1. Embo lEhololo ola popya shike shi na sha noshiwana shaKalunga?

 EMBO lEhololo ola popya kutya Ouhamba waKalunga womeulu owa dikwa po nonokutya Satana okwa umbwa mo meulu. (Eh. 12:1-9) Osho osha etela ovo ve li meulu epepelelo, ashike oshe tu etela omaupyakadi. Omolwashike mbela? Omolwaashi Satana okwa handukila nota ponokele unene ovo hava longele Jehova noudiinini kombada yedu. — Eh. 12:12, 15, 17.

2. Oshike tashi ke tu kwafela tu kale ovadiinini kuJehova?

² Ongahelipi hatu dulu okukala ovadiinini kuJehova, nonande Satana ote tu ponokele? (Eh. 13:10) Oshinima shimwe tashi tu kwafele, otwa pumbwa okushiiva osho twa tuvikililwa monakwiiwa. Pashihopaenenwa, omuyapostoli Johannes okwa popya mEhololo omanangeko noupuna amwe omwaao hatu ka hafela mafiku. Limwe lomomanangeko noupuna oo, ololo kutya ovatondi vaKalunga otava ka hanaunwa po. Paife natu ka kundafaneni nghee Ehololo la popya shi na sha novatondi ovo, naasho tava ka ningilwa.

3. Omafaneko amwe elipi a longifwa mEhololo?

³ Movelishe yotetetete, Ehololo ole tu lombwela kutya ouyelele oo hatu ka lesha owa popiwa “pafaneko.” (Eh. 1:1, NW) Lwanima, ohatu ka lesha kombinga yoilyani yonhumba oyo tai faneke ovatondi vaKalunga. Pashihopaenenwa, ope na ‘oshilyani sha djuuka mefuta.’ Oshi na “eembinga omulongo nomitwe heyali.” (Eh. 13:1) Oshilyani osho osha shikulwa ‘koshilyani shikwao sha dja medu.’ Osha hovela okupopya ngaashi ongadu nosha etifa ‘omundilo okudja meulu.’ (Eh. 13:11-13) Opo nee otwa  mona vali oshilyani shimwe shi lili, ‘oshilyani shitilyana,’ sha londwa kombwada. Oilyani oyo itatu otai faneke ovatondi, ovo va kala tava pataneke Jehova Kalunga okudja nale nosho yo Ouhamba waye. Onghee hano, osha fimana okukala tu va shii. — Eh. 17:1, 3.

4-5. Osho sha popiwa muDaniel 7:15-17, otashi tu kwafele ngahelipi tu ude ko eityo lomafaneko oo?

⁴ Fimbo inatu shiiva kutya ovatondi ovo ovo oolyelye, otwa pumbwa okuuda ko kutya oshilyani nosho yo ombwada otai faneke shike. Ohatu ka uda ko nawa omafaneko oo, ngeenge otwa efa Ombiibeli i liyelife yo vene. Omafaneko mahapu oo taa hangwa mEhololo okwa yelifwa nale momambo makwao Ombiibeli. Pashihopaenenwa, omuprofeti Daniel okwa twa ondjodi i na sha ‘noilyani ine inene ya djuuka mefuta.’ (Dan. 7:1-3) Daniel okwa popya kutya oilyani oyo otai faneke shike. Oilyani ei inene oi lile po “eehamba” nhee, ile omapangelo. (Lesha Daniel 7:15-17.) Eudeko olo la yela nawa otali tu kwafele tu ude ko kutya oilyani oyo ya popiwa mEhololo oi na yo okukala tai ulike komapangelo opapolotika.

⁵ Paife natu ka kundafaneni omaxunganeko amwe, oo a popiwa mEhololo. Eshi hatu ningi ngaho, ohatu ka mona nghee Ombiibeli tai tu kwafele tu mone eityo lomafaneko oo. Ohatu ka hovela noilyani. Tete, ohatu ka tala kutya otai faneke shike. Opo nee ohatu ka tala osho oilyani oyo tai ka ningilwa. Xuuninwa, ohatu ka kundafana nghee oiningwanima oyo ye tu kuma.

6. Oshilyani shomitwe heyali, osho sha tumbulwa mEhololo 13:1-4, otashi faneke shike?

⁶ Oshilyani shomitwe heyali oshike? (Lesha Ehololo 13:1-4.) Otwa didilika kutya oshilyani eshi otashi monika sha fa ongwe, ashike oshi na omakasha a fa emwangha, okanya kasho oka fa konghoshi noshi na eembinga omulongo. Oilyani ine, oyo ya tumbulwa muDaniel etukulwa 7, nayo oi na omaukwatya a tya ngaho. Ashike membo lEhololo, omaukwatya oo okwa yukifwa koshilyani shimwe, ndele kai li ine ya yoolokafana. Oshilyani eshi itashi faneke ashike epangelo limwe alike, ile epangelo olo tali pangele ounyuni aushe. Johannes okwa popya kutya otashi “pangele omihoko, ovanhu, omalaka noiwana aishe.” Onghee itashi ulike ashike kepangelo lopashiwana limwe alike. (Eh. 13:7) Oshilyani eshi oshi na okukala tashi ulike komapangelo aeshe opapolitika, oo a kala nokupangela ovanhu okudja nale fiyo okunena. * — Omuud. 8:9.

7. Omitwe heyali doshilyani otadi faneke shike?

⁷ Omitwe heyali doshilyani otadi faneke shike? Ehololo etukulwa 17 otali tu kwafele tu mone enyamukulo, molwaashi ola yelifa oshilyani osho sha tumbulwa mEhololo etukulwa 13. Ehololo 17:10, ola ti: “Ope na eehamba heyali: Nhano itadi pangele vali, imwe otai pangele, naimwe inai hovela natango. Ngeenge oya hovele, otai pangele ashike okafimbo kaxupi.” Omapangelo aeshe aheyali opapolotika, oo Satana ta longifa, okwa faafanifwa “nomitwe,” molwaashi oku na eenghono dinene. Aa oo omapangelo omounyuni aushe, oo a kala nokupangela nokuhepeka oshiwana shaKalunga. Eshi omuyapostoli Johannes a li momwenyo, atano omomapangelo oo okwa hangwa nale a pangela, ngaashi: Egipiti, Assiria, Babilon, Medo-Persia nosho yo Greka. Epangelo enaenghono etihamano mounyuni, Roma, olo la li tali pangele, eshi Johannes a ulikilwa emoniko. Oshike tashi ka ulika kutya epangelo lilipi la li tali ka ninga etiheyali nolaxuuninwa enaenghono mounyuni?

8. Omutwe omutiheyali woshilyani otau faneke shike?

 ⁸ Ngaashi hatu ke shi mona, omaxunganeko oo a popiwa membo laDaniel otae tu kwafele tu mone kutya olyelye e lilwe po komutwe omutiheyali nowaxuuninwa woshilyani. Epangelo enaenghono lilipi la kala tali pangele pefimbo eli lomomafiku aa axuuninwa, ile tu tye “mefiku lOmwene”? (Eh. 1:10) Epangelo olo ola fikama po momapangelo avali omanaenghono, oo taa longele kumwe, United Kingdom nosho yo United States of America, ile tu tye, Epangelo lOpamuhanga Enaenghono mOunyuni laAmerika naBritain. Onghee hano, ohatu dulu okufika pexulifodiladilo kutya epangelo olo, olo omutwe omutiheyali woshilyani, oo wa tumbulwa mEhololo 13:1-4.

9. Oshilyani ‘sheembinga mbali da fa dodi’ otashi faneke shike?

⁹ Ehololo 13 ola popya kutya omutwe omutiheyali, Epangelo lOpamuhanga Enaenghono mounyuni laAmerika naBritain, otali dana yo onghandangala la fa oshilyani ‘sheembinga mbali da fa dodi, nosha hovela okupopya ngaashi ongadu.’ Oshilyani eshi “osha longa oikumwifilonga inene moipafi yovanhu, sha etifa nokuli omundilo kedu okudja meulu.” (Eh. 13:11-15) Ehololo etukulwa 16 nosho yo 19 ola popya kutya oshilyani eshi oshi li ‘omuprofeti omunaipupulu.’ (Eh. 16:13; 19:20) Daniel naye okwa tumbula oshinima sha faafana, a ti kutya, Epangelo lOpamuhanga Enaenghono mOunyuni laAmerika naBritain otali ka ‘hanauna nai tashi kumwifa.’ (Dan. 8:19, 23, 24) Naasho osho sha li sha ningwa lelalela pOita Itivali yOunyuni. Ovanongononi vaBritian naAmerika ova li va nduluka po eeboma mbali dolute, odo da li da nuninwa okuxulifa po oita muPacific. Onghee hano, Epangelo lOpamuhanga Enaenghono mOunyuni laAmerika naBritain, eshi la nduluka po eeboma odo, kungaho ola li la ‘etifa omundilo kedu okudja meulu.’

10. ‘Oshihongwafano shoshilyani’ otashi faneke shike? (Ehololo 13:14, 15; 17:3, 8, 11)

¹⁰ Natu ka kundafaneni vali oshilyani shikwao. Oshilyani eshi otashi monika sha fa hanga oshilyani shomitwe heyali, ashike oshitilyana. Ohashi ifanwa “oshihongwafano shoshilyani” nosha popiwa shi li “ohamba onhihetatu.” * (Lesha Ehololo 13:14, 15; 17:3, 8, 11.) “Ohamba” ei oya popiwa ya li ya holoka po, ndele tai kana po, nolwanima, oya ka holoka vali. Osho otashi tu kumwe filufilu nOiwana ya Hangana, oyo ya kala tai xumifa komesho ouwa womapangelo mounyuni aushe. Tete oya li hai ifanwa Oshipandi shOiwana. Opo nee pefimbo lOita Itivali yOunyuni osha li sha kana po. Nolwanima, osha ka holoka po vali shi li Oiwana ya Hangana.

11. Oilyani oyo tai faneke omapangelo otai ningi shike, nomolwashike tuhe na okukala twe i tila?

¹¹ Oilyani oyo, ile omapangelo oo opapolotika otaa xwaxwameke ovanhu, opo va kale ve li omhinge naJehova nosho yo noshiwana shaye, tae shi ningi okupitila momitotolombo. Otaa ongaleke pafaneko ‘eehamba adishe dokombada yedu,’ opo di kalwe oita puArmagedon, sha hala okutya, “mefiku linene laKalunga Omunaenghono adishe.” (Eh. 16:13, 14, 16) Ashike katu na okukala twa tila. Kalunga ketu Munene, Jehova, ota ka katuka onghatu diva, opo a xupife aveshe ovo hava yambidida ounamapangelo waye. — Hes. 38:21-23.

12. Oshike tashi ka ningilwa oilyani aishe?

¹² Oshike tashi ka ningilwa oilyani aishe? Ehololo 19:20 ola nyamukula la ti: “Oshilyani osha kwatwa po pamwe nomuprofeti omunaipupulu oo a li a longa oikumwifilonga moipafi yasho nokwa pukifa ovo ve na edidiliko loshilyani naavo  have linyongamene oshihongwafano shasho. Opo nee oshilyani nomuprofeti oo ova ekelwa nomwenyo mefuta lomundilo omo mu na omundilo wosulfuri wa hanya.” Onghee hano, omapangelo opapolotika, oo e li ovatondi vaKalunga, otaa hangwa taa pangele, eshi Kalunga te ke uya oku a hanauna po fiyo alushe.

13. Ovakriste ohava shakeneke eshongo lilipi okudja komapangelo omounyuni?

¹³ Osho otashi ti shike kufye kunena? Tu li Ovakriste, otu na okukala ovadiinini kuKalunga nosho yo kOuhamba waye. (Joh. 18:36) Opo tu ninge ngaho, otwa pumbwa okukanyatela omufika wetu wokuhakufa ombinga meepolotika domounyuni. Ndele otashi dulu okukala eshongo okukanyatela omufika wetu wokuhakufa ombinga, molwaashi omapangelo omounyuni okwa hala tu a yambidide pauyadi okupitila meendjovo detu nosho yo moilonga. Ovo tave liyandje kefininiko olo, otava ka kala ve na edidiliko loshilyani. (Eh. 13:16, 17) Ashike keshe oo ta ka kala e na edidiliko la tya ngaho, ita ka kala vali a hokiwa kuJehova noita ka mona omwenyo waalushe. (Eh. 14:9, 10; 20:4) Onghee hano, osha fimanenena kukeshe umwe womufye okukanyatela omufika waye wokuhakufa ombinga mopolotika, kashi na nee mbudi kutya otwa taalela omafininiko e fike peni.

14. Oshinima shilipi sha kumwifa omuyapostoli Johannes, osho sha popiwa mEhololo 17:3-5?

¹⁴ Omuyapostoli Johannes okwa popya kutya ‘okwa li a kumwa neenghono,’ eshi a mona oshinima shimwe vali. Oshinima osho oshi kwashike? Osho omukainhu umwe a londa shimwe shomoilyani ei ikwanyanya. (Eh. 17:1, 2, 6) Omukainhu oo okwa li ta monika a fa “ombwada inene,” nokwa ifanwa “Babilon Shinene.” Ombwada oyo oya “haela” “neehamba dokombada yedu.” — Lesha Ehololo 17:3-5.

15-16. Olyelye “Babilon Shinene,” notu shi shii ngahelipi?

¹⁵ Olyelye “Babilon Shinene”? Omukainhu ou ita faneke ehangano lonhumba lopapolotika, molwaashi okwa popiwa a haela novawiliki vopapolotika vomounyuni. (Eh. 18:9) Osho otashi ulike kutya ota kendabala okuwilika ovapangeli vomounyuni, eshi a popiwa a londa koshilyani. Shikwao vali, ita faneke omangeshefelo omounyuni waSatana, oo e na olwisho, molwaashi omangeshefelo a tya ngaho, otaa popiwa e li “ovashingifi vokombada yedu.” — Eh. 18:11, 15, 16.

¹⁶ PaMishangwa, outumbulilo “ombwada” otau dulu okuyukifwa kwaavo have liti otava longele Kalunga, ashike ohava kufa ombinga meenghedi vali dimwe dokulongela oikalunga. Ile hava pange oukaume nounyuni momikalo donhumba. (1 Omaf. 5:25; Jak. 4:4) Mepingafano naasho, ovo hava longele Kalunga noudiinini ova popiwa ve li ngaashi “oukadona elela.” (2 Kor. 11:2; Eh. 14:4) Babilon shonale osho sha li ondingandinga yelongelokalunga loipupulu. Onghee hano, Babilon Shinene oshi na okukala tashi ulike keenghedi adishe delongelokalunga loipupulu. Metwokumwe naasho, Babilon Shinene otashi ulike kouhamba womounyuni aushe womalongelokalunga oipupulu. — Eh. 17:5, 18; tala oshitukulwa shi li mOshiingilisha ko-jw.org “Babilon Shinene oshike?”

17. Oshike tashi ka ningilwa Babilon Shinene?

¹⁷ Oshike tashi ka ningilwa Babilon Shinene? Ehololo 17:16, 17 ola ti: “Oshilyani nosho yo eembinga omulongo odo wa mona otadi ka tonda ombwada, tadi i kufa oinima yayo aishe, ndele tai kala hamunghele, notadi ka lya po ombelela yayo noku i xwika po filufilu nomundilo. Osheshi Kalunga okwe shi tula momitima davo va wanife po elalakano laye.” Jehova ote ke linyengifa oiwana i longife oshilyani shitilyana, sha hala okutya, Oiwana ya Hangana, opo i  pilukile po nokuhanauna po filufilu ouhamba womounyuni womalongelokalunga oipupulu. — Eh. 18:21-24.

18. Ongahelipi hatu dulu okukala noushili kutya itatu yambidida nandenande Babilon Shinene?

¹⁸ Osho otashi ti shike kufye kunena? Otwa hala okukaleka ‘elongelokalunga letu la koshoka nolihe na edilo pataleko laKalunga ketu.’ (Jak. 1:27) Inatu hala nandenande okunwefwa mo komahongo oipupulu, koivilo yoshipaani, kelihumbato la xutuka nosho yo okukufa ombinga moinima youmhulile yaBabilon Shinene. Otwa hala okukwafela ovanhu va ‘dje mo musho,’ opo vaha kufe ombinga moulunde washo nokuhandukilwa kuKalunga. — Eh. 18:4.

19. Olyelye “ongadu inene itilyana”?

¹⁹ Embo lEhololo ola popya yo “ongadu inene itilyana.” (Eh. 12:3) Ongadu oyo oya lwa naJesus nosho yo novaengeli vaye. (Eh. 12:7-9) Oya ponokela ovapiya vaKalunga noya yandja eenghono koilyani, ile tu tye komapangelo opanhu. (Eh. 12:17; 13:4) Olyelye ongadu inene? Oyo “eyoka likulu olo hali ifanwa Ondiaboli nosho yo Satana.” (Eh. 12:9; 20:2) Oye ta wilike ovatondi vakwao aveshe vaJehova.

20. Oshike tashi ka ningilwa ongadu?

²⁰ Oshike tashi ka ningilwa ongadu? Ehololo 20:1-3 ola popya kutya omweengeli ota ka umbila Satana mombwili, nokungaho ota ka kala a fa a tulwa modolongo. Ngeenge okwa tulwa modolongo, Satana ita ka ‘hongaula vali oiwana fiyo osheshi omido 1 000 da pwa ko.’ Xuuninwa, Satana nosho yo eendemoni daye otava ka umbilwa “mefuta lomundilo wa hanyekwa nosulfuri,” sha hala kutya otava ka hanaunwa po fiyo alushe. (Eh. 20:10) Diladila kunghee ounyuni tau ka kala wa tya, eshi itamu ka kala vali Satana neendemoni daye! Itashi ka kala tuu efimbo litunhula!

21. Omolwashike tu na okukala twa hafa shi na sha naasho twa lesha membo lEhololo?

²¹ Itashi pameke tuu okushiiva eityo lomafaneko oo a popiwa membo lEhololo! Inatu mona ashike kutya ovatondi vaJehova ovo oolyelye, ndele otwa shiiva yo osho tava ka ningilwa. Onghee hano, ‘keshe ou ta lesha mokule eendjovo di na sha nexunganeko eli, nakeshe ou te di udu ota kala a hafa.’ (Eh. 1:3) Ndele ngeenge ovatondi vaKalunga ova hanaunwa po, ovapiya vaKalunga ovadiinini otava ka hafela omanangeko noupuna elipi? Osho ohatu ke shi kundafana moshitukulwa shaxuuninwa shomoitukulwa ei ya pambafana.