1. Jesus okwa popya shike shi na sha nomamona omeulu?

HAMAMONA aeshe haa dulu okumonika. Oushili oyoo kutya omamona oo e na ondilo ihaa monika. Jesus okwa popya kombinga yomamona omeulu oo e dule kokule oinima yopamaliko mEudifo lokOmhunda. Opo nee okwa weda ko ta ti: “Oko ku na emona loye oko yo ku na omutima woye.” (Mat. 6:19-21) Omitima detu otadi ke tu linyengifa tu lalakanene oinima oyo twa lenga unene. Ohatu ke lituvikilila “omamona meulu” ngeenge otwa kala tu na edina liwa koshipala shaKalunga. Jesus okwa popya kutya omamona a tya ngaho ihaa dulu okuhanaunwa po ile okuvakwa po.

2. (a) Metwokumwe 2 Ovakorinto 4:17, 18, Paulus okwe tu ladipika tu yandje elitulemo koshike? (b) Oshike hatu ka kundafana moshitukulwa eshi?

² Omuyapostoli Paulus okwe tu ladipika tu ‘yandje elitulemo koinima oyo ihe wetike.’ (Lesha 2 Ovakorinto 4:17, 18.) Omamona oo ihaa monika okwa kwatela mo omanangeko noupuna oo hatu ka hafela mounyuni mupe waKalunga. Moshitukulwa eshi, ohatu ka kundafana omamona ane ihaa monika oo hatu hafele paife, ngaashi okupanga oukaume naKalunga, oshali yeilikano, ekwafo olo hatu mono lomhepo iyapuki yaKalunga nanghee Jehova, Jesus novaengeli have tu yambidida ngeenge tu li moukalele. Ohatu ka kundafana yo nghee hatu dulu okuulika kutya otwa pandula omamona oo ihaa monika.

3. Emona la denga mbada ihali monika olilipi, noshike she li ningifa tashi shiiva opo tu dule oku li mona?

³ Emona la denga mbada ihali monika olo okupanga oukaume  naJehova Kalunga. (Eps. 25:14) Oshike she shi ningifa tashi shiiva opo ovanhu ovalunde va pange oukaume naKalunga nokukala ovayapuki filufilu? Kalunga okwe shi ningifa tashi shiiva omolwekuliloyambo laJesus olo la “kufa po omatimba ounyuni.” (Joh. 1:29) Nokuli nofimbo Jesus ina fya, Jehova okwa kala e shii kutya Jesus ota ka kala omudiinini fiyo okefyo opo a xupife ovanhu. Nomolwaasho Kalunga a li a panga oukaume novanhu ofimbo Jesus ina fya. — Rom. 3:25.

4. Yandja oihopaenenwa yovalumenhu vamwe ovo va li va panga oukaume naKalunga ofimbo Jesus ine uya kombada yedu.

⁴ Diladila kovalumenhu vamwe ovo va li va panga oukaume naKalunga ofimbo Jesus ine uya kombada yedu. Abraham okwa li e na eitavelo la kola. Konima eshi Abraham a fya pa pita omido di dulife 1 000, Jehova okwe mu ifana ‘kaume kaye.’ (Jes. 41:8) Osho otashi ulike kutya Kalunga okwa tala ko ovanhu ve li ookaume kaye kopofingo nonande ova fye. Jehova okwa tala ko Abraham e na omwenyo. (Luk. 20:37, 38) Job oku li yo umwe womuvo. Eshi ovaengeli aveshe va li va ongala pamwe meulu, Jehova okwa li ta popi nomukumo kombinga yaJob. Jehova okwa popya kutya Job okwa li ‘omulumenhu ehe noshipo, omuyuki, ha tila Kalunga noha kukuma owii.’ (Job 1:6-8) Jehova okwa li e uditile ngahelipi Daniel, oo a li he mu longele noudiinini omido 80 lwaapo mokati kovapaani? Ovaengeli ova li va popya lwoikando itatu kutya Daniel oku li “omulumenhu muwa” ile tu tye e na ondilo koshipala shaKalunga. (Dan. 9:23; 10:11, 19) Ohatu dulu okukala nelineekelo kutya Jehova okwa teelela nodjuulufi oku ka nyumuna ookaume kaye ovaholike ovo va fya. — Job 14:15.

5. Oiteelelwa ilipi twa pumbwa okuwanifwa po opo tu dule okupanga oukaume wopofingo naJehova?

⁵ Mbela ovanhu ve fike peni inava wanenena va panga oukaume wopofingo naJehova? Ovanhu omamiliyona. Osho otu shi shii molwaashi ovalumenhu vahapu, ovakainhu nounona mounyuni aushe ohava ulike meenghatu kutya ove li ookaume kaKalunga. Jehova “omushiiviki wovayuki” ile tu tye oha pange oukaume novanhu ovo ovayuki. (Omayel. 3:32) Ova dula okupanga oukaume naKalunga molwaashi ove na eitavelo mekuliloyambo laJesus. Omolwekuliloyambo, ohatu dulu okuninga ookaume kaJehova moku mu liyapulila nokuninginifwa. Ngeenge otwa katuka eenghatu odo da fimana, ohatu waimine ovanhu omamiliyona ovo ve liyapula Jehova, va ninginifwa notava hafele oukaume wopofingo nOmunhu oo a tumbala meshito alishe.

6. Ongahelipi hatu dulu okuulika kutya otwa pandula oshali yokupanga oukaume naKalunga?

⁶ Ongahelipi hatu dulu okuulika kutya otwa pandula oshali yokupanga oukaume naKalunga? Ngaashi Abraham naJob va kala tava longele Kalunga noudiinini oule womido omafele, nafye ohatu dulu okukala ovadiinini kashi na nee mbudi kutya otwa kala hatu longele Jehova efimbo li fike peni monghalelo ei ya kulupa. Ngaashi Daniel, natu kale twa lenga oukaume wetu wopofingo naKalunga shi dulife okukalamwenyo kwetu. (Dan. 6:7, 10, 16, 22) Kekwafo laJehova, ohatu ka dula okulididimikila eshongo keshe olo hatu shakeneke nokupameka ekwatafano letu naye. — Fil. 4:13.

7. (a) Metwokumwe nOmayeletumbulo 15:8, Jehova oha kala e uditile ngahelipi omailikano etu? (b) Jehova oha nyamukula ngahelipi omailikano etu?

⁷ Emona limwe olo ihali monika eilikano. Ookaume kopofingo ohava hafele okulombwelafana omadiladilo nomaliudo avo. Mbela ookaume kaJehova navo osho ve na okuninga ngaho? Heeno. Jehova oha popi nafye okupitila mEendjovo daye omo he tu hololele osho ta diladila nomaliudo aye. Fye ohatu popi naye okupitila meilikano omo hatu mu lombwele osho hatu diladila nomaliudo etu omoule. Jehova oha kala a hafa neenghono ngeenge ta  pwilikine komailikano etu. (Lesha Omayeletumbulo 15:8.) Molwaashi Jehova oku li Kaume omunahole, iha pwilikine ashike komailikano etu, ndele ohe a nyamukula yo. Peemhito dimwe, omailikano etu ohe a nyamukula meendelelo. Ashike omafimbo amwe, otu na okutwikila okwiilikana kombinga yoshinima shonhumba. Ndele nande ongaho, otu na elineekelo kutya ota ka nyamukula eilikano letu pefimbo la wapala nomonghedi ya denga mbada. Oshoshili kutya omafimbo amwe Kalunga otashi dulika a nyamukule omailikano etu monghedi omo inatu teelela. Pashihopaenenwa, ponhele a kufe po eyeleko, otashi dulike e tu pe ounongo neenghono tu dule “okulididimika.” — 1 Kor. 10:13.

8. Ongahelipi hatu dulu okuulika kutya otwa pandula oshali yeilikano?

⁸ Ongahelipi hatu dulu okuulika kutya otwa pandula oshali yeilikano? Onghedi imwe omokudulika komayele e na sha ‘nokwiilikana tuhe na edimbuko.’ (1 Tes. 5:17) Jehova ihe tu fininike tu ilikane. Ponhele yaasho, okwa fimaneka emanguluko letu nohe tu ladipike tu ‘diinine okwiilikana.’ (Rom. 12:12) Onghee ohatu dulu okuulika olupandu letu mokukala hatu ilikana lwoikando efiku keshe. Oshoshili kutya otu na okukala hatu pandula Jehova meilikano nosho yo oku mu tanga. — Eps. 145:2, 3.

9. Omumwatate umwe oha kala e udite ngahelipi shi na sha neilikano, noho kala u udite ngahelipi kombinga yalo?

⁹ Ohatu ka kala twa lenga eilikano ngeenge otwa mono nghee Jehova a kala nokunyamukula omailikano etu oule wefimbo olo twa kala hatu mu longele. Pashihopaenenwa, diladila koshimoniwa shomumwatate Chris, oo a kala moilonga yefimbo li yadi oule womido di dulife 47. Okwa ti: “Ohandi hafele alushe okupenduka ongula opo ndi ilikane kuJehova. Ihashi kala tuu shitunhula okupopya naJehova ngeenge etango opo tali piti noinima aishe hai kala tai monika nawa! Osho oshe linyengifa nge ndi kale handi mu pandula omolweeshali adishe, mwa kwatelwa oufembanghenda weilikano. Ngeenge handi ilikana konguloshi, ohandi kala nda hafa eshi handi ka kofa ndi na eliudo la koshoka.”

10. Omolwashike tu na okukala twa lenga omhepo iyapuki yaKalunga?

¹⁰ Omhepo iyapuki yaKalunga nayo oi li oshali  ihai monika oyo hatu dulu okukala twa lenga. Jesus okwe tu ladipika tu twikile okwiilikana omhepo iyapuki. (Luk. 11:9, 13) Jehova ohe tu pe “eenghono di dule dopaushitwe” okupitila momhepo iyapuki. (2 Kor. 4:7; Oil. 1:8) Ohatu dulu okulididimikila omashongo oo hatu shakeneke kekwafo lomhepo iyapuki yaKalunga.

11. Omonghedi ilipi omhepo iyapuki tai dulu oku tu kwafela?

¹¹ Omhepo iyapuki otai dulu oku tu kwafela tu wanife po oinakuwanifwa yetu moilonga yaKalunga. Otai dulu oku tu kwafela tu xwepopaleke owino wetu nokudula kwetu. Otai dulu yo oku tu kwafela tu wanife po oinakuwanifwa yetu yopaKriste. Otu shi shii kutya oidjemo iwa oyo hatu mono moilonga yaKalunga ohatu i mono ashike kekwafo lomhepo iyapuki.

12. Metwokumwe nEpsalme 139:23, 24, ohatu dulu okwiilikana omhepo iyapuki i tu kwafele tu ninge shike?

¹² Onghedi imwe omo hatu dulu okuulika kutya otwa lenga omhepo iyapuki yaKalunga omokwiilikana i tu kwafele tu didilike mo omadiladilo nosho yo omahalo a puka oo e li momitima detu. (Lesha Epsalme 139:23, 24.) Ngeenge otwa ningi ngaho, Jehova ote ke tu kwafela tu didilike mo omadiladilo nosho yo omahalo a puka okupitila momhepo iyapuki. Nongeenge otwa didilike mo omadiladilo ile omahalo a puka, otu na okwiilikana omhepo iyapuki yaKalunga i tu pe eenghono opo tu dule okukondjifa omadiladilo ile omahalo a tya ngaho. Ngeenge otwa ningi ngaho, ohatu ka ulika kutya otwa tokola toko okuhenuka keshe osho tashi dulu okwiimba Jehova e tu kwafele nomhepo yaye iyapuki. — Ef. 4:30.

13. Ongahelipi hatu dulu okuulika kutya otwa pandula neenghono omhepo iyapuki?

¹³ Ohatu dulu okuulika kutya otwa pandula neenghono omhepo iyapuki ngeenge otwa tale kwaasho ya wanifa po pefimbo letu. Jesus okwa lombwela ovahongwa vaye ofimbo ina londa meulu a ti: “Otamu ka pewa eenghono ngeenge omwa tililwa omhepo iyapuki, opo nee otamu ka yandja oundombwedi kombinga yange . . . kombada yedu alishe.” (Oil. 1:8) Eendjovo odo otadi wanifwa yo pefimbo letu. Ovapiya vaJehova omamiliyona ahetatu netata ova ongelwa mounyuni aushe kekwafo lomhepo iyapuki.  Ohatu hafele yo oparadisa yopamhepo molwaashi omhepo iyapuki yaKalunga ohai tu kwafele tu kulike omaukwatya mawa ngaashi ohole, ehafo, ombili, onheni, olune, ouwa, eitavelo, omwenyo muwa nelipangelo. Omaukwatya oo oku li “oiimati yomhepo.” (Gal. 5:22, 23) Omhepo iyapuki kai fi tuu oshali ya denga mbada!

14. Ohatu mono eyambidido ihali monika lilipi ngeenge hatu longo moukalele?

¹⁴ Otu na yo emona ihali monika ‘lokulonga pamwe’ naJehova, Jesus nosho yo novaengeli. (2 Kor. 6:1) Ohatu longo pamwe navo ngeenge hatu kufa ombinga moilonga yokuudifa nokuninga ovanhu ovahongwa. Paulus okwa popya kombinga yaye mwene nosho yo ovo hava kufa ombinga moilonga oyo a ti: “Fye ovalongi pamwe naKalunga.” (1 Kor. 3:9) Ohatu longo yo pamwe naJesus ngeenge hatu kufa ombinga moilonga yokuudifa. Konima eshi Jesus a lombwela ovashikuli vaye va ka ninge “ovanhu vomoiwana aishe ovahongwa,” okwa ti: “Ondi li pamwe nanye.” (Mat. 28:19, 20) Ongahelipi shi na sha novaengeli? Kashi fi tuu enangeko noupuna okuwilikwa kovaengeli eshi hatu udifile ovanhu ‘evaengeli laalushe kombada yedu’! — Eh. 14:6.

15. Yandja oshihopaenenwa shopaMbiibeli osho tashi ulike onghandangala ya fimana oyo Jehova ha dana moukalele.

¹⁵ Ekwafo olo hatu mono okudja meulu ohali tu kwafele ngahelipi tu pondole? Eshi hatu kunu eembuto dOuhamba, eembuto dimwe ohadi wile momitima diwa nohadi kulu. (Mat. 13:18, 23) Olyelye ha kulike eembuto odo doshili fiyo otadi dala? Jesus okwa popya kutya kape na oo ta dulu okuninga omushikuli waye okuninga “Tate . . . te mu nane.” (Joh. 6:44) MOmbiibeli omu na oshihopaenenwa shi na sha naasho. Oshikando shimwe, Paulus okwa li a udifila ongudu yovakainhu kondje yoshilando shaFilippi. Ombiibeli oya popya shi na sha nomukainhu umwe wedina Lidia, ya ti: “Jehova okwa li a patulula omutima womukainhu oo opo a yandje elitulemo keendjovo daPaulus.” (Oil. 16:13-15) Ngaashi Lidia, ovanhu omamiliyona ova nanenwa kuJehova.

16. Olyelye e na okupandulwa ngeenge twa pondola moukalele?

¹⁶ Olyelye e na okufimanekwa ngeenge twa mona oidjemo iwa moukalele? Paulus okwa nyamukula epulo olo eshi a shangela eongalo lokuKorinto a ti: “Ame onda twika, Apollos okwa tekela, ndele Kalunga oye ta kulike. Kalunga ou ta kulike oye e na okufimanekwa, ndele hamunhu oo a twika ile a tekela.” (1 Kor. 3:6, 7) Ngaashi Paulus, otu na alushe okupandula Jehova ngeenge twa mona oidjemo iwa moukalele.

17. Ongahelipi hatu dulu okuulika kutya otwa pandula eshi hatu “longo pamwe” naKalunga, Kristus nosho yo novaengeli?

¹⁷ Ongahelipi hatu dulu okuulika olupandu omolwoufembanghenda ‘wokulonga pamwe’ naKalunga, Kristus nosho yo novaengeli? Ohatu dulu okuninga ngaho mokuninga ngaashi hatu dulu tu udifile ovanhu onghundana iwa. Ope na eenghedi dihapu omo hatu dulu okuninga ngaho, ngaashi okuudifa “moipafi nosho yo eumbo neumbo.” (Oil. 20:20) Ovanhu vahapu ohava hafele okuyandja oundombwedi wohangelela. Ngeenge va shakena nomunhu oo vehe shii, ohave mu popifa monghedi youkaume nokuhovela eenghundafana. Ngeenge omunhu okwa ulike ohokwe, ohava yukifa eenghundafana ketumwalaka lOuhamba.

18-19. (a) Ohatu tekele ngahelipi eembuto doshili? (b) Yandja oshihopaenenwa osho tashi ulike nghee Jehova a kwafela omukonakonimbiibeli umwe.

¹⁸ Tu li ovalongi pamwe naKalunga, inatu pumbwa ashike okukuna eembuto doshili, ndele otwa pumbwa yo oku di tekela. Omunhu ngeenge okwa ulike ohokwe, otwa pumbwa okuninga eenghendabala opo tu shune ko kuye ile tu pule umwe a ye ko kuye opo va hovele okukonakona Ombiibeli naye. Ohatu kala twa hafa okumona  nghee Jehova ta kwafele omukonakonimbiibeli a lundulule onghedi yaye yokudiladila, nanghee e udite.

¹⁹ Natu ka taleni koshihopaenenwa shaRaphalalani, oo a li ondudu moSouth Africa. Okwa li a hafela osho a li te lihongo mOmbiibeli. Ashike osha li eshongo linene eshi e lihonga mEendjovo daKalunga kutya osha puka okukala u na ekwatafano novakwamhungu. (Deut. 18:10-12) Mokweendela ko kwefimbo, okwa li a efa Kalunga a me omadiladilo aye. Xuuninwa, okwa li a efa po oundudu nonande omo a li ha mono oiniwe. Raphalalani, oo paife e na omido 60, okwa ti: “Ohandi pandula unene Eendombwedi daJehova odo da kwafela nge meenghedi dihapu ngaashi omokukonga oilonga. Komesho yaaishe, ohandi pandula unene Jehova eshi a kwafela nge ndi kale nonghalamwenyo ya koshoka opo ndi kale handi kufa ombinga moukalele ndi li Ondombwedi ya ninginifwa.”

20. Owa tokola toko okuninga shike?

²⁰ Moshitukulwa eshi, otwa kundafana omamona ane ihaa monika. Emona limwe olo tu na la denga mbada olo okukala tu na oufembanghenda wokupanga oukaume wopofingo naJehova. Eshi twa ninga ookaume kaJehova kopofingo oshe tu kwafela tu mone omamona makwao ihaa monika ngaashi okupopya naye meilikano, okumona ekwafo lomhepo iyapuki, okulonga pamwe naKalunga, Jesus novaengeli moukalele. Natu kale twa tokola toko okuulika kutya otwa pandula omamona oo ihaa monika. Otwa hala okukala alushe hatu pandula Jehova eshi e li Kaume a denga mbada.