1, 2. (a) Omolwashike ovanyasha Ovakriste hava findana mokukondjifa eemhepo dowii? (Tala efano pehovelo loshitukulwa.) (b) Oshike hatu ka konakoneni?

OMUYAPOSTOLI Paulus okwa faafanifa onghalamwenyo yetu yopaKriste naayo yomukwaita oo ha kufa ombinga molwoodi. Fye ohatu lu oita yopamhepo, ndele kai fi yopambelela. Ndele nande ongaho, ovatondi vetu oko ve li shili. Satana neendemoni ovakwaita ve na ounghulungu muhapu. Potete otashi dulika nokuli tu mone twa fa itatu pondola sha, unene tuu ovanyasha Ovakriste. Ongahelipi tava dulu okukala nelineekelo kutya otava dulu okufinda eemhepo dowii? Oushili oyoo kutya ovanyasha otava dulu okufindana. Omolwashike mbela? Omolwaashi ohave ‘lipameke mOmwene nomeenghono daye.’ Ndele ohava ningi shihapu shihe fi ashike okulipameka meenghono daKalunga. Ove lilongekidila olwoodi. Ngaashi ovakwaita va deulwa nawa, navo ova djala “oilwifo aishe yaKalunga.” — Lesha Ovaefeso 6:10-12.

² Eshi Paulus a li ta yandje efaneko olo, otashi dulika a li e na momadiladilo oilwifo oyo ya li hai djalwa kovakwaita vaRoma. (Oil. 28:16) Natu ka konakoneni kutya omolwashike efaneko olo tali  wapalele. Eshi hatu konakona, didilika osho ovanyasha vamwe va popya kombinga yomashongo nosho yo ouwa wokudjala oshilwifo keshe shopamhepo.

3, 4. Ongahelipi oshili oyo tai hangwa mOmbiibeli ya fa ekwamo lomukwaita waRoma?

³ Lesha Ovaefeso 6:14. Ekwamo lomukwaita waRoma ola li hali kala li na oipapa yoivela nola li hali amene oshiya shaye. Elalakano lalo ola li okukwafela okukaleka oipapa yoivela ponhele nokupupaleka ondjudo yoilwifo. Omakwamo amwe okwa li haa kala e na oukwatelo va kola vokweendjelelifa eongamukonda nosho yo omukonda waye. Shimha omukwaita a mangele mo nawa ekwamo laye, okwa li ha kala e lilongekidila olwoodi.

⁴ Sha faafana, oshili oyo hatu lihongo mEendjovo daKalunga ohai tu amene koiponga yopamhepo oyo hai etifwa komahongo oipupulu. (Joh. 8:31, 32; 1 Joh. 4:1) Ngeenge otu hole oshili, otashi ka kala shipu kufye okudjala “oipapa yoivela,” kokutya okukala metwokumwe nomifikamhango daKalunga douyuki. (Eps. 111:7, 8; 1 Joh. 5:3) Shikwao vali, ngeenge otu na eudeko loshili lEendjovo daKalunga la yela, ohatu dulu okukala twa pama nokukondjifa ovapataneki vetu. — 1 Pet. 3:15.

5. Omolwashike tu na okupopya oshili?

⁵ Ngeenge otwa shiiva filufilu oshili yOmbiibeli, otai ke tu linyengifa tu kale metwokumwe nayo notu kale hatu popi oshili efimbo keshe. Omolwashike tu na okuhenuka okupopya oipupulu? Omolwaashi oipupulu oi li oshilwifo shaSatana osho hashi pondola unene. Oipupulu ohai ehameke oo te i popi nosho yo oo te i itavele. (Joh. 8:44) Onghee ohatu henuka okupopya oipupulu nonande inatu wanenena. (Ef. 4:25) Ashike otashi dulu okukala eshongo. Abigail, oo e na omido omulongo nahetatu, okwa ti: “Otashi dulika okupopya oshili haalushe naanaa haku monika ku na oshilonga, unene tuu ngeenge to popi oipupulu opo u likanyune ile u dje moupyakadi.” Omolwashike ha kendabala alushe okupopya oshili? Okwa ti: “Ngeenge handi popi oshili, eliudo lange ohali kala la yela koshipala shaJehova. Ovadali vange nookaume kange ove shii kutya otava dulu okulineekela nge.” Victoria, oo e na omido 23, okwa ti: “Otashi dulika u shekwe ngeenge to popi oshili ile to popile eitavelo loye. Ndele oho mono alushe omauwa mahapu: Oho kala u na omukumo, oho kala u udite wa ehena popepi naJehova noho kala wa fimanekwa kwaavo ve ku hole.” Efimbo keshe, osha fimana okukala twa ‘manga oshiya shetu noshili.’

6, 7. Omolwashike ouyuki wa faafanifwa noipapa yoivela?

⁶ Oipapa yoivela oyo ya li hai djalwa kovakwaita vaRoma mefelemudo lotete oya li hai kala ye liwila. Oipapa oyo oya li hai dingilwa mombadja noya li hai patelwa mo noupatifo nosho yo neemhato. Omukwaita okwa li ha kala a dingilwa oipapa yoivela okudja moshiya fiyo omofingo. Oshikutu shomukwaita osho osha li ashike hashi mu pitike a katuke eenghatu donhumba, nosha li sha pumbwa okukala tashi talwa ngeenge oipapa aishe oya patelwa ngoo peenhele. Oshikutu osho ohashi kelele ondungu yeongamukonda ile eendungu doikuti diha twe omutima waye ile oilyo vali imwe ya fimana.

⁷ Osho kashi fi tuu edidiliko langhee omifikamhango daJehova douyuki hadi amene omutima wetu wopafaneko! (Omayel. 4:23) Ngaashi ashike omukwaita iha lundulula oipapa yoivela opo a tule ko oyo inai kola, nafye inatu hala okulundulula omifikamhango daJehova douyuki noinima oyo tu wete kutya oi li mondjila kufye. Molwaashi fye inatu wanenena itatu dulu okwaamena omitima detu. (Omayel. 3:5, 6) Ponhele yaasho, otu na alushe okukala hatu tale ngeenge “oipapa yoivela” oyo Jehova e tu pa otwe i patela mo ngoo nawa momutima wetu.

8. Omolwashike sha fimana okukala metwokumwe nomifikamhango daJehova?

 ⁸ Mbela omafimbo amwe oho kala u udite kutya omifikamhango daJehova douyuki ode ku wilila po ile da ngabeka emanguluko loye? Daniel, oo e na omido 21, okwa ti: “Ovahongi novanafikola vakwetu ohava kala tava yolo nge molwaashi handi kala metwokumwe nomifikamhango dOmbiibeli. Onda kala nda teka omukumo nonda polimana oule wefimbo.” Oshike sha li she mu kwafela? Okwa ti: “Onda mona omauwa oo haa di mokukala metwokumwe nomifikamhango daJehova. Vamwe ‘vomookaume’ kange ova li va hovela okulongifa oingangamwifi; vamwe ova li va efa po ofikola. Osha li shi nyemateka okumona nghee va lundulukila kowii. Jehova ohe tu amene shili.” Madison, oo e na omido 15, okwa ti: “Ohandi kendabala okukala metwokumwe nomifikamhango daJehova nokuhashikula osho oomakula vange ve wete shi li nawa ile shihafifa.” Oshike sha li she mu kwafela e lididimike? Okwa ti: “Onda li nde lidimbulukifa kutya onda humbata edina laJehova nonokutya eyeleko olo ola li ashike onghedi yaSatana yokuponokela nge. Onda li handi kala ndi liuditile etumba ngeenge nda findi eyeleko.”

9-11. (a) Eenghaku dopafaneko dilipi Ovakriste hava djala? (b) Oshike tashi dulu oku tu kwafela tu kale tu na omukumo eshi hatu udifa onghundana iwa?

⁹ Lesha Ovaefeso 6:15. Ovakwaita vaRoma ovo va li hava kala inava djala eenghaku kava li hava kala ve lilongekidila olwoodi. Eenghaku davo oda li da longwa di na eesola nhatu doshipa da tulwa kumwe odo da li hadi va kwafele va kale va pama po pedu. Oda li da pama nodi pu okweendifa.

¹⁰ Ngaashi ashike eenghaku odo da li hadi djalwa kovakwaita vaRoma moita, eenghaku dopafaneko odo hadi djalwa kOvakriste ohadi va kwafele va udife etumwalaka lombili. (Jes. 52:7; Rom. 10:15) Ndele nande ongaho, otashi pula ouladi ngeenge pa holoka eemhito u li udife. Roberto, oo e na omido 20, okwa ti: “Onda li handi kala nda tila okuudifila ovanafikola vomongudu yetu. Onda li handi kala nda fya ohoni. Ngeenge handi diladila konakudiwa, nghi shii kutya omolwashike nda li handi kala nda tila ile nda fya ohoni. Paife ohandi hafele okuudifila oomakula vange.”

¹¹ Ovanyasha vahapu ova mona kutya ngeenge ova kala ve lilongekida nawa okuudifa onghundana iwa, ohashi kala unene shipu kuvo. Oshike to dulu okuninga opo u lilongekide? Julia, oo e na omido 16, okwa ti: “Ohandi kala ndi na oishangomwa mondjato yange yofikola, nohandi pwilikine eshi ovanafikola vomongudu yetu tava popi etaleko ile eitavelo lavo. Ohandi diladila kwaasho tashi dulu oku va kwafela. Shimha nde lilongekida, ohandi popi navo kondadalunde kombinga yaasho tashi va etele ouwa.” Makenzie, oo e na omido 23, okwa ti: “Ngeenge ou na olukeno noho pwilikine nawa, oto ka mona eenghalo odo oomakula voye tava ungaunga nado. Ohandi shilipaleke kutya onda lesha oishangomwa aishe oyo ya nuninwa ovanyasha. Monghedi ya tya ngaho, ohandi ulikile oomakula vange osho tashi dulu oku va kwafela mOmbiibeli ile ko-jw.org.” Ngaashi omatyekosha oo e shi ulika, ngeenge owa kala we lilongekida okuudifa, “eenghaku” doye otadi kala da pama ko keemhadi.

12, 13. ‘Oikuti imwe ya xwama omundilo’ ilipi Satana ha longifa?

¹² Lesha Ovaefeso 6:16. “Oshikelelifo” osho sha li hashi humbatwa kovakwaita vaRoma osha li hashi kala she va uvika okudja komapepe fiyo opeengolo. Osha li hashi va amene koikuti ya xwama omundilo nosho yo keehandje doikuti.

¹³ Satana otashi dulika e kuumbe ‘noikuti ya xwama omundilo’ mokupopya oipupulu kutya Jehova ke na ko nasha naave nosho yo kutya ke  ku hole. Ida womido omulongo nomuwoi ota kondjifa omaliudo okukala e udite ehe na oshilonga. Okwa ti: “Onda kala ndi udite kutya Jehova ke li popepi naame noina hala okukala Kaume kange.” Ongahelipi a li a ungaunga neponokelo la tya ngaho? Ida okwa ti: “Okwoongala ohaku pameke eitavelo lange. Onda li ashike handi kala omutumba noka nda li handi yandje omatyekosha, molwaashi onda li handi diladila kutya kape na oo a hala okupwilikina kwaasho handi popi. Paife ohandi lilongekidile okwoongala nohandi kendabala okunyamukula luvali ile lutatu. Nonande kashipu, ohandi kala nda pepelelwa ngeenge nda ningi ngaho. Ovamwatate novamwameme ohava tu nge omukumo. Alushe ohandi di kokwoongala ndi shii kutya Jehova oku hole nge.”

14. Oshimoniwa shaIda osha popya oshili ya fimana ilipi?

¹⁴ Oshimoniwa shaIda osha popya oshili ya fimana kutya: Oikelelifo oyo ya li hai pewa ovakwaita ounene wayo kawa li hau lunduluka, ashike eitavelo letu hasho li li ngaho, molwaashi otali dulu okunghundipala ile okupama. Ehoololo oli li momake etu. (Mat. 14:31; 2 Tes. 1:3) Inashi fimana tuu okupameka eitavelo letu!

15, 16. Ongahelipi eteelelo la fa embale loshivela?

¹⁵ Lesha Ovaefeso 6:17. Embale loshivela olo la li hali djalwa kovakwaita vaRoma ola li la nuninwa okwaamena omutwe, ofingo noshipala koikuti. Omambale oivela amwe okwa li e na oikwatifo opo ovakwaita va dule oku a humbata peke.

¹⁶ Ngaashi ashike embale loshivela hali amene  ouluvi wovakwaita, ‘eteelelo lexupifo’ ohali amene omadiladilo etu. (1 Tes. 5:8; Omayel. 3:21) Eteelelo ohali tu kwafele tu kale hatu yandje elitulemo komaudaneko aKalunga nokukala tu na etaleko la yuka li na sha nomaupyakadi. (Eps. 27:1, 14; Oil. 24:15) Ashike ngeenge otwa hala “embale loshivela” letu li kale tali longo otu na oku li djala komutwe, ndele katu na okulihumbata peke.

17, 18. (a) Ongahelipi Satana ta dulu oku tu ningifa tu kufe ko embale letu loshivela? (b) Ongahelipi hatu dulu okuulika kutya itatu pukifwa komapukifo aSatana?

¹⁷ Ongahelipi Satana ta dulu oku tu ningifa tu kufe ko embale letu loshivela? Diladila konghedi oyo a li a ungaunga naJesus. Satana okwa li nale e shii kutya Jesus oku na eteelelo loku ka pangela ovanhu. Ashike Jesus okwa li e na okuteelela fiyo opefimbo laJehova la wapala. Nofimbo osho inashi ningwa okwa li e na okumona oixuna nokufya. Onghee Satana okwa li a pa Jesus omhito opo a wanife po eteelelo laye diva. Satana okwa li a popya kutya ngeenge Jesus okwe mu linyongamene, ote ke mu pa aishe nokukala nayo fiyo alushe. (Luk. 4:5-7) Sha faafana, Satana oku shii kutya Jehova ote ke tu pa omauwa mahapu mounyuni mupe. Ashike otu na okuteelela, notashi dulika tu na okulididimikila eenghalo didjuu fimbo tu li mounyuni ou. Satana ohe tu ulikile oinima ihokwifa opo ngeno tu hafele onghalamwenyo paife. Okwa hala tu konge tete oinima yopamaliko nokukala tu i na aishe paife. Okwa hala tu konge Ouhamba xuunina. — Mat. 6:31-33.

¹⁸ Ngaashi ovanyasha vahapu Ovakriste, Kiana womido 20 ka li a pukifwa komapukifo oo. Okwa ti: “Ondi shii kutya Ouhamba waKalunga oo ashike tau ka kufa po omaupyakadi etu aeshe.” Ongahelipi eteelelo la twa la kuma okudiladila nosho yo eenghatu daye? Okwa weda ko a ti: “Eteelelo lOparadisa ohali kwafele nge ndi litulile po omalalakano taa ti sha. Ihandi kendabala okulongifa ounghulungu wange opo ndi likole oimaliwa ihapu ile okulalakanena eendodo dopombada. Ponhele yaasho, ohandi longifa efimbo neenghono dange mokulalakanena oinima yopamhepo.”

19, 20. Ongahelipi hatu dulu okuxwepopaleka ounghulungu wetu mokulongifa Eendjovo daKalunga?

¹⁹ Eongamukonda olo la li hali longifwa kovakwaita vaRoma eshi Paulus a shanga onhumwafo yaye, ola li li na oule weesendimeta 50 nola li la nuninwa okulwa. Etomheno limwe eshi Ovaroma va li have shi endifa nawa ololo kutya ova li have lideula po noilwifo yavo efiku keshe.

²⁰ Paulus okwa faafanifa Eendjovo daKalunga neongamukonda olo Jehova e tu pa. Ashike otu na okulihonga oku li longifa noukeka ngeenge hatu popile eitavelo letu ile ngeenge hatu lundulula okudiladila kwetu. (2 Kor. 10:4, 5; 2 Tim. 2:15) Ongahelipi to dulu okuxwepopaleka ounghulungu woye? Sebastian, oo e na omido 21, okwa ti: “Onda kala handi didilike ovelishe imwe metukulwa keshe melesho lange lOmbiibeli. Onda kala handi ongele eevelishe dange odo ndi hole unene. Kungaho, ondi udite ndi li metwokumwe nonghedi oyo Jehova ha diladila.” Daniel, oo a popiwa metetekelo, okwa ti: “Ngeenge handi lesha Ombiibeli yange, ohandi hoolola mo eevelishe odo ndi wete kutya otadi ka kwafela ovanhu ovo handi shakeneke moukalele. Onda mona kutya ovanhu ohave linyenge nawa ngeenge ova mono kutya ou hole Ombiibeli noto kendabala oku va kwafela.”

21. Omolwashike inatu pumbwa okutilifwa kuSatana nosho yo keendemoni?

²¹ Ngaashi ovanyasha ovo va popiwa moshitukulwa eshi ve shi ulika, inatu pumbwa okutilifwa kuSatana nosho yo keendemoni. Ove na eenghono, ashike kadi dule daJehova. Itava dulu okukalelela. Mafiku, momukokomoko wEpangelo lOmido Eyovi laKristus, otava ka mangwa vaha hongaule vali ovanhu, nokonima otava ka hanaunwa po. (Eh. 20:1-3, 7-10) Otu shii omutondi wetu, eemwiyo daye nosho yo omauko aye. Kekwafo laJehova, ohatu dulu oku mu kondjifa.