1-2. Eendombwedi dihapu oda taalela omashongo elipi?

OMUYAPOSTOLI PAULUS okwa li a ladipika Timoteus nosho yo Ovakriste aveshe va wanife po nawanawa oukalele wavo. (2 Tim. 4:5) Atusheni otwa pumbwa okutala ko omayele aPaulus a kwata moiti. Ashike ohapa kala omashongo. Ovamwatate novamwameme vahapu ohashi va pula ouladi, opo va kufe ombinga moilonga yokuudifa. (2 Tim. 4:2) Pashihopaenenwa, diladila kovamwatate ovo ve li moilongo omo oilonga yetu ya tulilwa po eendjidikila, ile ya shilikwa. Ohava kufa ombinga moukalele, nonande otashi dulika va tulwe modolongo.

² Ovapiya vaJehova ohava ungaunga nomaupyakadi e lili noku lili, oo taa dulu oku va teya omukumo. Pashihopaenenwa, vahapu ohava longo eevili dihapu koilonga yokulikongela omboloto, opo va dule okulanda oipumbiwa yakeshe efiku youkwaneumbo. Ohava kala va hala okulonga shihapu moukalele, ndele ohava kala va loloka momaxuliloshivike. Vamwe ova ngabekwa neenghono omolwomikifi doshinamenena, ile oukulupe, notashi dulika nokuli va ngabekelwa momaumbo avo. Ofimbo vamwe otava kondjo nomaliudo okukala ve udite vehe na oshilonga kuJehova. Mary, * omumwameme wokOushilo woPokati, okwa ti: “Ohashi pula nge eenghendabala dihapu, opo ndi dule okukondjifa omaliudo mai, oo haa fiye nge nda loloka pamaliudo. Ngeenge inandi mona efimbo lokuya moukalele, ile ndihe na eenghono, ohashi ningifa nge ndi kale ndi udite ondjo.”

3. Oshike hatu ka kundafana moshitukulwa eshi?

³ Jehova ote ke tu nghonopaleka, opo tu dule okulididimikila omaupyakadi opaumwene notu twikile oku mu longela, kashi na nee mbudi kutya otwa taalela eenghalo dilipi. Ofimbo inatu ka kundafana nghee Jehova ta dulu oku tu kwafela, natu ka konakoneni nghee a li a pameka Paulus naTimoteus va dule okupondola  moukalele, nonande ova li va taalela omashongo.

4. Paulus okwa li a taalela omashongo elipi?

⁴ Paulus okwa li a taalela omashongo mahapu. Okwa li unene a pumbwa okupamekwa eshi a li a dengwa nokwa tulwa modolongo. (2 Kor. 11:23-25) Paulus okwa li nokuli a popya a manguluka kutya omafimbo amwe okwa li ha kondjo nomaliudo mai. (Rom. 7:18, 19, 24) Okwa li yo e na okulididimikila “ekiya mombelela,” olo nokuli a li a ilikana kuKalunga e li mu kufe. — 2 Kor. 12:7, 8.

5. Paulus okwa li a pondola shi fike peni, nonande okwa li a taalela omashongo?

⁵ Jehova okwa li a pameka Paulus a twikile okuwanifa po oukalele waye, nonande okwa li a taalela omashongo aeshe oo. Natu ka taleni kwaasho Paulus a li a pondola. Pashihopaenenwa, eshi a li modolongo yomeumbo muRoma, okwa li a udifila ovanhu vahapu nouladi onghundana iwa moipafi yovawiliki Ovajuda notashi dulika moipafi yovanambelewa. (Oil. 28:17; Fil. 4:21, 22) Okwa li yo ha udifile ovakwaita vahapu vetangakwaita lohamba yaRoma nosho yo aveshe ovo va li have uya oku mu talela po. (Oil. 28:30, 31; Fil. 1:13) Pefimbo opo tuu opo, Paulus okwa li a shanga eenhumwafo da nwefwa mo. Eenhumwafo odo oda li da kwafela Ovakriste vashili vopefimbo laye novokunena. Onghee hano, oshihopaenenwa shaPaulus osha li sha pameka eongalo lomuRoma nosha kwafela ovamwaxe va kale “tava udifa nouladi eendjovo daKalunga nopehe na oumbada.” (Fil. 1:14) Nonande omafimbo amwe Paulus okwa kala a ngabekwa, okwa ninga ngaashi ta dulu, ‘nonghalo yaye oye shi ningifa tashi shiiva, opo onghundana iwa i tandavele.’ — Fil. 1:12.

6. Metwokumwe no 2 Ovakorinto 12:9, 10, oshike sha kwafela Paulus a pondole moukalele?

⁶ Paulus okwa li e shii kutya Kalunga oye e mu pa eenghono, opo a dule okupondola mukeshe shimwe moilonga yaYe, ndele ina dula okuninga ngaho keenghono daye mwene. Okwa li a dimina kutya eenghono daKalunga odo da li hadi mu ‘pameke ngeenge a nghundipala.’ (Lesha 2 Ovakorinto 12:9, 10.) Jehova okwa li a pa Paulus eenghono okupitila momhepo yaye iyapuki, opo a dule okuwanifa po nawanawa oukalele waye, nonande okwa li ta hepekwa, a tulwa modolongo nokwa taalela omashongo amwe vali.

7. Timoteus okwa li e na okufinda omashongo elipi po, opo a wanife po oukalele waye?

⁷ Timoteus, omunyasha oo a li ha ende pamwe naPaulus, okwa li e na okulineekela meenghono  daKalunga, opo a dule okuwanifa po oukalele waye. Timoteus okwa li ha waimine Paulus ngeenge a li ta i momalweendo male outumwa. Paulus okwa li yo ha tumu Timoteus a ka talele po omaongalo noku a twe omukumo. (1 Kor. 4:17) Timoteus otashi dulika a li ha kala a tila. Nomolwaasho Paulus tashi dulika a li e mu kumaida ta ti: “Ino efa nande oumwe a kale e ku dina eshi u li omunyasha.” (1 Tim. 4:12) Pefimbo opo tuu opo, Timoteus okwa li yo e na ekiya mombelela, ‘ouvela oo hau mu hange efimbo nefimbo.’ (1 Tim. 5:23) Ashike Timoteus okwa li e shii kutya omhepo iyapuki yaJehova otai ke mu pa eenghono odo a pumbwa, opo a dule okuudifa onghundana iwa nokuyakula ovamwaxe. — 2 Tim. 1:7.

8. Jehova oha pameke ngahelipi oshiwana shaye kunena?

⁸ Kunena, Jehova oha pe oshiwana shaye “eenghono di dule dopaushitwe,” opo shi twikile oku mu longela noudiinini. (2 Kor. 4:7) Natu ka kundafaneni omafiloshisho opane, oo Jehova ha longifa, opo e tu pameke noku tu kwafela tu kale ovadiinini kuye. Omafiloshisho oo ongaashi eilikano, Ombiibeli, okweendafana nOvakriste vakwetu nosho yo oukalele.

9. Eilikano ohali tu kwafele ngahelipi?

⁹ Eilikano ohali tu pameke. Ngaashi sha popiwa mOvaefeso 6:18, Paulus okwe tu ladipika tu kale hatu ilikana kuKalunga “efimbo keshe.” Kalunga ota ka nyamukula omailikano etu moku tu pameka. Jonnie, wokoBolivia, okwa mona nghee Jehova a li e mu kwafela eshi a li a taalela omaupyakadi a yoolokafana. Omukulukadi waye nosho yo ovadali vaye ova li tava ehama sha kwata moiti pefimbo limwe. Osha li shidjuu kuJonnie oku va fila oshisho aveshe vatatu. Ina okwa ka fya, nosha li sha pula oule wefimbo, opo omukulukadi waye naxe va veluke. Jonnie okwa popya shi na sha nefimbo olo la li lidjuu, a ti: “Ngeenge nda wililwa po neenghono, osho sha li hashi kwafele nge, ongeenge handi ilikana handi tumbula oinima kondadalunde.” Jehova okwa li a pa Jonnie eenghono odo a li a pumbwa, opo a dule okulididimika. Ronald, omukulunhuongalo wokuBolivia, okwa li a lombwelwa kutya ina oku na okankela. Ina okwa ka fya konima yomwedi. Oshike she mu kwafela e lididimike? Okwa ti: “Eilikano ohali kwafele nge ndi mbubulile Jehova omutima wange aushe nonghee ndi udite. Ondi shii kutya oku udite ko nawa onghalo yange e dulife keshe umwe, nokuli naame mwene.” Omafimbo amwe otashi dulika tu kale twa wililwa po, ile tu kale tuhe shii kutya natu ilikane kombinga yashike. Ndele Jehova ote tu shivi tu ilikane kuye, nonande otu wete shidjuu oku mu yelifila omadiladilo nomaliudo etu. — Rom. 8:26, 27.

10. Metwokumwe nOvaheberi 4:12, omolwashike sha fimana okulesha Ombiibeli nokudilonga kwaasho twa lesha?

¹⁰ Ombiibeli ohai tu pameke. Ngaashi ashike Paulus a li e na elineekelo kutya Omishangwa ohadi mu pameke noku mu hekeleka, nafye ohatu dulu okukala twe di lineekela. (Rom. 15:4) Ngeenge hatu lesha Eendjovo daKalunga nokudilonga kudo, Jehova oha longifa omhepo yaye iyapuki, opo tu di ude ko nawa notu mone nghee tadi dulu oku tu kwafela monghalo yetu. (Lesha Ovaheberi 4:12.) Ronald, oo a popiwa metetekelo, okwa ti: “Ohandi pandula neenghono eshi ndi na onghedindjikilile yokulesha oshitukulwa shOmbiibeli onguloshi keshe. Ohandi dilonga luhapu komaukwatya aJehova nanghee ha ungaunga pahole novapiya vaye. Osho ohashi kwafele nge ndi kale ndi na eenghono.”

11. Ombiibeli oya kwafela ngahelipi omumwameme umwe, oo a li a nyika oluhodi?

¹¹ Ngeenge hatu dilonga kEendjovo daKalunga ohashi tu kwafele tu kale tu na etaleko liwa li na sha nomaupyakadi etu. Natu ka taleni nghee  Ombiibeli ya li ya kwafela omufiyekadi umwe, oo a li a nyika oluhodi. Omukulunhuongalo umwe okwa li e mu lombwela a leshe embo laJob, olo li na oilihongomwa oyo tai dulu oku mu kwafela. Eshi ta lesha okwa hovela okutokola Job meendelelo omolwokudiladila kwaye kwa puka. Okwa li ta faneke momadiladilo aye ta londwele Job ta ti: “Job! Ino kala u na etaleko lii!” Opo nee okwa ka didilika kutya etaleko laye ola li la faafana naali laJob. Osho osha li she mu kwafela a lundulule etaleko laye noshe mu pa eenghono a dule okulididimikila ouyehame wefyo lomushamane waye.

12. Jehova ohe tu pameke ngahelipi okupitila mOvakriste vakwetu?

¹² Ohatu pamekwa ngeenge hatu endafana nOvakriste vakwetu. Onghedi ikwao omo Jehova he tu pameke, okupitila mOvakriste vakwetu. Paulus okwa li a shanga kutya okwa djuulukwa ‘okutwaafana omukumo’ novamwaxe vopamhepo. (Rom. 1:11, 12) Mary, oo a tumbulwa metetekelo, okwa lenga neenghono eendafano la tya ngaho. Okwa ti: “Jehova okwa longifa ovamwatate novamwameme, ovo nokuli va li vehe shii omaupyakadi ange. Ova li hava popi sha osho sha li hashi tu nge omukumo, ile va tumine nge okakalata, naasho osho lela nda li handi kala nda pumbwa. Osho ohashi kwafele nge yo ndi kale nda mangulukila ovamwameme, ovo ve na omaupyakadi a fa ange, nohandi lihongo koimoniwa yavo. Ovakulunhuongalo ohava kwafele nge alushe ndi kale ndi udite ndi li oshitukulwa sheongalo sha fimana.”

13. Ongahelipi hatu dulu okupamekafana ngeenge tu li pokwoongala?

¹³ Onhele imwe ya denga mbada opo hatu dulu okutwaafana omukumo, ongeenge tu li pokwoongala. Ngeenge tu li pokwoongala, ohatu dulu okukendabala tu pameke vamwe moku va lombwela kutya otu va hole nokupandula oilonga yavo. Pashihopaenenwa, ofimbo okwoongala inaku hovela, omukulunhuongalo umwe wedina Peter okwa lombwela omumwameme umwe, oo e na kaume kopahombo ehe fi Ondombwedi, ta ti: “Ohashi tu tu omukumo neenghono ngeenge tu ku wete pokwoongala. Alushe oho longekida ounona voye vahamano noho va endifa po, opo va ka yandje omatyekosha.” Omumwameme okwa nyamukula nolupandu nomesho e yadi omahodi, ta ti: “Onda hafa neenghono okuuda ngaho.”

14. Okukufa ombinga moukalele ohashi tu kwafele ngahelipi?

¹⁴ Oukalele ohau tu pameke. Ngeenge hatu udifile vamwe ohatu kala twa hafa, kashi na nee mbudi kutya otava pwilikine, ile hasho. (Omayel. 11:25) Omumwameme wedina Stacy okwa popya nghee oukalele hau mu pameke. Eshi oshilyo shoukwaneumbo wavo shimwe sha li sha kondwa, okwa li a nyemata neenghono nokwa kala he lipopile lwoikando ta ti: ‘Onda longa ngoo noudiinini, opo ndi mu kwafele?’ Omadiladilo oo okwa kala alushe haa ingaana muStacy. Mbela oshike she mu kwafela a ungaunge nonghalo oyo idjuu? Oukalele! Eshi a kala ta kufa ombinga moilonga yokuudifa, okwa kala ta yandje elitulemo kovanhu vomoshitukulwa shavo, ovo va li va pumbwa ekwafo laye. Okwa ti: “Pefimbo opo, Jehova okwa pa nge omukonakonimbiibeli, oo a li ta ningi exumokomesho meendelelo. Osho osha li sha twa nge omukumo neenghono. Oilonga yokuudifa oya kwafela nge neenghono.”

15. Oshike hatu lihongo komatyekosha aMary?

¹⁵ Ovamwatate novamwameme vamwe ove udite kutya itava dulu okulonga shihapu moukalele, omolweenghalo omo ve li. Ngeenge naave osho u udite ngaho, dimbuluka kutya Jehova oha kala a hafa ngeenge to ningi ngaashi to dulu. Natu ka taleni vali koshihopaenenwa shaMary. Eshi a tembukila koshitukulwa shimwe, oko haku popiwa elaka loshinailongo, okwa li e wete ita pondola. Okwa ti: “Omafimbo amwe onda li handi yandje etyekosha li li paunafangwa,  ile ndi leshe ovelishe mOmbiibeli, ile ndi yandje okafo moukalele.” Okwa li e udite ehe na oshilonga eshi e liyelekanifa naavo hava popi nawa elaka olo. Onghee hano, okwa li a lundulula etaleko laye. Okwa li a mona kutya Jehova ota dulu oku mu kwafela, nonande ke shii okupopya nawa elaka olo. Okwa ti: “Osho Ombiibeli ya popya oshi li paunafangwa, ashike otashi dulu okukwafela ovanhu va lundulule onghedi yavo yokukalamwenyo.”

16. Oshike tashi dulu okukwafela ovo va ngabekelwa momaumbo?

¹⁶ Jehova oku shii kutya vamwe vomufye otwa hala okuudifa, ashike ihatu dulu okudja mo momaumbo. Ota dulu oku tu yeululila eemhito, opo tu dule okuudifila ovo tave tu file oshisho, eendokotola novapangi. Ngeenge otwa yelekanifa oilonga oyo hatu longo paife naasho twa li hatu longo monakudiwa, otashi ke tu teya omukumo. Ashike ngeenge otu shii kutya Jehova ote tu kwafele paife, otashi ke tu pameka, opo tu dule okulididimikila eshongo keshe nehafo.

17. Metwokumwe nOmuudifi 11:6, omolwashike tu na okutwikila noilonga yokuudifa, nonande katu wete oidjemo yoilonga yetu diva?

¹⁷ Ihatu kala tu shii kutya eembuto doshili odo hatu kunu onaini tadi mene omidi nokuhovela okukula. (Lesha Omuudifi 11:6.) Pashihopaenenwa, omumwameme Barbara, womido 80 nasha, oha udifa pandjikilile okupitila mongodi nosho yo okushanga eenhumwafo. Monhumwafo yaye imwe okwa li a tula mo Oshungonangelo ye 1 Marsa 2014, oyo i na oshitukulwa shi na oshipalanyole “Osho Kalunga e ku ningila.” Ka li e shii ngeenge onhumwafo oyo okwe i tumina ovalihomboli, ovo va li va kondwa. Ova lesha oshifo osho oikando noikando. Omushamane okwa li e udite a fa ta popi naJehova odikilila. Ovalihomboli ovo ova li va hovela okwoongala, nomokweendela ko kwefimbo ova ka ninga vali Eendombwedi de lipyakidila, konima eshi va kala inave lipyakidila omido di dulife po 27. Diladila nghee omumwameme Barbara a li a tuwa omukumo nokwa pamekwa, eshi a mona oidjemo iwa oyo ya etifwa konhumwafo imwe oyo a shanga!

18. Oshike hatu dulu okuninga po, opo Kalunga e tu pameke?

¹⁸ Jehova okwe tu pa omafiloshisho mahapu, oo hae tu pameke. Ngeenge hatu longifa omafiloshisho oo, ngaashi eilikano, Ombiibeli, okweendafana nOvakriste vakwetu nosho yo oukalele, kungaho ohatu ka ulika kutya otwe lineekela meenghono daJehova nota dulu oku tu kwafela. Onghee hano, natu kale alushe twe lineekela muTate yetu womeulu, oo e hole ‘okukwafa neenghono ovo have liameke kuye nomutima aushe.’ — 2 Omaf. 16:9.