Vamwe ovo va lesha ehokololo olo meendelelo ova pula epulo la tya ngaho. Ashike mehokololo omo omwa tumbulwa ovalumenhu vavali va yoolokafana, ovo ve na edina Mefiboset. Ohatu ke lihonga mo sha, ngeenge otwa konakona osho sha ningwa po.

Ohamba yaIsrael, Saul, oya li i na ovanamati vaheyali novanakadona vavali. Jonatan oye a li oshiveli shaye. Lwanima, Saul okwa ka dala okamonamati nomukulukadi wopomunghulo, Rispa, ndele te ka luku Mefiboset. Shihokwifa, Jonatan naye okwa ka dala okamonamati, ndele te ka luku Mefiboset. Nomolwaasho ohamba Saul ya kala i na omonamati Mefiboset nosho yo omutekulu e na edina la faafana.

Pomhito imwe, ohamba Saul oya li ya pilukila po Ovagibeon, ovo va li mokati kOvaisrael, noya li ya hala oku va komba po filufilu. Vahapu vomuvo ova li va dipawa, naasho osha li sha puka filufilu. Omolwashike mbela? Omolwaashi pefimbo laJosua, ovakulunhu vOvaisrael ova li va ninga eano lombili nOvagibeon. — Jos. 9:3-27.

Eano olo ola li natango tali longo nopefimbo lohamba Saul. Ashike nande ongaho, ohamba oya li ya kendabala okukomba po filufilu Ovagibeon. Osho osha ningifa ‘Saul nepata laye va kale ve na etimba lohonde.’ (2 Sam. 21:1) Lwanima, David okwa ka ninga ohamba. Ovagibeon, ovo va li va xupa po, ova li ve mu lombwela kombinga yenyono olo. David okwe va pula kutya oshike va hala e va ningile omolwoshinima shinyanyalifi osho Saul a ninga. Osho osha li sha pa Jehova omhito a nangeke noupuna oshilongo shavo. Ponhele Ovagibeon va pule oimaliwa, ova li va pula ovanamati vaheyali vomulumenhu oo ‘a li a pangela omhangela yoku va hanauna po’ va dipawe. (Num. 35:30, 31) David okwa li e va ningila osho va pula. — 2 Sam. 21:2-6.

Pefimbo opo, Saul naJonatan ova hangwa va fila molwoodi, ashike Mefiboset, omonamati waJonatan, okwa li e li natango momwenyo. Okwa li a ninga oshilema, eshi a li munini. Onghee ka li a yambidida xekulu, eshi a li ta ponokele Ovagibeon. David ova li va ninga eano loukaume naJonatan, olo la kwatela mo okwaamena oludalo laJonatan, mwa kwatelwa naMefiboset. (1 Sam. 18:1; 20:42) Ehokololo ola ti: “Ohamba [David] ya fila onghenda Mefiboset yaJonatan yaSaul, omolweano kOmwene, la li pokati kaDavid naJonatan yaSaul.” — 2 Sam. 21:7.

David okwa li a fimaneka osho Ovagibeon ve mu pula. Okwa li a yandja ovanamati vavali vaSaul, oo umwe womuvo a li Mefiboset nosho yo ovatekulu vaSaul vatano. (2 Sam. 21:8, 9) Onghatu oyo David a li a katuka oya li ya xulifa po etimba lohonde moshilongo.

Kakele kouyelele u na sha nondjokonona, mehokololo omo ohatu lihongo mo shihapu. Omhango yaKalunga oya li ya yela. Oya popya ya ti: ‘Ovana kave okudipawa omolwomanyono ooxe.’ (Deut. 24:16) Jehova ka li ta ka pitika osho sha ningilwa ovamati vavali vaSaul nosho yo ovatekulu vatano, ngeenge kava li ve na ondjo. Omhango oya weda ko ya ti: “Keshe umwe e nokufya omolwoulunde waye mwene.” Osha fa shi li ngaha kutya ovanamati vavali vaSaul nosho yo ovatekulu vaye vatano ova li va kufa ombinga meponokelo, eshi Saul a li a dipaifa Ovagibeon. Oshidjemo, ovo vaheyali ova li va futila po enyono lavo.

Ehokololo olo ola hala okutya omunhu ita dulu okulipopila omolwenyono olo a ninga mokudiladila, ile mokupopya kutya okwa li ta shikula filufilu omalombwelo. Eyeletumbulo limwe ola popya la ti: “Elila lomhadi yoye li yelakanifa neendjila doye adishe nadi kale da pama.” — Omayel. 4:24-27; Ef. 5:15.