya oshi li xwepo okaana ka kaleke eninginifo fiyo osheshi ka kula noihaka ningi omatokolo ehe li pandunge. (Gen. 8:21; Omayel. 22:15) Otashi dulika va diladile kutya, ‘Shimha ashike okaana kange inaka ninginifwa, itaka dulu okukondwa.’ Omolwashike okutomhafana kwa tya ngaho kwa puka? — Jak. 1:22.

13. Mbela okukaleka eninginifo ohashi ningifa omunhu ehe ke lihokolole kuJehova? Shi yelifa.

13 Ovadali Ovakriste ihava kala va hala ovana va ninginifwe ofimbo inava kula nokuliyapulila Jehova. Ashike nande ongaho, kashi li pandunge okufika pexulifodiladilo kutya ngeenge okaana inaka ninginifwa itake ke lihokolola kuJehova. Omolwashike mbela? Okulihokolola kuJehova kaku na sha nokuninginifwa. Ponhele yaasho, okaana otake ke lihokolola kuJehova ngeenge oke shii osho shi li mondjila naasho sha puka momesho aye. (Lesha Jakob 4:17.) Onghee hano, ponhele yokushololifa okaana kaha ninginifwe, ovadali ovanaendunge ohava longo noudiinini opo va tule po oshihopaenenwa shiwa. Ova hala va kwafele ovana vavo va kulike olupandu okudja kounona wavo li na sha nomifikamhango daJehova dopaenghedi. (Luk. 6:40) Olupandu la tya ngaho oli li eameno la denga mbada, nokaana koye otake ke linyengifwa ka yambidide onghedi yaJehova yokupangela. — Jes. 35:8.

VAMWE NAVO OTAVA DULU OKUKWAFELA

14. Ongahelipi ovakulunhuongalo tava dulu okuyambidida ovadali eshi tava kwafele ovana vavo va ninginifwe?

14 Ovakulunhuongalo otava dulu okuyambidida ovadali mokupopya navo kombinga yomalalakano opamhepo. Omumwameme umwe oo a kokola ondjila oule womido di dulife 70, ota dimbuluka nghee a li a kumwa keenghundafana odo va li va ninga nomumwatate Charles T. Russell eshi a li e na omido hamano. Okwa ti: “Otwa li twa popya naye kombinga yomalalakano ange opamhepo oule wominute 15.” Eendjovo diwa nosho yo etwomukumo otali dulu oku ku kuma efimbo lile. (Omayel. 25:11) Ovakulunhuongalo otava dulu yo okukwatela mo ovadali novana mokuwapaleka Olupale lOuhamba, tava pe ovanyasha oinakuwanifwa she likolelela komido nokokudula kwavo.

15. Omeenghedi dilipi vamwe meongalo tava dulu okutwa ovanyasha omukumo?

15 Oilyo yeongalo otai dulu okukwafela mokuulika kutya oi na ko nasha novanyasha pauhandimwe. Otai dulu okudidilika mo oinima oyo tai ulike kutya ovanyasha otava ningi exumokomesho lopamhepo. Mbela omunyasha okwa yandja etyekosha tali di komutima notali tungu ile a kufa ombinga moitukulwa yokwoongala kwomokati koshivike? Mbela omunyasha okwa li a taalela eyeleko nomupondo olo la li tali yeleke oudiinini waye ile a mona omhito yokuyandja oundombwedi kofikola? Kala ho va pandula diva tashi di komutima. Omolwashike ito shi ningi elalakano loye lokukala ho popi novanyasha komesho ile konima yokwoongala, to ulike kutya ou na ko nasha navo shili? Meenghedi da tya ngaho, ovanyasha otava dulu okumona kutya ove li oshitukulwa ‘sheongalo linene.’ — Eps. 35:18.

KWAFELA OKAANA KOYE KA NINGE EXUMOKOMESHO FIYO KA NINGINIFWA

16, 17. (a) Omolwashike sha fimana ounona va ninginifwe? (b) Ehafo lilipi ovadali aveshe Ovakriste tava dulu okumona? (Tala efano pehovelo loshitukulwa.)

16 Ovadali Ovakriste ove na oufembanghenda munene wokutekula ovana “meduliko nomekumaido lOmwene.” (Ef. 6:4; Eps. 127:3) Mepingafano nounona vomoshiwana shaIsrael shonale, ounona vovadali Ovakriste inava dalwa ve li oshitukulwa shoshiwana osho she liyapulila Jehova. Shikwao vali, ohole yokuhola Kalunga nosho yo oshili ihai fyuululwa. Okudja efiku olo okaana ka dalwa, ovadali ove na okukala ve na ehalo loku ka ninga omuhongwa, tave ka kwafele ke liyapulile Jehova noka ninginifwe ke li omupiya waye. Oshike tashi dulu okukala sha fimana? Komesho yaaishe, eliyapulo, eninginifo nosho yo okulongela Kalunga noudiinini pauhandimwe oko taku ke mu ningifa a ka xupifwe pefimbo loudjuu munene oo tau ke uya. — Mat. 24:13.

Ovadali ove na okukala ve na elalakano lokukwafela okaana kavo ka ninge omuhongwa (Tala okatendo 16, 17)

17 Eshi Blossom Brandt a tokola kutya okwa hala okuninginifwa, ovadali vaye ovatilikalunga ova li va hala okushilipaleka kutya okwe lilongekida okukatuka onghatu ya fimanenena monghalamwenyo yaye. Eshi va mona kutya okwe lilongekida, ova li va yambidida etokolo laye. Oufiku oo wa tetekela eninginifo laye, xe okwa li a ninga oshinima shiwa. Blossom okwa ti: “Okwa li e tu pula atushe tu twe eengolo, ndele tai ilikana. Okwa li a lombwela Jehova kutya okwa hafela etokolo lokamonakadona kaye loku mu liyapulila onghalamwenyo yako.” Konima yomido di dulife 60, Blossom okwa ti: “Oto dulu okukala noushili, meedula adishe tadi ke uya, itandi ka dimbwa nandenande oufiku oo.” Ovadali otamu dulu okumona ehafo nembilipalelo olo hali di mokumona ovana veni tave liyapulile Jehova notava ninginifwa ve li ovapiya vaye.

^ par. 9 Ovadali pamwe novana otava dulu okweendulula ouyelele oo tau dulu oku va kwafela, membo Questions Young People Ask—Answers That Work, Volume 2, ep. 304-310. Tala yo “Oshimhungu shomapulo” mokafo kOukalele Wetu wOuhamba, kaAprili 2011, ep. 2.