Ohatu dulu ashike okudiminwa po omanyono etu okupitila mekuliloyambo olo Jesus a futa nohonde yaye. (Ef. 1:7) Natango, Ombiibeli oya ti: ‘Kalunga okwa ulika onheni nokwa dimina po ovanhu omanyono avo omonakudiwa,’ sha hala okutya fimbo Jesus ina yandja ekulilo. (Rom. 3:25) Ongahelipi Jehova a dula okudimina po ovanhu omanyono avo fimbo ekulilo inali futwa nopefimbo opo tuu opo oku li Kalunga kouyuki?

Jehova okwa udaneka ‘oludalo’ olo la li tali ka xupifa ovo ve na eitavelo muYe nosho yo momaudaneko aye. Eshi Jehova a ninga eudaneko olo, ekulilo ola fa nale la yandjwa. (Gen. 3:15; 22:18) Kalunga okwa li e shi shii filufilu kutya peufwafimbo laye, Omona waye ota ka yandja ekulilo nehalo liwa. (Gal. 4:4; Heb. 10:​7-10) Eshi Jesus a li kombada yedu, Jehova okwa li e mu pa eenghono dokudimina po ovanhu omanyono avo, ofimbo ekulilo la li inali yandjwa. Jesus okwa li a dula okudimina po ovo va li ve na eitavelo, molwaashi okwa li e shii kutya ekulilo olo a li ta ka yandja otali ka tuvika omatimba avo. — Mat. 9:​2-6.