OMAFIMBO amwe Jesus okwa li ha popifa oohandimwe voukashike kookanhu wa yooloka ko kuwaye, ta longifa outumbulilo “Omukainhu.” Pashihopaenenwa, eshi a li ta velula omunaudu oo a kala e na omhepo youngone omido 18 nokwa kala ha ende omwodimba, okwa ti: “Omukainhu, wa veluka koudu woye.” (Luk. 13:10-13) Ngeenge a li ta popi naina okwa kala alushe ha longifa onghedi oyo ya li ya talika ko i li okuulika efimaneko pefimbo lOmbiibeli. (Joh. 19:26; 20:13) Ashike opa li oshitya shimwe osho sha li sha talika ko unene shi li onghedi yokuulika efimaneko.

Ombiibeli oya longifa vali oshitya shimwe osho tashi ulike unene onghenda nolune ngeenge tai popi kombinga yovakainhu vonhumba. Jesus okwa li a longifa oshitya osho eshi a li a popya nomukainhu oo a kala ta hepekwa ketiko lohonde oule womido 12. Onghedi oyo a li a ya kuJesus kaya li metwokumwe nOmhango yaKalunga, oyo tai ti kutya omunhu oo e li monghalo ya fa yaye kali a koshoka. Okwa li yoo tashi dulika ngeno e na okulombwelwa e likaleke kokule novanhu omolwonghalo yaye. (Lev. 15:19-27) Ashike, omukainhu oo okwa li a halelela okuveluka molwaashi okwa li e “lihepeka shili neendudu dihapu, ndee ta manene mo emona laye alishe, ndelenee ina mona ekwafo, ndele oudu owa ya ashike komesho neenghono.” — Mark. 5:25, 26.

Omukainhu okwa li e lifininika mongudu yovanhu nokwa ehena konima yaJesus ndele ta kumu keenyemba doshikutu shaye. Opo tuu opo etiko lohonde yaye ola oka! Omukainhu oo okwa li ta diladila kutya ota dulu ashike okuya nopehe na ou te shi nongele, ashike Jesus okwa li a pula a ti: “Olyelye ou a kuma nge?” (Luk. 8:45-47) Omukainhu okwa li a tila nokukakama, opo nee okwa wila poshi peemhadi daJesus “ndee te mu hepaululile oshili aishe.” — Mark. 5:33.

Opo e shi ninge shipu komukainhu oo, Jesus okwa li a popya naye nonghenda a ti: “Kala nomwenyo muwa, omumwange.” (Mat. 9:22) Ovahongwanhu vOmbiibeli ova popya kutya oshitya shOshiheberi nOshigreka osho sha tolokwa “omumwange,” ile tu tye omumwangekadona, otashi dulu okulongifwa okuulika “onghenda nosho yo olune.” Jesus okwa li a twikila oku mu shilipaleka eshi a ti: “Eitavelo loye ole ku velula. Inda nombili, ove u kale wa veluka koudu woye.” — Mark. 5:34.

Omulumenhu oshipuna Omuisrael wedina Boas okwa li a popifa Rut Omumoab ta ti: “Omumwange.” Rut okwa li e na etomheno lokukala a tila molwaashi okwa li ta pupudulula mepya lomulumenhu ehe mu shi. Boas okwa ti: “Pwilikina, omumwange.” Opo nee okwe mu ladipika a twikile nokupupudulula mepya laye. Rut okwa li e linyongamena poshi poshipala shaye ndee te mu pula kutya omolwashike a kala ta ungaunga naye nonghenda nonande ye omunailongo. Boas okwa li e mu nyamukula nokwe mu shilipaleka a ti: “Ame nda hepaululilwa [naanaa] ashishe osho wa ningila nyokomweno [omufiyekadi Naomi] . . . Omwene ne ku alulile oshilonga shoye.” — Rut 2:8-12.

Mbela Jesus naBoas inava tulila po tuu ovakulunhuongalo Ovakriste oshihopaenenwa shiwa! Omafimbo amwe, ovakulunhuongalo vavali otashi dulika va talele po omumwameme oo a pumbwa ekwafo lopamishangwa nosho yo etwomukumo. Konima yokukonga ewiliko laJehova meilikano nokupwilikina nelitulemo osho omumwameme ta ti, ovakulunhuongalo otava ka dula oku mu shilipaleka nosho yo oku mu pa ehekeleko lopamishangwa. — Rom. 15:4.