1. Oshike ovadali va halela ounona vavo?

 OVADALI, otu shi shii kutya omwa hala okukwafela ounona veni va shiive nova kale ve hole Jehova. Ashike Kalunga iha monika. Ongahelipi tamu dulu okukwafela ounona veni ve mu tale ko e li Omunhu wolela nova ehene popepi naye?​—Jak. 4:8.

2. Ongahelipi ovadali tava dulu okuhonga ounona vavo kombinga yomaukwatya aJehova?

² Onghedi imwe ya fimana yokukwafela ounona va ehene popepi naJehova, omokukonakona Ombiibeli pamwe navo. (2 Tim. 3:14-17) Ashike Ombiibeli oya popya vali onghedi imwe omo ounona tava dulu okulihonga kombinga yaJehova. Membo lOmayeletumbulo omwa popiwa xe omudali ta dimbulukifa omonamati waye aha dimbwe omaukwatya aJehova, oo a ulikwa okupitila meshito. (Omayel. 3:19-21) Ohatu ka kundafana eenghedi dimwe omo ovadali tava dulu okulongifa eshito, opo va kwafela ounona vavo ve lihonge kombinga yomaukwatya aJehova.

3. Ekwafo lilipi ovadali ve na okupa ounona vavo?

³ Ombiibeli oya popya kutya “omaukwatya [aKalunga] oo ihaa dulu okumonika kovanhu, . . . okwa kala e liwetikile filufilu okudja peshito lounyuni ngeenge oinima oyo a shita tai konakonwa.” (Rom. 1:20) Ovadali, otashi dulika hamu hafele oku ka enda mo nounona veni. Onghee longifeni omhito oyo, opo mu va kwafele va mone ekwatafano olo li li pokati koinima oyo Jehova a “shita” nomaukwatya aye makumwifi. Natu ka taleni kutya oshike ovadali tava dulu okulihonga koshihopaenenwa shaJesus.

4. Ongahelipi Jesus a li a longifa eshito, opo a honge ovahongwa vaye? (Lukas 12:24, 27-30)

 ⁴ Natu ka kundafaneni nghee Jesus a li a longifa eshito, opo a honge. Pomhito imwe, okwa li a pula ovahongwa vaye va tale komakola nosho yo keengala. (Lesha Lukas 12:24, 27-30.) Jesus okwa li ta dulu okulongifa oshinamwenyo, ile oshimeno keshe, ashike okwa li a hoolola okadila nosho yo ongala, oyo ovahongwa vaye va li ve shii nawa. Ovahongwa otashi dulika va li ve wete omakola taa tuka pombada nosho yo eengala tadi monika nawa, odo di li moixwa. Faneka nee ngeno momadiladilo nghee Jesus a li ta ulike oinima oyo, eshi a li ta popi. Oshike a li a ninga po, konima eshi a tumbula oihopaenenwa oyo? Okwa li a honga ovahongwa vaye oshilihongomwa sha fimanenena shi na sha nokuyandja nehalo liwa kwaXe womeulu nosho yo olukeno laye. Jehova ota ka palula nokudjaleka ovapiya vaye ovadiinini, ngaashi ashike he shi ningile omakola nosho yo eengala domoixwa.

5. Oihopaenenwa yomeshito ilipi ovadali tava dulu okulongifa, eshi tava hongo okaana kavo kombinga yaJehova?

⁵ Ovadali, mbela itamu dulu okuhopaenena onghedi yaJesus yokuhonga? Otashi dulika u lombwele okaana koye shi na sha noinima oyo ho hafele meshito, ngaashi oshinamwenyo osho u hole, ile oshimeno. Eshi to ningi ngaho, shilipaleka kutya owe ka yelifila kutya oshihopaenenwa osho otashi tu hongo shike kombinga yaJehova. Opo nee oto dulu okupula okaana koye kombinga yoshinamwenyo, ile oshimeno osho ke hole. Ngeenge owa longifa oshinima shomeshito osho ke na ohokwe musho, otashi dulika ka yandje elitulemo filufilu, eshi to popi kombinga yomaukwatya aJehova.

6. Oshike hatu dulu okulihonga koshihopaenenwa shaina yaChristopher?

⁶ Mbela ovadali ove na okulongifa efimbo lihapu mokuninga omapekaapeko e na sha noshinamwenyo, ile oshimeno shonhumba, ofimbo inava kundafana kutya oshishitwa osho otashi holola shike kombinga yaJehova? Hasho naanaa. Jesus ka li a longifa eyelifo lilelile, eshi a li ta yelifa shi na sha nokupalulwa kwomakola, ile okukula kweengala. Nokuli nonande okaana koye ohaka hafele eenghundafana domoule di na sha neshito, omafimbo amwe owa pumbwa ashike okuninga etyekosha li li paunafangwa, ile epulo, opo u ka kwafele ka ude ko osho to ka lombwele. Didilika osho omumwatate wedina Christopher ta dimbuluka okudja kounona waye, okwa ti: “Omafimbo amwe, meme okwa li ha ningi omatyekosha e li paunafangwa, opo e tu kwafele tu kale tu na olupandu li na sha neshito. Pashihopaenenwa, ngeenge tu li popepi neemhunda, otashi dulika a tye: ‘Taleni eemhunda odo dinene nodiwa. Jehova ke mu kumwifi tuu!’ Ile ngeenge tu li popepi nefuta, otashi dulika a tye: ‘Taleni komakufikufi oo manene. Kalunga ke fi tuu omunaenghono?’” Christopher okwa ti: “Omatyekosha, oo e li paunafangwa notaa ti sha, okwe tu kuma neenghono.”

7. Ongahelipi to dulu okudeula ounona voye va kale hava dilonga keshito?

⁷ Eshi ounona voye tava ende tava kulu, oto dulu oku va deula va kale hava dilonga keshito nove lihonge kombinga yomaukwatya aJehova. Oto dulu okudivilika oshinima shimwe osho Kalunga a shita nokupula ounona voye kutya, “Osho otashi tu hongo shike kombinga yaJehova?” Otashi dulika u ka kuminwe okuuda osho tava ka tya.​—Mat. 21:16.

8. Omhito ilipi ovadali Ovaisrael va li ve na, ngeenge ve li “mondjila”?

⁸ Ovadali Ovaisrael ova li va ladipikwa va honge ovana vavo oipango yaJehova, ngeenge ve li “mondjila.” (Deut. 11:19) Kondje yaIsrael  okwa li kwa enda eendjila dihapu omo to dulu okumona oinamwenyo i lili noku lili, oudila nosho yo eengala. Ngeenge omaukwaneumbo Ovaisrael a ya molweendo taa ende meendjila odo, ovadali ova li ve na omhito yokuhonga ovana vavo kombinga yoinima oyo Jehova a shita. Ovadali kunena nanye otashi dulika mu na eemhito da faafana dokuhonga ovana veni tamu longifa eshito. Natu ka taleni nghee ovadali vamwe va ninga ngaho.

9. Oshike to dulu okulihonga kuPunitha naKatya?

⁹ Omudalakadi wedina Punitha, oo ha di modoolopa inene moIndia, okwa ti: “Ngeenge twa ka talela po ovapambele ovo ve li koitukulwa oyo i li kondje yodoolopa, ohatu longifa omhito ya tya ngaho tu kwafele ounona vetu ve lihonge kombinga yeshito laJehova likumwifi. Ondi udite kutya ounona vange ohava udu ko nawa eshito, ngeenge va dja mo modoolopa oyo i yadi ovanhu nosho yo oihauto.” Ovadali, ounona veni otashi dulika vaha dimbwe omafimbo oo mwa kala navo peenhele odo diwa. Katya, omumwameme wokoMoldova, okwa ti: “Omafimbo mawa, oo itandi dimbwa okudja kounona wange, oyoo nda kala pamwe novadali vange kondje yodoolopa. Onde va pandula, eshi va honga nge okudja kounona okukanghama, okukonenena eshito laJehova noku mu shiiva okupitila meshito laye.”

10. Oshike ovadali tava dulu okuninga, ngeenge oshidjuu kuvo okufiya po odoolopa? (Tala oshimhungu “ Ekwafo kovadali.”)

¹⁰ Ongahelipi ngeenge oshidjuu kwoove okuya keenhele odo di li kondje yodoolopa? Amol, oo naye ha di moIndia, okwa ti: “Moshitukulwa shetu, ovadali ove na okulonga eevili dihapu, noshi na ondilo oku ka talela po eenhele odo di li kondje yodoolopa. Ashike oto dulu okutala keshito laJehova nokupopya kombinga yalo, ngeenge mu li mokaparka, ile kombada yetungo.” Ngeenge owa tale noukeka, otashi dulika u mone oinima ihapu yomeshito, oyo i li popepi neumbo leni, oyo to dulu okuulikila ounona voye. (Eps. 104:24) Otashi dulika u mone oudila, oupuka, oimeno naikwao ihapu. Karina, wokoGermany, okwa ti: “Meme oku hole eengala,  onghee eshi nda li ndi munini, okwa li ha ulikile nge eengala diwa, ngeenge hatu ende.” Ovadali, otamu dulu yo okulongifa ouvidio noishangomwa oyo ya nyanyangidwa kehangano letu, opo mu honge ounona veni kombinga yeshito. Kashi na nee mbudi kutya oho di peni, oto dulu okukwafela ovana voye va konakone osho Kalunga a shita. Paife, natu ka kundafaneni omaukwatya amwe aJehova, oo to dulu okulombwela ounona voye.

11. Ongahelipi ovadali tava dulu okukwafela ounona vavo va didilike mo ohole yaJehova?

¹¹ Opo u kwafele ounona voye va didilike mo ohole yaJehova, oto dulu okupopya monghedi yopahole omo oinamwenyo ihapu hai file oshisho ounimwena vayo. (Mat. 23:37) Oto dulu yo okupopya kombinga yoinima ikumwifi i lili noku lili oyo hatu hafele neenghono meshito. Karina, oo a popiwa metetekelo, okwa ti: “Ngeenge hatu ende, meme oha lombwele nge tu kanghame po kanini nokutala nghee ongala keshe ye likalekelwa nanghee ewapalo layo tali holola ohole yaJehova. Konima yomido, onda kala handi tale noukeka keengala, nonda didilika nghee oluvala nomutungilo wakeshe imwe wa yooloka ko. Otadi twikile okuhonga nge nghee Jehova e tu hole.”

12. Ongahelipi ovadali tava dulu okukwafela ounona vavo va didilike mo ounongo waKalunga? (Epsalme 139:14) (Tala yo efano.)

¹² Kwafela ounona voye va didilike mo ounongo waKalunga. Jehova oku na ounongo wa shiya ko e tu dule. (Rom. 11:33) Oto dulu okupopya nghee omeva haa i mombada, opo a ninge oilemo, oyo hai ende, opo i loke keenhele neenhele. (Job 38:36, 37) Oto dulu yo okupopya nghee omalutu etu a shitwa monghedi ikumwifi. (Lesha Epsalme 139:14.) Natu ka taleni nghee xe omudali wedina Vladimir a ninga ngaho. Okwa ti: “Efiku limwe, omonamati wetu okwa li a wa nokambashikela kaye, ndele te liyahameke. Konima yomafiku manini, oshipute shaye osha li sha veluka. Ame nomukulukadi wange otwa li twe mu yelifila kutya Jehova okwa shita omalutu etu haa dulu okulivelula. Opo nee otwa li twa popya kutya oinima oyo ya longwa kovanhu ihai dulu okuninga ngaho. Pashihopaenenwa, ohauto ihai dulu okulipangela konima yoshiponga. Oshimoniwa osho osha kwafela omonamati wetu a ude ko ounongo waJehova.”

13. Ongahelipi ovadali tava dulu okukwafela ounona vavo va didilike mo eenghono daKalunga? (Jesaja 40:26)

 ¹³ Jehova ote tu shivi tu tale keulu notu diladile nghee eenghono daye dikumwifi de shi ningifa tashi shiiva, opo eenyofi adishe di kale peenhele dado mewangadjo. (Lesha Jesaja 40:26.) Oto dulu okuladipika ovana voye va tale keulu nova diladile kwaasho ve wete. Didilika osho Tingting, omumwameme wokoTaiwan, ta dimbuluka okudja kounona waye, okwa ti: “Efiku limwe, meme okwa li a twala nge tu ka talele po onhele yonhumba, notwa li twa dula okumona eenyofi adishe, molwaashi kapa li omalamba omodoolopa. Pefimbo opo, onda li handi lipula shi na sha nomafininiko oomakula, nonda li handi lipula ngeenge ohandi ka dula ngoo okutwikila okulongela Jehova noudiinini. Meme okwa li a ladipika nge ndi dilonge kombinga yeenghono odo Jehova a longifa, opo a shite eenyofi adishe odo. Okwa li yo a dimbulukifa nge kutya Jehova ota dulu okulongifa eenghono odo, opo a kwafele nge ndi taalele eyeleko keshe. Konima eshi nda konakona eshito molweendo olo, osha li she linyengifa nge ndi shiive nawa Jehova. Osha li yo sha pameka etokolo toko lange loku mu longela.”

14. Ongahelipi ovadali tava dulu okulongifa eshito va kwafele ovana vavo va mone kutya Jehova oku li Kalunga omuhafi?

¹⁴ Oinima oyo Jehova a shita otai ulike kutya okwa hafa nokwa hala yo tu kale twa hafa. Ovanongononi ova mona kutya oinamwenyo ihapu ohai danauka, mwa kwatelwa oudila nosho yo eeshi. (Job 40:20) Mbela ope na efiku limwe ounona voye va li tava yolo, eshi tava tale oshinamwenyo tashi danauka? Otashi dulika va mona okambishona taka taataa okatanga keengodi, ile oumbwena tava danauka. Oshikando tashi uya, ngeenge owa mono ounona voye tava yolo, eshi tava tale oshinamwenyo tashi danauka, va dimbulukifa kutya ohatu longele Kalunga omuhafi.​—1 Tim. 1:11.

15. Oshike tashi dulu okukwafela ovadali va shiive osho ounona vavo tava diladila? (Omayeletumbulo 20:5) (Tala yo efano.)

¹⁵ Omafimbo amwe, ovadali otashi dulika va mone shidjuu okuningifa ovana vavo ve va lombwele  omaupyakadi oo va taalela. Ngeenge ou li monghalo ya tya ngaho, owa pumbwa okulonga tau pu mo, opo u shiive osho ounona voye tava diladila. (Lesha Omayeletumbulo 20:5.) Ovadali vamwe ohava mono shipu okuninga ngaho, ngeenge tava hafele eshito pamwe nounona vavo. Omolwashike? Etomheno limwe ololo kutya ounona nosho yo ovadali ihava kala tava piyaanekwa koinima ihapu. Xe omudali wokoTaiwan wedina Masahiko okwa tumbula vali etomheno limwe, a ti: “Ngeenge twa dja mo nounona, tashi dulika twa ka londa eemhunda, ile twa ka enda komunghulofuta, ohava kala va manguluka. Onghee ohatu mono shipu oku va ningifa ve tu lombwele osho tava diladila.” Katya, oo a popiwa metetekelo, okwa ti: “Ngeenge nda di kofikola, meme okwa li ha twala nge koparka iwa. Monhele oyo ye limwenena, onda li handi mono shipu kwaame okulombwela meme osho sha ningwa po kofikola nosho yo osho handi lipula nasho.”

16. Ongahelipi omaukwaneumbo taa dulu okufuwa po, ngeenge taa hafele eshito laJehova?

¹⁶ Omaukwaneumbo ohaa hafele oinima oyo Jehova a shita, opo a fuwe po nokuhafela pamwe, naasho ohashi pameke ekwatafano loukwaneumbo. Ombiibeli oya ti kutya ope na ‘efimbo lokuyola’ nosho yo ‘efimbo lokutanha nehafo.’ (Omuud. 3:1, 4) Jehova okwa shitila kombada yedu eenhele diwa oko hatu dulu okuningila oinima oyo tu hole. Omaukwaneumbo mahapu ohaa shakene peenhele domatalelepo, peenhele odo di li kondje yodoolopa, keemhunda, ile komunghulofuta. Ounona vamwe ove hole okutondoka nokudanaukila moparka iwa, okutala oinamwenyo, okuyowa momulonga, metale, ile mefuta. Ope na eemhito dihapu dokuhafela eshito nosho yo oinima oyo ye tu dingilila, oyo ya shitwa kuJehova.

17. Omolwashike ovadali ve na okukwafela ounona vavo va hafele eshito laKalunga?

¹⁷ Mounyuni mupe, ovadali nosho yo ounona otava ka hafela eshito laJehova shi dulife nale. Itatu ka kala vali tu na etomheno lokutila oinamwenyo ngaashi kunena, noinamwenyo itai ka kala vali ye tu tila. (Jes. 11:6-9) Ohatu ka hafela oinima oyo Jehova a shita efimbo alishe. (Eps. 22:26) Ashike ovadali, inamu teelela fiyo efimbo olo, opo mu kwafele ovana veni va hafele eshito. Eshi to longifa eshito, opo u honge ounona voye kombinga yaJehova, otava ka dimina osho ohamba David ya popya ya ti: ‘Omwene kape na eshi sha fa oilonga yoye.’​—Eps. 86:8.