1. Okwiimba ohaku tu kwafele tu ninge shike?

OMUTOTI umwe womaimbilo a shiivika nawa okwa ti: “Oitya ohai ku diladilifa. Omusika ohai pendula omaliudo oye. Ashike okwiimba eimbilo ohaku ku diladilifa nokupendula omaliudo oye, naasho ohashi ku kumu komutima.” Mbela ihatu kala tuu tu udite nawa ngeenge hatu tange nokuulika kutya otu hole Tate yetu womeulu, Jehova, moku mu imbila? Kutya nee ohatu imbi tu li ofye atuke ile tu li pamwe neongalo loshiwana shaKalunga, okwiimba oku li oshitukulwa shelongelokalunga la koshoka.

2, 3. (a) Vamwe otashi dulika va kale ve udite ngahelipi ngeenge tava imbi mokule pamwe neongalo? (b) Omapulo elipi hatu ka kundafana?

² Mbela oho kala u udite ngahelipi, ngeenge to imbi mokule pamwe neongalo? Mbela oho shi tale ko shififa ohoni? Momaputuko amwe, otashi dulika ovalumenhu hava mono shidjuu okwiimba moipafi yovanhu. Etaleko olo otali dulu okukuma eongalo alishe, unene tuu ngeenge ovo hava kwatele komesho ohava kongo omatomheno opo vaha imbe ile ve lipyakidile noinima imwe eshi eongalo tali imbi. — Eps. 30:12.

³ Ngeenge otwa tala ko shili okwiimba ku li oshitukulwa shelongelokalunga letu, itatu ka kala twa hala okuya pondje ile tu  kale tuhe po poshitukulwa osho shokwoongala kwetu. Onghee hano, keshe umwe womufye ne lipule kutya: ‘Mbela ohandi tale ko ngahelipi okwiimba pokwoongala kwetu? Ongahelipi handi dulu okufinda oumbada keshe oo tashi dulika u imbe nge ndi imbile Jehova nehafo? Oshike handi dulu okuninga po, opo ndi holole omaliudo eimbilo olo hatu imbi?’

4, 5. Opa li hapa ningwa omalongekido a tya ngahelipi e na sha nokwiimba melongelokalunga lomuIsrael shonale?

⁴ Ovapiya vaJehova ovadiinini ova kala hava longifa eemusika di li onghedi yoku mu hambelela. Eshi Ovaisrael vonale va li tava longele Jehova noudiinini, okwiimba okwa li haku dana onghandangala melongelokalunga lavo. Pashihopaenenwa, ohamba David oya li ya unganeka Ovalevi 4 000 va imbe omaimbilohambelelo pelongekido loilonga yotembeli. Mokati kavo omwa li ovanhu 288 “ovo va longwa okwiimbila Omwene ehambelelo.” — 1 Omaf. 23:5; 25:7.

⁵ Okudana omusika nokwiimba okwa li kwa dana onghandangala ya fimana peyapulo lotembeli. Ombiibeli oya ti: “Novashiki vomanghuma oivela novaimbi aveshe kumwe va hovela nondaka imwe okuhambelela nokupandula Omwene, ndele opo vo eshi va yelula ondaka pamwe nomanghuma oivela nomanghuma eembinga noishikomwa, va imba: ‘Hambeleleni Omwene,’ . . . oshinge shOmwene sha yadifa ongulu yaKalunga.” Osho kasha li tuu oshiningwanima tashi pameke eitavelo! — 2 Omaf. 5:13, 14; 7:6.

6. Hokolola okwiimba kwe likalekelwa oko kwa li kwa ningwa pefimbo lokupangela kwaNehemia eshi a li ngoloneya waJerusalem.

⁶ Eshi Nehemia a li ta kwatele komesho Ovaisrael ovadiinini mokutungulula ekuma laJerusalem, okwa li yo a unganeka nokulongekidila ovaimbi Ovalevi oishikomwa. Eshi ekuma olo la tungululwa la li tali yapulwa, eemusika de likalekelwa oda li da weda ko kehafo linene poshiningwanima osho. Pefimbo olo, opa li “eengudu mbali dinene dovaimbi.” Eengudu odo oda li da shakena kombada yekuma olo la li popepi notembeli opo omaimbilo a udike kokule. (Neh. 12:27, 28, 31, 38, 40, 43) Kape na omalimbililo, Jehova okwa li a hafa okuuda ovalongeli vaye tave mu imbile nehafo omaimbilohambelelo.

7. Ongahelipi Jesus a ulika kutya otwa pumbwa okukala hatu imbi melongelokalunga lopaKriste?

⁷ Eshi kwa totwa eongalo lopaKriste, eemusika oda twikila nokudana onghandangala ya fimana melongelokalunga lashili. Moufiku wa fimanenena mondjokonona yovanhu, konima eshi Jesus a dika po Ouvalelo wOmwene, ova li va imba omaimbilo. — Lesha Mateus 26:30.

8. Ongahelipi Ovakriste vomefelemudo lotete va tula po oshihopaenenwa shokwiimba melongelokalunga?

⁸ Ovakriste vomefelemido lotete ove tu tulila po oshihopaenenwa shokuhambelela Kalunga nomaimbilohambelelo. Nonande luhapu ova kala hava ongalele momaumbo, omalongelokalunga oo a li moitukulwa yavo kaa li e va ningifa va efe po ouladi wavo wokwiimbila Jehova. Omuyapostoli okwa lombwela ovamwaxe Ovakriste a ti: “Longafaneni, pukululafaneni . . . nomapsalome nomaimbilopandulo, nomalwiimbo opamhepo nokwiimbila Kalunga nokupandula momitima deni.” (Kol. 3:16) Omaimbilo oo e li membo letu leimbilo oku li shili ‘omalwiimbo opamhepo e nokwiimbwa nolupandu.’ Oku li oshitukulwa sheendja dopamhepo odo hadi di ‘komupiya omudiinini nomunaendunge.’ — Mat. 24:45.

9. (a) Oshike tashi dulika shi imbe vamwe okwiimbila Jehova nehafo pokwoongala nosho yo poyoongalele yetu? (b) Ongahelipi hatu dulu okwiimbila Jehova omaimbilohambelelo, noolyelye ve na okukwatela komesho? (Tala efano pehovelo loshitukulwa.)

⁹ Ongahelipi ngeenge okwiimba inaku lengwa moukwaneumbo, meputuko ile momudingonoko weni? Molwaashi ope na oinima yopauteknologi, otashi dulika ho hafele okupwilikina kovaimbidingi vomounyuni. Ashike, otashi dulika u kale wa fya ohoni ile wa nyemata ngeenge to yelekanifa ewi loye nomawi oo ho udu komalihafifo omounyuni. Ndele osho inashi ku imba okwiimbila Jehova omaimbilohambelelo. Ponhele yaasho, kwata eimbilo loye we li yelula, yukililifa omutwe woye, ndele to imbi tashi di komutima. (Esra 3:11; lesha Epsalme 147:1.) Kunena, mOmalupale Ouhamba mahapu, oitya yomaimbilo ohai ulikwa ko-screen, naasho ohashi tu kwafele tu imbe mokule. Oshididilikwedi yo eshi ovakulunhuongalo navo hava imbi omaimbilo Ouhamba kOfikola yOukalele wOuhamba. Osho otashi ulike kutya ovakulunhuongalo ova pumbwa okukwatela komesho okwiimba meongalo.

10. Oshike tu na okudimbuluka ngeenge oumbada otau tu imbi tu imbe mokule?

¹⁰ Oshinima shimwe osho hashi ningifa ovanhu vahapu vaha imbe newi lopombada osho oumbada. Oumbada otau dulu oku ku ningifa uha fikame nawa ile u kale udite to pukifa vamwe. Ashike natu kaleke momadiladilo kutya ngeenge hatu popi, “atushe ohatu puka luhapu.” (Jak. 3:2) Ndele, osho ihashi tu imbi okupopya. Onghee hano, inatu efa nande omawi etu inaa wanenena e tu imbe tu imbile Jehova omaimbilohambelelo.

11, 12. Omaetepo amwe elipi tae tu kwafele tu xwepopaleke okwiimba kwetu?

¹¹ Otashi dulika tu kale twa tila okwiimba molwaashi katu shii naanaa nghee tu na okwiimba. Ashike ohatu dulu okuxwepopaleka  okwiimba kwetu mokutula moilonga omaetepo amwe. *

¹² Oto dulu okulihonga okwiimba nawa u nomukumo nosho yo newi lopombada mokukala ho fuda nawa. Ngaashi ashike olusheno hali yandje eenghono kokabiena, okufuda nako ohaku nghonopaleke ewi loye ngeenge to popi ile to imbi. Oto dulu okwiimba mokule ngaashi ho popi ile nokuli shi dulife po. (Tala omaetepo taa hangwa membo Mona ouwa mOfikola yOukalele woPauteokratika, pepandja 181 fiyo 184, koshi yoshipalanyole, “Lihonga okukala ho fuda nawa.”) Shi na sha nokwiimba omaimbilohambelelo, Omishangwa otadi ladipike ovalongeli vaJehova va imbe va ‘nyakukwa.’ — Eps. 33:1-3.

13. Yelifa nghee hatu dulu okwiimba tu na omukumo.

¹³ Pefimbo lelongelokalunga loukwaneumbo ile nokuli pekonakono lopaumwene, kendabala okuninga ngaha: Hoolola eimbilo limwe lomomaimbilo oo u hole unene membo letu lomaimbilo. Lesha oitya mokule newi la kola nou na omukumo. Fuda lumwe aluke to popi eendjovo adishe odo di li metumbulo limwe newi la faafana. Opo nee imba etumbulo olo monghedi ya faafana. (Jes. 24:14) Ewi loye lokwiimba otali ka kala li li pombada, naasho oshi li oshinima shiwa. Ino efa li ku tilife ile li ku fife ohoni.

14. (a) Ongahelipi okupatulula okanya ketu ka pwa ko haku tu kwafele shi na sha nokwiimba? (Tala oshimhungu “ Nghee to dulu okuxwepopaleka okwiimba.”) (b) Omaetepo e na sha nokufinda oupyakadi wewi elipi wa mona taa longo?

¹⁴ Ito ka kala to imbi nawa ngeenge ino patulula okanya koye. Eetepo limwe ololo kutya patulula okanya koye ka pwa ko shi dulife ngeenge to popi. Ou na okuninga po shike ngeenge ou udite kutya ou na ewi li li pedu ile li li pombada unene? Oto dulu okumona omaetepo taa longo e na sha nomaupyakadi oo membo, Mona ouwa mOfikola yOukalele woPauteokratika, pepandja 184, moshimhungu, “Nghee to dulu okufinda omaunghundi onhumba.”

15. (a) Pokwoongala kwokomudo kwomo 2016, opa li pa ningwa eshiivifo lashike? (b) Omolwashike pwa nyanyangidwa embo leimbilo lipe?

¹⁵ Mo 2016, opa li ehafo linene pokwoongala kwokomudo kwehangano lo-Watch Tower Bible and Tract Society of Pennsylvania, eshi omumwatate Stephen Lett wOlutuwiliki a li a shiivifa kutya embo leimbilo lipe li na oshipalanyole, ‘Imbileni Jehova nehafo,’ otali ka longifwa mafiku pokwoongala. Omumwatate Lett okwa li a popya shi na sha nomalunduluko oo a ningwa meimbilo lipe kutya okwa ningwa netomheno opo li kale metwokumwe no-New World Translation of the Holy Scriptures oyo ya pepalekwa. Osha li tashi pula mu kufwe ile mu lundululwe oitya oyo inai longifwa vali mOmbiibeli oyo. Shikwao vali, omaimbilo mape e na sha noilonga yetu yokuudifa nosho yo omaimbilo oo taa ulike olupandu letu li na sha nekulilo nao okwa kwatelwa mo. Natango, molwaashi okwiimba oku li oshitukulwa sha fimana shelongelokalunga letu, Olutuwiliki ola li la hala okunduluka po embo li na ongushu noshipeko sha faafana no-New World Translation oyo ya pepalekwa.

16, 17. Omalunduluko elipi a ningwa membo leimbilo lipe?

¹⁶ Opo embo leimbilo ‘Imbileni Jehova nehafo’ li kale lipu okulongifwa, omaimbilo okwa unganekwa she likolelela koikundafanwa. Pashihopaenenwa, omaimbilo 12 otete otaa popi shi na sha naJehova, nomaimbilo 8 oo a shikula ko otaa popi shi na sha naJesus nosho yo ekuliloyambo. Pashihopaenenwa, ope na oikundafanwa oyo tai ku kwafela ngeenge to hoolola eimbilo loshipopiwa shomoipafi.

¹⁷ Opo shi kwafele keshe umwe a imbe tashi di komutima, oitya imwe yomaimbilo oya pepalekwa opo omadiladilo a kale e na eityo. Omaimbilo amwe nao okwa pepalekwa opo a kale taa tu kumwe nokwoongala nosho yo noukalele. Pashihopaenenwa, eimbilo loshipalanyole “Kala wa wanenwa keeshali diwa odo Kalunga e tu pa” ola lundululwa ndele tali ningi ‘Okuhonga Eendjovo daKalunga.’

18. Omolwashike twa pumbwa okukala tu shii omaimbilo oo e li membo letu leimbilo? (Tala eshangelo lopedu.)

¹⁸ Omaimbilo mahapu oo e li membo ‘Imbileni Jehova nehafo’ oku li monghedi yeilikano. Oto dulu okulombwela Jehova omaliudo oye to longifa omaimbilo oo. Omaimbilo amwe otae tu kwafele tu twafane omukumo “mohole nomoilonga iwa.” (Heb. 10:24) Otwa halelela okukala tu shii eengovela, omungengulilo nosho yo oitya yomaimbilo etu. Oto dulu okuninga ngaho mokukala ho pwilikine komaimbilo oo a imbwa, oo e li ko-jw.org. Ile oto dulu yo okulideula okwiimba omaimbilo oo keumbo, opo u dule oku a imba u nomukumo nosho yo tashi di komutima. *

19. Ongahelipi aveshe ovo ve li meongalo tava dulu okukufa ombinga mokulongela Jehova?

¹⁹ Dimbuluka kutya okwiimba oku li oshitukulwa sha fimana shelongelokalunga letu. Oku li onghedi ya denga mbada yokuulikila Jehova ohole nolupandu letu. (Lesha Jesaja 12:5.) Ngeenge to imbi nehafo mokule, oto tu yo vamwe omukumo navo va imbe nomukumo. Momaongalo aeshe, ovanyasha, ovakulunhu naavo ve na ohokwe otava dulu okukufa ombinga monghedi oyo yokulongela Jehova. Onghee hano, ino kala wa tila okwiimba. Ponhele yaasho, dulika keendjovo domupsalme odo tadi ti: “Imbileni Omwene.” Heeno, natu imbileni Jehova nehafo. — Eps. 96:1.