1-2. Ngeenge ovanhu tava ninginifwa, oshike hashi ningwa po luhapu, noshike u na okukaleka momadiladilo?

 MBELA ope na efiku wa monene ongudu yovaninginifwa? Owa li wa uda nghee va li tava popi va tomhwa, eshi tava nyamukula omapulo avali, ofimbo inava ninginifwa. Owa li wa mona ovapambele nookaume kavo va tunhukwa. Eshi ovaninginifwa va dja momeva, owa li wa uda ovanhu tava pandula nowa li wa mona nghee oipala yavo tai vilima kehafo. Luhapu, oshivike keshe ovanhu omayovi ohava katuka onghatu oyo, have liyapulile Jehova Kalunga nokuninginifwa ve li Eendombwedi daye.

² Ongahelipi shi na sha naave? Ngeenge oto diladila okuninginifwa, ou li omunhu oo e likalekelwa mounyuni ou woukolokoshi, molwaashi oto “kongo Kalunga.” (Eps. 14:1, 2) Oshitukulwa eshi oove sha shangelwa, kashi na nee mbudi kutya ou li omunyasha, ile omunamido. Ashike ovo twa ninginifwa nale, nafye otwa hala okupameka etokolo toko letu lokulongela Jehova fiyo alushe. Onghee natu ka kundafaneni omatomheno atatu omomatomheno mahapu kutya omolwashike hatu longele Jehova.

3. Omolwashike ovapiya vaJehova ve hole oshili nosho yo ouyuki? (Epsalme 119:128, 163)

³ Jehova okwa lombwela ovapiya vaye va kale ve “hole oshili.” (Sak. 8:19) Jesus okwa ladipika ovashikuli vaye va lalakanene ouyuki. (Mat. 5:6) Osho osha hala kutya keshe umwe oku na okukala a halelela okuninga osho sha uka, shiwa nosha koshoka momesho aKalunga. Mbela ou hole oshili nosho yo ouyuki? Otu shi shii kutya ou i hole. Ou tonde oipupulu nosho yo oinima aishe ii noya puka. (Lesha Epsalme 119:128, 163.) Oipupulu ohai ulike oukwatya waSatana, omupangeli  wounyuni ou. (Joh. 8:44; 12:31) Elalakano limwe laSatana olo okunyateka edina liyapuki laJehova Kalunga. Satana okwa kala nokutandaveleka oipupulu i na sha naKalunga ketu okudja pounashibofa womuEden. Okwa popya kutya Jehova oku li Omupangeli, oo e lihole mwene noke fi omunashili, oo ha ngungunine ovanhu oinima iwa. (Gen. 3:1, 4, 5) Oipupulu yaSatana i na sha naJehova oya twikila okunyateka omadiladilo nomitima dovanhu. Ngeenge ova hovele okukala ve “hole oshili,” Satana ota dulu oku va ningifa va longe oinima aishe oyo inai yuka noya puka.​—Rom. 1:25-31.

4. Ongahelipi Jehova a ulika kutya oku li “Kalunga omudiinini”? (Tala yo efano.)

⁴ Jehova oku li “Kalunga omudiinini” noha hongo nehalo liwa oshili ovo ve mu hole. (Eps. 31:5) Kungaho, ohe va kwafele va manguluke ko koipupulu yaSatana. Jehova oha hongo yo ovapiya vaye va kale ovanashili novayuki. Nomolwaasho ve lifimaneka vo vene nove na ombili yopamadiladilo. (Omayel. 13:5, 6) Mbela okwe ku ningila ngaho, eshi wa konakona Ombiibeli? Owe lihonga kutya eendjila daJehova oda denga mbada kovanhu aveshe nosho yo kwoove pauhandimwe. (Eps. 77:13) Onghee owa hala okuninga osho sha yuka koshipala shaKalunga. (Mat. 6:33) Owa hala okupopila oshili nokunyaneka pomutenya oipupulu yaSatana i na sha naKalunga ketu Jehova. Ongahelipi to dulu okuninga ngaho?

5. Ongahelipi to dulu okupopila oshili nosho yo ouyuki?

⁵ Oto dulu okuhoolola onghalamwenyo oyo tai ulike kutya: “Inandi tambula ko oipupulu yaSatana, nohandi yambidida oshili. Onda hala Jehova oye a kale Omupangeli wange nonda hala okuninga keshe osho ta ti kutya osha yuka.” Ongahelipi to dulu okukatuka onghatu ya tya ngaho? Omokupopya naJehova okupitila meilikano, oku mu liyapulila nokuulika eliyapulo la tya ngaho moipafi, eshi to ninginifwa. Ohole yokuhola osho shoshili naasho sha yuka, oi na eenghono dinene dokulinyengifa omunhu a tokole okuninginifwa.

6. Epsalme 45:4 ole ku pa omatomheno elipi e na sha nokuhola Jesus Kristus?

⁶ Omolwashike u hole Jesus Kristus? Natu ka taleni komatomheno amwe a femba taa hangwa mEpsalme 45:4. (Lesha.) Jesus okwa li ha xumifa komesho oshili, elininipiko nosho yo ouyuki. Ngeenge ou hole oshili nosho yo ouyuki, otashi ulike kutya ou hole yo Jesus  Kristus. Diladila kunghee Jesus a li a popila nouladi oshili nosho yo ouyuki. (Joh. 18:37) Ongahelipi Jesus a li a xumifa komesho elininipiko?

7. Oshike ho mono shihokwifa shi na sha nelininipiko laJesus?

⁷ Jesus okwa xumifa komesho elininipiko okupitila moshihopaenenwa shaye. Pashihopaenenwa, okwa yukifa efimano alishe kuXe, ndele hakuye mwene. (Mark. 10:17, 18; Joh. 5:19) Ou uditile ngahelipi elininipiko la tya ngaho? Mbela ihali ku linyengifa u kale u hole Omona waKalunga nou mu shikule? Kape na omalimbililo, ohali ku linyengifa. Omolwashike Jesus e li omulininipiki? Omolwaashi oku hole noha hopaenene Xe, oo e li omulininipiki. (Eps. 18:35; Heb. 1:3) Mbela ino nanenwa kuJesus, oo ha ulike omaukwatya aJehova monghedi ya wanenena?

8. Omolwashike tu hole Jesus e li Ohamba yetu?

⁸ Otu hole Jesus e li Ohamba yetu, molwaashi oku li Omupangeli a denga mbada. Jehova okwa deula Omona waye nokwe mu nangeka po a pangele. (Jes. 50:4, 5) Diladila yo shi na sha nohole yeliyambo oyo Jesus a ulika. (Joh. 13:1) Owa pumbwa okukala u hole Jesus filufilu, molwaashi oku li Ohamba yoye. Okwa yelifa kutya ovo ve mu hole shili, ovo a ifana ookaume kaye, ove na okuulika ohole yavo mokudulika koipango yaye. (Joh. 14:15; 15:14, 15) Kashi fi tuu oufembanghenda munene okukala kaume kOmona waJehova!

9. Ongahelipi eninginifo lopaKriste la faafana naalo laKristus?

⁹ Shimwe shomoipango yaJesus oshosho kutya ovashikuli vaye ove na okuninginifwa. (Mat. 28:19, 20) Okwa tula po oshihopaenenwa. Eninginifo laye ola yooloka ko kwaalo lovashikuli vaye meenghedi dimwe. (Tala oshimhungu “ Eninginifo laJesus ola yooloka ko ngahelipi kwaalo lovashikuli vaye?”) Ashike nande ongaho, okwa faafana meenghedi donhumba. Eshi Jesus a ninginifwa, okwa li a ulika kutya ota ka longa ehalo laXe. (Heb. 10:7) Sha faafana, ovashikuli vaKristus ohava ninginifwa moipafi va ulike kutya ove liyapulila Jehova Kalunga. Okudja opo, ohava yandje elitulemo kokulonga ehalo laKalunga, ndele halavo vene. Onghee otava shikula oshihopaenenwa shOmwene wavo.

10. Omolwashike ohole yokuhola Jesus i na oku ku linyengifa u ninginifwe?

¹⁰ Owa tambula ko Jesus e li Omona waJehova ewifa noku li Ohamba, oyo ya nangekwa po kuKalunga i tu pangele. Ou shii kutya Jesus omulininipiki noha hopaenene Jehova monghedi ya wanenena. Owe lihonga kutya okwa li a palula ovanhu, ovo va li tava dengwa kunakaidi kahalwenya, a li a hekeleka ovo va teka omukumo nokuvelula nokuli ovanaudu. (Mat. 14:14-21) Ou wete nghee ta wilike eongalo laye kunena. (Mat. 23:10) Ou shii kutya ota ka ninga shihapu shi dulife pwaasho monakwiiwa e li Ohamba yOuhamba waKalunga. Ongahelipi to dulu okuulika kutya ou mu hole? Omokushikula oshihopaenenwa shaye. (Joh. 14:21) Oto dulu okuninga ngaho, mokuhovela okuliyapulila Jehova nokuninginifwa.

11. Etomheno la fimanenena lokuninginifwa olilipi, nomolwashike to tile ngaho?

¹¹ Etomheno la fimanenena lokuninginifwa olilipi? Jesus okwa popya oshipango shinenenene shomoipango yaKalunga, a ti: “Hola Jehova Kalunga koye nomutima woye aushe, nomwenyo woye aushe, nomadiladilo oye aeshe neenghono doye adishe.” (Mark. 12:30) Mbela eendjovo odo otadi holola kutya naave osho u hole Kalunga ngaho?

12. Omolwashike u hole Jehova? (Tala yo efano.)

¹² Ope na omatomheno mahapu okuhola  Jehova. Pashihopaenenwa, owa shiiva kutya oye ‘ofifiya yomwenyo’ noku li Omuyandji ‘woshali keshe noinima aishe iwa.’ (Eps. 36:9; Jak. 1:17) Oshinima keshe to hafele osha dja kuKalunga ketu omunahole, oo ha yandje nehalo liwa.

13. Oshike sha ningifa ekuliloyambo li kale oshali ya denga mbada?

¹³ Ekuliloyambo oli li oshali ya denga mbada oyo Jehova e tu pa. Omolwashike hatu tile ngaho? Diladila kekwatafano lopofingo olo li li pokati kaJehova nOmona waye. Jesus okwa ti: “Tate oku hole nge,” naame “ondi hole Tate.” (Joh. 10:17; 14:31) Ekwatafano olo li li pokati kavo ola enda nokupamenena, eshi va kala pamwe oule womido omabiliyona. (Omayel. 8:22, 23, 30) Paife diladila nghee sha li sha yahameka Kalunga, eshi a efa Omona waye a mone oixuna nokufya. Jehova oku hole neenghono ovanhu, naave wa kwatelwa mo, eshi a yandja nehalo liwa Omona waye omuholike, e li eyambo, opo ovanhu aveshe, naave wa kwatelwa mo, va dule okukala nomwenyo fiyo alushe. (Joh. 3:16; Gal. 2:20) Olo oli li etomheno la denga mbada kuhe na vali lokuhola Kalunga.

14. Elalakano la denga mbada lilipi to dulu okulitulila po monghalamwenyo yoye?

¹⁴ Ohole yoye yokuhola Jehova oya enda tai kulu, eshi wa enda to lihongo shihapu  kombinga yaye. Oshoshili kutya owa hala okweehena popepi elela naye paife nofiyo alushe, noto dulu okuninga ngaho. Ote ku ladipike pahole u hafife omutima waye. (Omayel. 23:15, 16) Oto dulu okuninga ngaho, hameendjovo ashike, ndele nomeenghatu yo. Onghedi yoye yokukalamwenyo ohai ulike kutya ou hole shili Jehova. (1 Joh. 5:3) Olo olo elalakano la denga mbada monghalamwenyo olo to dulu okulitulila po.

15. Ongahelipi to dulu okuulika kutya ou hole Jehova?

¹⁵ Ongahelipi to dulu okuulika kutya ou hole Jehova? Tete, oho ilikana eilikano le likalekelwa omo ho liyapulile Kalunga aeke kashili. (Eps. 40:8) Opo nee oho ulike eliyapulo olo lopaumwene moipafi, eshi to ninginifwa. Ngaashi twa kundafana pehovelo loshitukulwa eshi, eninginifo oli li omhito yehafo noitunhula monghalamwenyo yoye. Oho tameke onghalamwenyo ipe; ku li vali kwoove mwene, ndele owaJehova. (Rom. 14:8; 1 Pet. 4:1, 2) Osho otashi dulika tashi monika shi li onghatu ya kwata moiti, noya kwata moiti shili. Ashike ohai ku pe omhito u kale nonghalamwenyo ya denga mbada. Ngahelipi mbela?

16. Metwokumwe nEpsalme 41:12, ongahelipi Jehova ha yandje ondjabi kwaavo hava yambe po onghalamwenyo yavo moku mu longela?

¹⁶ Jehova oku li Omunhu, oo ha yandje nehalo liwa. Kashi na nee mbudi kutya owe mu pa shi fike peni, ote ke ku pa alushe shi dulife pwaasho we mu pa. (Mark. 10:29, 30) Ote ke ku pa ondjabi ya denga mbada nosho yo onghalamwenyo iwa nokuli nopaife mounyuni ou wa kolokosha. Osho oshi li ashike ehovelo. Onghalamwenyo yoye, oyo ya hovela peninginifo, kai na okuxula. Oto dulu okutwikila okulongela Xo omunahole fiyo alushe. Ohole, oyo i li pokati koye naXo, otai ka twikila okukula noto ka dula okukala nomwenyo fiyo alushe ngaashi ye.​—Lesha Epsalme 41:12.

17. Oshike to dulu okupa Jehova osho ehe na nale?

¹⁷ Ngeenge owa katuka onghatu yokuliyapulila Jehova nokuninginifwa, oto ka kala u na oufembanghenda wokuyandja oshinima shi na ondilo kuXo. Okwe ku pa oinima aishe iwa nosho yo eemhito adishe dehafo, odo wa  hafela. Mepingafano naasho, oto dulu okupa Mwene weulu nedu oshinima osho ehe na nale, okuliyandja nehalo liwa u mu longele noudiinini. (Job 1:8; 41:11; Omayel. 27:11) Okulongifa onghalamwenyo yoye monghedi ya tya ngaho, oshi li oshinima sha denga mbada. Nopehe na omalimbililo, ohole yoye yokuhola Jehova oi li etomheno la denga mbada lokuninginifwa.

18. Omapulo elipi to dulu okulipula?

¹⁸ Oto ka nyamukula ngahelipi epulo olo kutya, Mbela oto ka ninginifwa? Oove ashike to dulu oku li nyamukula. Ndele otashi dulika shi kale ekwafo, ngeenge owe lipula kutya, ‘Omolwashike ndi na okuteelela?’ (Oil. 8:36) Dimbuluka omatomheno atatu, oo twa kundafana. Lotete, ou hole oshili nosho yo ouyuki. Lipula kutya, ‘Mbela onda hala oku ka kala po, eshi keshe umwe ta ka popya oshili nokulonga ouyuki?’ Etivali, ou hole Jesus Kristus. Lipula kutya, ‘Mbela onda hala Omona waKalunga a kale Ohamba yange nonda hala ngoo okushikula oshihopaenenwa shaye?’ Etitatu, ou hole Jehova komesho yaaishe. Lipula kutya, ‘Mbela onda hala ngoo okuhafifa omutima waJehova moku mu longela e li Kalunga kange?’ Ngeenge enyamukulo loye komapulo oo oheeno, omolwashike ito ninginifwa? Omolwashike u na okuteelela?​—Oil. 16:33.

19. Omolwashike uhe na okwoongaonga okuninginifwa? Shi faneka. (Johannes 4:34)

¹⁹ Ngeenge oto ongaonga okuninginifwa, diladila kefaneko olo Jesus a longifa. (Lesha Johannes 4:34.) Didilika kutya Jesus okwa yelekanifa okulonga ehalo laXe noikulya. Omolwashike mbela? Omolwaashi oikulya oiwa kufye. Jesus oku shii kutya oshinima keshe osho Jehova ta pula tu longe oshiwa kufye. Jehova ina hala tu ninge oshinima osho tashi tu ehameke. Mbela Jehova okwa hala u ninginifwe? Heeno. (Oil. 2:38) Oto dulu okukala nelineekelo kutya okudulika koshipango shi na sha nokuninginifwa otashi ke ku etela ouwa. Ngeenge iho ongaonga okuhafela eendja odo tadi tokola elaka, omolwashike to ongaonga okuninginifwa?

20. Oshike hatu ka kundafana moshitukulwa tashi landula ko?

²⁰ Owa teelela shike? Vahapu otashi dulika va nyamukule ngaha: “Inandi lilongekida natango.” Oushili oyoo kutya etokolo lokuliyapulila Jehova nokuninginifwa, oli li etokolo la fimanenena olo u na okuninga. Onghee otashi pula efimbo, okudiladila noukeka nosho yo eenghendabala da mana mo, opo u lilongekide. Ashike ngeenge owa halelela okukatuka onghatu oyo, oshike to dulu okuninga paife, opo u lilongekide? Ohatu ka kundafana enyamukulo lepulo olo moshitukulwa tashi landula ko.