1-2. (a) Omolwashike ovo opo va hombola va pumbwa okulineekela muJehova? (Epsalme 37:3, 4) (b) Oshike hatu ka kundafana moshitukulwa eshi?

MBELA ou li pokuhombola mafiku, ile opo mwa hombola? Ngeenge osho, kape na omalimbililo kutya omwa halelela oku ka hafela onghalamwenyo pamwe mu li ovalihomboli. Oshoshili kutya mohombo ohamu kala omashongo. Omu na yo omatokolo a fimana, oo mu na okuninga mu li ovalihomboli. Onghedi omo hamu ungaunga nomashongo nanghee hamu ningi omatokolo, oyo tai ka ufa kutya otamu ka kala mwa hafa shi fike peni mu li ovalihomboli momido dokomesho. Ngeenge omwa kala mwe lineekela muJehova, otamu ka ninga omatokolo e li pandunge, ohombo yeni otai ka kala ya pama notamu ka kala mwa hafa. Ngeenge omwa dopa okutula moilonga omayele aKalunga, otashi dulika mu ka shakeneke omashongo, oo taa ka nyona po ehafo leni. — Lesha Epsalme 37:3, 4.

² Nonande oshitukulwa eshi osha nuninwa unene ovo opo va hombola, osha kundafana yo omashongo, oo taa dulu okushakenekwa kovalihomboli aveshe. Otashi ka kundafana osho hatu lihongo moihopaenenwa yovalumenhu novakainhu vamwe, ovo va li ovadiinini, ovo va popiwa mOmbiibeli. Oihopaenenwa oyo yopaMbiibeli otai tu hongo oilihongomwa oyo tai dulu oku tu kwafela meenghedi di lili noku lili mokukalamwenyo, mwa kwatelwa nomohombo. Ohatu ka tala yo osho hatu lihongo koimoniwa yovalihomboli vamwe vopefimbo letu.

3-4. Ovo opo va hombola otashi dulika va shakeneke omashongo elipi?

³ Vamwe otashi dulika va ladipike ovo opo va hombola va lalakanene onghedi yokukalamwenyo oyo tai lalakanenwa kovanhu  vahapu kunena. Pashihopaenenwa, ovadali nosho yo ovapambele vamwe otashi dulika va fininike ovalihomboli va hovele okumona ounona diva ngaashi tashi shiiva. Ile ookaume novapambele ovo tava monika ve na omalinyengotomheno mawa otashi dulika va ladipike ovo opo va hombola va lande eumbo nova landele mo oinima ihapu youdjeko.

⁴ Ngeenge ovalihomboli inava lungama, otashi dulika va ka ninge omatokolo, oo tae ke va etela eendjo inadi pumbiwa. Osho otashi ka ningifa omushamane nomukulukadi va kale tava longo eevili dihapu, opo va fute eendjo odo. Oilonga yokulikongela omboloto otai ke va ningifa vaha mone efimbo lokuninga ekonakonombiibeli lopaumwene, elongelokalunga loukwaneumbo nosho yo okuya moukalele. Ovalihomboli otashi dulika va faule okwoongala, opo va longe olutaima, va likole oimaliwa ihapu, ile va kaleke po oilonga yavo. Ngeenge ova ningi ngaho, otava ka xutwifa eemhito ditunhula, odo va li tava dulu okuhafela moilonga yaJehova.

5. Oshike hatu lihongo moshihopaenenwa shaKlaus naMarisa?

⁵ Oihopaenenwa ihapu oya ulika kutya, ngeenge otwa pitifa komesho oinima yopamaliko itatu ka kala twa hafa. Natu ka taleni kwaasho ovalihomboli, Klaus naMarisa, ve lihonga shi na sha naasho. * Eshi opo va hombola, aveshe ova li hava longo oilonga yokulikongela omboloto, opo ve likongele oimaliwa ihapu nova kale nonghalamwenyo youdjeko. Ashike paulelalela kava li va mona ehafo lashili. Klaus okwa ti: “Otwa li tu na oinima ihapu yopamaliko i dulife pwaasho twa pumbwa, ndele katwa li twe litulila po omalalakano okulongela Jehova shihapu. Osho osha li ashike sha djuupaleka onghalamwenyo yetu noshe tu etela oisho ihapu.” Otashi dulika yo naave wa didilika kutya nonande omunhu oku lalakanene oinima yopamaliko iha kala a wanenwa. Ngeenge naave osho u li ngaho, ino teka omukumo. Ngeenge owa konakona oihopaenenwa iwa yavamwe otai ke ku kwafela u ninge omalunduluko e na sha naasho. Tete, natu ka kundafaneni osho ovashamane tava dulu okulihonga koshihopaenenwa shohamba Josafat.

6. Ohamba Josafat oya tula moilonga ngahelipi efinamhango olo li li mOmayeletumbulo 3:5, 6, eshi ya li ya taalela eshongo la kwata moiti?

⁶ Ovashamane, mbela omafimbo amwe ohamu kala mu udite mwa wililwa po koinakuwanifwa yeni? Ngeenge osho, otamu dulu okumona ouwa moshihopaenenwa shohamba Josafat. E li ohamba, okwa li e na oshinakuwanifwa shokwaamena oshiwana ashishe. Ongahelipi a li a dula okuwanifa po oshinakuwanifwa osho sha kwata moiti? Josafat okwa li a ninga ngaashi ta dulu, opo a amene aveshe ovo ve li mepashukilo laye. Okwa li a tunga oilando yaJuda nokwa li a ongela etangakwaita enaenghono, olo la li li na ovakwaita ve dulife 1 160 000. (2 Omaf. 17:12-19) Lwanima, Josafat okwa ka taalela eshongo la kwata moiti. Etangakwaita linene la fikama po mOvaammoni, mOvamoab nosho yo movalumenhu va dja koitukulwa yokeemhunda daSeir, ola li le mu ningila omatilifo  pamwe noukwaneumbo waye nosho yo oshiwana shaye. (2 Omaf. 20:1, 2) Josafat okwa li a ninga po shike? Okwa li a pula Jehova e mu kwafele noku mu pameke. Kungaho, okwa li a katuka metwokumwe nomayele opandunge, oo taa hangwa mOmayeletumbulo 3:5, 6. (Lesha.) Eilikano laJosafat lelininipiko, olo tali hangwa mo 2 Omafimbo 20:5-12, ola ulika kutya okwa li e lineekela shi fike peni muJehova. Mbela Jehova okwa li a nyamukula ngahelipi eilikano laJosafat?

7. Jehova okwa li a nyamukula ngahelipi eilikano laJosafat?

⁷ Jehova okwa li a popya naJosafat okupitila mOmulevi wedina Jahasiel. Jehova okwa ti: “Fikameni, kaleni mu li ofika ndele taleni nhumbi Omwene te mu xupifa.” (2 Omaf. 20:13-17) Oshoshili kutya oyo hayo onghedi va li hava longifa moita. Ashike omalombwelo oo okwa li a dja kuJehova, ndele inaa dja komunhu. Josafat okwa li e lineekela muKalunga nokwa li a ninga ngaashi a lombwelwa. Eshi ye noshiwana va ka shakeneka omutondi, ka li a tula komesho ovakwaita, ovo ve na owino muhapu. Ponhele yaasho, okwa li ashike a tula ko ovaimbi ovo nokuli va li inava homata sha. Jehova okwa li a wanifa po eudaneko olo a udanekela Josafat nokwa li a finda etangakwaita lovatondi. — 2 Omaf. 20:18-23.

8. Oshike ovashamane tave lihongo moshihopaenenwa shaJosafat?

⁸ Ovashamane, otamu dulu okulihonga sha moshihopaenenwa shaJosafat. Omu na oshinakuwanifwa shokufila oshisho omaukwaneumbo eni nohamu longo noudiinini, opo mu a amene noku a yambidida. Ngeenge mwa taalela omashongo, otashi dulika mu kale mu udite kutya otamu dulu oku a kandula po kunye vene. Ashike henukeni oikala yokulineekela mokudula kweni. Ponhele yaasho, kaleni hamu ilikana pauhandimwe kuJehova, opo e mu kwafele. Shikwao vali, kaleni hamu ilikana mwa mana mo pamwe novakulukadi veni. Kaleni hamu kongo ewiliko kuJehova mokukala hamu lesha Ombiibeli nosho yo oishangomwa oyo ya nyanyangidwa kehangano laye nokutula moilonga omayele oo e li mo. Vamwe otashi dulika va kale ve li omhinge nomatokolo eni, oo mwa ninga a kanghamena kOmbiibeli, notashi dulika nokuli ve mu lombwele kutya kae li pandunge. Otashi dulika va popye kutya oimaliwa nosho yo omaliko oyo ashike tai dulu okweetela oukwaneumbo weni eameno lashili. Ndele dimbulukeni oshihopaenenwa shaJosafat. Okwa li a ulika meenghatu daye kutya okwe lineekela muJehova. Jehova ka li a efa po omulumenhu oo omudiinini, noite ke mu efa yo. (Eps. 37:28; Heb. 13:5) Oshike vali ovalihomboli tava dulu okuninga, opo va shilipaleke kutya otava hafele onghalamwenyo?

9. Oshike hatu lihongo komuprofeti Jesaja nomukulukadi waye?

⁹ Omuprofeti Jesaja nomukulukadi waye ova li va pitifa komesho okulongela Jehova monghalamwenyo yavo. Jesaja okwa li omuprofeti. Omukulukadi waye otashi dulika a li e lineekelelwa oinakuwanifwa youprofeti, molwaashi okwa li ha ifanwa “omuxunganeki.” (Jes. 8:1-4) Ve li ovalihomboli, Jesaja nomukulukadi waye ova li va pitifa komesho okulongela Jehova. Mbela osho kashi fi tuu oshihopaenenwa sha denga mbada kovalihomboli vokunena!

10. Ongahelipi okukonakona omaxunganeko Ombiibeli taku dulu okulinyengifa ovalihomboli va kale va tokola toko okulongela Jehova ngaashi tava dulu?

¹⁰ Ovalihomboli kunena otava dulu okuhopaenena Jesaja nomukulukadi waye mokulongela Jehova ngaashi tava dulu. Otava dulu okupameka elineekelo lavo muJehova mokukonakona pamwe omaxunganeko Ombiibeli nokutala nghee haa wanifwa alushe. (Tit. 1:2) Opo nee otava dulu okudiladila kwaasho tava dulu okuninga  po, opo va dule okukufa ombinga mewanifo lexunganeko lonhumba lOmbiibeli. Pashihopaenenwa, otava dulu okuyambidida mokukufa ombinga mewanifo lexunganeko laJesus, olo kutya onghundana iwa oi na okuudifilwa ounyuni aushe, ofimbo exulilo inali uya. (Mat. 24:14) Ngeenge ovalihomboli ova kala va tomhwa kutya omaxunganeko Ombiibeli otaa wanifwa shili, osho otashi ke ve linyengifa va kale va tokola toko okulongela Jehova ngaashi tava dulu.

11. Oshike Priskila naAkwila va li tava dulu okuninga, nomolwashike?

¹¹ Ovalihomboli ovanyasha otava dulu okulihonga shihapu kuPriskila naAkwila, ovalihomboli Ovajuda, ovo va li hava di moshilando shaRoma. Eshi va udifilwa onghundana iwa i na sha naJesus ova li va ninga Ovakriste. Osho otashi ulike kutya ova li va wanenwa monghalamwenyo. Ashike onghalamwenyo yavo oya li ya lunduluka ombadilila, eshi Omupangeli Klaudius a li a lombwela Ovajuda aveshe va dje mo muRoma. Diladila kutya osho osha li tashi ka kuma ngahelipi Akwila naPriskila. Ova li ve na okufiya po oshitukulwa osho va ika, va li ve na okukonga eumbo lipe nova li ve na oku ka totulula ongeshefa yavo yokuninga eetenda koshitukulwa shipe oko va li tava i. Mbela omalunduluko oo mape okwa li tae ke va imba va pitife komesho Ouhamba? Enyamukulo otashi dulika u li shii. Moshitukulwa shavo shipe, muKorinto, Akwila naPriskila ova li hava yambidida meongalo lomoshitukulwa nova li hava longo pamwe nomuyapostoli Paulus, opo va pameke ovamwatate vamo. Lwanima, ova ka tembukila yo koilando ikwao, oko kwa li ku na omhumbwe inene yovaudifi. (Oil. 18:18-21; Rom. 16:3-5) Onghalamwenyo yavo oya kala ye lipyakidila nova kala va hafa neenghono.

12. Omolwashike ovalihomboli ve na okulitulila po omalalakano okulongela Jehova?

¹² Ovalihomboli kunena otava dulu okuhopaenena Priskila naAkwila mokukala va pitifa komesho Ouhamba. Efimbo lokweendelafana oli li omhito iwa kovalihomboli okukundafana kombinga yomalalakano avo. Ngeenge ovalihomboli ove litulile po omalalakano moilonga yaJehova nokulonga noudiinini opo ve a hange, otava ka mona nghee Jehova te va kwafele meenghedi dihapu monghalamwenyo yavo. (Omuud. 4:9, 12) Natu ka taleni  koshihopaenenwa shaRussell naElizabeth. Russell okwa ti: “Eshi twa li hatu endelafana, otwa li hatu kundafana kondadalunde osho twa hala okulonga moilonga yaJehova.” Elizabeth okwa ti: “Otwa li hatu kundafana ngaho, opo ngeenge lwanima otwa ka taalela eenghalo omo tu na okuninga omatokolo, ohatu shilipaleke kutya omatokolo etu itaa i moshipala omalalakano etu oo twe litulila po.” Eenghalo omo Russell naElizabeth va li oda li de va pitika va tembukile koMicronesia, opo va ka longele oko ku na omhumbwe inene yovaudifi.

13. Metwokumwe nEpsalme 28:7, ouwa ulipi hatu ka mona, ngeenge otwa kala twe lineekela muJehova?

¹³ Ngaashi Russell naElizabeth, ovalihomboli vahapu ova tokola okukaleka onghalamwenyo yavo paunafangwa. Ohava ningi ngaho, opo va longife efimbo lavo lihapu moilonga yokuudifa nokuhonga onghundana iwa nopehe na omapiyaaneko. Ngeenge ovalihomboli ove litulile po omalalakano taa ti sha e na sha noilonga yaJehova nokulongela kumwe opo ve a hange, otava ka mona oidjemo iwa. Otava ka mona nghee Jehova te va kwafele, tava ka kala ve mu lineekela shi dulife nale notava ka mona ehafo linene. — Lesha Epsalme 28:7.

14. Ongahelipi omuyapostoli Petrus nomukulukadi waye va ulika kutya ove lineekela meudaneko olo li li muMateus 6:25, 31-34?

¹⁴ Ovalihomboli otava dulu yo okulihonga shihapu moshihopaenenwa shomuyapostoli Petrus nomukulukadi waye. Omuyapostoli Petrus okwa li e na okuninga etokolo la fimana konima yeemwedi hamano, eshi va shakena naJesus. Petrus okwa li e na ongeshefa yeeshi, opo a file oshisho ovaneumbo laye. Onghee hano, eshi Jesus a shiva Petrus va ka longe moilonga yefimbo li yadi, Petrus okwa li e na okudiladila kombinga yomukulukadi waye, eshi ta ningi etokolo olo. (Luk. 5:1-11) Petrus okwa li a ninga etokolo li li pandunge, eshi a hoolola oku ka udifa pamwe naJesus. Osho otashi ulike kutya omukulukadi waPetrus oku na okukala a yambidida etokolo laye. Ombiibeli oya popya kutya konima eshi Jesus a nyumunwa, Petrus okwa kala ha i momalweendo pamwe nanekulu laye. (1 Kor. 9:5) Nopehe na omalimbililo, oshihopaenenwa shaye e li omukulukadi Omukriste osha li sha kwafela Petrus a kale e na emanguluko lokupopya, eshi ta yandje omayele kovashamane nosho yo kovakulukadi Ovakriste. (1 Pet. 3:1-7) Osho otashi ulike filufilu kutya Petrus nomukulukadi waye ova li ve lineekela meudaneko laJehova, olo kutya ote ke va fila oshisho, ngeenge ova pitifa komesho Ouhamba. — Lesha Mateus 6:25, 31-34.

15. Oshike hatu lihongo moshihopaenenwa shaTiago naEsther?

¹⁵ Ngeenge omwa kala mohombo oule womido dinini paife, ongahelipi tamu dulu okutamununa mo oukalele weni? Onghedi imwe omo tamu dulu okuninga ngaho, omokutala koimoniwa yovalihomboli vamwe. Pashihopaenenwa, otamu dulu okulesha oitukulwa ya pambafana “Vamwe ovo ve liyamba va longe nehalo liwa.” Oitukulwa ya tya ngaho, oya kwafela Tiago naEsther, ovalihomboli vokoBrazil, opo va kale va halelela oku ka longela oko ku na omhumbwe inene yovaudifi. Tiago okwa ti: “Konima eshi twa lesha oimoniwa i na sha nanghee Jehova a kwafela ovapiya vaye vopefimbo letu, nafye otwa li twa halelela okutula moilonga omayele aye nokumona nghee te tu kwafele.” Mokweendela ko kwefimbo ova li va tembukila diva koParaguay, nova kala tava longele moshitukulwa omo hamu popiwa elaka lOshiputu okudja mo 2014. Esther okwa ti: “Omushangwa oo tu hole unene atushe Ovaefeso 3:20. Otwa mona lwoikando ihapu nghee hatu wanifilwa omushangwa oo, eshi hatu longele Jehova.” Monhumwafo oyo Paulus a li a shangela Ovaefeso,  okwa udaneka kutya Jehova ote ke tu pa shihapu neenghono shi dulife pwaasho hatu pula. Otwa mona nghee eudaneko olo tali wanifwa meenghedi dihapu.

16. Ovalihomboli ovanyasha ove na okupula omayele kulyelye, ngeenge ova hala okulitulila po omalalakano?

¹⁶ Ovalihomboli ovanyasha kunena navo otava dulu okulihonga shihapu moimoniwa yavamwe, ovo va kala ve lineekela muJehova. Ovalihomboli vamwe otashi dulika va kala tava longele Jehova moilonga yefimbo li yadi oule womido. Omolwashike ito va pula omayele, ngeenge owa hala okulitulila po omalalakano? Oyo oi li onghedi imwe omo to dulu okuulika kutya owe lineekela muJehova. (Omayel. 22:17, 19) Ovakulunhuongalo navo otava dulu okukwafela ovalihomboli ovanyasha ve litulile po omalalakano okulongela Jehova noku a hanga.

17. Oshike sha ningilwa Klaus naMarisa, noshike hatu lihongo moshimoniwa shavo?

¹⁷ Omafimbo amwe otashi dulika tu kale twa hala okulongela Jehova monghedi yonhumba, ndele otashi dulika e ke tu pe oshinakuwanifwa shimwe shi lili. Osho osho sha li sha ningilwa Klaus naMarisa, ovo va tumbulwa metetekelo. Konima yomido nhatu eshi va hombola, ova li va tembukila kokule neumbo lavo, oko ve ke liyamba moilonga yokutunga omatungo ehangano koshitaimbelewa shaFinland. Ndele ova li va mona kutya kava li va pitikwa va kale mo eemwedi di dulife puhamano. Potete, osha li she va udifa nai. Ashike diva konima yaasho, ova li va shivwa va ka hongwe elaka lOshiarabia. Paife otava longo va hafa koshitukulwa oko haku popiwa elaka olo, koshilongo shimwe shi lili. Eshi Marisa a li ta diladila kwaasho sha ningwa po, okwa ti: “Onda li handi kala nda tila okuninga oshinima osho inandi ninga nande onale, nonda pumbwa okulineekela filufilu muJehova. Ndele onda mona nghee Jehova a kala noku tu kwafela monghedi omo twa li inatu shi teelela. Konima yoshimoniwa osho, onda hovela okukala nde lineekela muJehova shi dulife nale.” Oshihopaenenwa osho otashi ulike kutya Jehova ota dulu oku mu pa ondjabi, ngeenge omwa kala mwe mu lineekela filufilu.

18. Ovalihomboli ova pumbwa okuninga shike, opo va kale ve lineekela muJehova?

¹⁸ Ohombo oi li oshali ya dja kuJehova. (Mat. 19:5, 6) Okwa hala ovalihomboli va hafele oshali ya tya ngaho. (Omayel. 5:18) Ovalihomboli ovanyasha, omolwashike itamu konakona nghee tamu ka longifa onghalamwenyo yeni? Mbela otamu ningi ngoo ngaashi tamu dulu, opo mu ulike kutya omwa pandula Jehova omolweeshali odo e mu pa? Kaleni hamu ilikana kuJehova. Kaleni hamu kongo omafinamhango mEendjovo daye, oo taa dulu oku mu kwafela shi na sha nonghalo oyo mu li muyo. Kaleni yo hamu tula moilonga omayele oo tamu pewa kuJehova. Ngeenge omwa ningi ngaho, otamu ka kala mwa hafa notamu ka mona ondjabi, eshi tamu longele Jehova noudiinini mu li ovalihomboli.