1-2. Ngeenge ino lilongekidila natango eninginifo, omolwashike uhe na okuteka omukumo? (Tala efano kombada yoshifo.)

 NGEENGE owa hala okuninginifwa, owe litulila po elalakano la denga mbada. Mbela owe lilongekidila okukatuka onghatu oyo paife? Ngeenge owa itavela kutya osho, novakulunhuongalo ova dimina, ino ongaonga okuninginifwa. Ngeenge owa ningi ngaho, oto ka kala u na onghalamwenyo ya denga mbada moilonga yaJehova.

² Mepingafano naasho, mbela owa lombwelwa kutya owa pumbwa okuninga exumokomesho la wedwa po, ofimbo ino ninginifwa? Ile owe shi didilika kwoove mwene? Ngeenge osho, ino teka omukumo. Oto dulu okuninga exumokomesho fiyo wa katuka onghatu oyo ya fimana, kashi na nee mbudi kutya ou li omunyasha, ile omukulunhu.

3. Elenga lokuEtiopia ola li la pula Filippus shike, nosha pendula epulo lilipi? (Oilonga 8:36, 38)

³ Lesha Oilonga 8:36, 38. Elenga lokuEtiopia ola li la pula omuudifi wevaengeli Filippus la ti: “Oshike tashi imbi nge ndi ninginifwe?” Omulumenhu oo Omuetiopia okwa li a halelela okuninginifwa, ndele mbela okwa li ngoo shili elilongekidila okukatuka onghatu oyo ya fimana?

4. Omutiopia oo okwa ulika ngahelipi kutya okwa li a tokola toko okutwikila okulihonga?

⁴ Omulumenhu Omuetiopia “okwa li a ya kuJerusalem a ka longela Kalunga.” (Oil. 8:27) Ka li Omujuda, ashike okwa li a tambula ko elongelokalunga lOshijuda. Nopehe na omalimbililo, okwa li e lihonga kombinga yaJehova momashangelo mayapuki Omishangwa dOshiheberi. Ashike okwa li a halelela okulihonga shihapu. Eshi Filippus a shakeneka elenga olo mondjila, okwa hanga omulumenhu oo ta ningi shike? Okwe mu hanga ta lesha omushangwatonywa womuprofeti Jesaja. (Oil. 8:28) Odo  oda li eendja dopamhepo da pama. Elenga olo kala li ashike la wanenwa kokulihonga omahovelohongo manini, ndele ola li la hala okutwikila okulihonga.

5. Omulumenhu Omuetiopia okwa ninga po shike shi na sha naasho e lihonga?

⁵ Omulumenhu oo okwa li elenga li na ondodo ya fimana mepangelo laKandake, ohambakainhu yaEtiopia, nokwa li “ha pashukile emona layo alishe.” (Oil. 8:27) Onghee oku na okukala a li e na oinakuwanifwa ihapu. Ashike nande ongaho, okwa li a konga efimbo, opo a ka longele Jehova. Ka li a wanenwa koshili oyo a li te lihongo nokwa li a katuka metwokumwe naasho e lihonga. Onghee okwa li a enda okudja kuEtiopia, opo a ka longele Jehova kotembeli muJerusalem. Ondjila oyo oi na okukala ya li tai pula efimbo lihapu nosho yo oiniwe, ashike omulumenhu oo okwa li a ninga eenghendabala a ka longele Jehova, kashi na nee mbudi kutya osha li tashi pula shike.

6-7. Ongahelipi ohole yOmuetiopia yokuhola Jehova ya enda tai kulu?

⁶ Omuetiopia okwa li e lihonga kuFilippus oshili imwe ya fimanenena, oyo kutya Jesus oye Messias. (Oil. 8:34, 35) Elenga olo ola li la hafa, eshi le lihonga osho Jesus e li ningila. Ola li le linyenga ngahelipi? Ola li tali dulu okukala ngaashi li li, li li omulumenhu a fimanekwa, oo a tambula ko eitavelo lOshijuda. Ponhele yaasho, ohole yalo yokuhola Jehova nosho yo Omona waye oya li ya enda tai kulu. Osho osha li she li linyengifa li ninge etokolo la fimana lokuninginifwa li li omushikuli waJesus Kristus. Filippus okwa li a mona kutya omulumenhu oo okwe lilongekida, onghee okwe mu ninginifa.

⁷ Ngeenge owa shikula oshihopaenenwa shomulumenhu Omuetiopia, naave oto dulu okulilongekidila okuninginifwa. Naave oto dulu okupopya u na omukumo kutya, “Oshike tashi imbi nge ndi ninginifwe?” Natu ka taleni nghee hatu dulu okushikula eenghatu da faafana naado da li da katukwa komulumenhu Omuetiopia, ngaashi: Okwa twikila okulihonga, okwa katuka metwokumwe naasho e lihonga nokwa twikila okukulika ohole yaye yokuhola Kalunga.

8. Johannes 17:3 ote ku lombwele u ninge shike?

⁸ Lesha Johannes 17:3. Mbela eendjovo odo daJesus otadi ku kwafele u ninge etokolo lokukonakona Ombiibeli? Vahapu vomufye osho de tu ningila. Ndele mbela eendjovo odo tuu odo otadi ku lombwele u twikile okulihonga? Heeno. Ohatu twikile ‘okushiiva Kalunga aeke kashili.’ (Omuud. 3:11) Ohatu twikile okulihonga fiyo alushe. Ngeenge otwa twikile okuninga ngaho, ohatu ka ehena popepi elela naJehova.​—Eps. 73:28.

9. Oshike twa pumbwa okuninga konima eshi twe lihonga omahovelohongo Ombiibeli?

⁹ Eshi twa hovela okulihonga kombinga  yaJehova, otwe lihonga ashike omahovelohongo Ombiibeli. Monhumwafo yaye oyo a shangela Ovaheberi, omuyapostoli Paulus okwa popya omahongo opehovelo e li “omahovelohongo.” Ka li te a hekula, ndele okwa li te a yelekanifa nomashini, oo haa palula ounona. (Heb. 5:12; 6:1) Okwa ladipika yo Ovakriste aveshe va twikile okulihonga omahovelohongo nosho yo oshili yomoule yEendjovo daKalunga. Mbela naave owa halelela okulihonga oinima yomoule i na sha nomahongo Ombiibeli? Mbela owa halelela okutwikila okukula pamhepo nokulihonga kombinga yaJehova nosho yo omalalakano aye?

10. Omolwashike tashi dulika shi kale shidjuu kuvamwe okukonakona?

¹⁰ Vahapu vomufye ohatu mono shidjuu okukonakona. Ongahelipi shi na sha naave? Mbela owe lihonga okulesha nokukonakona nomupondo kofikola? Mbela owa li ho hafele okukonakona noho mono kutya owe lihonga shihapu? Ile owa li wa fika pexulifodiladilo kutya kufi omulihongi muwa? Ngeenge osho, haave auke. Ashike Jehova ota dulu oku ku kwafela. Okwa wanenena noku li Omuhongi a denga mbada kuhe na vali.

11. Ongahelipi Jehova a ulika kutya oku li “Omulongi” Munenenene?

¹¹ Jehova okwe lipopya e li “Omulongi woye” Munenenene. (Jes. 30:20, 21) Oku li Omuhongi e na elididimiko, onghenda noha udile vamwe oukwao wananghali. Oha yandje elitulemo komaukwatya mawa ovahongwa vaye. (Eps. 130:3) Ina teelela nandenande tu ninge shihapu shi dulife pwaasho hatu dulu. Dimbuluka kutya okwe tu shita tu na ouluvi, oshali oyo ya denga mbada. (Eps. 139:14) Oshi li paushitwe okukala twa halelela okulihonga. Omushiti wetu okwa hala tu twikile okulihonga fiyo alushe noku ku hafela. Onghee oshi li pandunge okukala twa “halelela” okulihonga oshili yOmbiibeli. (1 Pet. 2:2) Litulila po omalalakano oo to dulu okuhanga nokudiinina elandulafano loye li na sha nokulesha Ombiibeli noku i konakona. (Jos. 1:8) Kekwafo laJehova, oto ka dula okuhafela okulesha Ombiibeli nokulihonga shihapu kombinga yaye.

12. Omolwashike tu na okukonakona onghalamwenyo nosho yo oukalele waJesus pekonakono letu lopaumwene?

¹² Kala ho kongo efimbo pandjikilile u dilonge konghalamwenyo yaJesus noukalele waye. Osha fimana okushikula oshihopanenwa shaJesus filufilu, ngeenge otwa hala okulongela Jehova, unene tuu pomafimbo aa madjuu. (1 Pet. 2:21) Jesus okwa lombwela ovashikuli vaye, nopehe na oku va lila okafima koluko, kutya otava ka shakeneka omashongo. (Luk. 14:27, 28) Ashike okwa li e na elineekelo kutya ovashikuli vaye vashili otava dulu okupondola ngaashi ye. (Joh. 16:33) Konakona ouyelele u na sha nonghalamwenyo yaJesus nokulitulila po omalalakano u mu hopaenene monghalamwenyo yoye yakeshe efiku.

13. Ou na okutwikila okupula Jehova shike, nomolwashike?

¹³ Inashi wana ashike okukala tu na eshiivo olo alike. Etomheno kutya omolwashike twa pumbwa eshiivo, ololo kutya, opo tu dule okulihonga shihapu kombinga yaJehova nokukulika omaukwatya ngaashi ohole yoku mu hola nosho yo okukala neitavelo muye. (1 Kor. 8:1-3) Eshi to twikile okulihonga, kala ho pula Jehova e ku wedele eitavelo. (Luk. 17:5) Oha nyamukula nehalo liwa omailikano a tya ngaho. Eitavelo lashili la kanghamena keshiivo lashili lokushiiva Kalunga, otali ke ku kwafela u katuke onghatu ya wedwa po.​—Jak. 2:26.

14. Omuyapostoli Petrus okwa divilika ngahelipi nghee sha fimana okukatuka metwokumwe naasho hatu lihongo? (Tala yo efano.)

¹⁴ Omuyapostoli Petrus okwa divilika nghee  sha fimana kovashikuli vaKristus okutwikila okukatuka metwokumwe naasho ve lihonga. Okwa popya ehokololo lopaMbiibeli li na sha naNoa. Jehova okwa li a lombwela Noa kutya ota ka hanauna po ovakolokoshi vopefimbo opo okupitila meyelu. Noa noukwaneumbo waye kava li ashike tava ka xupifwa mokukala ve shii kutya otaku ke uya eyelu. Didilika kutya Petrus okwa li ta popi kombinga yefimbo olo la tetekela Eyelu, “ofimbo onguluwato ya li tai tungwa.” (1 Pet. 3:20) Onghee Noa nokwaneumbo waye ova li va katuka metwokumwe naasho va hongwa kuKalunga mokutunga onguluwato, oyo ya li ombautu inene. (Heb. 11:7) Petrus okwa yelekanifa eninginifo naasho Noa a longa, eshi a ti: “Osho otashi faneke eninginifo olo tali mu xupififa kunena.” (1 Pet. 3:21) Onghee ohatu dulu okuyelekanifa osho to longo paife u lilongekidile eninginifo noilonga yaNoa nosho yo oukwaneumbo waye, oyo va longa oule womido, opo va tunge onguluwato. Oshike wa pumbwa okulonga, opo u lilongekidile eninginifo?

15. Elivelombedi lashili ola kwatela mo shike?

¹⁵ Oshinima shotete shomoinima oyo tu na okuninga osho okulivela ombedi shili omolwomanyono etu. (Oil. 2:37, 38) Ngeenge otwe livela ombedi shili, ohatu ka ninga omalunduluko oo a pumbiwa. Mbela owa efa po eenghedindjikilile inadi koshoka odo hadi nyemateke Jehova, ngaashi oluhaelo, okushila omakaya, okulongifa elaka la honga, ile omalaka mai? (1 Kor. 6:9, 10; 2 Kor. 7:1; Ef. 4:29) Ngeenge ino shi ninga natango, kendabala okutwikila okuninga omalunduluko. Popya nomunhu oo hamu konakona naye Ombiibeli, ile u pule ovakulunhuongalo ve ku kwafele noku ku pa ewiliko. Ngeenge ou li natango meumbo novadali voye, twikila oku va pula ve ku kwafele u efe po eenghedindjikilile dii, odo tashi dulika tadi ku imbi u ninginifwe.

16. Oshike tu na okuninga, ngeenge otwa hala okulongela Jehova pandjikilile?

¹⁶ Osha fimana yo okukala tu na onghedindjikilile yokuninga oinima yopamhepo. Osho osha kwatela mo okukala pokwoongala kwopaKriste nokukufa ombinga muko. (Heb. 10:24, 25) Ngeenge owa wana okukala omuudifi, ou na okukala ho ningi ngaho pandjikilile. Ngeenge owa kala ho kufa ombinga luhapu moilonga oyo tai xupifa eemwenyo, oto ke i  hafela neenghono. (2 Tim. 4:5) Ngeenge ou li omunyasha noho di meumbo lovadali voye, lipula kutya: ‘Mbela ovadali vange ova pumbwa okudimbulukifa nge okuya kokwoongala, ile moukalele? Ile ohandi katuka eenghatu kwaame mwene?’ Ngeenge oho katuka eenghatu da tya ngaho kwoove mwene, oto ulike kutya ou na eitavelo, u hole Jehova Kalunga nowe mu pandula omolwoinima aishe oyo e ku pa. Oinima oyo oi li “oilonga yometilokalunga,” eeshali odo ho pe Jehova. (2 Pet. 3:11; Heb. 13:15) Eeshali adishe odo hatu yandje nehalo liwa nopehe na okufininikwa ohadi hafifa Kalunga ketu. (Yelekanifa no 2 Ovakorinto 9:7.) Ohatu katuka eenghatu da tya ngaho, molwaashi ohashi tu hafifa okuyandja osho sha denga mbada kuJehova.

17-18. Oukwatya wa fimanenena ulipi tau ke ku kwafela u ninge exumokomesho fiyo wa ninginifwa, nomolwashike? (Omayeletumbulo 3:3-6)

¹⁷ Eshi to twikile okuninga exumokomesho fiyo wa ninginifwa, oto ka taalela omashongo. Ovanhu vamwe otashi dulika ve ke ku sheke omolweitavelo loye lipe, notashi dulika nokuli ve ku pataneke, ile ve ku hepeke. (2 Tim. 3:12) Eshi to longo noudiinini u efe po eenghedindjikilile dii, otashi dulika u ka ninge oinima ii natango. Ile otashi dulika u kanife elididimiko nokukenyanana, molwaashi tashi dulika u wete to anye okuhanga elalakano loye. Oshike tashi ke ku kwafela u lididimike? Oukwatya wa fimanenena, ohole yokuhola Jehova.

¹⁸ Ohole yoye yokuhola Jehova oi li oukwatya muwa, oukwatya wa denga mbada oo u na. (Lesha Omayeletumbulo 3:3-6.) Ohole inene yokuhola Kalunga otai dulu oku ku kwafela u taalele omashongo nomupondo. Ombiibeli oya popya luhapu kombinga yohole yaJehova i na oudiinini yokuhola ovapiya vaye. Ohole i na oudiinini oya hala kutya Jehova ke na efiku a efe po ovapiya vaye, ile a efe po okukala e va hole. (Eps. 100:5) Owa shitwa oshifeka shaKalunga. (Gen. 1:26) Ongahelipi to dulu okuhopaenena ohole ya tya ngaho?

19. Ongahelipi to dulu okuhapupalifa olupandu loye omolwaashishe osho Jehova e ku ningila? (Ovagalati 2:20)

¹⁹ Kala u na olupandu. (1 Tes. 5:18) Efiku keshe, lipula kutya, ‘Ongahelipi Jehova a ulikila nge ohole?’ Opo nee pandula Jehova momailikano oye, to tumbula oinima kondadalunde oyo e ku ningila. Didilika kutya Jehova okwe ku ningila oinima iwa pauhandimwe, molwaashi oku ku hole, ngaashi ashike omuyapostoli  Paulus a li a didilika shi na sha naasho kombinga yaJehova. (Lesha Ovagalati 2:20.) Lipula kutya, ‘Mbela naame onda hala oku mu ulikila kutya ondi mu hole?’ Ohole yokuhola Jehova otai ke ku kwafela u finde omayeleko nou taalele omashongo nomupondo. Otai ke ku linyengifa yo u twikile okulongela Jehova pandjikilile nokuulikila Xo efiku keshe kutya ou mu hole.

20. Oshike sha kwatelwa mo mokuliyapulila Jehova, nongahelipi etokolo olo la fimana?

²⁰ Mokweendela ko kwefimbo, ohole yoye yokuhola Jehova otai ke ku linyengifa u ilikane eilikano le likalekelwa. Oto ke liyapulila Kalunga. Dimbuluka kutya ngeenge owe liyapulile Jehova, oto ka kala u na eteelelo litunhula olo kutya: Oto ka kala waJehova fiyo alushe. Ngeenge owe liyapulila Jehova onghamwenyo yoye, owa udaneka oku mu longela momafimbo mawa nomomafimbo mai. Ito ka pumbwa okuningulula eudaneko olo. Oshoshili kutya eshi twe liyapulila Jehova, otwa ninga etokolo la kwata moiti. Diladila kwaashi: Oto ka ninga omatokolo mahapu monghalamwenyo yoye, amwe omuo omawa neenghono, ashike itaa ka yelekwa netokolo lokuliyapulila Jehova onghalamwenyo yoye. (Eps. 50:14) Satana ota kendabala okunghundipaleka ohole yoye yokuhola Xo, e lineekela kutya oto ka efa po oudiinini woye. Ino pa Satana omhito nandenande! (Job 27:5) Ohole yoye ya kola yokuhola Jehova otai ke ku linyengifa u kale metwokumwe neliyapulo loye noto ka enda to ehene popepi elela naXo womeulu.

21. Omolwashike hatu tile kutya eninginifo kali fi exulilo, ndele ehovelo?

²¹ Konima eshi we liyapulila Jehova, popya novakulunhuongalo vomeongalo leni kombinga yonghatu ya fimanenena ya shikula ko. Dimbuluka alushe kutya eninginifo kali fi exulilo, ndele ehovelo. Ola hovela nonghamwenyo ihe na exulilo yokulongela Jehova. Onghee pameka ohole yoye yokuhola Xo womeulu paife. Litulila po omalalakano, opo ohole yoye i kule neenghono efiku keshe. Eenghatu da tya ngaho, otadi ke ku linyengifa u ninginifwe. Olo otali ka kala efiku litunhula. Ndele olo oli li ashike ehovelo. Twikila okukulika ohole yoye yokuhola Jehova nosho yo Omona waye fiyo alushe.