Omolwashike omulumenhu umwe a ti kutya ota ka nyona po efyuululo laye, ngeenge okwa hombola po Rut? (Rut 4:1, 6)

Pefimbo lOmbiibeli, ngeenge omulumenhu oo a hombola okwa fi ehe na okaana, opa li hapa kala omapulo amwe oo a pumbwa okunyamukulwa ngaashi: Oshike tashi ka ningwa po shi na sha nedu laye? Mbela edina laye otali ka kana filufilu? Omhango yaMoses oya nyamukula omapulo oo.

Oshike tashi ka ningwa po shi na sha nedu lomulumenhu oo a fya, ile laao a ninga ohepele, ndele ta landifa po edu laye? Mumwainamati, ile omupambele wopopepi elela ota dulu okukulila, ile okulanda ko edu olo. Kungaho, edu olo otali ka kala natango loukwaneumbo oo.—Lev. 25:23-28; Num. 27:8-11.

Edina lanakufya ola li hali kalekwa po ngahelipi? Ola li hali kalekwa po, eshi mumwainamati wanakufya a li ha hombola po omukulukadi wamumwaina, naasho osho sha li sha ningwa shi na sha naRut. Omulumenhu oo a li ha hombola po omufiyekadi wamumwainamati, okwa li ha dalele mumwainamati okaana, oko taka ka fyuulula po oinima yaye. Elongekido olo lopahole ola li yo la ningwa, opo ku filwe oshisho omufiyekadi.—Deut. 25:5-7; Mat. 22:23-28.

Natu ka taleni koshihopaenenwa shaNaomi. Okwa li a hombolwa komulemunhu wedina Elimelek. Eshi Elimelek novanamati vavo vavali va fya, kapa li vali oo a li ta dulu okufila oshisho Naomi. (Rut 1:1-5) Eshi Naomi a shuna kuJuda, okwa li a lombwela oshitenya Rut shi ka pule Boas, opo a kulile ko epya lavo. Boas okwa li omupambele wopopepi waElimelek. (Rut 2:1, 19, 20; 3:1-4) Ashike Boas okwa li a didilika kutya ope na omupambele vali umwe wopopepi elela. Onghee oye a li e na omhito tete yokutokola ngeenge okwa hala okukulila ko edu olo.—Rut 3:9, 12, 13.

Potete, omulumenhu oo okwa li a halelela okukwafela. (Rut 4:1-4) Nonande osho osha li sha kwatela mo oiniwe yonhumba, okwa li a didilika kutya Naomi ita dulu vali okumona okaana, oko ka li taka ka fyuulula po edu laElimelek. Onghee omulumenhu oo okwa li ta ka mona edu olo nola li tali ka kala oshitukulwa shefyuululo laye, naasho osha li tashi monika oshinima shiwa.

Ndele omulumenhu oo okwa li a lundulula omadiladilo aye, eshi a mona kutya okwa li e na okuhombola po Rut. Okwa ti: “Ihandi dulu oku li fyuulula, osheshi handi nyono po oshitukulwafyuululwa shange.” (Rut 4:5, 6) Omolwashike a li a lundulula omadiladilo aye?

Ngeenge omulumenhu oo, ile umwe e lili, okwa hombola po Rut, ndele Rut ta mono okaana kokamati, okaana oko otaka ka fyuulula po edu laElimelek. Ongahelipi osho sha li tashi ka ‘nyona po oshitukulwafyuululwa’ shomulemenhu oo? Ombiibeli inai popya sha shi na sha naasho, ashike apa otapa shikula eenghedi dimwe.

• Yotete, ota ka hepifa oimaliwa oyo ta ka longifa, molwaashi edu laElimelek mokweendela ko kwefimbo itali ka kala laye. Otali ka kala lomonamati waRut.

• Onhivali, ota ka kala e na oshinakuwanifwa shokupalula nokufila oshisho Naomi naRut.

• Onhinhatu, ngeenge ova dala vali ounona vamwe naRut, otava ka tukulilafana efyuululo nounona ovo e na nale.

• Onhine, ngeenge omulumenhu oo ke na ounona, omonamati oo Rut a li ta ka dala okwa li e na oufemba wokufyuulula po edu laElimelek nolomulumenhu oo. Ngeenge omulumenhu oo okwa fi, edu laye otali ka ninga po lomonamati, oo a dalela edina laElimelek, ndele kali fi laye. Onghee omulumenhu oo ka li a hala okunyona po efyuululo laye mokukwafela Naomi. Okwa li a yandja omhito komukulili oo a shikula ko, Boas, opo a kufe po oshinakuwanifwa osho. Boas okwa li a ninga ngaho, molwaashi okwa li a hala ‘okudalela edina lanakufya oshitukulwafyuululwa shaye.’—Rut 4:10.

Osha fa shi li ngaha kutya omulumenhu oo okwa li ta yandje unene elitulemo kokukaleka po edina nosho yo efyuululo laye. Okwa li e lihole mwene. Ndele ponhele yokukaleka po edina laye, omulumenhu oo okwa li a ningifa edina laye liha popiwe mo mondjokonona. Okwa li yo e likanifila oufembanghenda we likalekelwa, oo wa li wa pewa Boas, wokuninga umwe womooxekulululwa vaMessias, sha hala okutya Jesus Kristus. Omulumenhu oo okwa li a mona oidjemo inyikifa oluhodi omolwokuliholamwene, eshi a li ina hala okukwafela umwe, oo a li e na omhumbwe.—Mat. 1:5; Luk. 3:23, 32.