1, 2. (a) Ovapiya vaKalunga ova teelela nodjuulufi oku ka mona ondjabi yashike? (b) Oshike tashi tu kwafele tu kale twa tala kondjabi? (Tala efano pehovelo loshitukulwa.)

NGAASHI omuyapostoli Paulus, Ovakriste vokunena ovo vavaekwa nomhepo ove neteelelo loku ka pewa ‘ondjabi yefindano oyo Kalunga e va ifanena neifano lopombada.’ (Fil. 3:14) Ova teelela nodjuulufi oku ka pangela pamwe naJesus Kristus mOuhamba womeulu noku ka twala ovanhu mewaneneno. (Eh. 20:6) Ka li fi tuu eteelelo litunhula olo Kalunga e va pa va lalakanene! Eedi dimwe odi na eteelelo li lili. Oda teelela nodjuulifi oku ka mona ondjabi yomwenyo waalushe kombada yedu. Osho ka shi tunhula tuu! — 2 Pet. 3:13.

² Opo Ovakriste ovavaekwa va kwafelwe va kale ovadiinini nova ka mone ondjabi, Paulus okwe va lombwela a ti: “Omadiladilo eni naa dame oinima yopombada.” (Kol. 3:2) Ova li ve na okukaleka momadiladilo eteelelo litunhula loku ka mona efyuululo lavo  lomeulu. (Kol. 1:4, 5) Okudiladila komanangeko noupuna oo Jehova ta ka pa oshiwana shaye ohashi kwafele ovapiya vaye aveshe va kale va tala kondjabi, kutya nee ove na eteelelo lomeulu ile olokombada yedu. — 1 Kor. 9:24.

3. Paulus okwa li a londwela Ovakriste vakwao kombinga yomaupyakadi elipi?

³ Natango, Paulus okwa londwela Ovakriste vakwao kombinga yomaupyakadi oo taa dulu oku va imba va ka mone ondjabi. Pashihopaenenwa, okwa li a shangela eongalo lomuKolossi kombinga yOvakriste ovanaipupulu ovo va li tava kendabala okukala va hokiwa kuKalunga okupitila moilonga yOmhango ponhele yokukala ve na eitavelo muKristus. (Kol. 2:16-18) Paulus okwa li yo e va lombwela kombinga yomaupyakadi oo e li ko kunena notaa dulu oku tu imba tu ka mone ondjabi. Pashihopaenenwa, okwa li e va yelifila nghee tava dulu okukondjifa omahalo inaa koshoka, okuungaunga nomaupyakadi oo e li pokati kavo novaitaveli vakwao nosho yo momaukwaneumbo. Nokunena, omayele aye moinima oyo okwa fimana yo kufye. Onghee hano, natu ka konakoneni omalondwelo aye opahole oo taa hangwa monhumwafo yaye oyo a li a shangela Ovakolossi.

4. Omolwashike omahalo inaa koshoka taa dulu oku tu imba tu ka mone ondjabi?

⁴ Konima eshi Paulus a dimbulukifa ovamwaxe kombinga yeteelelo litunhula, okwa shanga a ti: “Dipaeni hano oinhimbu yeni yopadu: oluhaelo, onyata, olwisho loipala, okahalu kai, nolwisho leliko.” (Kol. 3:5) Omahalo inaa koshoka otaa dulu okukala e neenghono noku tu imba omamona opamhepo. Omumwatate umwe oo a li a twalwatwalwa komahalo inaa koshoka, konima eshi a alukila meongalo okwa ti kutya, “Omutima wange owa kala ta hongaulwa kokahalu kaii; onda papala ashike nda nyona.”

5. Ongahelipi hatu dulu okuliamena keenghalo da nyika oshiponga?

⁵ Osha fimana unene okukala tu li oupafi ngeenge tu li meenghalo odo tadi dulu oku tu yeleka tu efe po omifikamhango daJehova dopaenghedi. Pashihopaenenwa, oshi li pandunge kwaavo tava endelafana ve litulile po omangabeko moinima ngaashi okulikwata, okulixupita, ile okukala ovo aveke. (Omayel. 22:3) Eenghalo da nyika oshiponga otadi dulu okuholoka po ngeenge Omukriste okwa i molweendo li na sha nongeshefa ile ngeenge oha longo nomunhu woukashike kookanhu wa yooloka ko kuwaye. (Omayel. 2:10-12, 16) Ngeenge owe lihange monghalo ya tya ngaho, ulika kutya ove ou li umwe womEendombwedi daJehova, katuka monghedi yefimaneko nokudimbuluka kutya okulihumbata monghedi tai kokele momilele otaku dulu okweeta oilanduliko inyikifa oluhodi. Otashi dulika yo tu lihange monghalo ya nyika unene oshiponga ngeenge otwa polimana ile tu li moluhepo. Monghalo ya tya ngaho, otashi dulika tu kale twa hala umwe e tu ningife tu kale tu udite tu na oshilonga. Otashi dulika nokuli tu kale twa wililwa po komaliudo, naasho otashi dulu oku tu ningifa tu yandje elitulemo kukeshe umwe. Ngeenge osho oshe ke ku ningilwa, konga ekwafo kuJehova nokoshiwana shaye opo uhe li imbe oku ka mona ondjabi. — Lesha Epsalme 34:18; Omayeletumbulo 13:20.

6. Oshike tu na okukaleka momadiladilo ngeenge hatu hoolola omalihafifo?

⁶ Opo tu dipae omahalo inaa koshoka, otwa pumbwa okuhenuka omalihafifo inaa koshoka. Omalihafifo mahapu kunena, oku yadi oinima oyo ya li hai ningwa muSodom naGomorra shonale. (Jud. 7) Ovashiivifi voipindi ohava ningifa ovanhu va diladile kutya okuninga oinima yopamilele inai koshoka oshi li paushitwe noinashi nyika oshiponga. Otu na okukala twa lungama tuha kufe ombinga momalihafifo keshe taa ningwa. Otwa pumbwa okuhoolola omalihafifo  oo itae tu imbi okukala twa tala kondjabi yomwenyo. — Omayel. 4:23.

7. Omaupyakadi elipi hatu dulu okushakeneka meongalo lopaKriste?

⁷ Atushe ohatu dimine kutya okukala oshilyo sheongalo lopaKriste oshi li enangeko noupuna. Eendjovo daKalunga odo hatu konakona pokwoongala kwetu nosho yo ombili nohole oyo hatu ulikilafana ohai tu kwafele tu kale twa tala kondjabi. Kakele kaasho, omafimbo amwe otashi dulika pa holoke okuhaudafana pokati koilyo yeongalo. Ngeenge otwa dopa okukandula po omaupyakadi a tya ngaho, otashi dulika tu kwate onghone. — Lesha 1 Petrus 3:8, 9.

8, 9. (a) Omaukwatya elipi tae tu kwafele tu mone ondjabi? (b) Oshike tashi ke tu kwafela tu kaleke po ombili ngeenge Omukriste mukwetu okwe tu udifa nai?

⁸ Ongahelipi hatu dulu okukelela onghone ihe tu imbe ondjabi yetu? Paulus okwa li a ladipika Ovakolossi a ti: “Ovahoololwa nye vaKalunga, ovayapuki novaholike, djaleni efilonghenda lomomutima, ombili, elininipiko, engungumano noutalanheni, lididimikilafaneni, diminafaneni po omanyono, ngeenge mwa ningafana nomukweni, ngaashi Kristus e mu dimina po, osho nanye yo mu ninge; ndele kombada yaaishe djaleni ohole, oyo oshimangifo sha wana shoku mu manga kumwe.” — Kol. 3:12-14.

⁹ Ohole nosho yo ombili otai dulu oku tu kwafela tu dimine po vamwe. Pashihopaenenwa, ngeenge otwa udifwa nai keendjovo ile keenghatu dOmukriste mukwetu, ohatu dulu okudiladila kunghee twa li twa popya ile twa katuka shihe li pandunge. Mbela ohatu pandula ngoo ovamwatate novamwameme ovanahole novanambili ovo ihava yandje elitulemo komapuko etu? (Lesha Omuudifi 7:21, 22.) Otwa pandula unene Kristus eshi a hanganifa ovalongelikalunga vashili moukumwe. (Kol. 3:15) Atushe otu hole Kalunga umwe, hatu udifa etumwalaka limwe nohatu shakeneke omashongo a faafana. Ngeenge otwa kala hatu dimine po vamwe hatu linyengifwa kohole nokolukeno, ohatu ka xumifa komesho oukumwe wopaKriste nohatu ka kala twa tala kondjabi.

10, 11. (a) Omolwashike ondubo ya nyika oshiponga? (b) Ongahelipi hatu dulu okuhenuka ondubo ihe tu imbe ondjabi yetu?

¹⁰ Oihopaenenwa yelondwelo oyo i li mOmbiibeli oye tu dimbulukifa kutya ondubo otai dulu oku tu imba tu ka mone ondjabi. Pashihopaenenwa, Kain okwa li a twila omumwainamati, Abel, ondubo nokwa li e mu dipaa. Kora, Datan naAbiram ova li va twila Moses ondubo nova li ve mu pataneka. Natango, ohamba Saul oya li ya twila David ondubo noya li ya kendabala oku mu dipaa eshi a li a pondola. Nomolwaasho Eendjovo daKalunga da ti: “Apa pe nefupa neenhamanana, opo pe na yo edongakano noilonga aishe yowii.” — Jak. 3:16.

¹¹ Ngeenge otwa kulike ohole nombili momitima detu, itatu ka twila vamwe ondubo. Eendjovo daKalunga oda ti: “Ohole i noutalanheni, ohole i nolukeno; ohole ihai fi efupa.” (1 Kor. 13:4) Opo tuha efe ondubo i kule momitima detu, otwa pumbwa okukendabala okukala hatu tale ko oinima ngaashi Kalunga he i tale ko nokutala ko ovamwatate novamwameme ve li oilyo yolutu lopaKriste limwe. Osho otashi ke tu kwafela tu kala tu uditile vamwe oukwao wananghali, metwokumwe nomayele a nwefwa mo oo a ti: Ngeenge “oshinhimbu shimwe tashi fimanekwa, oinhimbu aishe otai hafe pamwe nasho.” (1 Kor. 12:16-18, 26) Ponhele yokukala twa twila vamwe ondubo ngeenge va mona omanangeko noupuna, natu kale twa hafa. Diladila koshihopaenenwa shomonamati wohamba Saul, Jonatan. Ka li a twila David ondubo eshi a fyuulula oshipundi shaxe. Ponhele yaasho, okwa li e mu twa omukumo. (1 Sam. 23:16-18) Mbela ohatu dulu ngoo okukala ovanalukeno novanahole ngaashi Jonatan?

12. Omayele elipi opamishangwa taa dulu oku tu kwafela tu ka mone ondjabi ngeenge otwe a tula moilonga?

¹² Okutula moilonga omifikamhango dOmbiibeli ota ku dulu okweetela oukwaneumbo ombili nehafo noku u kwafela u ka mone ondjabi. Paulus okwa li a pa Ovakriste vOmukolossi omayele elipi opaMbiibeli e na sha nomaukwaneumbo? Okwa ti: “Ovakainhu nye, dulikeni kovalumenhu veni, ngaashi sha wapalela mOmwene. Ovalumenhu nye, holeni ovakainhu veni, nye inamu va ningila onyanya. Ounona nye, dulikeni kovakulunhu veni moinima aishe, Osheshi osho sha wapalela mOmwene. Ooxe nye, inamu shinda ovana veni, vehe mu livangeke.” (Kol. 3:18-21) Kape na omalimbililo, oto dimine kutya okutula moilonga omayele aPaulus a nwefwa mo natango otaa etele ovashamane, ovakulukadi nounona ouwa.

13. Ongahelipi omumwameme Omukriste ta dulu okweeta moshili omushamane waye oo ehe fi omwiitaveli?

¹³ Ongahelipi ngeenge ou li omukulukadi nou udite kutya omushamane woye oo ehe fi omwiitaveli iha ungaunga nave nawa? Mbela oto ka lundulula onghalo oyo mokutanguna kombinga yelihumbato laye? Nonande owa pondola moku mu ningifa a ninge osho wa hala, mbela oto ke mu eta ngoo moshili? Hasho naanaa. Ashike ngeenge owa ulike kutya owa fimaneka oukwamutwe womushamane woye, oto dulu okuxumifa komesho ombili moukwaneumbo, oto ka hafifa Jehova notashi dulika nokuli u mu ete moshili;  nokungaho amushe otamu ka mona ondjabi. — Lesha 1 Petrus 3:1, 2.

14. Omushamane Omukriste ota dulu okuninga po shike ngeenge omukulukadi waye oo ehe fi omwiitaveli ine mu fimaneka?

¹⁴ Ongahelipi ngeenge ou li omushamane nou udite kutya omukulukadi woye oo ehe fi omwiitaveli ine ku fimaneka? Mbela oto ke mu linyengifa e ku ulikile efimaneko ngeenge owa kala to mu tangunine opo u mu ulikile kutya oove u neenghono? Hasho nandenande! Kalunga okwa teelela u longife oukwamutwe woye pahole, mokuhopaenena Jesus. (Ef. 5:23) Jesus ohe lididimike pahole eshi ta longifa oukwamutwe waye meongalo. (Luk. 9:46-48) Ngeenge ovashamane ova hopaenene oshihopaenenwa shaJesus, otava dulu okunanena ovakulukadi vavo kelongelokalunga lashili.

15. Ongahelipi omushamane Omukriste ha ulikile omukulukadi waye ohole?

¹⁵ Ovashamane omwa lombwelwa kutya, “Holeni ovakainhu veni, nye inamu va ningila onyanya.” (Kol. 3:19) Omushamane omunahole oha fimaneke omukulukadi waye mokupwilikina komaetepo aye noku mu shilipaleka kutya okwa lenga osho a popya. (1 Pet. 3:7) Nonande haalushe ha ningi osho e mu pula, luhapu ngeenge a kundafana naye oha ningi etokolo li li pandjele. (Omayel. 15:22) Oha kendabala a katuke monghedi oyo tai ningifa omukulukadi a kale e mu fimaneka ponhele yokukala te mu lombwele e mu fimaneke. Omushamane oo e hole omukulukadi waye novana vaye ota ka kala e na oukwaneumbo tau longele Jehova nehafo notau ka findana ondjabi yomwenyo.

16, 17. U li omunyasha, ongahelipi to dulu okuhenuka okukala u uditile nai ovadali voye?

¹⁶ Ongahelipi ngeenge ou li omunyasha nou udite kutya ovadali voye Ovakriste ihave ku udu ko ile ove ku ngabeka? Okuuda nai kwoye otashi dulika nokuli ku ku ningife u kale wa limbililwa ngenge okulongela Jehova oko onghedi ya denga mbada monghalamwenyo. Ashike ngeenge owa efa okuuda nai ku ku efife po okulongela Jehova, oto ke shi mona mo diva kutya kape na vali umwe e na ko nasha naave shi dulife ovadali voye ovatilikalunga nosho yo eongalo loye.

¹⁷ Ngeenge ovadali voye ihave ku pukulula, mbela ito ka kala to lipula ngeenge ove na ngoo ko nasha naave shili? (Heb. 12:8) Ashike otashi dulika onghedi omo have ku pe outekuduliko oyo hai ku udifa nai. Ponhele yokuuda nai omolwonghedi omo have ku pe outekuduliko, kendabala okumona kutya ope na sha osho she va ningifa va katuke ngaho. Onghee hano, kala wa ngungumana nokuhenuka oku va kembaula. Eendjovo daKalunga oda ti: “Ou ta pangele eendjovo daye, ye e neshiivo. Ndele ou e nomhepo ya pama, ye omulumenhu e neendunge.” (Omayel. 17:27) Lalakanena okukala ho tambula ko omayele, okumona mo ouwa nopehe na okulipula unene konghedi omo a yandjwa. (Omayel. 1:8) Oshi li enangeko noupuna okukala u na ovadali ovaitaveli ovo ve hole shili Jehova. Ova halelela oku ku kwafela u findane ondjabi yomwenyo.

18. Omolwashike wa tokola toko okukala wa tala kondjabi?

¹⁸ Oshiwa okukala hatu diladila kondjabi itunhula oyo ye tu tu vikililwa kutya nee oyo ku ka kala nomwenyo ihau fi meulu ile onomwenyo waalushe moparadisa kombada yedu. Olo oli li eteelelo lashili, la udanekwa kOmushiti mwene. Kalunga okwa popya shi na sha nOparadisa kombada yedu a ti: “Edu alishe otali ka kala li yadi eshiivo lokushiiva Omwene.” (Jes. 11:9) Keshe umwe ta ka kala kombada yedu ota ka hongwa kuKalunga. Oyo oi li ondjabi yashili twa pumbwa okulalakanena. Onghee hano, kala to diladila kwaasho Jehova a udaneka noino efa nande osha shi ku imbe ondjabi.