Ovakriste vamwe ohava longifa oilongifo yopashinanena opo va kwatafane novapambele vavo nosho yo nEendombwedi dikwao. Ashike Ovakriste ovo va pyokoka pamhepo ohava kaleke momadiladilo omayele oo taa ti: “Omunaendunge eshi ta mono oshiponga, ota hondama. Ndelenee ovashima tava ehene ko, ndele tava mono oshiponga.” — Omayel. 27:12.

Otu shii kutya Jehova okwa hala oku tu amena. Onghee katu na okweendafana naavo hava eta etukauko, ovo va kondwa nosho yo ovo hava pengifa omahongo. (Rom. 16:17; 1 Kor. 5:11; 2 Joh. 10, 11) Vamwe ovo hava endafana neongalo otashi dulika ihava dulika keemhango dOmbiibeli. (2 Tim. 2:20, 21) Otu na okukaleka oshinima osho momadiladilo ngeenge hatu hoolola ookaume. Ashike kashipu okuhoolola ookaume pandunge hatu longifa omukalo wopaelektronika.

Osha fimana okukala twa lungama ngeenge hatu hoolola ookaume, ngeenge tu li meengudu dinene dokulitumina omatumwalaka. Ovakriste vamwe ova waimina eengudu dinene, odo di na ovanhu ve na elihumbato inali koshoka. Ongahelipi omumwatate ile omumwameme e na okukala a lungama ngeenge ongudu oi na ovanhu omafele ile omayovi? Itashi kala shipu okushiiva omaukwatya avo aveshe noupamhepo wavo. Epsalme 26:4 ola ti: “Ame ihandi kala omutumba pamwe neembudi, [noihandi] endafana naava ve na koshi.” Osho otashi ulike kutya oshi li pandunge okutuma omatumwalaka kovanhu ashike ovo tu shii.

Nokuli nonande ongudu oinini, Omukriste okwa pumbwa okulungamena efimbo olo ta longifa mokutuma omatumwalaka nosho yo osho ovanhu vomongudu oyo hava popi kombinga yasho. Katu na okukala tu udite kutya otu na ashike okunyamukula omatumwalaka, kashi na nee mbudi kutya otaa popi kombinga yashike, ile otashi pula efimbo li fike peni. Paulus okwa londwela Timoteus shi na sha noohandimwe ovo va li hava ‘ambe vakwao, nokulidopa moinima yavamwe.’ (1 Tim. 5:13) Kunena, oshipu okuninga oshinima sha yukila oko paelektronika.

Omukriste a pyokoka ita ka kufa ombinga ile a pwilikine kwaavo tava kembaula vamwe ile tava holola oiholekwa yOvakriste vakwao. (Eps. 15:3; Omayel. 20:19) Ota ka henuka yo omahokololo oo matilifa ile ehe na oushili muo. (Ef. 4:25) Onghee hano, otu na ouyelele wa kanghamena kOmbiibeli, eeraporta odo hatu dulu okulineekela odo di li ko-website yetu yo-jw.org nosho yo oprograma yetu yokomwedi, o-JW Broadcasting^®.

Eendombwedi dimwe ohadi longifa omatumwalaka opaelektronika opo di landife, di lande nodi shiivife oipindi yado ile di yandje oilonga kuvamwe. Oyo oinima ashike yopaipindi, ndele kai na sha nokulongela Jehova. Ovakriste ovo va hala okuhenuka ‘ohole yoimaliwa,’ ove na okukondjifa eshongo keshe lokulongifa ovamwatate, opo va likole oimaliwa. — Heb. 13:5.

Mbela otu na okulongifa omatumwalaka opo tu kongele ovamwatate oimaliwa ovo ve li momhumbwe ile ovo va hangwa koiponga yopaushitwe? Otu hole ovamwatate notu na ko nasha navo, nomolwaasho hatu yambidida ovo va pumbwa ekwafo noku va twa omukumo. (Jak. 2:15, 16) Ashike okuninga ngaho okupitila mongudu inene yomatumwalaka, otashi ka ya moshipala elongekido la denga mbada olo la tulwa po koshitaimbelewa shetu ile keongalo. (1 Tim. 5:3, 4, 9, 10, 16) Otu na oushili kutya kape na umwe womufye a hala okuningifa ovanhu va diladile kutya otu na oshinakuwanifwa she likalekelwa shokufila oshisho eedi daKalunga.

Otwa hala okuninga ashishe osho tashi fimanekifa Kalunga. (1 Kor. 10:31) Ngeenge otwa tokola okulongifa onghedi yokutuma omatumwalaka ile oinima imwe yopauteknologi, natu kaleke momadiladilo oinima oyo tai dulu okweeta oshiponga nokukala twa lungama.