1-2. Omolwashike omafinamhango amwe Ombiibeli tashi dulika a kale a fimanenena kufye, ngeenge eenghalo detu da lunduluka?

 OMUSHAMANE nomukulukadi mefiku lohango yavo ohava kala tava pwilikine nelitulemo koshipopiwa shopaMbiibeli shi na sha nohombo. Omafinamhango oo haa kala taa kundafanwa moshipopiwa osho ihaa kala mape kuvo. Ashike okudja mefiku olo, ouyelele wa tya ngaho ohau kala tau ti sha neenghono kuvo. Omolwashike mbela? Omolwaashi otava ka kala tava tula moilonga omafinamhango oo ve li ovalihomboli.

² Osho osha faafana ngeenge ovalihomboli va ningi ovadali. Otashi dulika va kala hava udu oipopiwa ihapu i na sha nokutekula ounona oule womido. Ndele paife omafinamhango a tya ngaho, ohaa kala a fimanenena kuvo, molwaashi otava ka kala ve na ounona vavo, ovo tava tekula. Osho kashi fi tuu oshinakuwanifwa sha kwata moiti! Onghee hano, ngeenge eenghalo tadi lunduluka monghalamwenyo yetu, omishangwa dimwe ohadi kala da fimanenena kufye. Nomolwaasho ovapiya vaJehova ve na okukala hava lesha Omishangwa nokudilonga kudo “omafiku aeshe” mokukalamwenyo kwavo, ngaashi eehamba daIsrael da li da lombwelwa di ninge. — Deut. 17:19.

3. Oshike hatu ka kundafana moshitukulwa eshi?

³ Ovadali, shimwe shomoinakuwanifwa ya denga mbada oyo mu na, okuhonga ounona veni kombinga yaJehova mu li Ovakriste. Omwa hala okuninga shipu shihe fi ashike oku va honga oshili kombinga yaKalunga ketu. Omwa hala oku va kwafela va kale ve hole neenghono Kalunga. Oshike tamu dulu okuninga, opo mu kwafele ovana veni va kale ve hole Jehova? Moshitukulwa  eshi, ohatu ka kundafana omafinamhango opaMbiibeli ane, oo taa dulu oku mu kwafela mu li ovadali. (2 Tim. 3:16) Ohatu ka tala yo nghee ovadali vamwe Ovakriste va mona ouwa mokutula moilonga omayele opaMbiibeli.

4. Efinamhango limwe lilipi olo tali dulu okukwafela ovadali va kwafele ovana va kale ve hole Jehova nomutima aushe? (Jakob 1:5)

⁴ Efinamhango 1: Konga ewiliko kuJehova. Pula Jehova e ku pe ounongo oo wa pumbwa, opo u kwafele ounona voye va kale ve mu hole. (Lesha Jakob 1:5.) Oku li Omunhu a denga mbada, oo ta dulu okuyandja omayele. Ohatu dulu okutya ngaho, omolwomatomheno onhumba. Diladila komatomheno avali omuo. Lotete, Jehova oku li omudali omunawino a shiya ko. (Eps. 36:9) Etivali, omayele opandunge oo ha yandje ohaa eta alushe ouwa. — Jes. 48:17.

5. (a) Ehangano laJehova ola ninga po shike, opo li kwafele ovadali? (b) Ngaashi sha ulikwa mokavidio, oshike we lihonga monghedi omo omumwatate nomumwameme Amorim va tekula ounona vavo?

⁵ Jehova oha yandje eendja dopamhepo da kanghamena kOmbiibeli, odo tadi dulu oku ku kwafela u tekule ounona voye va kale ve hole Jehova. Naasho ohe shi ningi okupitila mEendjovo daye nomehangano laye. (Mat. 24:45) Pashihopaenenwa, oto dulu okumona omayele taa longo moitukulwa ya pambafana “Ekwafo koukwaneumbo,” oyo ya kala hai holoka oule womido moshifo Kala oupafi! nopaife otai hangwa kepandja letu lokointaneta. Natango, ko-jw.org oku na ouvidio vahapu ve na sha nomapulaapulo nosho yo oinyandwa tai dulu okukwafela ovadali va tule moilonga omayele aJehova, eshi tava tekula ovana. * — Omayel. 2:4-6.

6. Omushamane umwe, oo e li omudali, oku uditile ngahelipi ewiliko olo ha mono okupitila mehangano laJehova ye nomukulukadi waye?

⁶ Ovadali vahapu ohava ulike olupandu lavo, eshi Jehova he va kwafele okupitila mehangano laye. Joe, oo e li omudali, okwa ti: “Kashi pu okutekulila ounona vetu vatatu moshili. Fye nomukulukadi wange ohatu ilikana alushe kuJehova e tu kwafele. Luhapu ohatu kala tu udite kutya oshitukulwa shonhumba, ile okavidio oke uya pefimbo la wapala ke tu kwafele tu ungaunge nonghalo yonhumba oyo twa taalela. Otwa kala alushe hatu kongo ewiliko kuJehova.” Joe nosho yo omukulukadi waye ova mona kutya  omafiloshisho a tya ngaho, ohaa kwafele ounona vavo va ehene popepi naJehova.

7. Omolwashike sha fimana kovadali okutula po oshihopaenenwa shiwa? (Ovaroma 2:21)

⁷ Efinamhango 2: Tula po oshihopaenenwa shiwa. Ounona ohava tale noku tu konenena ovadali vavo. Luhapu ohava hopaenene osho tava ningi. Oshoshili kutya kaku na omudali a wanenena. (Rom. 3:23) Ashike nande ongaho, ovadali ovanaendunge ohava kendabala okutulila po ounona vavo oshihopaenenwa shiwa. (Lesha Ovaroma 2:21.) Xe umwe omudali okwa popya kombinga younona a ti: “Ounona ova fa omundele, oo hau dulu okufipa keshe shimwe.” Okwa weda ko a ti: “Ohave tu lombwele, ngeenge katu li metwokumwe naasho hatu va hongo.” Onghee hano, ngeenge otwa hala ounona vetu va kale ve hole Jehova neenghono, ohole yetu yoku mu hola oi na okukala ya xwama noi liwetikile.

8-9. Oshike we lihonga momatyekosha aAndrew naEmma?

⁸ Ope na eenghedi dihapu omo ovadali tava dulu okuhonga ounona vavo va kale ve hole Jehova. Omumwatate womido 17 wedina Andrew okwa ti: “Ovadali vange ohava ladipike nge alushe kutya osha fimana okwiilikana. Tate oha ilikana pamwe naame, nokuli nonande okwa hanga nda ilikana nale paumwene. Ovadali vetu alushe ohave tu dimbulukifa kutya: ‘Otamu dulu okupopya naJehova lwoikando oyo mwa hala.’ Eladipiko la tya ngaho, ola kuma nge neenghono. Paife ohandi kala nda manguluka, ngeenge handi popi naJehova, nohandi mu tale ko e li Tate omunahole.” Ovadali, dimbulukeni alushe kutya ohole yeni yokuhola Jehova otai dulu okukwafela ovana veni va kale yo ve hole Jehova.

⁹ Diladila yo koshihopaenenwa shaEmma. Eshi xe a fiya po oukwaneumbo wavo, okwa fiya a lya eendjo dihapu, naina oye a li e na oku di futa. Emma okwa ti: “Omafimbo mahapu meme okwa kala ha kondjo nouxupilo, ashike okwa kala ha popi luhapu shi na sha nanghee Jehova ha file oshisho ovapiya vaye. Meme okwa kala metwokumwe naasho ha lombwele nge.” Oshilihongomwa? Ovadali otava dulu okuhonga ounona vavo okupitila moshihopaenenwa shavo, nokuli nonande ova taalela eenghalo didjuu. — Gal. 6:9.

10. Opeemhito dilipi opo ovadali vahapu Ovaisrael va li tava dulu okukundafana nounona vavo kombinga yaJehova? (Deuteronomion 6:6, 7)

¹⁰ Efinamhango 3: Kala ho popi nounona voye pandjikilile. Jehova okwa li a lombwela Ovaisrael vonale va kale hava hongo ounona vavo pandjikilile kombinga yaye. (Lesha Deuteronomion 6:6, 7.) Ovadali ovo ova li hava kala ve na eemhito dihapu momukokomoko wefiku omo tava dulu okukundafana nounona vavo noku va kwafela va kale ve hole Jehova nomutima wavo aushe. Pashihopaenenwa, okaana kokamati kokaIsrael oka li taka dulu okukala efimbo lihapu naxe, opo ke mu kwafele, eshi ta twike oimeno, ile ta teya oilikolomwa. Okamwainakadona oka li taka dulu okukala efimbo lihapu naina, opo ke mu kwafele, eshi ta hondjo, ile ta longo oilonga ikwao yomeumbo. Eshi ovadali nounona va li tava longo pamwe, ova li tava dulu okukundafana oinima ihapu ya fimana. Pashihopaenenwa, ova li tava dulu okukundafana kombinga youkwatya wouwa waJehova, nanghee a kala nokukwafela oukwaneumbo.

11. Opomhito imwe ilipi ovadali Ovakriste tava dulu okupopya nounona vavo?

¹¹ Omafimbo okwa lunduluka. Moilongo ihapu, ovadali nosho yo ounona ihava dulu okukala pamwe momukokomoko wefiku. Ovadali otashi dulika hava kala koilonga, nounona okofikola. Onghee hano, ovadali ova pumbwa okukonga eemhito, opo va dule okukala hava popi nounona vavo. (Ef. 5:15, 16; Fil. 1:10) Elongelokalunga loukwaneumbo oli li limwe lomeemhito da tya ngaho. Omumwatate omunyasha wedina  Alexander okwa ti: “Tate oha ningi alushe elongekido lelongelokalunga loukwaneumbo, noiha pitike nande oshinima shonhumba shi ye moshipala omhito oyo. Konima yelongelokalunga, ohatu hafele eenghundafana.”

12. Omitwe domaukwaneumbo odi na okukaleka shike momadiladilo pefimbo lelongelokalunga loukwaneumbo?

¹² Ngeenge ou li omutwe woukwaneumbo, oshike u na okuninga, opo ounona va kale va hokwa elongelokalunga loukwaneumbo? Oto dulu okukonakona nounona voye membo lipe Nghee to dulu okuhafela onghalamwenyo fiyo alushe! Embo olo otali ku kwafele u dule okukundafana nounona voye monghedi tai ti sha. Owa hala ounona voye va kale hava popi va manguluka kombinga yomaliudo avo nosho yo oisho yavo. Onghee hano, ino longifa efimbo la tya ngaho u va kembaule, ile u va vele eembedi. Ino kenyanana ngeenge ounona voye tave ku lombwele omaliudo avo, ile oshinima shonhumba osho shihe li metwokumwe nomafinamhango Ombiibeli. Ponhele yaasho, kala ho va pandula, eshi have ku hololele omaliudo avo, noku va twa omukumo va kale hava popi va manguluka. Oto ka dula ashike okukwafela ounona voye, ngeenge ou shii nghee ve udite filufilu.

13. Ovadali otava dulu okulongifa eemhito dimwe dilipi, opo va kwafele ounona vavo va ehene popepi naJehova?

¹³ Ovadali, kaleni hamu kongo eemhito momukokomoko wefiku, opo mu kwafele ovana veni va ehene popepi naJehova. Inamu kala ashike hamu teelele efimbo lokukonakona navo Ombiibeli, opo mu va honge kombinga yaKalunga ketu omunahole. Omudalakadi wedina Lisa okwa ti: “Otwa kala hatu longifa keshe osho she tu dingilila, opo tu honge ounona vetu kombinga yaJehova nosho yo yeshito. Pashihopaenenwa, ngeenge ombwa yetu oya ningi oshinima shonhumba sha yolifa ounona vetu, ohatu va lombwele kutya osho otashi ulike kutya Jehova oKalunga, oo ha kala a hafa, nokwe tu shita hatu dulu okukala twa hafa notu hafele oinima oyo i yolifa.”

14. Omolwashike sha fimana kovadali okukwafela ovana vavo va hoolole ookaume pandunge? (Omayeletumbulo 13:20)

¹⁴ Efinamhango 4: Kwafela ounona voye va hoolole ookaume vawa. Eendjovo daKalunga ode shi yelifa nawa kutya ookaume otava dulu oku tu nwefa mo nawa, ile nai. (Lesha Omayeletumbulo 13:20.) Ovadali, mbela omu shii ngoo ookaume kounona veni? Mbela omwa  shakena nale navo nokukala efimbo navo? Oshike u na okuninga po, opo u kwafele ovana voye va pange oukaume naavo ve hole Jehova? (1 Kor. 15:33) Oto dulu oku va kwafela va hoolole ookaume vawa mokushiva ovanhu, ovo ve na ekwatafano liwa naJehova, mu ninge oinima yonhumba pamwe nanye. — Eps. 119:63.

15. Oshike ovadali tava dulu okuninga, opo va kwafele ovana va mone ookaume vawa?

¹⁵ Diladila koshimoniwa shomudali wedina Tony. Okwa yelifa osho ye nomukulukadi waye va ninga po, opo va kwafele ovana va hoolole ookaume vawa. Okwa ti: “Moule womido, fye nomukulukadi wange otwa kala hatu shivi ovamwatate novamwameme vomido da yoolokafana nova dja momaputuko e lili noku lili. Otwa kala hatu li pamwe navo nokuninga elongelokalunga loukwaneumbo. Oyo oi li onghedi ya denga mbada omo to dulu okushiiva ovo ve hole Jehova notave mu longele nehafo. Otwa kala hatu yakula meumbo letu ovapashukilishikandjo, ovatumwa nosho yo vamwe vali. Oimoniwa yavo, ouladi nosho yo omhepo yavo yeliyambo oya nwefa mo neenghono ounona vetu noye va kwafela va ehene popepi naJehova.” Ovadali, kaleni mwa tokola toko okukwafela ounona veni va kale hava endafana nookaume vawa.

16. Oshike to ka ninga po, ngeenge okaana koye oka ti kutya inaka hala vali okulongela Jehova?

¹⁶ Nonande owa ninga eenghendabala da mana mo, oshike to ka ninga po, ngeenge okaana koye kamwe oka ti kutya inaka hala vali okulongela Jehova? Ino fika pexulifodiladilo kutya owa dopa okuwanifa po oshinakuwanifwa shoye u li omudali. Jehova okwe tu pa atushe, mwa kwatelwa nounona, oshali yokuninga omatokolo, hatu dulu okuhoolola okulongela Kalunga, ile hasho. Ngeenge okaana koye oka tokola okufiya po Jehova, ino teka omukumo. Kala alushe u na elineekelo kutya efiku limwe lomomafiku otaka ka aluka. Dimbuluka efaneko lomumati a kanene. (Luk. 15:11-19, 22-24) Omulumenhu oo omunyasha okwa li a ninga oinima ii ihapu, ashike lwanima okwa ka aluka. Vamwe otashi dulika va tye, “olo efaneko ashike. Mbela ounona vange otava dulu ngoo okwaalukila kuJehova?” Heeno, otava dulu! Omulumenhu omunyasha wedina Elie okwa ningilwa oshinima sha fa osho.

17. Oshimoniwa shaElie oshe ku twa omukumo ngahelipi?

 ¹⁷ Elie okwa popya shi na sha novadali vaye a ti: “Ova ninga ngaashi tava dulu, opo va kwafele nge ndi kale ndi hole Jehova nosho yo Eendjovo daye, Ombiibeli. Ashike eshi nda li mepupi lokamukondapweyu, onda li nda tukula ounashibofa.” Elie okwa li a hovela okukala nonghalamwenyo yopavali, nokwa li a efa po ashishe osho a hongwa kovadali vaye. Konima eshi a fiya po eumbo, okwa ka kala ha endafana nookaume va puka. Ashike nande ongaho, omafimbo amwe, okwa li ha kundafana naumwe womookaume kaye eenghundafana dopaMbiibeli. Elie okwa ti: “Eshi nda kala handi popi luhapu nakaume kange oo kombinga yaJehova, onda hovela okukala handi diladila kombinga yaJehova. Eembuto doshili yOmbiibeli, odo da li da kunwa momutima wange kovadali vange, oda li da hovela okumena kanini nakanini.” Mokweendela ko kwefimbo, Elie okwa li a alukila kuJehova. * Diladila kunghee ovadali vaElie va li va hafa, eshi ve mu honga okudja kounona a kale e hole Jehova! — 2 Tim. 3:14, 15.

18. Oho kala u uditile ngahelipi ovadali ovo hava longo noudiinini va honge ounona vavo va kale ve hole Jehova?

¹⁸ Ovadali, omwa pewa oufembanghenda wa denga mbada kuJehova wokutekula ounona veni va ninge ovalongeli vaye. (Eps. 78:4-6) Osho oshinakuwanifwa sha kwata moiti, nohatu mu pandula, eshi tamu longo noudiinini mu kwafele ovana veni. Ngeenge omwa twikile okuninga ngaashi tamu dulu mu kwafele ounona veni va kale ve hole Jehova noku va kwafela va kale hava dulika kuye, otamu dulu okukala noushili kutya otamu ka hafifa Tate yetu womeulu omunahole. — Ef. 6:4.