1-3. Ongahelipi tashi dulika oupyakadi oo wa li pokati kaEuodia naSintike wa li wa holoka po, nongahelipi omaupyakadi a tya ngaho taa dulu okuhenukwa? (Tala efano pehovelo loshitukulwa.)

OVAPIYA vaJehova ova lenga neenghono Eendjovo daye diyapuki, Ombiibeli. Tu li ovanhu inava wanenena, atusheni ohatu pewa omayele opamishangwa efimbo nefimbo. Ohatu linyenge ngahelipi kuo? Natu ka konakoneni kombinga yOvakriste vomefelemudo lotete, Euodia naSintike. Pokati kovakainhu ovo ovavaekwa opa li pa holoka oupyakadi wa kwata moiti. Mbela oupyakadi washike? Ombiibeli inai popya kombinga youpyakadi wavo. Ndele natu tye nee ngeno ova li ve na oupyakadi tau landula.

² Natu tye nee ngeno Euodia okwa shiva ovamwatate novamwameme vamwe keumbo laye opo va hafele eendafano pamwe. Ashike Sintike ka li a shivwa, nokwa li a uda kutya ovamwatate ova li tava hafele eendafano liwa keumbo laEuodia. Sintike otashi dulika a tye: ‘Itandi shi itavele kutya Eudioa ina shiva nge keumbo laye! Onda li ndi shii okaume kange kopofingo.’ Molwaashi Sintike okwa li e udite a kengelelwa, okwa li a uda nai ndele ta kala nokuli a limbililwa Euodia. Opo nee, Sintike naye okwa li a unganeka okavilo kaye ndele ta shivi  ovamwatate novamwameme ovo va li va shivwa kuEuodia, ndele ye ine mu shiva. Oupyakadi oo wa li pokati kaEuodia naSintike owa li tau dulu okunyona po ombili yeongalo alishe. Ombiibeli inai popya kutya oshike sha ka ningwa po, ashike ovamwameme ovo otashi dulika va li va tula moilonga omayele opahole omuyapostoli Paulus. — Fil. 4:2, 3.

³ Nokunena, eenghalo da tya ngaho omafimbo amwe ohadi eta omaupyakadi momaongalo oshiwana shaJehova. Ashike nande ongaho, omaupyakadi oo otaa dulu okukandulwa po ile nokuli a henukwe ngeenge otwa tula moilonga omayele oo taa hangwa mEendjovo daKalunga. Ngeenge otwa kala twa lenga Eendjovo daJehova, Ombiibeli, ohatu ka kala metwokumwe nomahongo ayo. — Eps. 27:11.

4, 5. Eendjovo daKalunga ode tu pa omayele elipi e na sha nanghee hatu dulu okupangela omaliudo etu?

⁴ Ihashi kala shipu okupangela omaliudo etu ngeenge twa udifwa nai ile twa ungaungiwa nafye shihe li pauyuki. Oshi udifa nai ngeenge hatu ungaungiwa nafye nai, omolweputuko letu, oluvala letu ile tashi dulika omolwomayooloko amwe vali opalutu. Ohashi kala shi yahameka neenghono ngeenge wa udifwa nai kOmukriste mukweni. Mbela Eendjovo daKalunga odi na ngoo omayele oo taa dulu oku tu kwafela ngeenge twa taalela eenghalo dii odo hadi holoka po omolwokuhawanenena?

⁵ Jehova okwa kala e shii nale ekwatafano olo li li pokati kovanhu okudja peshito. Oha kala e shii omaliudo neenghatu detu. Omadiladilo nomaliudo etu otaa dulu oku tu ningifa tu popye ile tu katuke eenghatu dii odo tadi dulu oku tu ningifa lwanima tu lipe oushima. Mbela kashi li pandunge okutula moilonga omayele opaMbiibeli opo tu dule okupangela ehandu ile okuhenuka okweendelela okuhanduka! (Lesha Omayeletumbulo 16:32; Omuudifi 7:9.) Nopehe na omalimbililo, atusheni otwa pumbwa okulonga noudiinini tu kale ihatu handuka diva nokukala hatu dimine po alushe vakwetu. Jehova naJesus ova tala ko ediminepo li li oshinima sha fimana neenghono. (Mat. 6:14, 15) Mbela owa pumbwa okukala ho dimine po ile owa pumbwa okulihonga okupangela omaliudo oye?

6. Omolwashike twa pumbwa okukala twa lungamena ehandu?

⁶ Ovanhu ovo hava dopa okupangela omaliudo avo luhapu ohava handuka diva. Oshidjemo, vamwe otashi dulika va kale tava henuka okweendafana nomunhu a tya ngaho. Omunhu oo ha kala a handuka ota dulu okunwefa mo nai eongalo. Otashi dulika a kendabale aha ulike ehandu laye nosho yo outondwe, ashike omadiladilo mai oo e li momutima waye otaa ka ‘hololwa meongalo,’ ile tu tye, otaa ka didilikwa mo. (Omayel. 26:24-26) Ovakulunhuongalo otava dulu okukwafela omunhu a tya ngaho opo a mone kutya ehandu, outondwe nosho yo okukwatela umwe onghone inai tambulwa ko mehangano laJehova. Eendjovo daJehova di na ondilo oda popya sha yela kombinga yoshinima osho. (Lev. 19:17, 18; Rom. 3:11-18) Mbela oto tu kumwe nado?

7, 8. (a) Ongahelipi Jehova ha wilike oshitukulwa shehangano laye shokombada yedu? (b) Omalombwelo amwe elipi taa hangwa mEendjovo daKalunga, nomolwashike tu na okudulika kuo?

⁷ Jehova oha wilike nokupalula oshitukulwa shehangano laye shokombada yedu okupitila ‘momupiya omudiinini nomunaendunge’ koshi yewiliko laKristus, “omutwe weongalo.” (Mat. 24:45-47; Ef. 5:23) Ngaashi Olutuwiliki lomefelemudo lotete, omupiya omudiinini naye okwa tambula ko Eendjovo daKalunga da nwefwa mo, nokwe di lenga neenghono. (Lesha 1 Ovatessaloniki 2:13.) Omalombwelo amwe elipi e li mOmbiibeli taa dulu oku tu kwafela?

⁸ Ombiibeli otai tu lombwele tu kale hatu  kala pokwoongala nopehe na okufaula. (Heb. 10:24, 25) Otai tu ladipike tu xumife komesho oukumwe. (1 Kor. 1:10) Otai tu lombwele kutya natu kale twa pitifa komesho Ouhamba monghalamwenyo yetu. (Mat. 6:33) Omishangwa oda divilika yo oufembanghenda wetu wokuudifa eumbo neumbo, moipafi nosho yo okuyandja oundombwedi wohangelela. (Mat. 28:19, 20; Oil. 5:42; 17:17; 20:20) Ombiibeli otai lombwele ovakulunhuongalo Ovakriste va kaleke ehangano laJehova la koshoka. (1 Kor. 5:1-5, 13; 1 Tim. 5:19-21) Jehova okwa hala aveshe ovo ve li mehangano laye va kale va koshoka palutu nopamhepo. — 2 Kor. 7:1.

9. Oupitilo ulipi tau longifwa oku tu kwafela tu ude ko Eendjovo daKalunga?

⁹ Vamwe otashi dulika va kale ve udite kutya otava dulu okuuda ko Ombiibeli kuvo vene. Ndelenee, Jesus okwa nangeka po “omupiya omudiinini” oye a kale oupitilo woku tu pa eendja dopamhepo. Okudja mo 1919, Jesus Kristus okwa kala ta longifa omupiya oo a kwafele ovashikuli vaye va ude ko Ombiibeli nova dulike kewiliko laye. Ngeenge otwa kala hatu dulika komayele oo e li mOmbiibeli, ohatu ka xumifa komesho oukoshoki, ombili noukumwe meongalo. Atusheni ohatu dulu okulipula kutya, ‘Mbela ohandi dulika ngoo komupiya omudiinini nomunaendunge oo Jesus ta longifa kunena?’

10. Oshitukulwa shehangano laJehova shomeulu osha hokololwa ngahelipi membo laHesekiel?

¹⁰ Eendjovo daJehova otadi tu lombwele kombinga yoshitukulwa shehangano laye shomeulu. Pashihopaenenwa, Hesekiel okwa li a mona memoniko etemba linene lomeulu olo tali faneke oshitukulwa shehangano laJehova shomeulu. (Hes. 1:4-28) Jehova oye omushingi wetemba, nohali i oko omhepo yaye ya hala li ye. Oshitukulwa shehangano laye shomeulu ohashi wilike oshitukulwa shehangano lokombada yedu. Etemba olo ola kala tali lotoka neendelelo. Diladila kombinga yomalunduluko oo a kala taa ningwa mehangano laJehova momukokomoko womido da pita. Ashike kaleka momadiladilo kutya Jehova oye ta ningifa omaxumokomesho a tya ngaho, pamwe naKristus novaengeli ovayapuki. Eshi exulilo lounyuni ou wa kolokosha tali ehene popepi, etemba otali kala nokweendelela neenghono opo li wanife po elalakano laJehova li na sha nokuyukipalifa ounamapangelo waye nokuyapulifa edina laye liyapuki.

11, 12. Ehangano laJehova ola pondola moinima imwe ilipi?

¹¹ Natu ka taleni kwaasho oshitukulwa shehangano laKalunga shokombada yedu sha kala tashi longo momafiku aa axuuninwa. Oilonga yokutunga. Ovatungi vahapu ova kala ve lipyakidila nokutunga eembelewa da kula dEendombwedi daJehova koWarwick, moNew York sha-U.S.A. Ovaliyambi omayovi mounyuni aushe otava longo noudiinini mokutunga Omalupale Ouhamba nokutamununa mo omatungo oitaimbelewa koshi yewiliko lOshikondo shOkuduta nOkutunga mOunyuni aushe. Mbela inatu pandula tuu ovo ve liyamba nehalo liwa tava  kwafele moilonga oyo! Jehova ota nangeke noupuna ovo tava yambidida nehalo liwa oilonga yOuhamba mounyuni aushe pashimaliwa. — Luk. 21:1-4.

¹² Ehongo. Natu ka taleni keefikola dimwe odo hadi xumifa komesho ehongo olo la denga mbada. (Jes. 2:2, 3) Otu na Ofikola yOkudeula Ovakokolindjila, Ofikola yOvaudifi vOuhamba, Ofikola yaGilead, Ofikola yOvabetel Vape, Ofikola yOkudeula Ovapashukilishikandjo nOvakulukadi Vavo, Ofikola yOkudeula Ovakulunhuongalo, Ofikola yOukalele wOuhamba nosho yo Ofikola yOkudeula Oilyo yEekomitiye dOitaimbelewa nOvakulukadi Vavo. Jehova oku hole shili okuhonga oshiwana shaye. Ehongo lOmbiibeli otali xumifwa yo komesho kepandja letu lokointaneta o-jw.org, oko ku na oishangomwa i li momalaka mahapu. Kepandja letu lokointaneta oku na oitukulwa ya pamba ounona, omaukwaneumbo nosho yo oshitukulwa sheenghundana. Mbela oho longifa ngoo o-jw.org moukalele nopelongelokalunga loukwaneumbo weni?

13. Tu li ovalongeli vaJehova ovadiinini, otu na oshinakuwanifwa shilipi?

¹³ Kashi fi tuu oufembanghenda okukala oshitukulwa shehangano laJehova! Okukala tu shii oiteelelwa nosho yo omifikamhango daKalunga ohashi tu ningifa tu longe osho sha yuka notu yambidide ounamapangelo waye. Eshi ounyuni tau ende tau naipala otu na okukala tu ‘tonde owii, ngaashi Jehova.’ (Eps. 97:10) Otu na okuhenuka okulimbwanga mumwe novahenakalunga ovo hava ti “owii oo ouwa, nouwa oo owii.” (Jes. 5:20) Molwaashi otwa hala okuhafifa Kalunga, ohatu kendabala okukala twa koshoka palutu, paenghedi nopamhepo. (1 Kor. 6:9-11) Otu hole Jehova notwe mu lineekela, nomolwaasho otwa hoolola okukala ovadiinini kuye mokukala metwokumwe nomifikamhango odo tadi hangika mEendjovo daye di na ondilo, Ombiibeli. Ohatu ningi eenghendabala da mana mo tu dulike komifikamhango odo kutya nee omomaumbo etu, omeongalo, okoilonga, okofikola ile keshe apa tu li. (Omayel. 15:3) Natu ka konakoneni eenghedi dimwe omo hatu dulu okuulika oudiinini wetu kuKalunga.

14. Ongahelipi ovadali Ovakriste tava dulu okuulika oudiinini kuKalunga?

¹⁴ Okutekula ounona. Ovadali Ovakriste ohava ulike oudiinini kuJehova mokudeula ovana vavo metwokumwe nEendjovo daye. Ovadali ovatilikalunga ihava nwefwa mo komifyuululwakalo domomudingonoko di na sha nanghee ve na okutekula ounona. Omhepo younyuni kai na okukala meumbo lOmukriste. (Ef. 2:2) Omushamane Omukriste ita ka diladila kutya ‘Moshilongo shetu okutekula ounona oilonga yovakulukadi.’ Ombiibeli oya popya sha yela kombinga yaasho eshi ya ti: “Ooxe, . . . tekuleni [ovana veni] meduliko nomekumaido lOmwene.” (Ef. 6:4) Ovadali ovatilikalunga ova hala ovana vavo va kale va fa Samuel, oo Jehova a kala pamwe naye eshi ta kulu. — 1 Sam. 3:19.

15. Ngeenge hatu ningi omatokolo a kwata moiti, ongahelipi hatu ka ulika oudiinini wetu kuJehova?

¹⁵ Okuninga omatokolo. Onghedi imwe omo hatu dulu okuulika oudiinini wetu kuKalunga omokukala hatu kongo ekwafo mEendjovo daye nomehangano laye ngeenge hatu ningi omatokolo a kwata moiti monghalamwenyo. Opo tu ulike kutya omolwashike sha fimana okuninga ngaho, natu ka konakoneni oshinima shimwe osho hashi nyemateke ovadali vahapu. Osha tambulwa ko kovanhu vamwe okutwala ounona vavo va ka filwe oshisho kovapambele opo ovadali va twikile noilonga fimbo ve li koshitukulwa shimwe ile koshilongo shimwe. Oshoshili kutya oshi li etokolo lopaumwene, ashike otu na okukaleka momadiladilo kutya keshe umwe ote ke lihokolola kuKalunga omolwomatokolo oo ta ningi. (Lesha Ovaroma 14:12.) Mbela oshi li ngoo pandunge okuninga omatokolo a fimana e na sha nomaukwaneumbo etu nosho yo ouxupilo  wetu nopehena okukonga ekwafo tete mOmbiibeli? Hasho nandenande. Otwa pumbwa ekwafo laTate yetu womeulu molwaashi itatu dulu okuwilika eenghatu detu. — Jer. 10:23.

16. Omukainhu umwe okwa li e na okuninga ehoololo lilipi konima eshi a mona okaana, noshike sha li she mu kwafela opo a ninge etokolo lopandunge?

¹⁶ Omukulukadi umwe, oo opo a li a mono okaana kokamati fimbo a li koshilongo shimwe, okwa li ta ka twala okaana koshilongo shavo opo kaka filwe oshisho kooinakulu. Ondombwedi imwe oya li ya hovela okukonakona Ombiibeli nomukainhu oo eshi opo a mono okaana. Okwa li a ninga exumokomesho nokwe lihonga kutya pataleko laJehova, oye e na oshinakuwanifwa shokutekula okaana kaye ka kale haka longele Jehova. (Eps. 127:3; Omayel. 22:6) Omukainhu oo omunyasha okwa li a mbubulila Jehova omutima waye, ngaashi ashike omishangwa detu lombwela tu ninge. (Eps. 62:7, 8) Okwa li yo a mangulukila omuhongi waye wOmbiibeli nokupopya navamwe meongalo. Nonande okwa li ta fininikwa kovapambele nokookaume kaye a twale okaana kooinakulu, okwa li a fika pexulifodiladilo kutya kashi li mondjila okutwala okaana ka ka tekulwe kovapambele. Omushamane waye okwa li a kuminwa onghedi omo eongalo la kala tali ungaunga nomukulukadi waye nokaana kavo. Naasho osha li she mu linyengifa a tambule ko ekonakonombiibeli ndele ta hovele okukala ha i kokwoongala pamwe nokaana nomukulukadi waye. Mbela oto diladila kutya omukainhu oo okwa li e wete nghee Jehova a nyamukula eilikano laye la dja komutima? Nopehe na omalimbililo, okwa li e udite kutya Jehova okwa nyamukula eilikano laye.

17. Omalombwelo elipi twa pewa e na sha novakonakonimbiibeli?

¹⁷ Okulandula omalombwelo. Onghedi imwe omo hatu dulu okuulika kutya otu va diinini kuKalunga omokukala hatu landula omalombwelo oo hatu pewa kehangano laye. Pashihopaenenwa, natu ka taleni komaetepo oo twa li twa pewa e na sha novakonakonimbiibeli vetu. Otwa lombwelwa kutya shimha ashike twa hovele okukonakona nomunhu membo Ombibeli otai hongo lela shike? otwa pumbwa okukala hatu kundafana naye ominute dinini kombinga yehangano konima ashike yekonakono keshe. Ohatu dulu okuninga ngaho mokulongifa okavidio Oshike hashi ningwa pokwoongala keshe kwEendombwedi? nosho yo okambo Oolyelye tava longo ehalo laJehova kunena? Opa ningwa eetepo kutya ngeenge otwa mane ko embo Ombibeli otai hongo nomukonakonimbiibeli oo ta ningi exumokomesho, otwa pumbwa okukonakona vali naye membo ‘Likalekeni mohole yaKalunga,’ nonande okwa hangika a ningifwa nale. Ehangano ola yandja omalombwelo oo opo ovahongwa ovo vape va kale “nokulipamekela meitavelo.” (Kol. 2:7) Mbela oto shikula ngoo omalombwelo oo a dja kehangano laJehova?

18, 19. Otu na omatomheno amwe elipi okupandula Jehova?

¹⁸ Ope na omatomheno mahapu kutya omolwashike twa pumbwa okupandula Jehova. Otu na oku mu fimaneka monghalamwenyo yetu, osheshi omolwaye tu na omwenyo. (Oil. 17:27, 28) Okwe tu pa oshali i na ondilo, Ombiibeli. Otwe i tambula ko i li etumwalaka laKalunga, ngaashi Ovakriste vomuTessalonika. — 1 Tes. 2:13.

¹⁹ OmolwEendjovo daKalunga odo tu na, otwa dula okweehena kuye, naye okwa ehena kufye. (Jak. 4:8) Tate yetu womeulu okwe tu pa oufembanghenda wokukala tu li oshitukulwa shehangano laye. Mbela inatu pandula tuu omanangekonoupuna a tya ngaho! Omupsalme okwa imba a ti: “Panduleni Omwene, osheshi Oye omuwa! Osheshi alushe ouwanghenda waye tau kala po.” (Eps. 136:1) MEpsalme 136, ohatu hange mo outumbulilo “ouwanghenda waye tau kala po” lwoikando 26. Ngeenge otwa ulike kutya otu li ovadiinini kuJehova nokehangano laye, ohatu ka mona oushili weendjovo odo tadi kumu omutima, eshi hatu ka kala fiyo alushe.