1. Omolwashike Jesus a li a pula Jehova a pashukile ovahongwa vaye?

MOUFIKU waxuuninwa wokukalamwenyo kwaye kombada yedu, Jesus okwa li ta diladila komashongo aeshe oo a li taa ka shakenekwa kovahongwa vaye. Ohole yokuhola ookaume kaye, oya li ye mu linyengifa a pule Xe e “va amene komunawii.” (Joh. 17:14, 15) Jesus okwa li e shii kutya ngeenge okwa shuna meulu, Satana Ondiaboli ota ka twikila okulwifa ovo hava longele Jehova. Osho otashi ulike kutya ovapiya vaJehova ova pumbwa eameno.

2. Otu shi shii ngahelipi kutya Jehova ota ka nyamukula omailikano etu?

² Jehova okwa li a nyamukula eilikano laJesus, molwaashi oku hole Omona waye. Nafye ngeenge otwa ningi ngaashi hatu dulu opo tu hafife Jehova, ota ka kala e tu hole nota ka pwilikina komailikano etu eshi hatu mu pula e tu kwafele noku tu amena. Molwaashi Jehova oku li Omutwe woukwaneumbo unahole, ota ka twikila oku tu fila oshisho nawa tu li ovana vaye. Osho otashi ka shekifa edina laye ngeenge okwa dopa okuninga ngaho.

3. Omolwashike twa pumbwa eameno laJehova kunena?

³ Otwa pumbwa neenghono eameno laJehova shi dulife nale. Satana okwa umbwa mo meulu nokwa “handuka neenghono.” (Eh. 12:12) Okwa nwefa mo vamwe va diladile kutya ngeenge tave tu hepeke, kungaho otava “longele Kalunga oilonga iyapuki.” (Joh. 16:2) Vamwe ovo inava itavela muKalunga ohave tu hepeke, molwaashi twa yooloka ko kovanhu vomounyuni ou. Kashi na nee mbudi kutya omolwashike ovanhu have tu hepeke, katu na okukala twa tila. Omolwashike mbela? Omolwaashi Eendjovo daKalunga oda ti: “Molwaashi Omwene omudiinini, ote ke tu pameka noku tu amena komunawii.” (2 Tes. 3:3) Jehova ohe tu amene ngahelipi? Natu ka kundafaneni eenghedi dopavali.

4. Metwokumwe nOvaefeso 6:13-17, oshike Jehova e tu pa opo e tu amene?

⁴ Jehova okwe tu pa oilwifo aishe oyo hai tu amene komaponokelo aSatana. (Lesha Ovaefeso 6:13-17.) Oilwifo oyo yopamhepo oya kola nohai pondola. Ashike otwa pumbwa okudjala oshilwifo keshe ngeenge otwa hala i tu amene. Oshilwifo keshe otashi faneke shike? Natu ke i kundafaneni kooshimwe.

5. Ekwamo loshili oshike, nomolwashike twa pumbwa oku li djala?

⁵ Ekwamo loshili otali faneke oshili oyo tai hangwa mEendjovo daKalunga, Ombiibeli. Omolwashike twa pumbwa okukala twa djala ekwamo olo? Omolwaashi Satana ‘oxe yoipupulu.’ (Joh. 8:44) Okwa kala ta popi oipupulu oule womido omayovi nokuhongaula “ounyuni aushe.” (Eh. 12:9) Ashike oshili oyo tai hangwa mOmbiibeli ohai tu amene komapukifo. Ongahelipi hatu dulu okudjala ekwamo olo lopafaneko? Ohatu ningi ngaho, ngeenge hatu lihongo oshili kombinga yaJehova, hatu mu longele “momhepo nomoshili” nokukala ovanashili moinima aishe. — Joh. 4:24; Ef. 4:25; Heb. 13:18.

6. Oshipapa shouyuki shoponhulo oshike, nomolwashike tu na oku shi djala?

⁶ Oshipapa shouyuki shoponhulo otashi faneke omifikamhango daJehova douyuki. Omolwashike twa pumbwa okudjala oshipapa shoponhulo? Ngaashi ashike oshipapa shoponhulo shoovene vene hashi amene omutima womukwaita uha tuwe, oshipapa shoponhulo shouyuki ohashi amene omutima wetu wopafaneko, ile ounhu wetu womeni kenwefe mo lounyuni ou. (Omayel. 4:23) Jehova okwa teelela tu kale tu mu hole notu mu longele nomutima aushe. (Mat. 22:36, 37) Satana oha kendabala okutukula omitima detu moku tu ningifa tu kale tu hole oinima oyo i li mounyuni, oyo i tondike kuJehova. (Jak. 4:4; 1 Joh. 2:15, 16) Ashike ngeenge onghedi oyo inai pondola, oha kendabala oku tu etela omatilifo, ile e tu hepeke, opo tu nyone omifikamhango daJehova.

7. Ohatu djala ngahelipi oshipapa shoponhulo shouyuki?

⁷ Ohatu djala oshipapa shoponhulo shouyuki mokutula moilonga omifikamhango daJehova douyuki daasho shi li mondjila nosho yo osho sha puka nokukala metwokumwe nado. (Eps. 97:10) Vamwe ove udite kutya omifikamhango daJehova oda kwata moiti. Ashike ngeenge otwa efa po okutula moilonga omafinamhango Ombiibeli monghalamwenyo yetu, ohatu ka kala twa fa omukwaita oo a dula mo oshipapa shaye shoponhulo shoshivela pefimbo lolwoodi ta diladila kutya oshidjuu unene. Inashi nyika tuu oulai okuninga ngaho! Kwaavo ve hole Jehova, oipango yaye “kai fi idjuu,” ndele otai xupifa eemwenyo. — 1 Joh. 5:3.

8. Osha hala okutya ngahelipi okudjala eenghaku keemhadi detu twe lilongekida okuudifa onghundana iwa?

⁸ Paulus okwe tu ladipika tu djale eenghaku keemhadi detu, twe lilongekida okuudifa onghundana iwa yombili. Oku shi popya noitya imwe, otwa pumbwa okukala alushe twe lilongekida okuudifa onghundana iwa yOuhamba. Ngeenge hatu udifile vamwe etumwalaka lOmbiibeli, ohashi pameke eitavelo letu. Oshoshili kutya ohashi tu tu omukumo okumona ovapiya vaJehova mounyuni aushe tava kongo eemhito dokuudifa onghundana iwa. Ngaashi pashihopaenenwa ngeenge ve li koilonga, kofikola, peenhele domalandifilo, tava udifa eumbo neumbo, tava udifa ngeenge va ka landa sha, ngeenge tava talele po ovapambele ovo vehe fi Eendombwedi, tava popi novashiivikile, nokuli nongeenge tava popi naavo va ngabekelwa momaumbo oule wefimbo. Ngeenge otwa mbadapala ndele hatu efa po okuudifa, ohatu ka kala twa fa omukwaita oo a dula ko eenghaku daye pefimbo lolwoodi, molwaashi kungaho eemhadi daye odi li monghuwo inonghambe.  Oshidjemo, ita ka dulu okuliamena ye mwene ngeenge ta ponokelwa, noita ka dula okushikula omalombwelo oo ta pewa komuwiliki waye wetangakwaita.

9. Omolwashike twa pumbwa okukala twa humbata oshikelelifo sha kula sheitavelo?

⁹ Oshikelelifo sha kula sheitavelo otashi faneke eitavelo olo tu na muJehova. Otu na elineekelo kutya ota ka wanifa po omaudaneko aye aeshe. Eitavelo ohali tu kwafele tu dule ‘okudima po nalo oikuti aishe yomunawii ya xwama omundilo.’ Omolwashike twa pumbwa okukala twa humbata oshikelelifo sha kula sheitavelo? Omolwaashi eitavelo ohali tu amene tuha pukifwe komahongo ovashunimonima notuha kale twa tila ngeenge ovanhu tave tu sheke. Ngeenge katu na eitavelo itatu ka kala tu na eenghono dokukondjifa vamwe ngeenge tave tu ningifa tuha dulike komifikamhango daJehova. Mepingafano naasho, efimbo keshe hatu popile eitavelo letu koilonga ile kofikola, kungaho otwa humbata oshikelelifo shetu. (1 Pet. 3:15) Efimbo keshe hatu anye oilonga hai futu nawa, oyo tai ka ya moshipala omalipyakidilo etu opamhepo, kungaho otwa humbata oshikelelifo shetu. (Heb. 13:5, 6) Efimbo keshe hatu longele Jehova nonande ohatu patanekwa, kungaho oshikelelifo shetu otashi tu amene. — 1 Tes. 2:2.

10. Embale lexupifo oshike, nomolwashike twa pumbwa okukala twe li djala?

 ¹⁰ Embale lexupifo eteelelo olo Jehova e tu pa, olo kutya ota ka pa ondjabi ovapiya vaye ovo hava longo ehalo laye note ke va nyumuna ngeenge ova fi. (1 Tes. 5:8; 1 Tim. 4:10; Tit. 1:1, 2) Ngaashi ashike embale lovenevene hali amene omutwe womukwaita, eteelelo lexupifo ohali amene okudiladila kwetu. Omonghedi ilipi mbela? Eteelelo la tya ngaho ohali tu kwafele tu kale hatu yandje elitulemo komaudaneko aKalunga noku tu kwafela tuha kale twa wililwa po komaupyakadi. Ongahelipi hatu dulu okudjala embale olo? Ohatu ningi ngaho ngeenge hatu diladila monghedi omo Kalunga ha diladila. Pashihopaenenwa, ihatu tula elineekelo letu moinima oyo tai xulu po, ndele ohatu tula elineekelo letu muKalunga. — Eps. 26:2; 104:34; 1 Tim. 6:17.

11. Eongamukonda lomhepo oshike, nomolwashike twa pumbwa oku li longifa?

¹¹ Eongamukonda lomhepo olo Eendjovo daKalunga, Ombiibeli. Eongamukonda olo oli na eememo dokunyaneka pomutenya omapukifo aeshe, okumangulula ovanhu komahongo oipupulu nosho yo keenghedi inadi koshoka. (2 Kor. 10:4, 5; 2 Tim. 3:16, 17; Heb. 4:12) Ohatu hongwa nghee tu na okulongifa nawa eongamukonda olo okupitila mekonakono lopaumwene nosho yo medeulo olo hatu pewa kehangano laJehova. (2 Tim. 2:15) Kakele koilwifo aishe oyo, Jehova ohe tu amene vali monghedi imwe ya tongomana. Oilipi po?

12. Oshike vali tu na okuninga, nomolwashike?

¹² Omukwaita omunawino oha kala e shii kutya ita dulu okulwifa etangakwaita linene oye aeke. Ndele okwa pumbwa ekwafo lovakwaita vakwao. Sha faafana, nafye itatu ka lwifa nomupondo Satana novayambididi vaye ofye atuke, otwa pumbwa ekwafo lovamwatate novamwameme. Jehova okwe tu pa oumwainafana womounyuni aushe ‘wovamwatate aveshe,’ ovo ve lilongekida oku tu kwafela. — 1 Pet. 2:17.

13. Metwokumwe nOvaheberi 10:24, 25, ouwa ulipi hatu mono ngeenge tu li pokwoongala?

¹³ Onghedi imwe omo hatu mono eyambidido omokukala pokwoongala. (Lesha Ovaheberi 10:24, 25.) Atusheni omafimbo amwe ohatu kala twa teka omukumo, ashike okwoongala ohaku tu tu omukumo. Ohatu tuwa omukumo komatyekosha ovamwatate novamwameme taa di komutima. Oipopiwa ya kanghamena kOmbiibeli nosho yo omauliko oo haa kala po ohae tu pameke tu kale twa tokola okulongela Jehova. Eenghundafana tadi tungu, odo hatu popi novamwatate novamwameme ofimbo okwoongala inaku hovela nokonima yako, ohadi tu pameke. (1 Tes. 5:14) Shikwao vali, okwoongala ohaku tu pe omhito tu mone ehafo olo hali di mokukwafela vamwe. (Oil. 20:35; Rom. 1:11, 12) Okwoongala ohaku tu kwafele yo meenghedi dimwe vali. Ohaku xwepopaleke ounghulungu wetu wokuudifa nokuhonga moukalele. Pashihopaenenwa, ohatu hongwa nghee tu na okulongifa nomupondo oilongifo yomOshikefa shetu shokuhonga. Onghee hano, natu kale hatu lilongekidile nawa okwoongala. Natu kale hatu pwilikine nawa pefimbo lokwoongala. Kala ho tula moilonga osho we lihonga pokwoongala. Ngeenge owa ningi ngaho, oto ka kala “omukwaita muwa waKristus Jesus.” — 2 Tim. 2:3.

14. Otu na vali ekwafo lilipi?

¹⁴ Ohatu yambididwa yo kovaengeli omamiliyona ovanaenghono. Diladila ashike koshilonga osho sha longwa komweengeli umwe aeke! (Jes. 37:36) Paife diladila nee kutya etangakwaita enaenghono lovaengeli otali ka pondola shi fike peni. Kape na omunhu ile ondemoni tai dulu okulwifa etangakwaita laJehova enaenghono. Jehova oku na eenghono da shiya ko. Onghee hano, ngeenge oku li nafye, ovatondi vetu itava dulu oku tu finda, kashi na nee mbudi  kutya ove fike peni. (Ovatok. 6:16) Ohatu dulu okukala noushili mwaasho! Kaleka momadiladilo oinima oyo ngeenge wa tila oshinima osho omunailonga pamwe naave, omunafikola mukweni, ile omupambele oo ehe fi Ondombwedi a ninga, ile a popya. Dimbuluka kutya haave auke u li molwoodi olo. Oto shikula ewiliko laJehova.

15. Metwokumwe naJesaja 54:15, 17, omolwashike pehe na oo ta dulu okwiimba oshiwana shaKalunga shiha udife?

¹⁵ Ope na omatomheno mahapu oo tae tu ningifa tu kale tu tondike kounyuni ou tau pangelwa kuSatana. Ihatu kufa ombinga moinima yopapolotika ile moita. Ohatu udifa kombinga yedina laKalunga, hatu xumifa komesho Ouhamba waye kutya oo ashike tau ka eta ombili, nohatu diinine omifikamhango daye douyuki. Ohatu ulike kutya omupangeli wounyuni ou omunaipupulu nomudipai. (Joh. 8:44) Ohatu udifa yo kutya ounyuni waSatana otau ka hanaunwa po mafiku. Ashike Satana novayambididi vaye itava dulu nandenande oku tu imba tuha udife. Mepingafano naasho, ohatu twikile okutanga Jehova ngaashi hatu dulu. Nonande Satana oku na eenghono, ina dula okukelela etumwalaka lOuhamba liha hange ovanhu mounyuni aushe. Otwa dula ashike okuninga ngaho omolweameno laJehova. — Lesha Jesaja 54:15, 17.

16. Jehova ota ka amena ngahelipi ovapiya vaye poudjuu munene?

¹⁶ Oshike twa teelela monakwiiwa? Pefimbo loudjuu munene, Jehova ote ke tu amena meenghedi mbali da tongomana. Yotete, ota ka amena ovapiya vaye ovadiinini pefimbo opo eshi ta ka ningifa eehamba dokombada yedu di hanaune po Babilon Shinene, ouhamba womounyuni womalongelokalunga oipupulu. (Eh. 17:16-18; 18:2, 4) Opo nee ota ka amena ovapiya vaye eshi ta ka xulifa po oshixupe shounyuni waSatana puArmagedon. — Eh. 7:9, 10; 16:14, 16.

17. Ouwa ulipi hatu ka mona ngeenge otwa kala tu na ekwatafano la kola naJehova?

¹⁷ Ngeenge otu na ekwatafano la kola naJehova, Satana ite ke tu etela ouyahame tau kalelele. Oshoshili kutya Satana oye ta ka hanaunwa po filufilu. (Rom. 16:20) Onghee hano, kala wa djala oilwifo aishe nokukala to i longifa! Ino kendabala okulwifa Satana nounyuni waye oove auke. Yambidida ovamwatate novamwameme nokushikula ewiliko laJehova. Ngeenge owa ningi ngaho, oto ka kala noushili kutya Tate yetu womeulu ote ke ku pameka noku ku amena. — Jes. 41:10.