ALLEN okwa ti: “Onda li nda tila okutembukila ko. * Kanda li ndi shii ngeenge oha ndi ka mona ngoo ookaume ile ohandi ka tambulwa ko.” Allen ota ikilile meongalo lipe olo li li kokule neumbo lavo eekilometa 1 400.

Ngeenge owa tembukila keongalo limwe li lili, otashi dulika naave ho kala wa tila. Oshike tashi dulu oku ku kwafela u li ikilile? Oshike to dulu okuninga po ngeenge otashi pula u ninge omalunduluko oo ito dulu okuninga? Shimwe vali, ngeenge ove ito tembuka, ongahelipi to dulu oku shi ninga shipu kwaavo opo va tembukile meongalo leni?

Diladila koshihopaenenwa eshi: Pefimbo opo omiti opo da twikululwa ohadi kala da lemba. Luhapu omidi dihapu domuti ohadi tetelwa medu eshi tau fudulwa mo, opo shi shi ningife shipu oku u humbata. Konima eshi wa twikwa, ohau hovele diva okumena omidi dipe. Sha faafana, okutembukila keongalo limwe otaku dulu oku ku etela ostresa. Meongalo loye likulu, owa li wa menena mo “omidi” eshi wa li u na mo ookaume vawa nowa kala we lipyakidila nokulongela Jehova pandjikilile. Paife ou na okumena omidi dipe opo u ikilile meongalo lipe. Oshike tashi ke ku kwafela u ninge ngaho? Tula moilonga omafinamhango Ombiibeli. Natu ka kundafaneni amwe omuo.

Omunhu oo ha lesha Eendjovo daKalunga pandjikilile oku li “ngaashi omuti, ou wa twikwa pomatondokelo omeva ndele tau imifa oiimati yao pefimbo lao, nomafo ao ihaa lembe. Naashishe eshi ta ningi, osha fewa.” — Eps. 1:1-3.

Ngaashi ashike omuti hau nane omeva medu pandjikilile opo u kale nomwenyo, Omukriste naye oku na okulipalula pandjikilile nEendjovo daKalunga opo a kale a pama pamhepo. Onghee hano, twikila okulesha Ombiibeli efiku keshe, nokukala ho i kokwoongala pandjikilile. Kala ho ningi elongelokalunga loukwaneumbo pandjikilile nosho yo ekonakono lopaumwene. Keshe osho wa li ho ningi nale keongalo loye likulu opo u kale ke po ekwatafano la kola naJehova, owa pumbwa yo okutwikila oku shi ninga meongalo loye lipe.

“Nomuhekeleki wovakwao ota hekelekwa yo ye mwene.” — Omayel. 11:25.

Oto ka kala wa pama noto ka ikilila diva ngeenge owa kala ho kufa ombinga pauyadi moukalele. Kevin, omukulunhuongalo, okwa ti: “Osho she tu kwafela unene nomukulukadi wange otwa li twa kufa oukwafelikokolindjila konima ashike e shi twa fika keongalo letu lipe. Otwa li twa shiiva diva ovamwatate, ovakokolindjila noshitukulwa.” Roger, oo a tembukila koshitukulwa shi li kokule naapo a li hadi eekilometa 1 600, okwa ti: “Onghedi ya denga mbada yokwiikilila meongalo lipe okukala ho i moukalele luhapu ngaashi tashi dulika. Natango, shiivifila ovakulunhuongalo kutya oto dulu okukwafela monghedi keshe, ngaashi okuwapaleka Olupale lOuhamba, okuliyamba u ninge ko koshitukulwa shokwoongala ile okutwaalela vamwe kokwoongala ngeenge ou na osheendifo. Ovamwatate novamwameme ngeenge ova mono kutya meongalo omwe uya omunhu mupe e na omhepo yeliyambo, ohave mu tambula ko noupu.”

“Mbwalangadjeni.” — 2 Kor. 6:13.

Mbwalangadjekeni ohole yeni yokuhola ovamwaxo. Konima eshi Melissa noukwaneumbo wavo va tembukila keongalo lipe, ova kala tava yandje elitulemo kokupanga oukaume. Okwa ti: “Otwa kala hatu popi nakeshe umwe mOlupale lOuhamba komesho nokonima yokwoongala. Osho oshe tu kwafela tu kale hatu kundafana  navo ponhele ashike yoku va popifa ngahenya.” Osho osha li yo sha kwafela oukwaneumbo oo u lihonge diva omadina ovanhu meongalo. Shikwao vali, ova li va mbwalangadja eshi va kala hava yakula vamwe, naasho osha li sha pameka oukaume wavo. Okwa weda ko vali a ti: “Otwa li twe li pa eenomola detu deengodi opo tu dule okumonika nokukwatelwa moinima i na sha neongalo nosho yo momalipyakidilo vali amwe.”

Ngeenge owa wililwa po kokushakena novanhu vape, oto dulu okuhovela okukala ho popi navo. Pashihopaenenwa, oto dulu okulimemesha nonande ku udite wa hala. Okulimemesha otaku ka nanena vamwe kwoove. Komesho yaaishe, “omesho taa vilima, otaa hafifa omutima.” (Omayel. 15:30) Rachel, oo a tembukila kokule naapo a kulila, okwa ti: “Onda kala ndi na eehoni. Omafimbo amwe onda li handi kendabala okupopya novamwatate novamwameme meongalo lange lipe. Onda li handi tale mOlupale lOuhamba omunhu oo e li omutumba, itaa popi novanhu. Omunhu oo otashi dulika e na eehoni ngaashi ashike ame.” Omolwashike ito litulile po elalakano lokukala ho popi nomunhu oo mupe komesho ile konima yokwoongala keshe?

Shimwe vali, otashi dulika u kale wa hafa okushakena novanhu vape oivike inini yopehovelo. Ashike okukala u “mupe” otaku dulu okuxula po eshi efimbo tali piti po. Pomhito opo, otashi dulika wa pumbwa okutwikila okupanga oukaume navamwe.

Omiti dimwe ohadi kufa efimbo lile opo di twame omidi momudingonoko u pe. Sha faafana, haaveshe hava ikilile meongalo lipe monghedi ya faafana. Ngeenge owa tembuka nale pa pita efimbo ndele natango oto kendabala okwiikilila, oto dulu okukwafelwa mokutula moilonga omafinamhango Ombiibeli aa:

“Mokulonga ouwa inatu lolokeni, osheshi efimbo ngeenge la fiki, ohatu ka teya yo, ngeenge itatu loloka.” — Gal. 6:9.

Efa pa pite efimbo lihapu u ikilile shi dulife pwaasho wa teelela. Pashihopaenenwa, ovatumwa vahapu ovo va deulwa kofikola yaGilead ohava ka longa koilongo ihe fi yavo eedula donhumba ofimbo inava shuna koshilongo shavo va ka talele po. Okuninga ngaho, ohashi va kwafele va shiivafane novamwatate vomoshitukulwa nokwiikilila omaputuko a yoolokafana.

Alejandro, oo a tembuka lwoikando, oku shii kutya onghalo yokwiikilila itai dulu okweendelelifwa. Okwa ti: “Konima eshi twa tembuka oshikando sha xuunina, omukulukadi wange okwa ti, ‘Ookaume kange aveshe ove li keongalo letu likulu.’” Okwa li e mu dimbulukifa kutya okwa li a popya naanaa oshinima sha faafana naasho a li a popya omido mbali da pita, oshikando shaxuuninwa osho va li va tembuka. Ashike momukokomoko womido odo mbali, okwa li a ulika ohokwe muvamwe nokwa li a panga oukaume wopofingo naavo a li ehe shii nale.

“Ino tya: “Omolwashike hano omafiku onale a li mawa e dule aa opaife?” Osheshi ito shi pula neendunge!” — Omuud. 7:10.

Henuka okuyelekanifa eongalo loye lipe naalo likulu. Pashihopaenenwa, ovamwatate meongalo loye lipe otashi dulika va kale va mwena unene ile hava popi unene shi dulife osho wa li wa ikilila. Yandja elitulemo komaukwatya avo mawa, ngaashi ashike wa hala ve ku ningile. Ovo vape ohava ka mona kutya okutembuka okwe va ningifa ve lipule kutya ‘Mbela ondi hole ngoo shili “ovamwatate” aveshe?’ — 1 Pet. 2:17.

“Indileni, ndele tamu pewa.” — Luk. 11:9.

 Twikila okwiilikana u kwafelwe. David, omukulunhuongalo, okwa ti: “Ino kendabala okulididimika kwoove mwene. Oinima ihapu ohatu dulu ashike oku i ninga kekwafo laJehova. Ilikana kombinga yasho.” Rachel, oo a tumbulwa metetekelo, okwe shi dimina. Okwa ti: “Ame nomushamane wange ngeenge otu udite twa fa tuhe li oshitukulwa sheongalo, ohatu ilikana kuJehova hatu popi oshinima osho kondadalude, hatu ti: ‘Tu kwafela tu mone ngeenge ohatu ningi oshinima osho tashi shi ningifa shidjuu kuvamwe va ehene kufye.’ Opo nee, ohatu kendabala okukala efimbo lile novamwatate novamwameme.”

Ovadali, ngeenge ovana veni otava kendabala okwiikilila mo, kongeni efimbo mu ilikane pamwe navo kombinga yoshinima osho. Va kwafeleni va pange oukaume mokukala hamu vape omhito yokweendafana novanhu ovo tave va tungu.

Oshike to dulu okuninga opo u kwafele ovo opo va tembukile meongalo leni? Kendabala okukala kaume kashili okudja pehovelo. Opo u ninge ngaho, kendabala okudiladila oinima oyo ngeno to ka hafela eshi opo we uya meongalo, ndele to i ningi. (Mat. 7:12) Mbela ovo vape itava dulu oku mu waimina pelongelokalunga loukwaneumbo ile mu tale navo oprograma yokomwedi yo-JW Broadcasting? Mbela ito dulu oku va shiva mu ka longe pamwe navo moukalele? Ngeenge owa li pamwe navo, otava ka kala hava dimbuluka nghee wa li we va yakula. Ongahelipi to dulu vali okukwafela ovo vape?

Carlos okwa ti: “Eshi twa fika meongalo letu lipe, omumwameme umwe okwe tu pa omusholondodo weefitola odo hadi landifa oinima kombilixa. Osho osha li she tu kwafela neenghono.” Ovo va dja koitukulwa ku na onghalo yomhepo ya yooloka ko kwaayo yomoshitukulwa sheni, otava ka kala va hafa okulihonga nghee ve na okudjala pefimbo loupyu, loutalala ile lodula. Oto dulu yo oku va kwafela va kale ve lipyakidila unene moukalele moku va lombwela ondjokonona yomomudingonoko ile moku va yelifila omaitavelo omalongelokalunga omoshitukulwa.

Allen, oo a tumbulwa pehovelo, okwa kala meongalo laye lipe oule wodula. Okwa ti: “Potete onda li ndi na okukendabala okushiiva ovamwatate novamwameme. Ashike paife onda hafa, nondi udite ndi li oshitukulwa shoukwaneumbo wavo.” Allen okwa mona kutya eshi a tembuka ina kanifa nande ookaume. Ponhele yaasho, okwa mona ookaume vape, ovo a tala ko kutya ove li ookaume kaye fiyo alushe.