1-2. Omushangi umwe okwa popya shike, nohatu ka kundafana shike moshitukulwa eshi?

KUNENA, ovanhu omamiliyona ohava ti kutya ova itavela muJesus, ashike ihava kala metwokumwe naasho a honga. (2 Tim. 4:3, 4) Omushangi umwe okwa ti: “Ngeno kunena okwa li omunhu umwe a fa ‘Jesus,’ oo a popya oinima monghedi omo Jesus a li e i popya . . . , mbela ngeno ohatu ke mu lidimbika ngaashi ovanhu ovo va li ko omido omayovi avali da ka lupuka? . . . Enyamukulo, heeno, ohatu ke mu lidimbika.”

² Ovanhu vahapu vomefelemudo lotete kava li va itavela Jesus, nonande ova li va uda osho ta hongo nova mona oikumwifilonga oyo a longa. Omolwashike mbela? Moshitukulwa sha tetekela otwa kundafana omatomheno ane kutya omolwashike ovanhu va li va pundukifwa kwaasho Jesus a popya naasho a ninga. Natu ka kundafaneni omatomheno ane a wedwa po. Eshi hatu a konakona, ohatu ka mona kutya omolwashike ovanhu kunena ve tonde ovashikuli vaJesus, nanghee hatu dulu okuhenuka tuha pundukifwe.

3. Etokolo lilipi Jesus a ninga olo la pundukifa vamwe?

³ Eshi Jesus a li kombada yedu okwa li ha endafana novanhu vomaludi aeshe. Okwa li ha li pamwe noipuna nosho yo novanaenghono. Okwa li yo ha kala efimbo lihapu neehepele nosho yo novafininikwa. Natango, okwa li ha kenukile ovo va li va talika ko ve li “ovalunde.” Ovanhu, ovo va li ve lishii ouyuki, ova li va pundukifwa eshi Jesus ha endafana novanhu aveshe. Ova li va pula ovahongwa vaye va ti: “Omolwashike tamu li nokunwa pamwe novafendelifi  nosho yo ovalunde?” Jesus okwa li e va nyamukula ta ti: “Ovanhu ovo ve na oukolele inava pumbwa omuhakuli, ndele ovovo ashike tava vele. Ame inandi endela ovayuki, ndele ovalunde, opo ve lidilulule.” — Luk. 5:29-32.

4. Metwokumwe naasho sha popiwa komuprofeti Jesaja, oshike Ovajuda va li va teelela shi na sha naMessias?

⁴ Omishangwa otadi ti ngahelipi? Oule womido ofimbo Messias ine uya kombada yedu, omuprofeti Jesaja okwa hangika nale a yelifa kutya Jesus ita ka tambulwa ko kounyuni. Okwa xunganeka a ti: “Ye okwa li a dinika, okwa li a efiwa kovanhu, . . . aveshe ova uvika oipala yavo, vehe mu tale; Ye omudinwa ndele Ye otwe mu tala a fa oshinima shongaho.” (Jes. 53:3) Messias okwa li ta ka henukwa “kovanhu.” Onghee hano, Ovajuda vomefelemudo lotete ova li ve na okukala va teelela Messias aha tambulwe ko.

5. Ovanhu vahapu kunena ohava tale ko ngahelipi ovashikuli vaJesus?

⁵ Mbela otu wete oupyakadi wa faafana kunena? Heeno. Ovawiliki vahapu vomalongelokalunga, ohava tambula ko oilyo yavo yomalongelokalunga oyo i na eendodo, ya punapala nosho yo oyo ya talika ko inaendunge mounyuni. Ovawiliki ovo ohava ningi ngaho, nonande onghedi yokukalamwenyo nomikalo doilyo oyo ipe itai tu kumwe nomifikamhango daKalunga. Ovawiliki ovo ova dina ovapiya vaJehova ovadiinini, molwaashi ova koshoka noinava fimana pataleko lounyuni. Paulus okwa popya kutya Kalunga okwa hoolola ovo va “dinika.” (1 Kor. 1:26-29) Ashike kuJehova, ovapiya vaye aveshe ove na ondilo momesho aye.

6. Jesus okwa popya shike muMateus 11:25, 26, nongahelipi hatu dulu oku mu hopaenena?

⁶ Ongahelipi hatu dulu okuhenuka okupundukifwa? (Lesha Mateus 11:25, 26.) Ino nwefwa mo konghedi omo ounyuni wa tala ko oshiwana shaKalunga. Dimbuluka kutya Jehova oha longifa ashike ovalininipiki ovo va longe ehalo laye. (Eps. 138:6) Diladila ashike kwaasho a wanifa po, eshi a longifa ovanhu ovo va talika ko kounyuni vehe na eendunge noinava hongwa!

7. Omolwashike Jesus a ifana Ovafarisai ovanaihelele, nova li ve linyenga ngahelipi?

⁷ Jesus okwa li a nyaneka pomutenya oihelele yovawiliki vomalongelokalunga, molwaashi kava li hava kwafele ovanhu va longele Kalunga monghedi oyo a hokwa. Pashihopaenenwa, okwa li a holola oihelele yOvafarisai, ovo va li hava yandje unene elitulemo kokukosha eenyala davo shi dulife okufila oshisho ovadali vavo. (Mat. 15:1-11) Ovahongwa vaJesus otashi dulika va li va kuminwa eendjovo daye. Ova li ve mu pula tava ti: “Owa didilika ngoo kutya Ovafarisai ova uda nai kwaasho wa popya?” Jesus okwe va nyamukula a ti: “Omuti keshe oo inau twikwa kuTate womeulu otau ka dudwa mo. Va efeni, ovo ovakwatiketi ovapofi. Ngeenge omupofi oku kwete omupofi mukwao komhango, aveshe otava ka wila melambo.” (Mat. 15:12-14) Jesus ka li a efa okuuda nai kwovawiliki vomalongelokalunga ku mu ye moshipala aha popye oshili.

8. Jesus okwa ulika ngahelipi kutya hamalongelokalunga aeshe a hokiwa kuKalunga?

⁸ Jesus okwa li yo a nyaneka pomutenya omahongo oipupulu omalongelokalunga. Ina popya kutya omahongo aeshe omalongelokalunga okwa hokiwa kuKalunga. Ponhele yaasho, okwa yelifa kutya ovanhu vahapu otava kala nokweenda mondjila ya mbwalangadja, oyo tai twala mehanauno. Ofimbo ovanhu vanini tava kala nokweenda mondjila ya finana, oyo tai twala komwenyo waalushe. (Mat. 7:13, 14) Okwa ti kutya vamwe otashi dulika hava diladila kutya otava longele Kalunga, ndele paulelalela haye tava longele. Okwa londwela ta ti: “Lungameni ovaprofeti ovanaipupulu ovo have uya kunye ve li moikafa yeedi, ndele meni lavo omambungu haa lyana. Otamu va koneke koiimati yavo.” — Mat. 7:15-20.

9. Omahongo amwe omalongelokalunga a puka elipi Jesus a nyaneka pomutenya?

 ⁹ Omishangwa otadi ti ngahelipi? Omaxunganeko Ombiibeli okwa popya kutya Messias ota ka kondjela nouladi eumbo laJehova. (Eps. 69:9; Joh. 2:14-17) Ouladi wa tya ngaho, oo we linyengifa Jesus a nyaneke pomutenya omahongo oipupulu omalongelokalunga nosho yo oilonga yavo. Pashihopaenenwa, Ovafarisai ova li va itavela kutya omwenyo ihau fi; Jesus okwa honga kutya oonakufya ova kofa. (Joh. 11:11) Ovasadukai kava li va itavela menyumuko; Jesus okwa li a nyumuna kaume kaye, Lasarus. (Joh. 11:43, 44; Oil. 23:8) Ovafarisai ova honga kutya eenghono ihadi monika, ile Kalunga, oye ha wilike oinima aishe oyo hatu ningilwa, ile hatu ka ninga. Jesus okwa honga kutya ovanhu otava dulu okuhoolola okulongela Kalunga, ile vehe mu longele. — Mat. 11:28.

10. Omolwashike ovanhu vahapu hava pundukifwa komahongo etu?

¹⁰ Mbela otu wete oupyakadi wa faafana kunena? Heeno. Vahapu ova pundukifwa komahongo etu, molwaashi okwa kanghamena kOmbiibeli nokwa nyaneka pomutenya omahongo oipupulu omalongelokalunga. Ovawiliki vomalongelokalunga ohava hongo oilyo yavo kutya Kalunga ota ka handukila ovakolokoshi moheli. Ohava longifa ehongo la tya ngaho, opo va tilife ovanhu. Ovapiya vaJehova ohava nyaneke pomutenya ehongo loipupulu la tya ngaho, molwaashi ohava longela Kalunga omunahole. Ovawiliki vomalongelokalunga ohava hongo yo ovanhu kutya omwenyo ihau fi. Ngeno ehongo olo ola li li li mondjila, osha yela kutya ngeno inapa pumbiwa enyumuko. Ohatu ulike kutya ehongo la tya ngaho ka li li paMishangwa. Omalongelokalunga mahapu ohaa hongo kutya keshe osho hashi tu ningilwa osha nunwa kuKalunga komesho yefimbo, ile keenghono donhumba ihadi monika. Ndele fye ohatu hongo kutya ovanhu ove na emanguluko notava dulu okuhoolola okulongela Kalunga. Ovawiliki vomalongelokalunga ohave linyenge ngahelipi? Luhapu ohava kala va fula onya.

11. Metwokumwe neendjovo daJesus odo tadi hangwa muJohannes 8:45-47, Kalunga okwa teelela ovapiya vaye va ninge shike?

¹¹ Ongahelipi hatu dulu okuhenuka okupundukifwa? Ngeenge otu hole oshili, ohatu ka tambula  ko Eendjovo daKalunga. (Lesha Johannes 8:45-47.) Mepingafano naSatana Ondiaboli, fye otwa diinina oshili. Ihatu pengifa omahongo oshili. (Joh. 8:44) Ngaashi ashike Jesus a li a ninga, Kalunga okwa teelela oshiwana shaye ‘shi tonde owii nokudiinina osho shiwa.’ — Rom. 12:9; Heb. 1:9.

12. Omolwashike onghedi omo Jesus a dipawa ya pundukifa Ovajuda vahapu?

¹² Oshike vali sha li sha pundukifa Ovajuda vopefimbo laJesus? Paulus okwa ti: “Fye ohatu udifa kombinga yaKristus oo a valelwa komuti, oo e li emanya lepundukifo kOvajuda.” (1 Kor. 1:23) Omolwashike Ovajuda vahapu va li inava tambula ko Jesus omolwonghedi omo a dipawa? Ova li va tala ko Jesus e li omukolokoshi eshi a fila komuti womahepeko, ponhele yoku mu tala ko e li Messias. — Deut. 21:22, 23.

13. Ovo va pundukifwa kuJesus ova li va dopa okudidilika shike?

¹³ Ovajuda, ovo va li va pundukifwa, ova li va dopa okudidilika kutya Jesus ka li e na ondjo yasha, nonokutya okwa li a lundilwa noina ungaungiwa naye pauyuki. Ovo va li tava pangula Jesus kava li ve na ko nasha nouyuki. Omhangu yoPombada yOvajuda oya li ya tokola diva Jesus, nokaya li ya shikula omilandu odo da tulwa po. (Luk. 22:54; Joh. 18:24) Ponhele yokupwilikina nopehe na olwaamambinga nokukonakona oinima oyo ya li tai tamanekelwa Jesus, oya li ya konga “ovanhu va totele Jesus omahokololo oipupulu opo va dule oku mu dipaa.” Eshi va dopa okuninga ngaho, omupristeri omukulunhu okwa li a kendabala okupopya sha, opo a mone Jesus epuko mokupopya kwaye. Osho osha li omhinge nomifikamhango dopaveta. (Mat. 26:59; Mark. 14:55-64) Konima eshi Jesus a nyumunwa koufi, ovatokoli, ovo vehe fi ovayuki, ova li va futa “oimaliwa yoisilveri ihapu kovakwaita” Ovaroma, ovo va li tava pashukile ombila yaye, opo va tandavelife omahokololo oipupulu kutya omolwashike Jesus ehe mo mombila. — Mat. 28:11-15.

14. Omishangwa oda xunganeka shike shi na sha nefyo laMessias?

¹⁴ Omishangwa otadi ti ngahelipi? Nonande Ovajuda vahapu vopefimbo laJesus kava li va  teelela Messias a fye, Omishangwa oda xunganeka tadi ti: “Okwa yandja omwenyo waye mefyo nokwa valulilwa movakolokoshi, okwa humbata omatimba avahapu nokwa ilikanena ovanyoni.” (Jes. 53:12) Onghee hano, Ovajuda kava li ve na etomheno lokupundukifwa eshi Jesus a dipawa a fa omulunde.

15. Omalundilo amwe elipi e na sha nEendombwedi daJehova haa pundukifa vamwe?

¹⁵ Mbela otu wete oupyakadi wa faafana kunena? Osho naanaa! Jesus okwa li a tokolwa nokupatanekwa shihe li pauyuki. Eendombwedi daJehova oda kala hadi ungaungiwa nado shihe li pauyuki. Natu ka taleni koihopaenenwa imwe. Mo 1930 nasha nosho yo mo 1940 nasha, moUnited States omwa li oibofa ihapu yopamhangu i na sha nemanguluko letu lokulongela Kalunga. Ovatokoli vamwe ova li ve tu fininikila kongudi. MoQuebec, moCanada, eengeleka nepangelo oya li ye limanga oukuni kumwe, opo i ye moshipala oilonga yetu. Ovaudifi vahapu ova li va tulwa modolongo, molwaashi ashike tava popi novanhu vakwao kombinga yOuhamba waKalunga. MoGermany, epangelo laNazi ola li la dipaa ovamwatate ovanyasha vahapu ovadiinini. Omido opo da di ko, ovamwatate vahapu moRussia ova kala nokutamanekwa nokutulwa modolongo, molwaashi tava kundafana kombinga yOmbiibeli. Ova talika ko ve li “ovanashibofa.” Nokuli nOmbiibeli yo-New World Translation of the Holy Scriptures melaka lOshirussia oya shilikwa noya talika ko i li “oshilongifo shounashibofa,” molwaashi oi na edina Jehova.

16. Ngaashi sha popiwa mu 1 Johannes 4:1, omolwashike tuhe na okupukifwa komahokololo oipupulu e na sha noshiwana shaJehova?

¹⁶ Ongahelipi hatu dulu okuhenuka okupundukifwa? Mona oushili u na sha noshinima osho. MEudifo laye lokOmhunda, Jesus okwa londwela ovapwilikini vaye kutya vamwe otave ke va ‘popila mowii aushe nokufufya.’ (Mat. 5:11) Satana oye odjo yoipupulu ya tya ngaho. Oha nwefa mo ovapataneki va tandavelife oipupulu inyanyalifa i na sha naavo ve hole oshili. (Eh. 12:9, 10) Otwa pumbwa okuhenuka oipupulu ya tya ngaho. Inatu mbadapalekwa nandenande koipupulu oyo, ile tu efe i nghundipaleke eitavelo letu. — Lesha 1 Johannes 4:1.

17. Omonghedi ilipi oinima oyo ya tetekela efyo laJesus ya li ya pundukifa vamwe?

¹⁷ Fimbo Jesus ina fya, okwa li a kengelelwa kuumwe vomovayapostoli vaye 12. Omuyapostoli waye umwe okwa li e mu lidimbika lwoikando itatu, novayapostoli vaye aveshe ova li ve mu fiya po onguloshi oyo ya tetekela efyo laye. (Mat. 26:14-16, 47, 56, 75) Osho kasha li sha kumwifa Jesus. Okwa li a hangwa a xunganeka kutya ota ka ningilwa oinima i li ngaho. (Joh. 6:64; 13:21, 26, 38; 16:32) Vamwe eshi va mona oinima ya tya ngaho, osha li she va pundukifa, tava tomhafana kutya, ‘Ngeenge ovayapostoli vaJesus osho va li va ninga ngaho, inatu hala okukala vamwe vomuvo.’

18. Omaxunganeko elipi a li a wanifwa okutala koiningwanima oyo ya tetekela efyo laJesus?

¹⁸ Omishangwa otadi ti ngahelipi? Jehova okwa hangwa a holola mEendjovo daye omido omafele da ka lupuka kutya Messias ota ka kengelelwa noisilveri 30. (Sak. 11:12, 13) Okwa li ta ka kengelelwa kuumwe womookaume kaye kopofingo. (Eps. 41:9) Omuprofeti Sakaria naye okwa shanga a ti: “Denga omufita, eedi opo di lihane.” (Sak. 13:7) Ponhele ovanamitimadiwa va pundukifwe koiningwanima oyo, ova kala nokupamekwa komaxunganeko, oo a wanifilwa Jesus.

19. Ovanamitimadiwa ova didilika shike?

¹⁹ Mbela otu wete oupyakadi wa faafana kunena? Heeno. Efimbo opo la di ko, Eendombwedi dinini, odo di shiivike nawa, oda fiya po oshili nokuninga ovashunimonima. Oda kala tadi kendabala okwaamuna ko vamwe koshili. Oda kala  tadi andjakaneke koikundaneki nosho yo kointaneta omahokololo oipupulu, tadi popi oshili inai lixwa po nokulundila Eendombwedi daJehova. Ashike osho inashi pundukifa ovanamitimadiwa. Mepingafano naasho, ove shii kutya Ombiibeli oya popya kutya oinima oyo otai ka ningwa. — Mat. 24:24; 2 Pet. 2:18-22.

20. Ongahelipi hatu dulu okuhenuka okupundukifwa kwaavo va fiya po oshili? (2 Timoteus 4:4, 5)

²⁰ Ongahelipi hatu dulu okuhenuka okupundukifwa? Otwa pumbwa okupameka eitavelo letu mokukala hatu konakona pandjikilile, hatu ilikana alushe nokukala twe lipyakidila noilonga oyo twa pewa kuJehova. (Lesha 2 Timoteus 4:4, 5.) Ngeenge otu na eitavelo, itatu ka kala twa tila ngeenge otwa udu eenghundana dii. (Jes. 28:16) Ohole yetu yokuhola Jehova, Eendjovo daye nosho yo ovamwatate otai ke tu kwafela tu henuke okupundukifwa kwaavo va fiya po oshili.

21. Elineekelo lilipi tu na nonande ovanhu vahapu itava tambula ko etumwalaka letu?

²¹ Mefelemudo lotete, vahapu ova li va pundukifwa noinava tambula ko Jesus. Ndele nande ongaho, vahapu ova li ve mu tambula ko. Mongudu yaavo ve mu tambula ko omwa kwatela oshilyo shOmhangu yOshijuda “nongudu inene yovapristeri.” (Oil. 6:7; Mat. 27:57-60; Mark. 15:43) Sha faafana, nokunena ovanhu omamiliyona inava pundukifwa. Omolwashike mbela? Omolwaashi ove shii oshili oyo tai hangwa mOmishangwa nove i hole. Eendjovo daKalunga oda ti: “Ava ve hole omhango yoye ove na ombili inene, osheshi kave na eshi tashi va tengula.” — Eps. 119:165.