1. Ovapiya vamwe ovadiinini vaJehova otashi dulika tave lipula nashike?

 ITASHI hekeleke tuu okushiiva kutya Jehova okwa hokwa oshiwana shaye shi li ongudu! Ombiibeli oya ti: “Omwene okwa hokwa oshiwana shaye.” (Eps. 149:​4, KB-13) Ashike omafimbo amwe, vamwe ohava kala tave lipula kutya, ‘Mbela Jehova okwa hokwa nge ngoo pauhandimwe?’ Omafimbo amwe, ovapiya vahapu vaJehova ovadiinini ovo va popiwa mOmbiibeli ova li hava mono shidjuu okwiitavela kutya Jehova okwe va hokwa. — 1 Sam. 1:​6-10; Job 29:​2, 4; Eps. 51:11.

2. Oolyelye va hokiwa kuJehova?

² Ombiibeli oye shi popya sha yela kutya ovanhu inava wanenena otava dulu okukala va hokiwa kuJehova. Ngahelipi mbela? Otu na okukala tu na eitavelo muJesus Kristus nokuninginifwa. (Joh. 3:16) Kungaho, ohatu ulike moipafi yovanhu kutya otwe lidilulula notwa udanekela Kalunga kutya ohatu ka longa ehalo laye. (Oil. 2:38; 3:19) Jehova oha kala e tu hafela neenghono, ngeenge hatu katuka eenghatu da tya ngaho, opo tu pange oukaume wopofingo naye. Ngeenge otwa ningi ngaashi hatu dulu, opo tu twikile okukala metwokumwe neano letu, Jehova ota ka kala e tu hokwa note ke tu tala ko tu li ookaume kaye kopofingo. — Eps. 25:14.

3. Oshike hatu ka kundafana?

³ Omolwashike vamwe tashi dulika omafimbo amwe va kale ve udite kutya inava hokiwa kuKalunga? Jehova oha ulike ngahelipi  kutya okwe tu hokwa? Ongahelipi Omukriste ta dulu okukala e na oushili kutya okwa hokiwa kuKalunga?

ETOMHENO KUTYA OMOLWASHIKE VAMWE VE UDITE KUTYA JEHOVA INE VA HOKWA

4-5. Nokuli nonande otu udite tuhe na oshilonga, ohatu dulu okukala tu na oushili ulipi?

⁴ Vahapu vomufye otwa kala hatu kondjo nomaliudo okukala tu udite tuhe na oshilonga okudja kounona wetu. (Eps. 88:15) Omumwatate wedina Adrián okwa ti: “Onda kala alushe ndi udite ndihe na oshilonga. Eshi nda li okaana, ohandi dimbuluka nda li nda ilikana shi na sha noukwaneumbo wetu kutya otau ka kala mOparadisa, nokuli nonande onda li ndi na oushili kutya ame inandi wana okuya mo.” Tony, oo a kulila moukwaneumbo uhe fi wEendombwedi, okwa ti: “Ovadali vange kave na efiku va lombwelele nge kutya ove hole nge, ile va pandule nge. Osho osha ningifa nge ndi diladile kutya kandi na osho nda ninga she va hafifa.”

⁵ Ngeenge omafimbo amwe ohatu kala tu udite kutya katu na oshilonga, natu dimbuluke kutya Jehova oye mwene e tu nanena kuye. (Joh. 6:44) Oha mono omaukwatya etu mawa oo ihatu dulu okumona fye vene noku shii osho shi li momitima detu. (1 Sam. 16:7; 2 Omaf. 6:30) Onghee ohatu dulu okukala twe mu lineekela, eshi a ti kutya otu na ongushu momesho aye. — 1 Joh. 3:​19, 20.

6. Omuyapostoli Paulus okwa li e udite ngahelipi omolwomanyono aye omonakudiwa?

⁶ Fimbo inatu shiiva oshili, vamwe vomufye otashi dulika twa ninga oinima oyo hatu livele ombedi fiyo okunena. (1 Pet. 4:3) Nokuli nOvakriste ovadiinini ohava kondjifa eamo loulunde. Mbela omutima woye ohau ku tokola? Ngeenge osho, otashi ku hekeleke okushiiva kutya ovapiya vaJehova ovadiinini navo ova kondja nomaliudo a tya ngaho. Pashihopaenenwa, omuyapostoli Paulus okwa li ha kala a nyemata, ngeenge ta diladila kokuhawanenena kwaye. (Rom. 7:24) Oshoshili kutya Paulus okwa li e lidilulula nokwa ninginifwa. Ashike okwa li e litala ko e “dulike kovayapostoli aveshe” noku li omulunde “a shiya ko.” — 1 Kor. 15:9; 1 Tim. 1:15.

7. Oshike tu na okukaleka momadiladilo shi na sha nomanyono etu omonakudiwa?

⁷ Tate yetu womeulu okwa udaneka oku tu dimina po, ngeenge otwe livela ombedi. (Eps. 86:5) Onghee ngeenge otwe livela ombedi shili omolwomanyono etu, ohatu dulu okukala tu na elineekelo kutya osho Jehova a popya oshoshili nokwe tu dimina po. — Kol. 2:13.

8-9. Ongahelipi hatu dulu okufinda omaliudo oo kutya katu na efiku tu ninge sha wana osho tashi hafifa Jehova?

⁸ Atusheni otwa hala okulongela Jehova pauyadi ngaashi hatu dulu. Ashike vamwe ohava kala ve udite kutya ihava longo sha wana, opo va kale va hokiwa kuye. Omumwameme wedina Amanda okwa ti: “Luhapu ohandi diladila kutya okupa Jehova osho sha denga mbada osha hala okutya ondi na alushe okulonga shihapu. Ohandi kendabala lwoikando ihapu okuninga shihapu shi dulife pwaasho handi dulu. Onghee ngeenge onda kala inandi pondola, ohandi diladila kutya Jehova okwa handukila nge, ngaashi nde lihandukila ame mwene.”

⁹ Ongahelipi hatu dulu okufinda omaliudo okukala tu udite kutya katu na efiku tu longe sha wana, opo tu hafife Jehova? Dimbuluka kutya Jehova oku na ondjele. Ina teelela tu ninge shihapu shi dulife pwaasho hatu dulu. Jehova ohe tu pandula mwaashishe osho hatu mu ningile, shimha ashike hatu mu pe osho sha denga mbada. Natango, diladila koihopaenenwa yopaMbiibeli yaavo va longela Jehova nomutima aushe. Pashihopaenenwa, diladila kombinga yaPaulus. Okwa longa noudiinini oule womido, a enda oinano ile nokwa tota po omaongalo mahapu. Ndele eshi onghalamwenyo yaye ya lunduluka noka li vali ha dulu okuudifa ngaashi nale, mbela osho osha hala kutya ka li vali a hokiwa kuJehova? Ahowe. Okwa twikila okuninga ngaashi ta  dulu, na Jehova okwe mu nangeka noupuna. (Oil. 28:​30, 31) Sha faafana, onghedi omo hatu longele Jehova otai dulu okulunduluka efimbo limwe. Ashike osho sha fimana kuye omalinyengotomheno etu oku mu longela. Paife natu ka kundafaneni eenghedi dimwe omo Jehova ha ulike kutya okwe tu hokwa.

JEHOVA OHA ULIKE NGAHELIPI KUTYA OKWE TU HOKWA?

10. Jehova ohe tu lombwele ngahelipi kutya okwe tu hokwa? (Johannes 16:27)

¹⁰ Okwe tu pa Ombiibeli. Jehova oha kongo eenghedi, opo a ulike kutya oku hole ovapiya vaye nokwe va hokwa. Ombiibeli oya popya eemhito dopavali omo Jehova a lombwela Jesus kutya oku li Omona waye omuholike nokwe mu hokwa. (Mat. 3:17; 17:5) Mbela owa hala Jehova e ku lombwele kutya okwe ku hokwa? Jehova iha popi nafye odikilila okudja meulu, ashike ohe shi ningi okupitila mOmbiibeli. Jehova ohe tu lombwele kutya okwe tu hokwa, ngeenge hatu lesha eendjovo daJesus odo di li mOmavaengeli. (Lesha Johannes 16:27.) Jesus okwa hopaenena filufilu omaukwatya aXe. Onghee hano, ngeenge hatu lesha nghee Jesus a li a lombwela ovashikuli vaye ovadiinini, ovo va li inava wanenena, kutya okwe va hokwa, ohatu dulu okukala tu udite Jehova a fa te tu lombwele eendjovo odo. — Joh. 15:​9, 15.

11. Omolwashike ngeenge hatu mono oixuna inashi hala kutya Jehova ine tu hokwa? (Jakob 1:12)

¹¹ Ohe tu pe osho twa pumbwa. Jehova okwa halelela oku tu kwafela, ngaashi mokuwanifa po eemhumbwe detu. Omafimbo amwe, otashi dulika Jehova a efe tu mone oixuna, ngaashi a li e shi ningila omuyuki Job. (Job 1:​8-11) Ngeenge twa taalela omashongo, itashi ti kutya Kalunga ine tu hokwa. Ponhele yaasho, ohae tu pe eemhito tu ulike kutya otu hole Jehova neenghono notwe lineekela muye. (Lesha Jakob 1:12.) Ohatu ka mona kutya oku tu hole note tu yambidida, eshi te tu kwafele tu lididimike.

12. Oshike hatu lihongo moshimoniwa shaDmitrii?

¹² Diladila kwaasho sha li sha ningilwa omumwatate Dmitrii wokoAsia. Okwa li a kanifa oilonga yaye noka li a dula okumona oilonga oule weemwedi dihapu. Onghee okwa li a tokola okukala ha kufa ombinga pauyadi moukalele, ta ulike kutya okwe lineekela muJehova. Opa pita eemwedi dihapu, ashike ka li a dula natango okumona oilonga. Opo nee okwa li a kwatwa koudu wa kwata moiti noka li vali ta dulu okudja mo mombete. Okwa li a hovela okudiladila kutya ke fi vali omushamane nosho yo xe omudali e li nawa, nokwa li ta diladila kutya Jehova ine  mu hokwa vali. Opo nee oufiku umwe okamonakadona kaye oka li ka shanga eendjovo mokambapila odo di li muJesaja 30:​15, KB-13 tadi ti: ‘Okulimwenenena nomokulineekela omo tamu di eenghono deni.’ Oke mu etela okambapila pombete yaye, ndele taka ti: “Tate, ngeenge u udite nai, dimbuluka omushangwa ou.” Dmitrii okwa li a pandula Jehova, eshi a mona kutya oukwaneumbo waye ou na natango oikulya ya wana, oikutu nosho yo onhele yokukala. Okwa ti: “Onda li ashike nda pumbwa okukala nda ngungumana nokutwikila okukala nde lineekela muKalunga kange.” Ngeenge owa taalela eshongo la faafana, kala u na elineekelo kutya Jehova ote ku file oshisho note ku kwafele u lididimike.

13. Jehova otashi dulika a longife oolyelye, opo a ulike kutya okwe tu hokwa, nohe shi ningi ngahelipi?

¹³ Okwe tu pa ovamwatate novamwameme. Jehova oha longifa ovamwatate novamwameme, opo a ulike kutya okwe tu hokwa. Pashihopaenenwa, otashi dulika e linyengife vamwe ve tu twe omukumo pefimbo la wapala. Osho osha li sha ningilwa omumwameme wokoAsia pefimbo opo a li a wililwa po unene. Okwa li a kanifa oilonga yaye, nokwa li ta ehama neenghono. Opo nee omushamane waye okwa li a nyona enyono la kwata moiti noka li vali omukulunhuongalo. Okwa ti: “Kanda li ndi udite kutya omolwashike oinima oyo tai ningwa. Onda li handi diladila kutya pamwe ondi na osho nda ninga sha puka nokanda li vali nda hokiwa kuJehova.” Omumwameme okwa li a pula Jehova e mu shilipaleke kutya okwe mu hokwa natango. Jehova okwe shi ninga ngahelipi? Omumwameme okwa ti: “Ovakulunhuongalo ova li va popya naame nova li va shilipaleka nge kutya Jehova oku hole nge.” Lwanima, okwa li vali a pula Jehova e mu kwafele. Okwa ti: “Efiku olo tuu olo onda li nda yakula onhumwafo ya dja kovamwatate novamwameme meongalo. Eshi handi lesha eendjovo davo dehekeleko, onda li ndi wete kutya Jehova okwa uda eilikano lange.” Luhapu Jehova oha  ulike kutya okwe tu hokwa, okupitila meendjovo davamwe donghenda. — Eps. 10:17.

14. Omonghedi imwe vali ilipi Jehova ha ulike kutya okwe tu hokwa?

¹⁴ Natango, Jehova oha ulike kutya okwe tu hokwa mokulongifa ovamwatate novamwameme, opo ve tu pe omayele, ngeenge twe a pumbwa. Pashihopaenenwa, pefimbo lovayapostoli, Jehova okwa li a longifa omuyapostoli Paulus, opo a shangele ovaitaveli vakwao eenhumwafo 14. Meenhumwafo odo omwa yandjwa omayele opahole, ashike itaa lile ovanhu okafima koluko. Omolwashike Jehova a lombwela Paulus a kwatele mo omayele a tya ngaho? Jehova oku li Xe a denga mbada noha pe ovana vaye ovo e “hole” outekuduliko. (Omayel. 3:​11, 12 KB-13) Onghee ngeenge umwe te tu pe omayele a kanghamena kOmbiibeli, osho itashi ti kutya Jehova okwe tu handukila, ponhele yaasho, ota ulike kutya oku tu hole. (Heb. 12:6) Omeenghedi dimwe dilipi Jehova a ulika kutya okwe tu hokwa?

OUMBANGI UMWE OO TAU ULIKE KUTYA JEHOVA OKWE TU HOKWA

15. Oolyelye Jehova ha pe omhepo iyapuki, nomolwashike osho tashi dulu oku tu pa elineekelo?

¹⁵ Jehova oha yandje omhepo iyapuki kwaavo a hokwa. (Mat. 12:18) Ohatu dulu okulipula kutya, ‘Mbela ohandi ulike ngoo oiimati yomhepo yaKalunga monghalamwenyo yange?’ Mbela owa didilika ngoo kutya paife oho lididimikile vamwe shi dulife nale, eshi ino shiiva Jehova? Ngeenge owe lihongo okuulika oiimati yomhepo yaKalunga, oto ka mona kutya owa hokiwa kuJehova. — Tala oshimhungu “ Oiimati yomhepo oyo . . . ”

16. Jehova oha longifa oolyelye va udife onghundana iwa, nou uditile ngahelipi oshinima osho? (1 Ovatessalonika 2:4)

¹⁶ Jehova okwe lineekelela onghundana iwa ovo a hokwa. (Lesha 1 Ovatessalonika 2:4.) Didilika nghee omumwameme wedina Jocelyn a mona ouwa, eshi a udifila vamwe onghundana iwa. Efiku limwe, Jocelyn okwa li a penduka ina hafa. Okwa ti: “Kanda li ndi na eenghono nonda li ndi udite ndihe na oshilonga. Onda li handi kokola ondjila nonda li ndi na okuya moukalele efiku olo. Onghee onda li nda ilikana, ndele handi i moukalele.” Ongula oyo, Jocelyn okwa li a shakeneka Mary, omukainhu oo a li a tambula ko ekonakonombiibeli. Konima yeemwedi donhumba, Mary okwa popya kutya okwa kala ha ilikana kuKalunga e mu kwafele, eshi Jocelyn a konghola peumbo laye. Okutala koshimoniwa osho, Jocelyn okwa ti, “Onda li nda fa ndi udite  Jehova ta lombwele nge ta ti, ‘Onde ku hokwa.’” Oshoshili kutya havanhu aveshe tava ka pwilikina konghundana oyo hatu udifa. Ashike ohatu dulu okukala noushili kutya Jehova oha kala a hafa, ngeenge hatu ningi eenghendabala ngaashi hatu dulu tu udifile vamwe onghundana iwa.

17. Oshike hatu lihongo koshimoniwa shaVicky shi na sha nekulilo? (Epsalme 5:12)

¹⁷ Jehova oha yandje ashike ouwa wekulilo kwaavo a hokwa. (1 Tim. 2:​5, 6) Ndele ongahelipi ngeenge omitima detu inadi itavela natango kutya otwa hokiwa kuJehova, nokuli nonande otu na eitavelo mekulilo notwa ninginifwa? Dimbuluka kutya haalushe hatu dulu okulineekela omaliudo etu, ndele ohatu dulu okulineekela Jehova. Okwa tala ko ovo ve na eitavelo mekulilo ve li ovayuki momesho aye nokwa udaneka oku va nangeka noupuna. (Lesha Epsalme 5:12; Rom. 3:26) Okudilonga kekulilo okwa kwafela Vicky. Efiku limwe, konima eshi a dilonga moule kombinga yekulilo, okwa ti: “Jehova okwa kala te lididimikile nge efimbo lile. . . . Ndele, onda fa ashike nda li handi mu lombwele kutya: “Ohole yoye kainene itai fiki ko kwaame. Eyambo lOmona woye inali wana okukufa po omanyono ange.” Eshi a dilonga koshali yekulilo, okwa li a hovela okukala e udite kutya Jehova oku mu hole. Nafye ohatu ka kala tu udite kutya otu holike kuJehova nohatu ka mona kutya okwe tu hokwa, eshi hatu dilonga kekulilo.

18. Oushili ulipi hatu dulu okukala tu na, ngeenge otwa twikile okukala tu hole Tate yetu womeulu?

¹⁸ Nonande otashi dulika tu kendabale noudiinini tu tule moilonga osho twe lihonga moshitukulwa eshi, omafimbo amwe otashi dulika tu kale twa teka omukumo notwa limbililwa, ngeenge Jehova okwe tu hokwa ngoo shili. Ngeenge osho oshe ku ningilwa, dimbuluka kutya Jehova okwa hokwa “ovo tava twikile okukala ve mu hole.” (Jak. 1:12) Onghee twikila okweehena popepi naJehova nokudidilika eenghedi adishe odo tadi ulike kutya okwe ku hokwa. Kaleka alushe momadiladilo kutya Jehova “ke li kokule nakeshe umwe womufye.” — Oil. 17:27.