1, 2. Ohatu lihongo okuninga shike eshi hatu kulu pamhepo? Shi yelifa.

NATU tye nee ngeno okaana kanini oka pewa oshali. Ovadali vako ove ka lombwela kutya, “To ti tangi.” Okaana oka dulika, nonande inashi dja komutima. Eshi taka ende ta ka kulu, otaka kulike olupandu li na sha netaleko lovadali vako nosho yo okunakonasha navamwe. Paife ohaka pandula vamwe nehalo liwa tashi di komutima. Omolwashike? Omolwaashi oka kulika oukwatya wolupandu.

² Sha faafana, eshi twa mona eshiivo loshili, otwe lihonga nghee sha fimana okudulika koiteelelwa yaJehova. Ndele eshi hatu twikile okukula pamhepo, ohatu lihongo shihapu shi na sha nokudiladila metwokumwe nomadiladilo aJehova, osho e hole, osho e tonde nosho yo nghee ha tale ko oinima ya yoolokafana. Eshi hatu lihongo okukala hatu tale ko oinima ngaashi Jehova nosho yo okweefa etaleko laye li nwefe mo eenghatu nomatokolo etu, kungaho ohatu ulike kutya otwa hala omadiladilo etu a kale metwokumwe nomadiladilo aye.

3. Omolwashike okukaleka omadiladilo etu metwokumwe nomadiladilo aJehova taku dulu okukala eshongo?

³ Nonande okukaleka omadiladilo etu metwokumwe nomadiladilo aJehova ohaku eta ehafo, otaku dulu okukala eshongo. Omafimbo amwe, okuhawanenena kwetu otaku dulu oku tu piyaaneka.  Pashihopaenenwa, otashi dulika shi kale shidjuu okuuda ko etaleko laJehova li na sha noukoshoki wopaenghedi, oinima yopamaliko, oilonga yokuudifa, elongifonai lohonde, ile moshinima shimwe vali. Mbela oshike hatu dulu okuninga po? Ongahelipi hatu dulu okutwikila okuninga exumokomesho mokukaleka omadiladilo etu metwokumwe nomadiladilo aKalunga? Nongahelipi okuninga ngaho taku dulu okukuma eenghatu detu paife nosho yo monakwiiwa?

4. Oshike sha kwatelwa mo melondwelo laPaulus olo tali ti: “Shitukeni vape momadiladilo eni”?

⁴ Lesha Ovaroma 12:⁠2. Omuyapostoli Paulus okwa yelifa kutya oshike sha kwatelwa mo mokukala tu na etaleko la fa laJehova. Oshitukulwa sha tetekela oshe tu kwafela tu mone kutya ngeenge inatu hala okukala twa “faafana nounyuni ou,” otu na okuhenuka okukala tu na etaleko nosho yo oikala younyuni. Ndele Paulus okwa popya natango kutya omolwashike twa pumbwa ‘okushituka vape momadiladilo etu.’ Osho osha kwatela mo okukonakona Eendjovo daKalunga nelalakano lokushiiva etaleko laye, okudilonga kudo nosho yo okukala tu na etaleko la fa laye.

5. Yelifa eyooloko pokati kokulesha ashike shimha to lesha nokukonakona.

⁵ Okukonakona oku dule filufilu okulesha ashike shimha to lesha, nokwa kwatela mo shihapu shihe fi ashike okutofa mo omanyamukulo omapulo okukonakonwa. Ngeenge hatu konakona, ohatu konakona kutya oshikundafanwa otashi tu hongo shike kombinga yaJehova, eendjila daye nosho yo etaleko laye. Ohatu kendabala okuuda ko kutya omolwashike Kalunga a tula po omalombwelo onhumba nomolwashike a tokola oinima imwe. Ohatu diladila yo kutya omalunduluko elipi twa pumbwa okuninga monghalamwenyo yetu nomeenghatu detu. Nonande oitwa aishe oyo kai na okukonakonwa pefimbo limwe, ohatu mono ouwa eshi hatu longifa efimbo olo tu dilonge nolupandu kwaasho twa lesha. — Eps. 119:​97; 1 Tim. 4:⁠15.

6. Oshike hashi ningwa po ngeenge hatu dilonga kEendjovo daJehova?

⁶ Ngeenge ohatu dilonga pandjikilile kEendjovo daKalunga, ohapa ningwa oshinima shimwe osho shitunhula. Ohatu shiiva nohatu kala twa tomhwa kutya etaleko laJehova moinima ola yuka. Ohatu hovele okutala ko oinima ngaashi ye he i tale ko, nohatu kala metwokumwe netaleko la tya ngaho. Omadiladilo etu ohaa ‘shituka ape,’ nohatu kulike etaleko la yuka. Eshi hatu ningi exumokomesho, ohatu kala tu na etaleko la fa laJehova.

7, 8. (a) Jehova oha tale ko ngahelipi oinima yopamaliko? (Tala omafano pehovelo loshitukulwa.) (b) Ngeenge otwa kala tu na etaleko la fa laye, oshike hatu ka pitifa komesho?

⁷ Inatu fika pexulifodiladilo kutya etaleko oshinima ashike shopamadiladilo. Omadiladilo neenghatu ohai longele kumwe. (Mark. 7:​21-23; Jak. 2:​17) Ohatu ka kulika olupandu ngeenge otwa konakona oihopaenenwa yonhumba. Pashihopaenenwa, Omavangeli okwe tu pa ouyelele wa yela u na sha nanghee Jehova ha tale ko oinima yopamaliko. Kalunga okwa li a hoolola ovadali vopanhu ovo va li tava ka tekula Omona waye, ovalihomboli ovo va li ve na onghalamwenyo i li paunafangwa. (Lev. 12:⁠8; Luk. 2:​24) Eshi Jesus a dalwa, Maria okwe mu “nangeka mepeta lokulila oimuna, osheshi inava mona onhele mongulu yovaenda.” (Luk. 2:⁠7) Ngeno Jehova okwa li a hala, ngeno okwa ninga po sha opo a longekide onhele i li nawa omo mu dalelwe Omona waye. Ndele nande ongaho, osho sha li shi na oshilonga kuYe, omudingonoko wopamhepo omo Jesus a li ta ka filwa oshisho nokutekulilwa.

⁸ Shi na sha nehokololo lopaMbiibeli olo li na sha nokudalwa kwaJesus, ohatu dulu okukulika  olupandu langhee Jehova ha tale ko oinima yopamaliko. Ovadali vamwe ohava komangele ovana vavo oinima iwa yopamaliko, nonande osho otashi tula moshiponga oupamhepo wavo. Jehova okwa tala ko oinima yopamhepo oyo unene ya fimana i dulife keshe shimwe. Mbela owa kulika ngoo etaleko la fa laJehova? Eenghatu doye ohadi holola shike? — Lesha Ovaheberi 13:⁠5.

9, 10. Ongahelipi hatu dulu okuulika kutya ohatu ulike etaleko la fa laJehova li na sha nokupundukifa vamwe?

⁹ Oshihopaenenwa vali shimwe oshi na sha netaleko laJehova li na sha nokupundukifa vamwe. Jesus okwa ti: “Naau ta hongaula umwe waava vanini va itavela nge, oshiwa kuye, a mangelwe emanya loshini mofingo yaye, ye a ekelwe mefuta.” (Mark. 9:​42) Eendjovo odo otadi holola omaliudo omoule. Molwaashi Jesus okwa li a kulika omaukwatya a fa aXe, ohatu dulu okukala noushili kutya Jehova oha udile nai ovo eenghatu davo hadi pundukifa vamwe vomovashikuli vaJesus. — Joh. 14:⁠9.

¹⁰ Mbela ohatu ulike ngoo etaleko la fa laJehova naJesus? Mbela otu na ngoo etaleko la fa lavo? Eenghatu detu ohadi holola shike? Pashihopaenenwa, natu tye nee ngeno otwa nanwa konghedi yonhumba i na sha nokudjala ile nokuliwapeka oko haku udifa nai vamwe meongalo ile haku pendula omahalo inaa koshoka momadiladilo avamwe. Mbela ohole yetu yokuhola ovaitaveli vakwetu otai ke tu linyengifa ngoo tu henuke onghedi oyo yokudjala nokuliwapeka? — 1 Tim. 2:​9, 10.

11, 12. Ongahelipi okukulika etaleko la fa laKalunga li na sha nowii nosho yo okukala nelipangelo haku tu amene tuha longe owii?

¹¹ Oshihopaenenwa oshititatu: Jehova oku tonde oukolokoshi. (Jes. 61:⁠8) Molwaashi oku shii kutya otu na omahalo a puka omolwoulunde oo twa fyuulula, okwe tu kumaida tu kale tu tonde oukolokoshi. (Lesha Epsalme 97:​10.) Okudilonga kutya omolwashike Jehova e tonde owii otaku ke tu kwafela tu kale tu na etaleko la fa laye, notashi ketu pameka tu kondjife owii.

¹² Okukulika etaleko la fa laJehova li na sha noukolokoshi otaku ke tu kwafela tu kale hatu didilike mo oilonga yonhumba ya puka, nonande inai tumbulwa kondadalunde mEendjovo daKalunga. Pashihopaenenwa, okundanisha to lixu komatundji aumwe oku li onghedi inai koshoka oyo tai ende tai tandavele mounyuni. Vamwe otashi dulika ve lipopile ngeenge tashi uya pelihumbato la tya ngaho nokutomhafana kutya inali kwatela mo omilele. * Ndele mbela eenghatu da tya ngaho odi li ngoo metwokumwe netaleko laKalunga, oo e tonde owii woludi keshe? Natu kale kokule nowii mokukulika elipangelo nosho yo okukala tu tonde osho Jehova e tonde. — Rom. 12:⁠9.

13. Omolwashike twa pumbwa okudiladila komesho yefimbo kunghee etaleko laJehova tashi dulika li ka kume omatokolo etu omonakwiiwa?

¹³ Eshi hatu konakona, oshiwa okudiladila komesho yefimbo kutya Jehova otashi dulika a ka tale ko ngahelipi eenghalo donhumba omo tashi dulika tu ke lihange monakwiiwa. Kungaho, ngeenge otwe ke lihanga monghalo oyo tai pula tu ninge etokolo meendelelo, itatu ka kala tuhe shii osho tu na okuninga po. (Omayel. 22:⁠3) Natu ka konakoneni oihopaenenwa imwe yopaMbiibeli.

14. Oshike hatu lihongo kuJosef eshi a li a anya omaheka omukulukadi waPotifar?

¹⁴ Eshi Josef a li a anya divadiva omaheka omukulukadi waPotifar, okwa li a ulika kutya  oku na etaleko la fa laJehova li na sha nokukala omudiinini mohombo. (Lesha Genesis 39:​8, 9.) Shikwao vali, eshi a nyamukula omukulukadi waPotifar a ti: “Ndi dule ngahelipi okuninga owii u fike opo nokunyona kuKalunga?” okwa li a ulika kutya okwa kulika etaleko la fa laKalunga. Ongahelipi shi na sha nafye? Natu tye nee ngeno omunailonga pamwe naave okwa hovela okulihumbata monghedi oyo tai pendula omahalo opamilele. Ile ongahelipi ngeenge owa tuminwa omatumwalaka ile omafano oo taa pendula omahalo opamilele koshikwaelektronika shoye? * Otashi ka kala shipu oku shi henuka ngeenge otwa diladila nale notwa kulika etaleko la fa laJehova moshinima sha tya ngaho notwa tokola komesho yefimbo kutya oshike hatu ka ninga po.

15. Ngaashi Ovaheberi vatatu, ongahelipi hatu dulu okukondjifa omafininiko okweefa po oudiinini wetu kuJehova?

¹⁵ Diladila vali koshihopaenenwa shOvaheberi vatatu Sadrak, Mesak naAbednego. Okwaanya kwavo okulinyongamena oshitelekwafano shoshingoldo osho sha li sha dikwa kohamba Nebukadnesar nosho yo eshi va nyamukula ohamba ova ulika kutya ova kala nale va diladila kutya oshike sha kwatelwa mo mokukala omudiinini kuJehova. (Ex. 20:​4, 5; Dan. 3:​4-6, 12, 16-18) Natu tye nee ngeno omuyandji woye woilonga okwe ku pula u yambidide pashimaliwa oshivilo osho shi na ekwatafano nelongelokalunga loipupulu. Oshike to dulu okuninga po? Ponhele yokukala wa teelela eenghalo odo di holoke po, omolwashike ito diladila paife kutya Jehova okwa tala ko ngahelipi oinima ya tya ngaho? Opo nee onghalo keshe tai ka holoka po, otashi ka kala shipu kwoove okuninga po sha nokupopya osho sha yuka, ngaashi Ovaheberi vatatu va li va ninga.

16. Ongahelipi okushiiva filufilu etaleko laJehova taku dulu oku tu kwafela tu lilongekidile ounamiti wopaulumomhumbwe?

¹⁶ Okudiladila komesho yefimbo shi na sha nokukala omudiinini otaku dulu yo okukala ekwafo linene monghalo i na sha nounamiti wopaulumomhumbwe. Molwaashi otwa tokola toko okuhatulwa ohonde aishe ile oitukulwa yohonde inene inhe, omilandu dimwe odo da kwatela mo ohonde otadi pula etokolo lomunhu ye mwene la kanghamena komafinamhango Ombiibeli oo taa ulike etaleko laJehova. (Oil. 15:​28, 29) Inatu pumbwa okuninga omatokolo moinima oyo ngeenge  tu li moshipangelo, tashi dulika hatu yahama unene nosho yo ngeenge hatu fininikwa tu ninge omatokolo meendelelo. Paife olo efimbo lokuninga omapekapeko, okuyadeka eedokumende doye dopaunamiti to ulike osho wa hala shi ningwe, nokupopya nandokotola woye. *

17-19. Omolwashike sha fimana okulihonga nghee Jehova ha tale ko oinima paife? Yandja oshihopaenenwa shonghalo oyo twa pumbwa okulilongekidila.

¹⁷ Xuunina, diladila kunghee Jesus a li e linyenga komayele aPetrus a puka oo a li e mu pa eshi a ti: “Omwene, osho nashi ku kale kokule.” Osha yela kutya Jesus okwa hangwa a dilonga nale kwaasho Kalunga a li a hala a ninge nosho yo kombinga yomaxunganeko e na sha nonghalamwenyo yaye yokombada yedu nosho yo efyo laye. Eshiivo olo ola li la pameka etokolo laye lokukala omudiinini, okuyamba po omwenyo waye nopehe na oumbada. — Lesha Mateus 16:​21-⁠23.

¹⁸ Kunena, Kalunga okwa hala ovapiya vaye va pange oukaume naye nova kufe ombinga pauyadi moilonga yaye ngaashi tashi dulika. (Mat. 6:​33; 28:​19, 20; Jak. 4:⁠8) Ngaashi sha li sha ningilwa Jesus, ovanhu ovo ve na eendodo donhumba otashi dulika va kendabale oku tu efifa po oshili. Pashihopaenenwa, ongahelipi ngeenge omuyandji woye woilonga okwa hala oku ku yelaayela opo u kale ho mono ondjabi ya ondoka lela, ndelenee ondodo oyo otai ka ya moshipala omalipyakidilo oye opamhepo? Ile ngeenge ou li mofikola, natu tye nee ngeno owa pewa omhito yokufiya po eumbo opo u mone ehongo la wedwa po. Mbela pomhito oyo opo wa pumbwa okwiilikana nokuninga omapekapeko, okupopya novapambele nosho yo tashi dulika novakulunhuongalo, opo nawa u ninge etokolo? Omolwashike ito lihongo nghee Jehova ha tale ko oinima ya tya ngaho paife, ndele to kendabala okukala ho tale ko oinima ngaashi ye? Nongeenge owa ka shakeneka onghalo ya tya ngaho, ito ka mona lela i li eyeleko kwoove. Owe litulila po omalalakano opamhepo, owa tokola nomutima aushe, naasho wa pumbwa okuninga paife okuwanifa po ashike etokolo olo wa ninga nale.

¹⁹ Oto dulu okudiladila keenghalo odo tashi dulika di holoke po ombaadilila. Oshoshili kutya itatu dulu okulilongekidila eenghalo keshe odo hatu diladila kutya otadi dulu okuholoka po. Ngeenge otwa kala hatu dilonga kunghee Jehova ha tale ko oinima pefimbo lekonakono letu lopaumwene, ohatu ka dimbuluka nohatu ka tula moilonga osho twe lihonga monghalo yokondadalunde omo tashi dulika tu ke lihange. Natu didilike nghee Jehova ha tale ko oinima, natu kale hatu tale ko oinima ngaashi ye nosho yo natu diladile nghee okukala tu na etaleko la fa laye taku kumu eenghatu detu paife nosho yo monakwiiwa.

20, 21. (a) Omolwashike hatu ka hafela emanguluko la yeleka mounyuni mupe? (b) Ongahelipi hatu dulu okumona ehafo la yeleka paife?

²⁰ Otwa teelela nodjuulufi ounyuni mupe. Vahapu vomufye otwa teelela oku ka kala nonghalamwenyo ihe na exulilo moparadisa kombada yedu. Koshi yepangelo lOuhamba, ovanhu otava ka kala va manguluka ko komaupyakadi oo taa dana onghandangala mounyuni ou. Nokuli okudja opo ovanhu otava ka twikila okukala ve na emanguluko. Keshe umwe otaka ninga omatokolo she likolelela kwaasho e hole unene naasho a hala.

²¹ Emanguluko la tya ngaho otali ka kala la ngabekwa. Shi na sha nokuninga osho shi li mondjila naasho sha puka, ovananheni otava ka wilikwa keemhango daJehova nosho yo keenghatu daye. Osho otashi ka kala shihafifa, notashi ka eta ehafo linene nosho yo ombili inene. (Eps. 37:​11) Paife, ohatu dulu okukala nehafo la yeleka eshi hatu kulike etaleko la fa laJehova.