1. Oshinima shilipi unene hashi nwefa mo omaukwatya etu?

 ATUSHENI otwa hala okukala tu na omaukwatya oo taa hafifa Jehova, kashi na nee mbudi kutya opo twa ninginifwa, ile otwa ninginifwa omido da ka lupuka. Opo tu dule okuninga ngaho, otwa pumbwa okupangela omadiladilo etu. Omolwashike mbela? Omolwaashi omadiladilo etu ohaa nwefa mo omaukwatya etu. Ngeenge otwa kala hatu diladila komahalo etu opambelela, ohatu ka popya nokuninga oinima inai yuka. (Ef. 4:17-19) Mepingafano naasho, ngeenge otwa yadifa omadiladilo etu noinima iwa, ohatu ka popya nokukatuka monghedi oyo tai hafifa Tate yetu, Jehova. — Gal. 5:16.

2. Omapulo elipi hatu ka kundafana moshitukulwa eshi?

² Oshitukulwa sha tetekela oshe tu kwafela tu mone kutya itatu dulu okukelela omadiladilo aeshe mai aha kale taa ingaana mufye. Ndele ohatu dulu okuhoolola tuha katuke metwokumwe nao. Fimbo inatu ninginifwa, otwa li tu na okweefa po okupopya nokukatuka monghedi oyo Jehova e tonde. Naayo oyo onghatu yotete noya fimanenena i na sha nokulidula omunhu mukulu. Ashike opo tu hafife Jehova filufilu, otwa pumbwa okudulika koshipango osho tashi ti: ‘Djaleni omunhu mupe.’ (Kol. 3:10) Moshitukulwa eshi, ohatu ka nyamukula omapulo taa shikula: “Omunhu mupe” oshike? Ongahelipi hatu dulu okudjala omunhu mupe nokutwikila okukala twe mu djala?

3. Metwokumwe nOvagalati 5:22, 23 “omunhu mupe” oshike, noha djalwa ngahelipi?

³ Omunhu oo ha djala “omunhu mupe” oha hopaenene Jehova. Omunhu oha djala omunhu mupe, ngeenge ta ulike oiimati yomhepo yaKalunga, ta pitike omhepo iyapuki i nwefe mo omadiladilo aye, omaliudo neenghatu daye. (Lesha Ovagalati  5:22, 23.) Pashihopaenenwa, oku hole Jehova noshiwana shaye. (Mat. 22:36-39) Omunhu a tya ngaho, oha kala a hafa, nonande okwa taalela omashongo. (Jak. 1:2-4) Oha pange ombili novanhu vakwao. (Mat. 5:9) Oku li omulididimiki noku na onghenda, ngeenge ta ungaunga navakwao. (Kol. 3:13) Oku hole ouwa nohe u longo. (Luk. 6:35) Oha ulike okupitila meenghatu daye kutya oku na eitavelo la pama muXe womeulu. (Jak. 2:18) Oha kala a ngungumana, ngeenge ta shindwa. Oha kala yo e na elipangelo, ngeenge ta yelekwa. — 1 Kor. 9:25, 27; Tit. 3:2.

4. Opo tu djale omunhu mupe, mbela otwa pumbwa okukulika omaukwatya aeshe oo a tumbulwa mOvagalati 5:22, 23 poshikando shimwe? Shi yelifa.

⁴ Opo tu djale omunhu mupe, otwa pumbwa okukulika omaukwatya aeshe oo a tumbulwa mOvagalati 5:22, 23 nosho yo meevelishe dikwao dOmbiibeli. * Omaukwatya a tya ngaho, inaa fa oikutu oyo hatu hoolola okudjala efimbo nefimbo. Oshoshili kutya mahapu omomaukwatya oo okwa pambafana nomaukwatya makwao. Pashihopaenenwa, ngeenge ou hole omunhu mukweni, oto ke mu lididimikila noku mu ulikila olukeno. Opo yo u kale omunhu muwa, ou na okukala u na omwenyo muwa nelipangelo.

5. Osha hala okutya ngahelipi okukala tu “shii omadiladilo aKristus,” nomolwashike tu na okukonakona onghalamwenyo yaye? (1 Ovakorinto 2:16)

⁵ Lesha 1 Ovakorinto 2:16. Opo tu djale omunhu mupe, otwa pumbwa okukala tu “shii omadiladilo aKristus.” Oku shi popya noitya imwe, otwa pumbwa okulihonga nghee Jesus a li ha diladila, fye hatu mu hopaenene. Jesus oha ulike oiimati yomhepo yaKalunga monghedi ya wanenena. Omaukwatya aJehova ohaa kala e liwetikile muJesus, ngaashi ashike omunhu to litalele mesipili la yela nawa. (Heb. 1:3) Ngeenge otwa kala hatu diladila ngaashi Jesus, ohatu ka katuka ngaashi ye. Ohatu ka dula okuhopaenena filufilu omaukwatya aye. — Fil. 2:5.

6. Oinima ilipi tu na okukaleka momadiladilo, eshi hatu kendabala okudjala omunhu mupe?

⁶ Mbela otashi shiiva ngoo okushikula oshihopaenenwa shaJesus? Otashi dulika tu diladile kutya: ‘Jesus okwa wanenena. Katu na fiku tu mu fe nandenande!’ Ngeenge naave osho u udite ngaho, dimbuluka oinima ei. Shotete, owa shitwa oshifeka shaJehova naJesus. Onghee hano, oto dulu oku va hopaenena, noto dulu okupondola fiyo oposhitwa shonhumba.  (Gen. 1:26) Oshitivali, omhepo iyapuki yaKalunga oi na eenghono dinenenene meshito alishe. Oto dulu okuwanifa po oinima aishe oyo ito dulu okuninga kwoove vene, kekwafo lomhepo iyapuki. Oshititatu, Jehova ina teelela u ulike oiimati yomhepo iyapuki monghedi ya wanenena paife. Oshoshili kutya Tate yetu omunahole ota ka pa ovo ve na eteelelo lokukala kombada yedu omido 1 000, opo va fike mewaneneno. (Eh. 20:1-3) Jehova okwa teelela paife tu kendabale ngaashi hatu dulu nokukala twe mu lineekela, opo e tu kwafele.

7. Oshike hatu ka kundafana paife?

⁷ Ongahelipi hatu dulu okuhopaenena Jesus moinima yokondadalunde? Ohatu ka konakona pauxupi omaukwatya ane, oo haa imikwa komhepo yaKalunga. Opo nee ohatu ka tala osho hatu lihongo kunghee Jesus a li a ulika oukwatya keshe. Ohatu ka kundafana yo omapulo onhumba, oo tae ke tu kwafela tu tale nghee hatu dulu okudjala omunhu mupe.

8. Jesus okwa ulika ngahelipi kutya oku na ohole?

⁸ Molwaashi Jesus oku hole neenghono Jehova, okwa ninga omaliyambo omolwaXe nomolwetu. (Joh. 14:31; 15:13) Eshi Jesus a li kombada yedu, okwa ulika nghee a li e hole neenghono ovanhu. Efiku keshe, okwa kala ha ulikile ovanhu ohole noku va kenukila, nokuli nonande vamwe ova li tave mu pataneke. Nonghedi ya denga mbada omo e va ulikila ohole, omoku va honga kombinga yOuhamba waKalunga. (Luk. 4:43, 44) Jesus okwa ulika yo kutya oku hole Kalunga nosho yo ovanhu, eshi e liyandja nehalo liwa a mone oixuna nokudipawa kovalunde. Nokungaho, okwa yeululila ovanhu aveshe omhito yoku ka mona omwenyo waalushe.

9. Ongahelipi hatu dulu okuulika ohole, ngaashi Jesus?

⁹ Otwe liyapulila Jehova notwa ninginifwa, molwaashi otu hole Tate yetu womeulu. Onghee hano, ngaashi Jesus, otu na okuulika kutya otu hole Jehova monghedi omo hatu ungaunga novanhu vakwetu. Omuyapostoli Johannes okwa shanga a ti: “Ou ehe hole omumwaxe oo e wete, ita dulu okukala e hole Kalunga oo ehe wete.” (1 Joh. 4:20) Lipula kutya: ‘Mbela ondi hole ngoo neenghono ovanhu vakwetu? Ohandi ungaunga ngoo navo nolukeno, nonande ihava ungaunga naame nawa? Mbela ohole ohai linyengifa nge ngoo ndi longife efimbo lange noiniwe yange, opo ndi kwafele vakwetu ve lihonge kombinga yaJehova? Mbela ohandi kala ngoo nda halelela okuninga ngaho, nokuli nonande ovanhu vahapu inava lenga eenghendabala dange, ile tava pataneke nge? Ohandi kongo ngoo eenghedi ndi longife efimbo lihapu moilonga yokuninga ovanhu ovahongwa?’ — Ef. 5:15, 16.

10. Jesus okwa ulika ngahelipi kutya oku li omunambili?

¹⁰ Jesus okwa li ha pange ombili novanhu. Ngeenge ovanhu va li va ungaunga naye nai, ka li he va alulile owii. Ashike okwa li ha ningi shihapu shi dulife opo. Okwa li ha katuka eenghatu, opo a pange ombili navo. Okwa li yo ha ladipike vamwe va pongolole po okuhaudafana pokati kavo. Pashihopaenenwa, okwa li e va honga va pange ombili novamwaxe, ngeenge ova hala Jehova a kale e va hokwa, eshi tave mu longele. (Mat. 5:9, 23, 24) Okwa li a kwafela ovayapostoli lwoikando va efe po okutwa eemhata di na sha naao munene e dule vakwao. — Luk. 9:46-48; 22:24-27.

11. Ongahelipi hatu dulu okukala ovanambili?

¹¹ Opo tu kale ovanambili, otwa pumbwa okuninga shihapu, shihe fi ashike okuhenuka eenhamanana. Otwa pumbwa okuninga eenghendabala tu pange ombili novanhu vakwetu. Otwa hala yo okuladipika ovamwatate novamwameme va pongolole po okuhaudafana oko ku li pokati kavo. (Fil. 4:2, 3; Jak. 3:17, 18) Ohatu dulu okulipula omapulo aa: ‘Mbela onda halelela ngoo okuninga omaliyambo, opo ndi pange ombili navakwetu? Ngeenge omumwatate, ile omumwameme a udifa nge nai, mbela ohandi  mu kwatele onghone? Mbela ohandi teelele omunhu mukwetu oye a katuke onghatu tete, opo tu pange ombili naye? Ile aame handi katuka onghatu tete, nonande oye ta monika a fa oye a eta oupyakadi? Ohandi ladipike ngoo ovo ve na eenhamanana pokati kavo va pange ombili, ngeenge otashi shiiva?’

12. Jesus okwa ulika ngahelipi kutya oku na onghenda?

¹² Jesus okwa li omunanghenda. (Mat. 11:28-30) Okwa ulika kutya omunanghenda mokukala ha tifuka, nonande okwa li a taalela eenghalo didjuu. Pashihopaenenwa, eshi omukainhu Omufoinikia a li e mu indila a velule okaana kaye, potete okwa li a anya eindilo laye. Ashike eshi a mona kutya okwa ulika eitavelo linene, okwa velula okaana kaye. (Mat. 15:22-28) Nonande okwa li e na onghenda, ka li ha lile ovanhu okafima koluko. Omafimbo amwe, okwa li ha ulike kutya oku na onghenda mokuhambebeleka ovo e hole. Pashihopaenenwa, eshi Petrus a li ta kendabala okuteya omukumo Jesus aha longe ehalo laJehova, Jesus okwa li e mu hanyena moipafi yovahongwa vakwao. (Mark. 8:32, 33) Ka li a ninga ngaho, opo ngeno a fife ohoni Petrus, ndele okwa li te mu deula nokulondwela ovahongwa vakwao vaha kale ve na ounhwa. Osha yela kutya Petrus oku na okukala a li a fya ohoni. Ashike nande ongaho, oku na okukala a li a mona ouwa momayele oo a pewa.

13. Ongahelipi hatu dulu okukala ovananghenda?

¹³ Opo tu file onghenda ovo tu hole, omafimbo amwe otashi dulika twa pumbwa oku va pa omayele nopehe na oku va lila okafima koluko. Opo tu ninge ngaho, otwa pumbwa okuhopaenena Jesus mokukala hatu yandje omayele a kanghamena kEendjovo daKalunga. Kala u na ondjele. Kala u na oushili kutya navo ova hala okulonga osho sha yuka. Otava ka tambula ko omayele oo to va pe, molwaashi ove hole Jehova nove ku hole. Oto dulu okulipula omapulo aa: ‘Mbela ondi na ngoo ouladi wokupopya, ngeenge onda mono umwe oo ndi hole ta ningi sha sha puka? Ngeenge handi yandje omayele, ohandi popi ngoo nonghenda, ile ohandi popi monghedi tai yahameke? Oshike tashi linyengifa nge ndi yandje omayele? Mbela ohandi a yandje komunhu oo, molwaashi ta ningile nge nai? Ile ohandi a yandje, molwaashi nda hala oku mu kwafela?’

14. Jesus okwa ulika ngahelipi kutya oha longo ouwa?

¹⁴ Jesus ka li ashike e shii ouwa, ndele okwa li yo he u longo. Molwaashi Jesus oku hole Xe, okwa li ha longo alushe osho sha yuka, te shi ningi nelinyengotomheno liwa. Oukwatya wouwa ohau limonikila mo nghee hau kumu ovo tava longelwa ouwa. Omunhu muwa alushe oha kongo eemhito, opo a kwafele vamwe noku va ningila oinima iwa. Inashi wana ashike okushiiva okulonga osho shiwa, ndele otu na okulonga osho sha yuka, hatu shi ningi nelinyengotomheno liwa. Umwe otashi dulika e lipule kutya: ‘Mbela otashi shiiva ngoo okulonga osho sha yuka nelinyengotomheno la puka?’ Heeno, otashi shiiva. Pashihopaenenwa, pomhito imwe Jesus okwa li a popya shi na sha naavo va li va yandja oikwafa keehepele, ashike ova li ve i yandja moipafi yavamwe, opo ve va pandule. Nonande oilonga oyo va longa oiwa, Jehova ka li e va hafela. — Mat. 6:1-4.

15. Ongahelipi hatu dulu okukala ovanhu vawa?

¹⁵ Ohatu dulu ashike okukala ovanhu vawa, ngeenge ohatu ningi oinima ya yuka noitatu shi ningi nelinyengotomheno lokuliholamwene. Onghee hano, ohatu dulu okulipula kutya: ‘Mbela ohandi longo ngoo oilonga oyo ndi shii kutya oya yuka? Oshike hashi linyengifa nge ndi longe ouwa?’

16. Oshike tu na okuninga efiku keshe, nomolwashike?

¹⁶ Katu na okudiladila kutya ngeenge otwa ninginifwa otwa kwata ko ohambo nomaholo ayo,  ile tu tye otwa djala omunhu mupe filufilu, noinatu pumbwa vali okuninga eenghendabala dasha. Omunhu mupe ota dulu okufaafanifwa “noshikutu shipe” shiwa osho twa pumbwa okukwata nawa. Onghedi imwe hatu dulu okuninga ngaho, omokukonga eenghedi efiku keshe tu ulike oiimati yomhepo yaKalunga. Omolwashike mbela? Omolwaashi Jehova oku li Kalunga ta longo, nomhepo yaye iyapuki oi li eenghono daye tadi longo. (Gen. 1:2) Onghee hano, oiimati yomhepo iyapuki aishe otai dulu oku tu linyengifa nafye tu katuke eenghatu. Pashihopaenenwa, omuhongwa Jakob okwa shanga a ti: ‘Eitavelo lihe na oilonga ola fya.’ (Jak. 2:26) Ohatu dulu okupopya ngaho shi na sha nomaukwatya makwao aeshe oiimati yomhepo yaKalunga. Efimbo keshe hatu i ulike, ohatu ulike kutya omhepo yaKalunga otai longo mufye.

17. Otu na okulinyenga ngahelipi, ngeenge otwa dopa okuulika oiimati yomhepo?

¹⁷ Nokuli nOvakriste ovo va ninginifwa pa pita omido dihapu, navo ohava dopa okuulika oiimati yomhepo iyapuki. Ashike osho sha fimanenena oshosho kutya, ino sholola. Diladila kefaneko eli. Ngeenge owa pombola oshikutu shoye, osho u hole neenghono, mbela oto ka endelela u shi ku pule shi? Hasho nandenande. Luhapu ohatu shi hondjo noukeka, ngeenge otashi shiiva. Nokudja opo, ohatu kala twa lungama. Sha faafana, pomhito imwe ngeenge owa li wa dopa okufila onghenda umwe, oku mu lididimikila, ile okuungaunga naye pahole, ino teka omukumo. Ngeenge owa yandje ombili tashi di komutima, otashi ke ku kwafela u pange vali oukaume nomunhu a tya ngaho. Kala wa tokola toko okuninga osho shiwa moshikando tashi uya.

18. Otu na oushili ulipi?

¹⁸ Inatu pandula tuu eshi Jesus e tu tulila po oshihopaenenwa shiwa! Ngeenge otwa kala hatu hopaenene onghedi yaye yokudiladila, otashi ke tu kwafela tu mu hopaenene. Otashi ka kala shipu kufye okudjala omunhu mupe, ngeenge ohatu hopaenene luhapu Jesus. Moshitukulwa eshi, otwa konakona ashike oiimati yomhepo yaKalunga ine. Omolwashike ito kongo efimbo, opo u talulule oiimati yomhepo ikwao nokutala nghee to shi endifa? Opo u mone omusholondodo woitukulwa i na sha naasho, tala membo Elongifwambo lokukonga Omauyelele mOishangomwa yEendombwedi daJehova koshi yoshipalanyole “Onghalamwenyo yopaKriste,” opo nee to i pokapalanyole “Oiimati yomhepo.” Oto dulu okukala noushili kutya ngeenge owa longo ko ombinga yoye, Jehova ote ke ku kwafela u twikile okudjala omunhu mupe.