1. Metwokumwe naMateus 24:9, omolwashike shihe na oku tu kumwifa ngeenge ounyuni ou tu tonde?

JEHOVA okwe tu shita noukwatya wokuulikila vamwe ohole nokukala twa hala ve tu ulikile ohole. Ohatu udu nai ngeenge umwe e tu tonde, notashi dulika nokuli shi tu etele oumbada. Pashihopaenenwa, omumwameme wedina Georgina wokoEurope, okwa popya a ti: “Eshi nda li ndi na omido 14, meme okwa li a tonda nge eshi handi longele Jehova. Onda li ndi wete ndihe na oshilonga, nondi udite kutya ame omunhu wii.” * Omumwatate wedina Danylo okwa shanga a ti: “Eshi ovakwaita va denga nge, va ula nge omalaka mai nokuningila nge omatilifo molwaashi ndi li Ondombwedi yaJehova, onda li nda tila neenghono nonda fya ohoni.” Outondwe wa tya ngaho ohau tu udifa nai, ashike osho itashi tu kumwifa. Jesus okwa xunganeka kutya ohatu ka tondwa. — Lesha Mateus 24:9.

2-3. Omolwashike ovashikuli vaJesus ve tondike?

² Ounyuni ou tonde ovashikuli vaJesus. Omolwashike mbela? Omolwaashi katu li “oshitukulwa shounyuni,” ngaashi ashike Jesus. (Joh. 15:17-19) Oshidjemo, nonande otwa fimaneka omapangelo opanhu, ihatu a longele ile tu fimaneke omadidiliko oo e a lile po. Ohatu longele ashike Jehova oye aeke. Ohatu yambidida oushili oo kutya Kalunga oye ashike e na oufemba wokupangela ovanhu, ashike Satana ‘noludalo’ laye ove li omhinge nasho. (Gen. 3:1-5, 15) Ohatu udifa kutya Ouhamba waKalunga oo ashike tau ka kandula po omaupyakadi ovanhu notau ka xulifa po mafiku aveshe ovo ve li omhinge nao. (Dan. 2:44; Eh. 19:19-21) Etumwalaka olo oli li onghundana iwa kovananheni ile kovalininipiki, ofimbo kovahenakalunga li li onghundana ii. — Eps. 37:10, 11.

³ Otu tondike yo molwaashi ohatu kala metwokumwe nomifikamhango daKalunga douyuki. Omifikamhango da tya ngaho oda  yooloka ko filufilu ketaleko lounyuni. Pashihopaenenwa, ovanhu vahapu kunena ova tambula ko eenghedi inadi koshoka da fa daavo va li muSodom naGomorra, osho sha hanaunwa po kuKalunga. (Jud. 7) Ovanhu vahapu ohave tu popile mowii noku tu ula kutya otu li konima yefiya, molwaashi ohatu diinine omifikamhango dOmbiibeli di na sha nelihumbato lopaenghedi. — 1 Pet. 4:3, 4.

4. Omaukwatya elipi taa dulu oku tu pameka ngeenge ovanhu ove tu tonde?

⁴ Oshike tashi tu kwafele tu lididimike ngeenge ovanhu ove tu tonde nohave tu ula omalaka mai? Otwa pumbwa okukala tu na eitavelo la kola kutya Jehova ote tu kwafele. Ngaashi oshikelelifo, eitavelo letu otali dulu ‘okudima po oikuti aishe yomunawii ya xwama omundilo.’ (Ef. 6:16) Ndele otwa pumbwa shihapu shihe fi ashike eitavelo. Otwa pumbwa yo ohole. Omolwashike mbela? Omolwaashi ohole “ihai kenyanana.” Ohai tuvikile nohai lididimikile oinima aishe ii. (1 Kor. 13:4-7, 13) Paife natu ka taleni nghee ohole yokuhola Jehova, ovaitaveli vakwetu nosho yo nokuli novatondi vetu hai tu kwafele tu lididimikile outondwe.

5. Ohole yaJesus yokuhola Xe oya li ye mu pameka ngahelipi?

⁵ Ofimbo ovatondi vaye inave mu dipaa oufiku oo wa tetekela efyo laye, Jesus okwa li a lombwela ovashikuli vaye ovadiinini a ti: “Ondi hole Tate, [onghee] ohandi ningi naanaa ngaashi Tate a lombwela nge.” (Joh. 14:31) Ohole yaJesus yokuhola Jehova oya li ye mu pameka opo a dule okulididimikila omayeleko oo a li ta ka shakeneka. Ohole yetu yokuhola Jehova nayo otai dulu oku tu kwafela tu ninge ngaho.

6. Metwokumwe nOvaroma 5:3-5, ovapiya vaJehova ohava kala ve udite ngahelipi ngeenge tave lididimikile outondwe wounyuni?

⁶ Ohole yokuhola Kalunga ohai kwafela alushe ovapiya vaye ve lididimikile omahepeko. Pashihopaenenwa, eshi ovayapostoli va li va lombwelwa komhangu yopombada yOshijuda va efe po okuudifa, ohole yokuhola Kalunga oya li ye ve linyengifa va ‘dulike kuKalunga e li omupangeli ponhele yokudulika kovanhu.’ (Oil. 5:29; 1 Joh. 5:3) Ohole ya xwama ya tya ngaho ohai kwafele yo ovamwatate kunena va kale ovadiinini nonande otava hepekwa komapangelo omakwanyanya nomanaenghono. Ponhele yokuteka omukumo, ohatu shi tale ko shi li oufembanghenda okulididimikila outondwe wounyuni. — Oil. 5:41; lesha Ovaroma 5:3-5.

7. Otu na okulinyenga ngahelipi ngeenge hatu patanekwa kovapambele vetu?

⁷ Otashi dulika eshongo linene li dilile kovapambele vetu. Ngeenge ova mono kutya otu na ohokwe moshili, otashi dulika ovapambele vetu vamwe va diladile kutya otwa pukifwa. Vamwe otashi dulika va diladile kutya ohatu i eenghwengu. (Yelekanifa naMarkus 3:21.) Otashi dulika nokuli va ungaunge nafye nai. Omahepeko a tya ngaho kae na oku tu kumwifa. Jesus okwa ti: “Novaneumbo vomunhu mwene otave ke mu tonda.” (Mat. 10:36) Kashi na nee mbudi kutya ovapambele vetu ove tu tala ko ngahelipi, katu na oku va tala ko ve li ovatondi vetu. Mepingafano naasho, eshi ngoo ohole yetu yokuhola Jehova tai ende tai kulu, osho ngoo ohole yetu yokuhola ovanhu vakwetu nayo tai ende tai kulu. (Mat. 22:37-39) Ashike katu na okulipwililikila eemhango dOmbiibeli nosho yo omafinamhango ayo opo tu wapalele ovanhu.

8-9. Oshike sha kwafela omumwameme umwe a kale omudiinini nonande okwa li a taalela eyeleko la kwata moiti?

⁸ Georgina, oo a tumbulwa metetekelo, okwa dula okukala omudiinini nonande okwa li ta patanekwa kumeme waye. Georgina okwa ti: “Fye nameme otwa li twa hovela okukonakona Ombiibeli nEendombwedi. Ashike konima yeemwedi hamano eshi nda li nda hala okuya kokwoongala, oikala yameme oya li ya lunduluka. Onda li nda  mona kutya okwa li ha kwatafana novashunimonima nokwa li ha longifa omatomhafano avo ngeenge ta popi naame. Okwa li ha ula nge omalaka mai, ha shili nge meexwiki, ha pondo nge noku ku pula shi oishangomwa yange. Onda li nda ninginifwa eshi nda wanifa omido 15. Meme okwa li ta kendabala oku efifa nge po okulongela Jehova nokwa li a twala nge keumbo oko ku na ounona vamwe hava longifa oingangamifi nokulonga ominyonena. Omapataneko ohaa kala madjuu neenghono, unene tuu ngeenge otaa dilile komunhu oo e ku hole nohe ku file oshisho.”

⁹ Oshike sha li sha kwafela Georgina e lididimike? Okwa ti: “Efiku olo meme a hovela okupataneka nge, olo efiku olo nda mana ko okulesha Ombiibeli aishe. Onda li nda tomhwa filufilu kutya onda mona oshili, nonda li ndi udite nda ehena popepi elela naJehova. Onda kala handi mu ilikana lwoikando, noha nyamukula omailikano ange. Ofimbo nda li handi di keumbo oko meme a li a twala nge, omumwameme umwe okwa li a shiva nge keumbo laye notwa li twa konakona Ombiibeli pamwe. Ovamwatate novamwameme ova li hava pameke nge ngeenge tu li kOlupale lOuhamba. Ova li va tambula nge ko ndi li oshilyo shomaukwaneumbo avo. Onda mona kutya Jehova oku na eenghono e dule ovapataneki vetu, kashi na nee mbudi kutya ovo olyelye.”

10. Elineekelo lilipi hatu dulu okukala tu na muJehova Kalunga ketu?

¹⁰ Omuyapostoli Paulus okwa popya kutya kape na osho tashi dulu oku “tu tukula mohole yaKalunga okupitila muKristus Jesus Omwene wetu.” (Rom. 8:38, 39) Nonande otashi dulika tu kale hatu mono oixuna oule wefimbo, Jehova ohe tu hekeleke alushe noku tu pameka. Ngaashi twe shi mona moshimoniwa shaGeorgina, Jehova ohe tu kwafele yo okupitila movamwatate novamwameme.

11. Ohole oyo Jesus a tumbula muJohannes 15:12, 13 oya kwafela ngahelipi ovahongwa vaye? Yandja oshihopaenenwa.

¹¹ Oufiku oo wa tetekela efyo laye, Jesus okwa lombwela ovahongwa vaye va kale ve holafane. (Lesha Johannes 15:12, 13.) Okwa li e shii kutya ohole yavo yokuholafana otai ke va kwafela va kale va hangana nove lididimikile outondwe wounyuni. Natu ka taleni koshihopaenenwa sheongalo lokuTessalonika. Oilyo yeongalo olo oya kala tai hepekwa okudja ngoo eshi eongalo olo la totwa po. Ovamwatate novamwameme ovo ove li oshihopaenenwa shiwa shi na sha nokuulika oudiinini nohole. (1 Tes. 1:3, 6, 7) Paulus okwe va ladipika va twikile okuulika ohole “pauyadi.”  (1 Tes. 4:9, 10) Ohole oya li tai ke ve linyengifa va hekeleke ovo va polimana nokuyambidida ovo va nghundipala. (1 Tes. 5:14) Ova li va tula moilonga omalombwelo aPaulus, molwaashi monhumwafo onhivali oyo e ke va shangela konima yomudo, okwa popya a ti: ‘Ohole yeni yokuholafana otai ende tai kulu.’ (2 Tes. 1:3-5) Ohole yokuholafana oya li ye va kwafela ve lididimikile omaudjuu nomahepeko.

12. Ovamwatate novamwameme moshilongo shimwe ova li va ulikilafana ngahelipi ohole pefimbo loita?

¹² Natu ka taleni koshimoniwa shaDanylo, oo a tumbulwa metetekelo nosho yo omukulukadi waye. Eshi oita ya fika modoolopa yavo, ova li va twikila okukala hava i kokwoongala, okuudifa ngaashi tava dulu nosho yo okutukulilafana oikulya novamwaxe. Opo nee efiku limwe, meumbo laDanylo omwa li mwe uya ovakwaita va homata. Danylo okwa ti: “Ova lombwela nge kutya nandi efe po okukala Ondombwedi. Eshi nda dika eenyala medu, ova li va denga nge nokutilifa nge tava umbu eendjebo, eeholo tadi ende popepi nomutwe wange. Fimbo inava ya, ova lombwela nge kutya otava ka aluka ve uye va kwate omukulukadi wange onghonga. Ashike ovamwatate ova li ve tu londeka diva meshina lokolutenda tu ye kodoolopa imwe. Kandi na fiku ndi dimbwe ohole oyo nda ulikilwa kovamwatate ovo. Eshi twa fika kodoolopa oko twa ya, ovamwatate vomoshitukulwa ova li ve tu pa oikulya, nova kongela nge oilonga nosho yo eumbo. Osho oshe tu kwafela tu dule okukala hatu idilile Eendombwedi odo tadi di koitukulwa oko ku na oita.” Oimoniwa oyo otai ulike kutya ohole yopaKriste ohai tu kwafele tu lididimikile outondwe.

13. Omhepo iyapuki ohai tu kwafele ngahelipi tu lididimike eshi hatu longele Jehova nonande ovanhu ove tu tonde?

¹³ Jesus okwa lombwela ovashikuli vaye va kale ve hole ovatondi vavo. (Mat. 5:44, 45) Mbela oshipu ngoo okuninga ngaho? Hasho nandenande! Ashike otashi shiiva kekwafo lomhepo iyapuki yaKalunga. Oiimati yomhepo yaKalunga oya kwatela mo ohole, onheni, olune, omwenyo muwa nelipangelo. (Gal. 5:22, 23) Omaukwatya oo ohae tu kwafele tu lididimikile outondwe. Ovapataneki vahapu ova lundulula oikala yavo, molwaashi tashi dulika va ulikilwa omaukwatya oo opakalunga kovashamane vavo, kovakulukadi, kounona ile kovashiinda ovo ve li Eendombwedi. Ovapataneki vahapu paife ova ninga ovamwatate novamwameme. Ngeenge oho mono shidjuu okukala u hole ovanhu ovo ve ku tonde molwaashi to longele Jehova, ilikana  u pewe omhepo iyapuki. (Luk. 11:13) Kala wa tomhwa kutya okudulika kuKalunga oyo ashike onghedi ya denga mbada kuhe na vali. — Omayel. 3:5-7

14-15. Ongahelipi Ovaroma 12:17-21 va kwafela Yasmeen a ulikile ohole omushamane waye nonande ohe mu pataneke neenghono?

¹⁴ Natu ka taleni koshimoniwa shaYasmeen, wokOushilo woPokati. Omushamane waye okwa li ta diladila kutya okwa pukifwa eshi a ninga Ondombwedi yaJehova nokwa li ta kendabala oku mu ya moshipala aha longele Kalunga. Okwa li he mu tuku, nokuladipika ovapambele, omufita nosho yo ondudu ve mu ningile omatilifo kutya otave mu ningile owii wonhumba noku mu lundila kutya ota teya po oukwaneumbo waye. Omushamane waye okwa li a ula ovamwatate omalaka a honga pokwoongala. Yasmeen okwa li ha kala ta lili lwoikando, molwaashi okwa li ha ungaungiwa naye nonyanya.

¹⁵ Yasmeen okwa li ha hekelekwa kovamwatate novamwameme pOlupale lOuhamba. Ovakulunhuongalo ova li ve mu ladipika a tule moilonga Ovaroma 12:17-21. (Lesha.) Yasmeen okwa ti: “Kasha li shipu. Ashike onda li nda pula Jehova a kwafele nge nonda li nda ninga ngaashi handi dulu opo ndi tule moilonga osho Ombiibeli tai ti. Onda li handi wapaleke mokombifa ngeenge omushamane wange a halakanifila mo oimbodi. Ohandi popi naye nombili ngeenge ta tuku nge. Onda li handi mu file oshisho eshi a li ta vele.”

16-17. Oshike we lihonga moshihopaenenwa shaYasmeen?

¹⁶ Yasmeen okwa li a mona ondjabi eshi a ulikila omushamane waye ohole. Okwa ti: “Omushamane wange okwa hovela okulineekela nge molwaashi oku shii kutya alushe ohandi mu lombwele oshili. Okwa hovela okukala ha pwilikine kwaame nefimaneko ngeenge hatu popi oinima yopalongelokalunga, nokwa dimina kutya ita ningi vali oinima oyo hai nyono po ombili meumbo. Paife oha lombwele nge kutya nandi ka hafele okwoongala. Otu na ekwatafano liwa nomushamane wange paife, nomeumbo omu na ombili. Ondi na elineekelo kutya efiku limwe omushamane wange ota ka tambula ko oshili nohatu ka longela Jehova pamwe.”

¹⁷ Oshimoniwa shaYasmeen osha ulika kutya ohole “ohai tuvikile aishe, . . . hai teelele aishe nohai lididimikile aishe.” (1 Kor. 13:4, 7) Outondwe ou na eenghono nou yahameka, ashike ohole oi na eenghono i dule outondwe. Ohai linyengifa omitima dovanhu. Jehova oha kala a hafa ngeenge hatu ulikile ovanhu ohole. Ohatu dulu okukala twa hafa nonande ovapataneki vetu otava twikile okukala ve tu tonde. Ngahelipi mbela?

18. Omolwashike hatu dulu okukala twa hafa nonande otu tondike?

¹⁸ Jesus okwa ti: “Ngeenge ovanhu tave mu tondo, . . . otamu kala mwa hafa.” (Luk. 6:22) Ihatu hoolola okukala tu tondike. Ihatu kala twa hafa eshi hatu hepekwa molweitavelo letu. Ndele omolwashike hatu dulu okukala twa hafa nonande otu tondike? Natu ka taleni komatomheno atatu. Lotete, ngeenge otwe lididimike, ohatu kala twa hokiwa kuKalunga. (1 Pet. 4:13, 14) Etivali, eitavelo letu ohali kala li na ongushu nohali ende tali kolo. (1 Pet. 1:7) Etitatu, ohatu ka pewa ondjabi inene, omwenyo waalushe. — Rom. 2:6, 7.

19. Omolwashike ovayapostoli va li va hafa konima eshi va dengwa?

¹⁹ Diva konima yenyumuko laJesus, ovayapostoli ova li va mona ehafo olo a li ta popi. Konima eshi va dengwa nokulombwelwa kutya inava udifa vali ova kala va hafa. Omolwashike mbela? Omolwaashi ova li “va talika ko va wana okuhepekwa omolwedina laJesus.” (Oil. 5:40-42) Ova li ve hole unene Omwene wavo shi dulife oumbada wokutila ovatondi vavo. Ova li va ulika ohole yavo mokuudifa onghundana iwa “nopehe na okusholola.” Ovamwatate vahapu kunena otava twikile okulongela Jehova noudiinini nonande ova taalela omaudjuu. Ove shii kutya Jehova ke na efiku a dimbwe oilonga yavo nohole yavo mokufimaneka edina laye. — Heb. 6:10.

20. Oshike hatu ka kundafana moshitukulwa tashi shikula ko?

²⁰ Ovanhu ove na okukala ve tu tonde ofimbo tu li mounyuni ou wa nyonauka. (Joh. 15:19) Ashike inatu pumbwa okukala twa tila. Ngaashi hatu ke shi mona moshitukulwa tashi shikula ko, Jehova ‘ota ka pameka nokwaamena’ ovo ovadiinini kuye. (2 Tes. 3:3) Onghee hano, natu twikileni okukala tu hole Jehova, ovamwatate novamwameme nokuli novatondi vetu. Ngeenge otwa shikula omayele oo, ohatu ka kala moukumwe. Eitavelo letu otali ka kala la kola, hatu ka fimanekifa Jehova nohatu ka ulika kutya ohole oi na eenghono i dule outondwe.