1-2. Ongahelipi hatu dulu okutula moilonga omayele oo taa hangwa mOmayeletumbulo 4:25? Yandja oshihopaenenwa.

DILADILA koihopaenenwa tai shikula. Omumwameme Omukriste omunamido ta diladila koinima itunhula oyo a li a hafela monakudiwa. Nonande okwa taalela omashongo mahapu paife, ota twikile okuninga ngaashi ta dulu opo a longele Jehova. (1 Kor. 15:58) Efiku keshe oha kala e liwete e li pamwe novaholike vaye mounyuni mupe oo wa udanekwa. Omumwameme umwe ta dimbulukwa nghee a li a udifwa nai komwiitaveli mukwao, ashike ine mu kwatela onghone. (Kol. 3:13) Omumwatate ta dimbuluka omapuko aye omonakudiwa, ashike paife ota longele Jehova noudiinini. — Eps. 51:10.

² Mbela Ovakriste ovo vatatu oshike ve na sha faafana? Aveshe otava dimbuluka oinima oyo ya ningwa monakudiwa, ashike itava yandje unene elitulemo kuyo. Ndele ponhele yaasho, ‘omesho avo otaa tale a yukilila’ konakwiiwa. — Lesha Omayeletumbulo 4:25.

3. Omolwashike ‘omesho etu a pumbwa okutala a yukilila’ konakwiiwa?

³ Omolwashike sha fimana ‘omesho etu a tale a yukilila’ konakwiiwa? Ngaashi ashike omunhu itaa dulu okweenda a yukilila ngeenge ota tale konima, nafye itatu ka dula okulongela Jehova ngeenge otwa kala ashike hatu diladila konakudiwa. — Luk. 9:62.

4. Oshike hatu ka kundafana moshitukulwa eshi?

⁴ Moshitukulwa eshi ohatu ka kundafana eemwiyo dopatatu, odo tadi dulu oku tu ningifa tu kale ashike hatu diladila konakudiwa. * Eemwiyo odo: (1) okukala twa hala onghalamwenyo yetu i  kale ngaashi nale, (2) onghone nosho yo (3) okukala u udite unene ondjo. Monghalo keshe, ohatu ka tala nghee omafinamhango Ombiibeli taa dulu oku tu kwafela tu dimbwe “ei yokonima,” notu lalakanene “ei yokomesho.” — Fil. 3:13.

5. Omwiyo ulipi tau hangwa mOmuudifi 7:10, oo twa pumbwa okuhenuka?

⁵ Lesha Omuudifi 7:10. Didilika kutya ovelishe oyo inai popya kutya osha puka okupula kutya: “Omolwashike hano omafiku onale a li mawa?” Okudimbuluka oinima iwa oku li oshali ya dja kuJehova. Ponhele yaasho, ovelishe oyo oya ti: “Ino tya: ‘Omolwashike hano omafiku onale a li mawa e dule aa opaife?’” Osho osha hala okutya otwa pumbwa okukala twa lungama opo tuha yelekanife onghalamwenyo yetu yopaife nonghalamwenyo yetu yomonakudiwa. Etoloko limwe lOmbiibeli ola toloka ovelishe oyo la ti: “Ino pula kutya, ‘Hano omolwashike oinima ya li iwa pomafimbo onale?’ Epulo la tya ngaho ka li li pandunge.”

6. Omolwashike shihe li pandunge okudiladila kutya onghalamwenyo yetu yomonakudiwa oya li iwa? Yandja oshihopaenenwa.

⁶ Omolwashike shihe li pandunge okudiladila kutya onghalamwenyo yetu yomonakudiwa oya li iwa? Luhapu ngeenge hatu diladila konakudiwa ohatu diladila ashike unene koinima iwa oyo twa hafela. Ihatu diladila naanaa komaupyakadi oo twa li twa shakeneka. Pashihopaenenwa, diladila ashike koshiwana shaIsrael shonale. Konima eshi va dja muEgipiti, ova li va dimbwa diva oixuna oyo va li tava mono. Ponhele yaasho, ova li tava yandje elitulemo koikulya iwa oyo va li hava hafele. Ova ti: “Fye hatu dimbulukwa eeshi twe di lile ngaho muEgipiti noihenda yomatanga, omanuwa, ombidi, eenyanga nomakunde.” (Num. 11:5) Ndele mbela oikulya oyo ova li ashike have i li “oshali shamuhongi”? Ahowe. Ova li have i futile po noilonga idjuu; ova li hava kala tava findilwa kongudi eshi va li moupika waEgipiti. (Ex. 1:13, 14; 3:6-9) Onghee hano, ova li va dimbwa diva oilonga idjuu oyo va li hava longifwa, nova li va hala okushuna konakudiwa. Ova li tava yandje elitulemo “koinima iwa” yomonakudiwa, ponhele yokuyandja elitulemo koinima  iwa oyo Jehova e va ningila. Jehova ka li a hokwa oikala yavo. — Num. 11:10.

7. Oshike sha kwafela omumwameme umwe a henuke okudiladila konghalamwenyo yomonakudiwa?

⁷ Ongahelipi hatu dulu okuhenuka okudiladila ashike koinima yomonakudiwa? Diladila koshihopaenenwa shomumwameme umwe oo a hovela okulonga moBetel yaBrooklyn mo 1945. Konima yomido donhumba, okwa li a hombolwa komumwatate Omubetel, nova longela Jehova pamwe oule womido. Ashike mokati ko 1970 nasha, omushamane waye okwa li ta ehama sha kwata moiti. Omumwameme okwa popya kutya eshi omushamane waye a mona kutya oku li pokufya okwa li e mu lombwela omayele mawa, oo a li ta e ke mu kwafela e li omufiyekadi. Omushamane waye okwe mu lombwela ta ti: “Otwa tyapula ohombo yetu. Ovanhu vahapu ihava tyapula eehombo davo ngaashi fye.” Ashike omushamane waye okwe mu ladipika yo ta ti: “Ino kala to tale konima, nonande oto kala nokudimbuluka onakudiwa. Mokweendela ko kwefimbo ito ka kala vali wa nyika oluhodi. Ino teka omukumo ile u kale we linyematela. Kala wa hafa eshi twa dula okulongela Jehova pamwe. . . . Okudimbuluka oku li oshali oyo twa pewa kuKalunga.” Mbela ito dimine kutya omayele oo omawa neenghono?

8. Omumwameme okwa mona ngahelipi ouwa mokuhenuka okudiladila konakudiwa?

⁸ Omumwameme okwa tula moilonga omayele omushamane waye. Okwa longela Jehova noudiinini fiyo osheshi a ka fya e na omido 92. Omido dinini ofimbo ina fya, okwa popya a ti: “Ngeenge handi diladila omido di dulife 63 odo da kala moilonga yefimbo li yadi hadi longele Jehova, ohandi dulu okutya onda li ndi na onghalamwenyo ya denga mbada.” Omolwashike mbela? Okwa yelifa ta ti: “Osho hashi ningifa onghalamwenyo i kale tai ti sha oumwainafana wa denga mbada nosho yo eteelelo loku ka kala moparadisa kombada yedu pamwe novamwatate novamwameme, okulongela fiyo alushe Omushiti wetu Munenenene, Kalunga kashili Jehova.” *  Ohatu dulu okulihonga shihapu komumwameme oo a li ta yandje elitulemo konakwiiwa!

9. Metwokumwe naLeviticus 19:18, onaini unene hatu mono shidjuu okudimina po umwe oo e tu udifa nai?

⁹ Lesha Leviticus 19:18. Ohashi kala shidjuu okudimina po umwe oo e tu udifa nai, unene tuu ngeenge omwiitaveli mukwetu, kaume ketu kopofingo ile omupambele wetu. Pashihopaenenwa, omumwameme umwe okwa li a lundilwa komwiitaveli mukwao kutya okwa vaka po oimaliwa yaye. Lwanima, omumwameme oo e mu lundila okwa li e mu pa ombili, ashike omumwameme oo a lundilwa okwa kala ta diladila kwaasho sha ningwa po. Mbela naave ope na efiku limwe wa li u udite ngaho? Nonande inatu enda monghalo ya fa oyo, vahapu vomufye otashi dulika tu dimine kutya katu na efiku tu dimine po omunhu oo e tu udifa nai.

10. Oshike tashi dulu oku tu kwafela tuha kwate onghone?

¹⁰ Oshike tashi dulu oku tu kwafela tuha kwate onghone? Natu dimbuluke kutya, Jehova oha kala e wete keshe shimwe. Oku shii onghalo keshe hatu piti muyo, mwa kwatelwa nokuhenouyuki oko hatu ningilwa. (Heb. 4:13) Oha kala e udite nai ngeenge hatu mono oixuna. (Jes. 63:9) Okwa udaneka kutya ota ka kufa po ouyehame aushe oo hatu ningilwa omolwokuhenouyuki. — Eh. 21:3, 4.

11. Ouwa ulipi hatu ka mona pauhandimwe ngeenge otwa henuka okukwatela umwe onghone?

¹¹ Ohatu ka mona ouwa pauhandimwe ngeenge otwa henuka okukwatela umwe onghone. Osho osho omumwameme oo a li a lundilwa a didilika. Mokweendela ko kwefimbo, okwa li a dimina po omwiitaveli mukwao. Okwa mona kutya ngeenge ohatu dimine po vakwetu, Jehova naye ote ke tu dimina po. (Mat. 6:14) Okwa li e shii kutya osho omwiitaveli mukwao e mu ningila osha puka, ashike okwa li e mu dimina po. Oshidjemo? Omumwameme okwa kala a hafa nokwa dula okuyandja elitulemo kokulongela Jehova.

12. Oshike hatu lihongo mu 1 Johannes 3:19, 20?

¹² Lesha 1 Johannes 3:19, 20. Inatu lya olusha lokuhakala tu udite ondjo. Pashihopaenenwa, vamwe ohava kala ve udite ondjo omolwoinima oyo va ninga ofimbo inava shiiva oshili. Vamwe ohava kala ve udite ondjo omolwomapuko oo va ninga konima eshi va ninginifwa. Oshi li paushitwe okukala tu udite ngaho. (Rom. 3:23) Oshoshili kutya otwa hala okuninga osho sha yuka. Ashike “atusheni ohatu ningi omapuko luhapu.” (Jak. 3:2; Rom. 7:21-23) Nonande ihatu kala twa hafa ngeenge tu udite ondjo, otashi dulu oku tu etela ouwa. Omolwashike mbela? Omolwaashi okukala tu udite ondjo otashi tu linyengifa tu kale twa hala okuninga omalunduluko notu kale twa tokola toko tuha endulule omapuko oo twa ninga nale. — Heb. 12:12, 13.

13. Omolwashike tu na okuhenuka okukala tu udite unene ondjo?

¹³ Omafimbo amwe otashi dulika tu kale tu udite unene ondjo, nonande otwe livela ombedi notu shii kutya Jehova okwe tu dimina po. Okukala tu udite ngaho otashi dulu oku tu ehameka. (Eps. 31:10; 38:3, 4) Ngahelipi mbela? Diladila koshihopaenenwa shomumwameme umwe oo a kala ta kondjo omolwomanyono aye omonakudiwa. Okwa popya a ti: “Onda kala ndi udite kutya inandi wana okulonga shihapu moilonga yaJehova, molwaashi otashi dulika ndiha ka xupifwe.” Vahapu vomufye otashi dulika osho tu kale tu udite ngaho. Onghee hano, natu kale twa lungama tuha kale unene tu udite ondjo. Diladila ashike nghee Satana ta ka kala a hafa ngeenge otwa teka omukumo, nonande Jehova oku tu hole nokwe tu dimina po! — Yelekanifa no 2 Ovakorinto 2:5-7, 11.

14. Ongahelipi hatu dulu okukala noushili kutya Jehova okwe tu hokwa natango?

¹⁴ Keshe umwe pauhandimwe ota dulu okulipula kutya: ‘Ongahelipi handi dulu okukala noushili kutya natango Jehova okwa hokwa nge?’ Ngeenge otwe lipula epulo la tya  ngaho, otashi ulike kutya Jehova ote tu dimine po. Oshungonangelo imwe oyo ya nyanyangidwa omido da ka lupuka oya ti: “Otashi dulika tu endulule epuko la faafana oikando noikando, notashi dulika shi kale shidjuu okweefa po eenghedi inadi koshoka ofimbo inatu hovela okulongela Kalunga. . . . Ino sholola. Ino fika pexulifodiladilo kutya enyono loye itali dulu okudimwa po. Satana okwa hala u kale to tomhafana ngaho. Oho kala wa nyemata nowa lulilwa ngeenge to ningi epuko olo. Osho otashi ulike kutya ove ku fi omunhu mwii nonokutya Jehova ota dulu oku ku dimina po. Inda kuye ngaashi okaana haka i kuxe ngeenge ke li moupyakadi nonande otaka endulula epuko la faafana, na Jehova ote ke ku kwafela omolwefilonghenda laye linene.” *

15-16. Vamwe ohava kala ve udite ngahelipi ngeenge ova didilike kutya Jehova okwe va hokwa natango?

¹⁵ Ovapiya vaJehova vahapu ohashi va hekeleke ngeenge ova didilike kutya Jehova okwe va hokwa natango. Pashihopaenenwa, oule womido da pita, omumwatate umwe okwa li e linyengifwa koshitukulwa shomoitukulwa ya pambafana shi na oshipalanyole, “Ombiibeli ohai lundulula onghalamwenyo yovanhu.” Moshitukulwa osho, omumwameme umwe okwa li a mona kutya omolwoinima oyo a ninga monakudiwa, osha li shidjuu kuye okudimina kutya Jehova ota kala e mu hole. Okwa kala ta kondjo nomaliudo a tya ngaho, nokonima eshi a ninginifwa. Ashike eshi a dilonga kekuliloyambo laJesus, oshe mu kwafela a mone kutya Jehova oku mu hole. *

¹⁶ Oshimoniwa osho osha li sha kuma ngahelipi omumwatate? Okwa ti: “Eshi nda li omunyasha, onda li nda pikwa kokutala omafano oipala. Efimbo opo la di ko, onda li vali nda hovela oku a tala. Onda li nda ka konga ekwafo kovakulunhuongalo, nosha li shidjuu kwaame okufinda ounghundi oo. Ovakulunhuongalo ova li va shilipaleka nge kutya Kalunga oku hole nge nomunanghenda. Ashike omafimbo amwe ohandi kala ndi udite ndihe na oshilonga, nohandi kala ndi udite kutya Jehova ke hole nge. Eshi nda lesha oshimoniwa shomumwameme oo osha kwafela nge neenghono. Paife onda mona kutya kungaho  onda fa handi ti ekuliloyambo lOmona waye inali wana okudima po omanyono ange. Onda konda mo oshitukulwa osho, opo ndi kale handi shi lesha nokudilonga kusho ngeenge handi hangwa komadiladilo okukala ndi udite ndihe na oshilonga.”

17. Ongahelipi omuyapostoli Paulus a henuka omwiyo wokukala e udite unene ondjo?

¹⁷ Oimoniwa ya tya ngaho otai tu dimbulukifa omuyapostoli Paulus. Okwa li a nyona omanyono mahapu a kwata moiti ofimbo ina ninga Omukriste. Paulus okwa li ha dimbuluka osho a li a ninga, ashike ka li ha kala ta diladila kusho. (1 Tim. 1:12-15) Okwa li a tala ko ekuliloyambo li li oshali oyo a pewa pauhandimwe. (Gal. 2:20) Paulus okwa li a henuka omwiyo wokukala e udite unene ondjo. Okwa kala ta yandje elitulemo lokupa Jehova osho sha denga mbada.

18. Oshike twe lihonga moshitukulwa eshi?

¹⁸ Oshike twe lihonga eshi twa konakona eemwiyo odo da kundafanwa moshitukulwa eshi? (1) Okudimbuluka oinima iwa oku li oshali yandja kuJehova; kashi na nee mbudi kutya onghalamwenyo yetu oya li iwa ya fa peni monakudiwa, ohatu ka kala nonghalamwenyo ya denga mbada monakwiiwa. (2) Vamwe otashi dulika ve tu udife nai, ashike ohatu dulu oku va dimina po opo tu pule komesho. (3) Okukala tu udite unene ondjo otashi ke tu imba tu longele Jehova nehafo. Onghee hano, ngaashi Paulus, otwa pumbwa okudimina kutya Jehova ote ke tu dimina po.

19. Otu shi shii ngahelipi kutya mounyuni mupe itatu ka kala vali hatu lipe oushima omolwoinima oyo twa ninga monakudiwa?

¹⁹ Otu na etimaumbwile loku ka kala nomwenyo fiyo alushe. Nomounyuni mupe waKalunga itatu ka kala hatu lipe oushima omolwoinima oyo twa ninga monakudiwa. Ombiibeli oya popya shi na sha nefimbo olo ya ti: “Inya yonale itai dimbulukiwa vali.” (Jes. 65:17) Diladila ashike kwaashi: Vahapu vomufye otwa kulupila moilonga yaJehova, ndele mounyuni mupe ohatu ka kala twa nyashuka. (Job 33:25) Onghee hano, natu kale twa tokola toko tuha diladile konakudiwa. Ashike ponhele yaasho, natu kale hatu yandje elitulemo konakwiiwa, nokuteelela osho twa tuvikililwa!