Onda dalwa mo 1983. Onda kala ndi na oukolele okudja kounona wange, ashike eshi nda wanifa omido omulongo, onda li nda hakukilwa kouyahame olutu alishe. Konima yomido mbali lwaapo, onda li nda penduka efiku limwe itandi dulu okulinyenga. Nonande onda li handi kondjifa okulinyengifa omaulu ange kaali taa dulu okulinyenga. Okudja kefiku olo, inandi enda vali. Ouyahame wange owa li yo wa ningifa nge ndiha kule vali. Fiyo okunena, onda fa ashike okaana.

Konima yeemwedi dinini eshi nda hovela okuvela nokanda li vali handi di mo meumbo, onda li nda talelwa po kEendombwedi daJehova mbali. Luhapu ngeenge meumbo letu tamu uya ovanhu onda li handi hondama, ashike efiku olo onda li nda efa ovakainhu ovo va popye naame. Eshi va lombwela nge kombinga yoParadisa, osha dimbulukifa nge osho nda li nda uda eshi nda li ndi na omido nhano. Pefimbo opo, omutumwa wedina Jethro, oo a li ha kala muSuriname, okwa li ha talele po omukunda wetu lumwe momwedi nokwa li ha konakona natate. Jethro okwa li ha ungaunga naame nonghenda. Onda li ndi mu hole neenghono. Natango, tatekulu nameekulu ova li hava i naame kokwoongala kwEendombwedi oko kwa li haku ningilwa momukunda wetu. Eshi Florence, omukainhu umwe womuvo a pula nge ngeenge onda hala okulihonga shihapu, onda li nda dimina.

Florence okwa li a aluka pamwe nomushamane waye, Justus, nova li va hovela okukonakona Ombiibeli naame. Eshi va didilika kutya nghi shii okulesha, ova li va kwafela nge ndi lihonge okulesha. Okudja opo, omafimbo amwe onda li handi lesha ame mwene. Efiku limwe, ovalihomboli ovo ova lombwela nge kutya ova tuminwa va ka longele koSuriname. Shinyikifa oluhodi, mOrealla kamwa li va li oo a li ta dulu okutwikila okukonakona naame Ombiibeli. Ashike shihafifa, Jehova ina dimbwa nge.

Inapa pita olule, mOrealla omwa li mwe uya omukokolindjila wedina Floyd, nokwa li a shakena naame eshi a li ta udifa eumbo neumbo. Eshi a popya naame shi na sha nokukonakona Ombiibeli, onda li nde limemesha. Okwa pula nge a ti: “Omolwashike to limemesha?” Onde mu lombwela kutya onda konakona nale okambo Kalunga ota pula shike kufye? Nokwa li twa hovela okukonakona embo Eshiivo olo tali twala komwenyo waalushe. * Onda li nde mu yelifila kutya omolwashike inandi twikila vali okukonakona. Fye naFloyd otwa li twa mana ko okukonakona embo olo, ashike naye okwa li vali a tuminwa koshitukulwa shimwe shi lili. Kanda li vali ndi na oo ta konakona naame Ombiibeli.

 Kakele kaasho, mo 2004, ovakokolindjila vavali ve likalekelwa Granville naJoshua, ova li va tuminwa kOrealla. Ova li tava udifa eumbo neumbo nova li va shakeneka nge. Eshi va pula nge ngeenge onda hala okukonakona Ombiibeli, onde limemesha. Onda li nde va pula tu hovele okukonakona membo Eshiivo. Onda li nda hala ndi mone ngeenge otava ka honga nge ngoo oinima ya faafana naayo nda li nda hongwa kovahongi vange votete. Granville okwa li a lombwela nge kutya okwoongala ota ku ningilwa momukunda. Nonande kanda li nda dula okudja mo meumbo hanga oule womido omulongo, onda li nda hala okuya kokwoongala. Granville okwa li a tula nge mokatemba nokutwala nge kOlupale lOuhamba.

Lwanima, Granville okwa ladipika nge ndi ye mOfikola yOkudeula Ovaudifi. Okwa ti: “Nonande owa lemana oho dulu okupopya. Oto ka yandja oshipopiwa shomoipafi efiku limwe. Oto dulu oku shi ninga.” Eendjovo daye detwomukumo oda li da pameka nge.

Onda li nda hovela okuya moukalele pamwe naGranville. Ashike eendjila dihapu momukunda kada li diwa nokweenda okatemba. Onghee, onda pula Granville a undule nge mokatololi opo tu ende noupu. Onghendabala oyo oya li ya pondola. Onda li nda ninginifwa muAprili 2005. Diva konima yaasho, ovamwatate ova li va deulila nge okuungaunga noishangomwa yeongalo nosho yo noikwamawi yomOlupale lOuhamba.

Shinyikifa oluhodi, mo 2007, tate okwa li a fila moshiponga shombautu. Oukwaneumbo wetu owa li wa kumwa neenghono. Granville okwa li a ilikana pamwe nafye noku tu twa omukumo nomishangwa. Lwanima konima yomido mbali, otwa li twa wililwa po vali eshi Granville a fila moshiponga shombautu.

Eongalo letu linini, olo la li la nyika oluhodi kala li vali li na omukulunhuongalo, ndele omuyakuliongalo ashike umwe. Efyo laGranville ola kuma nge neenghono. Okwa li kaume kange kopofingo. Okwa li ha longo noudiinini opo a file oshisho eemhumbwe dange dopamhepo nosho yo dopalutu. Pokwoongalo oko kwa shikula efyo laye, onda li nda pewa oshinakuwanifwa shokulesha outendo vOshungonangelo yokukonakonwa. Eshi nda lesha ko outendo vavali vopetameko, onda hovela okulila, nomahodi okwa li ashike taa pololoka. Onghee, onda li nda dja ko komutune.

Onda ka kala ndi udite xwepo eshi ovamwatate vokomaongalo amwe ve uya oku tu kwafela kOrealla. Natango, oshitaimbelewa osha li she tu tumina omumwatate Kojo, oo a li omukokolindjila e likalekelwa. Shihafifa, meme nosho yo okandenge kange ova li va hovela okukonakona nova li va ningifwa. Opo nee, muMarsa 2015, onda li nda nangekwa po ndi li omuyakuliongalo. Mokweendelako kwefimbo, onda li nda yandja oshipopiwa shange shotete shomoipafi. Efiku olo onda li handi limemesha nokulila kehafo eshi nda dimbuluka eendjovo daGranville odo a lombwelele nge omido opo da di ko, a tile: “Efiku limwe, oto ka yandja oshipopiwa shomoipafi. Oto dulu oku shi yandja.”

Ko JW Broadcasting^®, onda mona ko oimoniwa yEendombwedi odo di li monghalo ya fa yange. Nonande ove na omangabeko, ohava pondola nova hafa. Naame onda mona kutya ohandi dulu okuninga oinima yonhumba. Onda kala nda hala okulongela Jehova shihapu ngaashi handi dulu, nomolwaasho nda tokola okuninga omukokolindjila wondjikilile. MuSeptemba 2019, onda li nda hangwa konghundana iwa oyo nda li inandi teelela. Omwedi oo, onda li nda nangekwa po ndi li omukulunhuongalo meongalo li na ovaudifi 40 lwaapo.

Onda pandula neenghono ovamwatate novamwameme ovo va konakona naame, nova kwafela nge ndi twikile noukalele. Komesho yaaishe, ohandi pandula neenghono Jehova eshi ina dimbwa nge.