1-2. Omolwashike tu na okukala tu na ohokwe membo lEhololo?

 MBELA owa pelwe nale oalbuma yomafano yomunhu wonhumba? Eshi to ende to tale omafano owa mona mo omafano ovanhu vahapu ovo uhe shii. Opo nee owe litwa mo efano limwe olo u na ohokwe mulo. Omolwashike mbela? Omolwaashi naave omo u li mefano olo. Eshi to li konakona, oto kendabala okudimbuluka kutya ola fanekelwa peni nonaini. Oto kendabala yo u shiive keshe oo e li mefano olo. Efano olo otali ti sha neenghono kwoove.

² Embo lEhololo ola fa naanaa efano olo. Omolwashike mbela? Omolwomatomheno avali lwaapo. Lotete, embo eli lOmbiibeli ofye la shangelwa. Ovelishe yotete yembo olo oya ti: “Eli ehololo olo Jesus Kristus a pewa kuKalunga, opo a ulikile ovapiya vaye oinima oyo tai ka ningwa diva.” (Eh. 1:1) Onghee hano, embo olo inali shangelwa ashike ovanhu vakwalukeshe, ndele ofye ovo tu li ovapiya vaKalunga twe mu liyapulila. Tu li oshiwana shaKalunga inatu pumbwa okukala twa kumwa, eshi tu wete omaxunganeko oo taa hangwa membo olo likumwifi tae tu wanifilwa. Oku shi popya noitya imwe, nafye “omo tu li mefano olo,” ile tu tye, oinima oyo hatu lesha membo olo oye tu kuma pauhandimwe.

3-4. Metwokumwe nembo lEhololo, onaini omaxunganeko alo taa ka wanifwa notaa ka kuma ngahelipi keshe umwe womufye?

³ Etomheno etivali oli na sha nefimbo olo omaxunganeko oo taa ka wanifwa. Omuyapostoli Johannes, oo a li omunamido, okwa popya shi na sha nefimbo olo, a ti: “Omhepo iyapuki oya  ulikila nge oinima oyo tai ka ningwa mefiku lOmwene.” (Eh. 1:10) Eshi Johannes a shanga eendjovo odo lwomo 96 O.P., ‘efiku lOmwene’ ola li natango kokule nokuhovela. (Mat. 25:14, 19; Luk. 19:12) Ndele metwokumwe nexunganeko lOmbiibeli, efiku olo ola hovela mo 1914, eshi Jesus a nangekwa po e li Ohamba meulu. Okudja momudo oo okuyuka komesho, omaxunganeko oo taa hangwa mEhololo, oo a kwatela mo oshiwana shaKalunga, okwa hovela okuwanifwa. Onghee hano, paife otu li “mefiku lOmwene.”

⁴ Molwaashi otu li mefimbo olo litunhula, otwa pumbwa okuyandja elitulemo le likalekelwa komayele opahole, oo taa hangwa mEhololo 1:3, taa ti: “Keshe ou ta lesha mokule eendjovo di na sha nexunganeko eli, nakeshe ou ta udu nokudiinina osho sha shangwa mo ota kala a hafa, molwaashi eufwafimbo oli li popepi.” Oshoshili kutya otwa pumbwa ‘okulesha mokule,’ opo tu ‘ude eendjovo di na sha nexunganeko eli,’ noku di ‘diinina.’ Ndele mbela eendjovo dimwe dilipi domeendjovo odo twa pumbwa okudiinina?

5. Embo lEhololo ola divilika ngahelipi nghee sha fimana okushilipaleka kutya Jehova okwa hokwa onghedi omo hatu mu longele?

⁵ Okudja metukulwa lotete lEhololo, ohatu lihongo mo kutya Jesus oku na ko nasha filufilu naasho tashi ningwa momaongalo oshiwana shaKalunga. (Eh. 1:12-16, 20; 2:1) Osho Jesus okwe shi ulika okupitila meendjovo odo a tumina omaongalo aheyali omuAsia Linini. Meendjovo odo, okwa yandja mo omayele okondadalunde, oo a kwafela Ovakriste vopefimbo opo va shilipaleke kutya Jehova okwa hokwa onghedi omo tave mu longele. Shikwao vali, osho a popya meendjovo odo otashi longo yo kovapiya aveshe vaKalunga kunena. Osho otashi tu hongo shike? Omuwiliki wetu, Kristus Jesus, oku na ko nasha nonghalonawa yetu yopamhepo. Otu li koshi yepashukilo laye nokape na osho sha holekwa momesho aye. Oku shii osho twa pumbwa okuninga, opo Jehova a kale a hokwa onghedi omo hatu mu longele. Ewiliko lilipi ha yandje, olo twa pumbwa okushikula kunena?

6. (a) Metwokumwe nEhololo 2:3, 4, oupyakadi ulipi Jesus a popya u na sha neongalo lomuEfeso? (b) Oshilihongomwa shilipi hatu lihongo mo?

⁶ Lesha Ehololo 2:3, 4. Inatu efa po ohole yetu yotete yokuhola Jehova. Jesus okwa popya meendjovo odo a lombwela eongalo lokuEfeso kutya ove lididimika nonokutya ova li va twikila okulongela Jehova, nonande ova li va taalela omashongo a yoolokafana. Ashike nande ongaho, ohole yavo yotete oya li ya talala. Ova li va pumbwa okukulika ohole yavo, opo Kalunga a kale a hokwa onghedi yavo yoku mu longela. Sha faafana nokunena, otwa pumbwa okuninga shihapu shihe fi ashike okulididimika. Otwa pumbwa okukala tu na omalinyengotomheno a yuka, eshi hatu lididimike. Kalunga ketu ke na ashike ohokwe mwaasho hatu ningi, ndele oku na yo ohokwe kutya omolwashike hatu shi ningile. Omalinyengotomheno etu okwa fimana kuye, molwaashi okwa hala onghedi yetu yoku mu longela i kale ya kanghamena kohole yetu yomoule yoku mu hola nosho yo kolupandu. — Omayel. 16:2; Mark. 12:29, 30.

7. (a) Metwokumwe nEhololo 3:1-3, oupyakadi ulipi Jesus a popya u na sha neongalo lokuSarde? (b) Oshike twa pumbwa okuninga?

⁷ Lesha Ehololo 3:1-3. Otwa pumbwa okutwikila okukala tu li oupafi. Oilyo yeongalo lokuSarde oya li i na oupyakadi wonhumba. Nonande monakudiwa ova kala tave shi endifa nawa pamhepo, pefimbo opo kava li tave shi endifa nawa mokulongela Kalunga.  Nomolwaasho Jesus e va lombwela va ‘kale oupafi.’ Oshilihongomwa shelondwelo kufye oshilipi po? Oshoshili kutya, Jehova ke na efiku a dimbwe oilonga yetu. (Heb. 6:10) Ashike nande ongaho, inatu pumbwa okukala twe likolelela moilonga oyo twa longela Jehova monakudiwa. Nonande otashi dulika tu kale tu na omangabeko mahapu paife shi dulife nale, otwa pumbwa okukala twe lipyakidila “moilonga yOmwene” nokukala tu li oupafi fiyo okexulilo. — 1 Kor. 15:58; Mat. 24:13; Mark. 13:33.

8. Oshike hatu lihongo meendjovo daJesus odo a lombwela ovamwatate vokeongalo laLaodikea, odo tadi hangwa mEhololo 3:15-17?

⁸ Lesha Ehololo 3:15-17. Otwa pumbwa okukala tu na ouladi nokulongela Jehova nomutima wetu aushe. Jesus okwa ulika meendjovo odo a lombwela ovamwatate vokeongalo laLaodikea kutya ova li ve na oupyakadi wonhumba. Onghedi yavo yokulongela Jehova oya li ya fa “omeva a lomoka.” Molwaashi kava li ve na ouladi, Jesus okwe va lombwela kutya ova “etifa onghenda.” Ova li va pumbwa okuulika kutya ove na ouladi wokulongela Jehova. (Eh. 3:19) Oshilihongomwa kufye? Ngeenge otwa efa po ouladi wetu, otu na okukulika olupandu li na sha noinima aishe oyo Jehova e tu ningila nosho yo ehangano laye. (Eh. 3:18) Inatu efa onghalamwenyo youdjeko i tu piyaaneke, ndele hatu tula oinima yopamhepo pondodo onhivali.

9. Oshiponga shilipi twa pumbwa okuhenuka, ngaashi sha ulikwa meendjovo daJesus di na sha nOvakriste vokuPergamo naTiatira?

⁹ Otwa pumbwa okuhenuka omahongo ovashunimonima. Jesus okwa li a hanyena Ovakriste vamwe vokuPergamo, molwaashi ova li tava xumifa komesho etukauko, ile olutandu meongalo. (Eh. 2:14-16) Okwa pandula Ovakriste vokuTiatira ovo va li hava henuka “oinima yomoule yaSatana” nokwe va ladipika va “diinine” oshili. (Eh. 2:24-26) Ovakriste ovanghundi, ovo va li va efa va yulwe komahongo oipupulu, ova li va pumbwa okulidilulula. Ongahelipi shi na sha nafye kunena? Otwa pumbwa okuhenuka ehongo keshe olo tali kondjifafana nomadiladilo aJehova. Ovashunimonima ohave “limonikifa va fa ovatilikalunga,” ndele ihava kala “metwokumwe nonghedi omo Kalunga a hala okulongelwa.” (2 Tim. 3:5) Oshipu neenghono okudidilika mo nokuhenuka omahongo oipupulu, ngeenge ohatu konakona noukeka Eendjovo daKalunga. — 2 Tim. 3:14-17; Jud. 3, 4.

10. Oshike vali hatu lihongo meendjovo daJesus odo a lombwela eongalo lokuPergamo nolokuTiatira?

¹⁰ Otwa pumbwa okuhenuka onghedi keshe  yoluhaelo nokukala tu i tonde. Meongalo lomuPergamo naTiatira, omwa li mu na vali oupyakadi umwe. Jesus okwa li a tokola vamwe ovo va li momaongalo oo, molwaashi ova li hava kufa ombinga moluhaelo. (Eh. 2:14, 20) Oshilihongomwa kufye? Jehova ita ka kala e tu hokwa, ngeenge ohatu kufa ombinga moluhaelo loludi keshe, nonande otwa kala hatu mu longele oule womido dihapu notu na oinakuwanifwa ihapu paife. (1 Sam. 15:22; 1 Pet. 2:16) Okwa teelela tu kale twa lenga omifikamhango daye dopaenghedi, kashi na nee mbudi kutya omifikamhango dounyuni ou otadi ende tadi xutuka shi fike peni. — Ef. 6:11-13.

11. Oshike twe lihonga fiyo opapa? (Tala yo oshimhungu “ Oilihongomwa kufye kunena.”)

¹¹ Oshike twe lihonga fiyo opapa oku shi ngonga pauxupi? Otwa mona kutya osha fimana okushilipaleka kutya Jehova okwa hokwa onghedi omo hatu mu longele. Ngeenge otwa mono kutya ope na oshinima shimwe omo twa kala hatu limi onghudu, otwa pumbwa oku shi wapeka meendelelo. (Eh. 2:5, 16; 3:3, 16) Ashike ope na vali oshinima shimwe osho Jesus a lombwela omaongalo oo. Oshike osho mbela?

12. Oshike hatu lihongo meendjovo odo Jesus a lombwela ovamwatate vokuSmirna naFiladelfia? (Ehololo 2:10)

¹² Paife natu ka kundafaneni eendjovo odo Jesus a lombwela eongalo lokuSmirna nolokuFiladelfia. Okwa lombwela Ovakriste ovo vaha kale va tila omahepeko, molwaashi otava ka pewa ondjabi omolwoudiinini wavo. (Lesha Ehololo 2:10; 3:10) Oshilihongomwa kufye kunena? Otu na okukala twa teelela omahepeko nokukala twa halelela oku e lididimikila. (Mat. 24:9, 13; 2 Kor. 12:10) Omolwashike edimbulukifo olo la fimana?

13-14. Ovapiya vaKalunga ova kumwa ngahelipi koiningwanima oyo ya hokololwa mEhololo etukulwa 12?

¹³ Embo lEhololo ole tu lombwela kutya ovapiya vaKalunga otava ka hepekwa pefimbo letu, “mefiku lOmwene.” Ehololo etukulwa 12 ola popya shi na sha noita oyo ya li ya luwa meulu diva eshi Jesus a ninga Ohamba yOuhamba waKalunga. Mikael, omutumbalekwa Jesus Kristus, nomatangakwaita aye ova lwifa Satana neendemoni daye. (Eh. 12:7, 8) Oshidjemo? Ovatondi ovo vaKalunga ova findwa, ndele tava ekelwa kombada yedu, oko va etela okumona oixuna kuhapu nosho yo ovanhu ovo ve li ko. (Eh. 12:9, 12) Osho osha kuma ngahelipi ovapiya vaKalunga?

¹⁴ Ehololo ole tu lombwela shi na sha neenghatu daSatana. Ke na vali oufemba wokuya mo meulu. Onghee ehandu laye ola xwamena oshixupe shovavaekwa, osho shi li kombada yedu, osho shi lile po Ouhamba waKalunga kombada yedu notashi “hepaulula kombinga yaJesus.” (Eh. 12:17; 2 Kor. 5:20; Ef. 6:19, 20)  Exunganeko olo ola kala tali wanifwa ngahelipi?

15. Oolyelye ve lilwe po ‘keendombwedi mbali,’ odo da popiwa mEhololo etukulwa 11, nova ningilwa shike?

¹⁵ Satana okwa li a ponokela ovamwatate ovavaekwa, ovo va li tava kwatele komesho oilonga yokuudifa yOuhamba. Ovalumenhu ovo ova li ve lilwe po ‘keendombwedi mbali’ dopafaneko, odo da popiwa membo lEhololo, da dipawa. * (Eh. 11:3, 7-11) Mo 1918, ovamwatate vahetatu, ovo va li tava kwatele komesho mehangano, ova li va tamanekelwa omalundilo nova li va tulwa modolongo oule wefimbo lile. Pataleko lopanhu, oilonga yovavaekwa ovo oya li tai monika ya fa ya ‘xulifwa po.’

16. Oshike shihokwifa shi na sha nexumokomesho olo la ka ningwa mo 1919, na Satana okwa twikila okuninga shike okudja pefimbo opo?

¹⁶ Exunganeko olo tali hangwa mEhololo etukulwa 11 ola popya kutya “eendombwedi mbali” otadi ka nyumuka konima yefimbo lixupi. Shi na sha newanifo lexunganeko olo, opa li pa ningwa oshinima shihokwifa mefimbo lixupi momudo wa ka shikula ko, konima eshi ovamwatate ovo va tulwa modolongo. Pehovelo lo 1919, ovamwatate ovo ovavaekwa ova li va mangululwa mo modolongo, nolwanima, oshibofa shavo osha li sha ekelwashi. Ovamwatate ova li va shuna diva koilonga yavo yOuhamba. Ashike nande ongaho, Satana ina efa okuponokela ovapiya vaKalunga. Okudja pefimbo opo, Satana okwa kala nokuponokela odikilila ovapiya aveshe vaKalunga ‘nomulonga’ womahepeko. (Eh. 12:15) Onghee hano, keshe umwe womufye okwa pumbwa “okulididimika nokukala neitavelo.” — Eh. 13:10.

17. Ovapiya vaKalunga ova li va mona ekwafo inali teelelwa lilipi, nonande ova li oshishonekwa shomaponokelo aSatana?

¹⁷ Ehololo etukulwa 12 ola popya kutya ovapiya vaKalunga otava ka mona ekwafo lonhumba, olo tali di kodjo oyo inava teelela. Otashi ka kala sha fa “edu” tali pona po omeva “omulonga” womahepeko. (Eh. 12:16) Osho osho naanaa sha ningwa. Omafimbo amwe, omahangano amwe omounyuni waSatana, ngaashi eemhangu, okwa kala nokupopila ovapiya vaKalunga. Peemhito dihapu, ovapiya vaJehova ova findana moibofa yopamhangu, oyo ye va pefa emanguluko la wedwa po. Ova kala tava longifa ngahelipi emanguluko olo? Ova kala tava longifa pauyadi omhito keshe, opo va  longe oilonga oyo Jehova e va pa. (1 Kor. 16:9) Mbela oilonga oyo oya kwatela mo shike?

18. Oilonga ya fimana ilipi hatu longo momafiku aa axuuninwa?

¹⁸ Jesus okwa xunganeka kutya ovashikuli vaye otava ka udifa “onghundana ei iwa yOuhamba [waKalunga]” kombada yedu alishe, ofimbo exulilo inali uya. (Mat. 24:14) Eshi tava ningi ngaho, ohava yambididwa komweengeli, ile kongudu yovaengeli, oyo ya popiwa i na “onghundana iwa yaalushe oyo i na okuudifilwa aveshe ovo ve li kombada yedu, oiwana, omihoko, omalaka nomaludi aeshe.” — Eh. 14:6.

19. Etumwalaka vali lilipi tali ka udifwa kwaavo ve hole Jehova?

¹⁹ Onghundana iwa yOuhamba hayo ashike etumwalaka olo li na okuudifwa kovapiya vaKalunga. Ova pumbwa yo okuyambidida oilonga oyo tai longwa kovaengeli ovo va popiwa mEhololo etukulwa 8 fiyo 10. Ovaengeli ovo ova popya lwoikando kombinga yomaudjuu a kwata moiti, oo a li taa ka kuma ovo ve li omhinge nOuhamba waKalunga. Onghee hano, Eendombwedi daJehova oda kala tadi kufa ombinga metumwalaka letokolo, olo la faafanifwa ‘neemhawe nomundilo,’ olo tali holola etokolo laKalunga li na sha nomahangano a yoolokafana omounyuni waSatana wa kolokosha. (Eh. 8:7, 13) Ovanhu ova pumbwa okushiiva kutya exulilo oli li popepi, opo va ninge omalunduluko manene monghalamwenyo yavo nova ka dule okuxupa mefiku lehandu laJehova. (Sef. 2:2, 3) Ashike etumwalaka olo kali shiivike naanaa kuvahapu. Otwa pumbwa ouladi, opo tu li udife. Pefimbo loudjuu munene, etumwalaka letokolo laxuuninwa otali ka udifa nai ovanhu shi dulife paife. — Eh. 16:21.

20. Oshike hatu ka kundafana moitukulwa ivali tai shikula ko?

²⁰ Otwa pumbwa okudiinina filufilu “eendjovo di na sha nexunganeko eli,” molwaashi otwa kwatelwa mo mewanifo leendjovo odo da popiwa membo lEhololo. (Eh. 1:3) Ndele ongahelipi hatu ke lididimikila nomupondo omayeleko nokutwikila okuudifa etumwalaka eli nouladi? Ohatu ka pamekwa koinima ivali: shotete, oshosho embo lEhololo la popya shi na sha novatondi vaKalunga, noshitivali, omanangeko noupuna oo hatu ka hafela, ngeenge otwa kala ovadiinini. Ohatu ka kundafana kombinga yaasho moitukulwa ivali tai shikula ko.