1, 2. (a) Eendjovo daJesus odo dili muMateus 24:12 oda li tadi popi kombinga yoolyelye? (b) Ongahelipi embo lOilonga la ulika kutya Ovakriste votete ova li hava kala nokuulika ohole? (Tala efano pehovelo loshitukulwa.)

EDIDILIKO limwe olo Jesus a li a yandja li na sha ‘nomafiku axuuninwa’ olo kutya ‘ohole yavahapu otai ka talala.’ (Mat. 24:3, 12) Mefelemudo lotete, Ovajuda ovo va li tave liti kutya oshiwana shaKalunga ova li va efa ohole yavo yokuhola Kalunga i talale.

² Mepingafano naasho, Ovakriste vamwe ova li ve lipyakidila ‘nokuudifa evaengeli laKristus Jesus’ nokuulika ohole yavo yokuhola Kalunga, Ovakriste vakwao nosho yo ovo vehe fi ovaitaveli. (Oil. 2:44-47; 5:42) Ashike nande ongaho, ovashikuli vamwe vaJesus vomefelemudo lotete ova li va efa ohole yavo i talale.

3. Oshike tashi dulika sha li sha ningifa ohole yOvakriste vamwe i talale?

³ Jesus Kristus omunyumunwa okwa li a lombwela Ovakriste vomefelemudo lotete ovo va li muEfeso, a ti: “Ondi na sha naave, eshi wa efa ohole yoye yotete.” (Eh. 2:4) Mbela okwa li e shi ninga netomheno lashike? Ovashikuli vaJesus votete otashi dulika va li va nwefwa mo kouhalu wombelela wounyuni. (Ef. 2:2, 3) Ngaashi  oilando ihapu kunena, Efeso shomefelemudo lotete nasho osha li shi yadi oukolokoshi. Osha li oshilando sha punapala omo ovanhu va li hava kala unene tava yandje elitulemo koinima yopamaliko, komalihafifo nosho yo konghalamwenyo youdjeko. Omahalo okuliholamwene okwa li a ningifa ovanhu va kale vehe na ohole. Natango, elihumbato la nyata nosho yo oluhaelo ola li apeshe.

4. (a) Omeenghedi dilipi ohole pefimbo letu ya talala? (b) Omeenghedi nhatu dilipi ohole yetu tai dulu okuyelekwa?

⁴ Exunganeko laJesus li na sha nohole yavahapu tai talala otali wanifwa nokunena. Ovanhu kunena ohole yavo yokuhola Kalunga otai ende tai talala neenghono. Ovanhu omamiliyona ova pa Kalunga ombuda nohava kongo ekwafo komahangano opanhu opo va kandule po omaupyakadi avo. Ashike nomokati kovanhu ovo ihava longele Jehova Kalunga, ohole yavo otai twikile nokutalala. Natango, ngaashi ashike eenghalo odo da li da holoka meongalo lomuEfeso mefelemudo lotete, nokunena Ovakriste vashili navo otava dulu okukala vehe na ko nasha ndele tava efa ohole yavo i talale. Paife ohatu ka kundafana eenghedi nhatu omo ohole yetu tai dulu okuyelekwa: (1) Ohole yokuhola Jehova, (2) ohole yokuhola oshili yOmbiibeli, (3) nosho yo ohole yokuhola ovamwatate.

5. Omolwashike tu na okukala tu hole Kalunga?

⁵ Diva mefiku ashike olo Jesus a li a popya shi na sha nohole tai xulu po, okwa li a divilika ohole oyo ya fimanenena i dule adishe. Okwa ti: “‘Hola Omwene Kalunga koye nomutima woye aushe nomwenyo woye aushe neendunge doye adishe.’ Oshipango shinene noshotete osho tuu eshi.” (Mat. 22:37, 38) Okukala tu hole Kalunga nohole yomoule ohashi tu kwafele tu dulike koipango yaye, tu lididimike nokukala tu tonde osho shii. (Lesha Epsalme 97:10.) Ashike Satana nounyuni waye otava kendabala okuxulifa po ohole yetu yokuhola Kalunga.

6. Eshi ovanhu vehe na vali ohole yokuhola Kalunga mbela osha eta oidjemo ilipi?

⁶ Ounyuni ou wetu dingilila ou na etaleko la puka li na sha nohole. Ponhele yokukala ve hole Omushiti, ovanhu ‘ove lihole voovene.’ (2 Tim. 3:2) Ounyuni ou tau pangelwa kuSatana ou ya di “okahalu komesho noifulalala yokukalamwenyo.” (1 Joh. 2:16) Omuyapostoli Paulus okwa londwela Ovakriste shi na sha nokahalu kombelela, a ti: “omadiladilo ombelela oo efyo . . . osheshi ombelela ohai diladila olwoodi naKalunga.” (Rom. 8:6, 7) Oshoshili kutya ovo va kala tava lalakanene oinima yopamaliko ile va kala moluhaelo ove lihanga va nyemata ile va yahamekwa neenghono. — 1 Kor. 6:18; 1 Tim. 6:9, 10.

7. Ovashikuli vaKristus vo kunena ova taalela omashongo elipi?

⁷ Moilongo imwe, ovanhu ovo va itavela kutya Kalunga ita dulu okushiivika naavo inava itavela muye nosho yo ovo va itavela moevolusi ohava xumifa komesho omahongo oo taa ningifa ovanhu va kale vehe hole Kalunga ile va kale inave mu itavela. Ova tomha ovanhu vahapu va itavele kutya omunhu oku na okukala shapo elai ile ehena eendunge ngeenge okwa itavela mOmushiti. Pefimbo olo tuu olo, ovanongononi ova fimanekwa, naasho ohashi ningifa ovanhu va kale ihava yandje elitulemo kOmushiti wetu. (Rom. 1:25) Ngeenge otwa kala hatu pwilikine komahongo a tya ngaho, otashi dulika tu twalwaatwalwe kokule naJehova nohole yetu yoku mu hola otai ka talala. — Heb. 3:12.

8. (a) Oshiwana shaJehova ohashi kala sha taalela eenghalo dilipi tadi shololifa? (b) Eshilipaleko lilipi hatu hange mEpsalme 136?

⁸ Etekomukumo otali dulu yo okunghundipaleka eitavelo letu nokuningifa ohole yetu yokuhola Kalunga i talale. Monghalelo ei yoinima tai pangelwa kuSatana, atusheni ohatu shakeneke eenghalo tadi tu shololifa. (1 Joh. 5:19) Otashi  dulika tu kale tu na omaupyakadi oo hae etifwa koukulupe, kokuhenoukolele ile kouxupilo tau kande omapunya. Ile otashi dulika hatu kondjo nomaliudo okukala tu wete tuhe na oshilonga, twa taalela eenghalo odo twa li inatu teelela ile omaunghundi opaumwene. Ashike inatu efa nande eenghalo odo ile omaliudo a tya ngaho e tu ningife tu itavele kutya Jehova okwe tu ekelashi. Ponhele yaasho, otwa pumbwa okukala hatu dilonga keendjovo deshilipaleko di na sha nohole yaJehova i na oudiinini. Eendjovo odo otadi hangika mEpsalme 136:23, olo tali ti: “Oye tuu ou, e tu dimbulukwa mediniko letu, osheshi alushe ouwanghenda waye tau kala po.” Oshoshili kutya ohole yaJehova i na oudiinini yokuhola ovapiya vaye ihai xulu po. Onghee hano, ohatu dulu okukala noushili kutya oha udu ‘omailikano etu’ nohe a nyamukula. — Eps. 116:1; 136:24-26.

9. Oshike sha li sha kwafela Paulus a kaleke po ohole yaye yokuhola Kalunga?

⁹ Ngaashi omupsalme, Paulus naye okwa li a pamekwa eshi a li a dilonga kunghee Jehova a kala te mu yambidida. Paulus okwa shanga a ti: “Omwene Oye omukwafi wange, ame ihandi tila; omunhu ota dulu okuninga nge shike?” (Heb. 13:6) Elineekelo olo la kola mohole yaJehova ola li la kwafela Paulus e lididimikile omaupyakadi onghalamwenyo. Ka li a efa eenghalo dii di mu shololife. Eshi Paulus a li modolongo, okwa li a shanga eenhumwafo detwomukumo. (Ef. 4:1; Fil. 1:7; Filem. 1) Naashi Paulus a li ta yelekwa, okwa kala ehole Kalunga. Oshike sha li she mu kwafela? Okwa kala e liameka ‘kuKalunga kehekeleko alishe, ou te tu hekeleke moudjuu wetu aushe.’ (2 Kor. 1:3, 4) Ongahelipi hatu dulu okuhopaenena oshihopaenenwa shaPaulus nokukaleka ohole yetu yokuhola Jehova ya xwama?

10. Ongahelipi hatu dulu okukaleka ohole yetu yokuhola Jehova ya xwama?

¹⁰ Paulus okwa popya ye mwene efinamhango limwe li na sha nanghee hatu dulu okukaleka ohole yetu yokuhola Jehova ya xwama. Okwa shangela ovaitaveli vakwao a ti: “Ilikaneni muhe nedimbuko.” Lwanima okwa shanga a ti: “Diinineni mokwiilikana.” (1 Tes. 5:17; Rom. 12:12) Okupopya naKalunga okupitila meilikano oshi li ekanghameno lokukala u na ekwatafano lopofingo naye. (Eps. 86:3) Ngeenge hatu mbubulile Jehova omadiladilo etu omoule nosho yo omaliudo etu, otashi ke tu kwafela tu ehene popepi elela naTate wetu womeulu, oo e li “Omuudi womailikano.” (Eps. 65:2) Shikwao vali, ngeenge otwa didilike kutya Jehova oha nyamukula omailikano etu, ohole yetu yoku mu hola otai ka kala ya xwama, nohatu ka kala twa tomhwa shili kutya “Omwene oku li popepi naaveshe, have mu ifana.” (Eps. 145:18) Okukala tu na elineekelo kutya Jehova ohe tu yambidida pahole otashi ke tu kwafele tu lididimikile omayeleko eitavelo.

11, 12. Ongahelipi hatu dulu okukulika ohole yetu yomoule yokuhola oshili yOmbiibeli?

¹¹ Tu li Ovakriste, otwa lenga oshili. Eendjovo daKalunga odi li odjo yoshili. Eshi Jesus a li ta ilikana kuXe, okwa ti: “eendjovo doye odo oshili.” (Joh. 17:17) Onghee hano, opo tu kale tu hole oshili otu na okukala tu hole Eendjovo daKalunga. (Kol. 1:10) Inashi kwatela mo ashike eudeko linini. Didilika nghee omushangi wEpsalme 119 a nwefwa mo e tu kwafele tu ude ko kutya osha hala okutya shike okukala tu hole oshili yOmbiibeli. (Lesha Epsalme 119:97-100.) Mbela ohatu dilonga ngoo kOmishangwa ile tu diladile moule kombinga yado momukokomoko wefiku? Olupandu letu li na sha noshili yOmbiibeli otali ka kula ngeenge otwa kala hatu dilonga keenghedi odo hatu mono ouwa ngeenge otwe shi ningi elalakano letu monghalamwenyo.

¹² Omupsalme okwa shanga a ti: “Omaudaneko oye omanyenye moshihokohoko shokanya  kange shi fike peni, omanyenye e dule omaadi eenyiki.” (Eps. 119:103) Sha faafana, ohatu dulu okumakela omulyo weendja dopamhepo odo hatu pewa kehangano laKalunga da kanghamena kOmbiibeli. Ohatu dulu okuhafela eendja odo mokudiladila ‘keendjovo da wapala’ doshili noku di longifa mokukwafela vamwe. — Omuud. 12:10.

13. Oshike sha li sha kwafela Jeremia a kale e hole oshili yOmbiibeli, nosha li she mu kuma ngahelipi?

¹³ Omuprofeti Jeremia okwa li e hole oshili yOmishangwa. Didilika nghee eendjovo daKalunga da li da kuma omutima waye. “Eendjovo doye oda hanga nge, ame onde di lya nde di pona. Ndele eendjovo doye oda li kwaame enyaku nehafo lomutima wange, osheshi ame onda lukilwa edina loye, Omwene, Kalunga komatanga ovakwaita.” (Jer. 15:16) Jeremia okwa li a lya nokupona pafaneko eendjovo daKalunga di na ondilo mokudilonga kudo. Kungaho okwa li a kulika olupandu lokomutima omolwoufembanghenda wokwiifanwa nedina laKalunga. Mbela ohole yetu yokuhola oshili yOmbiibeli ohai tu linyengifa ngoo tu mone nghee shi li oufembanghenda okwiifanwa nedina laKalunga nosho yo okuudifa kombinga yOuhamba waye momafiku aa axuuninwa?

14. Ongahelipi hatu dulu okukulika ohole yetu yokuhola oshili yOmbiibeli?

¹⁴ Kakele kokulesha Ombiibeli nosho yo oishangomwa oyo ya kanghamena kuyo, omonghedi vali ilipi hatu dulu okukulika ohole yomoule yokuhola oshili yOmbiibeli? Ohatu dulu yo okukulika ohole yetu yokuhola Eendjovo doshili mokukala pokwoongala pandjikilile. Ekonakono lOmbiibeli loshivike keshe okupitila mOshungonangelo oli li yo onghedi ya fimanenena omo hatu hongwa. Opo tu ude ko osho tashi kundafanwa mOshungonangelo, otwa pumbwa okulilongekida nawa oshitukulwa keshe. Onghedi imwe omo hatu dulu oku shi ninga omokulesha Omishangwa adishe odo da etwa mo. Kunena, Oshungonangelo otai dulu okutapwa kointaneta ko-jw.org ile okumonika ko-JW Library momalaka mahapu. Onghedi omo oishangomwa i li moikwaelektronika ohai shi ningifa shipu kufye okumona diva omishangwa odo da etwa mo moshitukulwa. Ndele kashi na nee mbudi kutya ohatu longifa onghedi ilipi, okulesha omishangwa noukeka nokudilonga kudo  otaku ke tu kwafela tu kulike ohole yomoule yokuhola oshili yOmbiibeli. — Lesha Epsalme 1:2.

15, 16. (a) Metwokumwe naJohannes 13:34, 35, oshike osho twa teelelika tu kale hatu ningi? (b) Ohole yetu yokuhola ovamwatate oya pambafana ngahelipi nohole yokuhola Kalunga nosho yo Ombiibeli?

¹⁵ Moufiku waye waxuuninwa kombada yedu, Jesus okwa li a lombwela ovahongwa vaye ta ti: “Oshipango shipe handi shi mu pe: mu holafane ngaashi Ame nda kala ndi mu hole, osho nanye yo mu holafane. Opo tuu opo aveshe tave mu koneke kutya, nye ovalongwa vange, ngeenge mu holafane.” — Joh. 13:34, 35.

¹⁶ Ohole yetu yokuhola ovamwatate novamwameme oya pambafana nohole yokuhola Jehova. Onghee, itatu dulu ashike okukala tu hole po umwe womuvo. Omuyapostoli Johannes okwa shanga a ti: “Osheshi ou ehe hole omumwaxe, nande e mu wete, oye ita dulu okuhola Kalunga ehe mu wete.” (1 Joh. 4:20) Shimwe vali, ohole yetu yokuhola Jehova nosho yo ovamwatate oya pambafana nohole yokuhola Ombiibeli. Omolwashike mbela? Omolwaashi ohole yetu yokuhola oshili yOmbiibeli ohai tu linyengifa tu dulike tashi di komutima koipango oyo i li mOmishangwa yokuhola Kalunga novamwatate. — 1 Pet. 1:22; 1 Joh. 4:21.

17. Omeenghedi dilipi hatu dulu okuulika ohole?

¹⁷ Lesha 1 Ovatessaloniki 4:9, 10. Omeenghedi dilipi hatu dulu okuulika ohole momaongalo etu? Otashi dulika omumwatate ile omumwameme wonhumba omunamido a pumbwa osheendifo opo a fike pokwoongala kwopaKriste. Otashi dulika yo omumwameme omufiyekadi a pumbwa ekwafo lokupangela sha meumbo laye. (Jak. 1:27) Ovamwatate novamwameme ovo va teka omukumo, va polimana ile va taalela omaudjuu onhumba kashi na nee mbudi kutya ovanyasha ile ovanamido, aveshe otwa pumbwa oku va pa elitulemo, oku va twa omukumo noku va hekeleka. (Omayel. 12:25; Kol. 4:11) Ohatu dulu okuulika kutya otu hole ovamwatate shili, hatu shi ningi paendjovo nomokulonga oilonga oyo tai ulike kutya otu na ko nasha ‘noovakwetu vomeitavelo.’ — Gal. 6:10.

18. Oshike tashi dulu oku tu kwafela tu pongolole po okuhaudafana pokati ketu novamwatate?

¹⁸ Ombiibeli oya xunganeka kutya “omafiku axuuninwa” onghalelo ei yoinima otaa ka didilikwa mo omolwoikala yokuliholamwene nosho yo olwisho. (2 Tim. 3:1, 2) Onghee hano, tu li Ovakriste otwa pumbwa okukulika ohole yetu yokuhola Kalunga, oshili yOmbiibeli novamwatate. Oshoshili kutya omafimbo amwe otashi dulika pa holoke okuhaudafana pokati ketu novamwatate. Kashi fi tuu enangekonoupuna ngeenge aveshe meongalo tave linyengifwa kohole va pongolole po okuhaudafana keshe monghedi yopahole! (Ef. 4:32; Kol. 3:14) Onghee hano, inatu efa nande ohole yetu i talale. Ponhele yaasho, natu twikileni okukala nohole yomoule yokuhola Jehova, Eendjovo daye nosho yo ovamwatate.