1-2. “Oshilonga shiwa” shomukulunhuongalo osha kwatela mo shike?

 NGEENGE ou li omuyakuliongalo, otashi dulika to longo noudiinini, opo u kale wa wana okuninga omukulunhuongalo. Mbela ino hala okulonga “oshilonga shiwa,” osho hashi longwa kovakulunhuongalo? — 1 Tim. 3:1.

² Oilonga yomukulunhuongalo oya kwatela mo shike? Omukulunhuongalo oha kufa ombinga moilonga yokuudifa, ha ningi omatalelepo oufita, ha hongo ovamwatate novamwameme nohe va pameke okupitila meendjovo nomoshihopaenenwa shaye. Ope na omatomheno mahapu mawa, kutya omolwashike Ombiibeli ya popya ovakulunhuongalo, ovo hava longo noudiinini, “ve li eeshali.” — Ef. 4:8.

3. Ongahelipi omumwatate ta dulu okukala a wana okuninga omukulunhuongalo? (1 Timoteus 3:​1-7; Titus 1:​5-9)

³ Mbela oshike wa pumbwa okuninga, opo u kale wa wana okuninga omukulunhuongalo? Omunhu iha kala ashike a wana okukala omukulunhuongalo she likolelela kowino oo e na. Ngeenge omunhu ta kongo oilonga, okwa pumbwa ashike okukala e na ounghulungu wonhumba oo wa halika komuyandji woilonga. Mepingafano naasho, opo u ninge omukulunhuongalo ino pumbwa ashike okukala u na ounghulungu wokuudifa nowokuhonga, ndele owa pumbwa yo okuwanifa po oiteelelwa yopaMishangwa, oyo ya popiwa mu 1 Timoteus 3:​1-7 nosho yo muTitus 1:​5-9. (Lesha.) Moshitukulwa eshi, ohatu ka kundafana omaukwatya amwe oo a popiwa meevelishe odo: nghee omumwatate ta dulu okuliningila edina liwa meongalo nosho yo kondje yeongalo, nghee ta dulu okukala oshihopaenenwa shiwa e li omutwe woukwaneumbo nanghee ta dulu okukala a hafa, eshi ta kwafele eongalo.

 LININGILA EDINA LIWA

4. Mbela osha hala okutya shike okukula u na “elihumbato liwa”?

⁴ Opo u kale wa wana okuninga omukulunhuongalo, owa pumbwa okukala u na “elihumbato liwa,” osho osha hala okutya vamwe meongalo ohave ku popile mouwa, molwaashi ou na elihumbato liwa noitali limbilike. Shikwao vali, owa pumbwa okukala ho “popilwa mouwa kwaavo vehe fi ovaitaveli.” Oshoshili kutya ovanhu ovo ihava longele Jehova otashi dulika va kembaule eitavelo letu, ashike elihumbato letu kali na oku va ningifa va diladile kutya katu fi ovanashili. (Dan. 6:​4, 5) Lipula kutya: ‘Mbela ondi na ngoo edina liwa meongalo nosho yo kondje yeongalo?’

5. Ongahelipi to dulu okuulika kutya ou “hole ouwa”?

⁵ Ngeenge ou “hole ouwa,” oto ka didilika mo omaukwatya mawa avamwe noto ke va pandula. Oto ka kala yo wa hala okulongela vamwe ouwa, nokuli nopomhito opo inave shi teelela. (1 Tes. 2:8) Omolwashike sha fimana kovakulunhuongalo va kale ve hole ouwa? Omolwaashi ohava longifa efimbo lavo lihapu, opo va file oshisho ovamwatate novamwameme meongalo, nova wanife po oinakuwanifwa yavo. (1 Pet. 5:​1-3) Ashike nonande ongaho, ohava mono ehafo olo hali di mokukwafela vamwe. — Oil. 20:35.

6. Omeenghedi dilipi to dulu ‘okuyakula ovaenda’? (Ovaheberi 13:​2, 16; tala yo efano.)

⁶ Oho ulike kutya oho “yakula ovaenda,” ngeenge to longele vamwe ouwa, nokuli naavo vehe fi ookaume koye kopofingo. (1 Pet. 4:9) Emboitya limwe lOmbiibeli, ola popya kutya: “Omunhu oo ha yakula ovaenda, oha kwafele nokuli naavo ehe shii noha kala a hafa oku va shiva meumbo laye.” Lipula kutya: ‘Mbela ondi shiivikile ngoo handi yakula ovaenda meongalo?’ (Lesha Ovaheberi 13:​2, 16.) Omunhu oo ha yakula ovaenda, oha yakula ovanhu va yoolokafana, mwa kwatelwa ovo va hepa painiwe, ovapashukilishikandjo nosho yo ovapopi ovaendi. — Gen. 18:​2-8; Omayel. 3:27; Luk. 14:​13, 14; Oil. 16:15; Rom. 12:13.

7. Omukulunhuongalo ota dulu okuulika ngahelipi kutya ke na “olwisho loimaliwa”?

⁷ ‘Okuhakala nolwisho loimaliwa.’ Osho osha hala okutya iho kala wa tala ko omaliko nosho yo oimaliwa i li oinima ya fimanenena monghalamwenyo yoye. Kashi na nee mbudi kutya owa punapala, ile hasho, okulongela Jehova oku li oshinima sha fimanenena monghalamwenyo  yoye. (Mat. 6:33) Oho longifa efimbo loye nosho yo oiniwe yoye, opo u longele Jehova, u file oshisho oukwaneumbo woye nou yambidide eongalo. (Mat. 6:24; 1 Joh. 2:​15-17) Lipula kutya: ‘Mbela onda tala ko ngahelipi oimaliwa? Mbela onda wanenwa ngoo kwaasho nda pumbwa okukala ndi na, opo ndi kale nomwenyo? Ile ohandi yandje ashike elitulemo kokulikongela oimaliwa nosho yo omaliko mahapu?’ — 1 Tim. 6:​6, 17-19.

8. Omeenghedi dilipi to dulu okuulika kutya ou na “ondjele” nosho yo “elipangelo”?

⁸ Ngeenge ou na “ondjele” nosho yo “elipangelo,” otashi ulike kutya owe litulila po omangabeko monghalamwenyo yoye. Pashihopaenenwa, iho li noiho nu sha pitilila, oho djala nokuliwapeka monghedi i li pandjele noho hoolola omalihafifo pandunge. Iho hopaenene onghedi yokukalamwenyo yovanhu ovo ihava longele Jehova. (Luk. 21:34; Jak. 4:4) Oho kala wa ngungumana, nokuli nonande vamwe otava ungaunga naave nai. Ku fi “ongholwe” noino shiivikila ho nu unene oikolwifa. Lipula kutya: ‘Mbela onghedi yange yokukalamwenyo otai ulike ngoo kutya ondi na ondjele nosho yo elipangelo?’

9. Oshike sha kwatelwa mo mokukala u na “eendunge” nosho yo “elandulafano”?

⁹ Ngeenge ou na “eendunge,” oho katuka she likolelela komafinamhango Ombiibeli. Oho konakona moule osho Ombiibeli tai ti, naasho ohashi ku ningifa u kale u na eudeko lomoule noho ningi omatokolo e li pandunge. Iho fiki pexulifodiladilo ofimbo uhe na ouyelele we lixwa po. Ponhele yaasho, oho shilipaleke kutya ou na ouyelele aushe. (Omayel. 18:13) Oshidjemo, oho ningi omatokolo e li pandjele noku li metwokumwe nokudiladila kwaJehova. Ngeenge ou na “elandulafano,” oinima yoye ohai kala ya unganekwa nawa noho i ningi pefimbo. Ou shii okulineekelwa noho shikula omalombwelo. Omaukwatya oo, otae ke ku kwafela, opo u kale u na edina liwa. Paife, natu ka kundafane kombinga yoiteelelwa imwe yopaMishangwa, oyo tai ke ku kwafela u tule po oshihopaenenwa shiwa, u li omutwe woukwaneumbo.

KALA OSHIHOPAENENWA SHIWA, U LI OMUTWE WOUKWANEUMBO

10. Ongahelipi omulumenhu ta dulu ‘okufila oshisho ovaneumbo laye’?

¹⁰ Ngeenge ou li omumwatate a hombola, nowa hala okuninga omukulunhuongalo, oukwaneumbo woye nao ou na okukala u na edina liwa. Onghee, owa pumbwa okukala ho ‘file oshisho ovaneumbo loye.’ Ou na okukala ho shi ningi pahole. Osho osha kwatela mo okukala hamu ningi elongelokalunga loukwaneumbo, okuya kokwoongala noku va kwafela va kufe ombinga moukalele. Mbela omolwashike osho sha fimana? Omuyapostoli Paulus okwa tomhafana, a ti: “Osheshi ngeenge omulumenhu ita dulu okufila oshisho ovaneumbo laye, ongahelipi ta ka dula okufila oshisho eongalo laKalunga?” — 1 Tim. 3:5.

11-12. Omolwashike ounona vomumwatate, oo a hala okuninga omukulunhuongalo, va pumbwa okukala ve na elihumbato liwa? (Tala yo efano.)

¹¹ Ngeenge ou li xe omudali, nou na ounona ve li koshi yomido 18, ounona voye ove na okukala “hava dulika nove na elihumbato liwa.” Owa pumbwa oku va honga noku va deula pahole. Oshoshili kutya, owa hala ounona voye va kale va hafa nohava danauka ngaashi ounona vakwao. Ashike, owa pumbwa oku va honga va kale hava dulika, ve na efimaneko nove na elihumbato liwa. Owa pumbwa yo okuninga ngaashi to dulu, opo u va kwafele va kale ve na ekwatafano liwa naJehova, va kale metwokumwe nomifikamhango dOmbiibeli nova ninge exumokomesho fiyo osheshi va ninginifwa.

¹² ‘Oku na ovana ovaitaveli, ve na elihumbato liwa novehe fi ovanashibofa.’ Ngeenge ou na okaana, oko ka ninginifwa, ile ke li pokuninginifwa, ndele taka nyono enyono la kwata moiti, ovakulunhuongalo otava ka tala ngeenge owa  wana okutwikila okukala omuyakuliongalo, ile omukulunhuongalo. U li xe omudali, ngeenge ino yandja outekuduliko kokaana koye, otashi dulika u kale ino wana okukala omukulunhuongalo. — Tala Oshungonangelo yo 15 Oktoba 1996, ep. 21, okat. 6-7.

KALA HO KWAFELE EONGALO

13. Ongahelipi to dulu okuulika kutya ou na “ondjele,” ndele ku fi “hamutwemukukutu”?

¹³ Ovamwatate, ovo hava ulike omaukwatya opaKriste, ove li ekwafo keongalo. Omunhu oo e na “ondjele,” oha xumifa komesho ombili. Oha pwilikine yo komaetepo avamwe. Pashihopaenenwa, mbela oto ka yambidida ngoo etokolo olo tali yambididwa kovakulunhuongalo vahapu, ngeenge itali nyono omifikamhango dOmbiibeli? ‘Uhe fi hamutwemukukutu,’ osho osha hala kutya iho kala alushe wa hala ovanhu va ninge oinima monghedi oyo wa hala. Oho kala wa lenga omaetepo avamwe. (Gen. 13:​8, 9; Omayel. 15:22) Ku “hole okutanguna” ove ‘iho handuka diva.’ Ponhele yaasho, oho kala wa fimaneka vamwe. Ngeenge ou na ombili, oho ningi ngaashi to dulu, opo u kaleke po ombili, nokuli nomeenghalo didjuu. (Jak. 3:​17, 18) Oho popi novanhu nombili, mwa kwatelwa ovo ihava tu kumwe neitavelo letu, naasho ohashi va kwafele vaha kale va handuka unene. — Ovatok. 8:​1-3; Omayel. 20:3; 25:15; Mat. 5:​23, 24.

14. Osha hala okutya shike, eshi taku tiwa kutya omumwatate “ke na okukala opo a ningi omwiitaveli” nosho yo kutya oku na okukala “omudiinini”?

¹⁴ Omumwatate, oo a wana okuninga omukulunhuongalo, “ke na okukala opo a ningi omwiitaveli.” Nonande omumwatate ina teelelika a kale a ninginifwa omido dihapu, okwa pumbwa efimbo, opo a dule okuninga Omukriste a pyokoka. Ofimbo ino nangekwa po u li omukulunhuongalo, ngaashi Jesus, ou na okukala omulininipiki nou na ehalo okulongela Jehova monghedi keshe. Oto ka kala we lididimika nowa teelela Jehova e ku pe oinakuwanifwa ya wedwa po meongalo. (Mat. 20:23; Fil. 2:​5-8) Oto dulu okuulika kutya ove “omudiinini,” mokukanyatela kuJehova, komifikamhango daye nosho yo okushikula ewiliko, olo te ku pe okupitila mehangano laye. — 1 Tim. 4:15.

15. Mbela omukulunhuongalo oku na okukala omupopi a denga mbada? Shi yelifa.

 ¹⁵ Omishangwa ode shi popya sha yela kutya ovakulunhuongalo ove na okukala ‘ve shii okuhonga.’ Mbela osho osha hala kutya omukulunhuongalo oku na okukala ha yandje oipopiwa ya denga mbada? Ahawe. Ovakulunhuongalo vahapu, kave fi ovapopi va denga mbada, ashike ngeenge tashi uya pokuudifa, ile pokuninga omatalelepo oufita, ovakulunhuongalo ove na okukala tava dulu okulongifa Ombiibeli, opo va honge nova twe omukumo ovamwatate novamwameme. (yelekanifa 1 Ovakorinto 12:​28, 29 nosho yo Ovaefeso 4:11.) Ashike nonande ku fi omupopi a denga mbada, owa pumbwa okuxwepopaleka ounghulungu woye wokuhonga. Ongahelipi to dulu okuninga ngaho?

16. Ongahelipi to dulu okukala omuhongi omunekeka? (Tala yo efano.)

¹⁶ ‘Ehongo laye oli na okukala la kanghamena keendjovo di shii okulineekelwa.’ Opo u dule okukala omuhongi omunekeka, owa pumbwa okukala ho longifa Ombiibeli ngeenge to hongo nosho yo eshi to yandje omayele. Kala ho konakona Ombiibeli noukeka nosho yo oishangomwa oyo ya kanghamena kuyo. (Omayel. 15:28; 16:23.) Eshi to konakona, yandja elitulemo kunghee Omishangwa da yelifwa, opo u dule oku ke di tula moilonga. Ngeenge to hongo, kendabala okuhanga omitima dovapwilikini voye. Oto dulu okuxwepopaleka ounghulungu woye wokuhonga mokupula ovakulunhuongalo, ovo ve na owino, omayele noku a tula moilonga. (1 Tim. 5:17) Ovakulunhuongalo ‘ove na okukala tava dulu okuladipika’ ovamwatate novamwameme, ashike omafimbo amwe ove na okupa ovamwatate omayele ‘noku va pukulula.’ Ove na alushe oku shi ninga nonghenda. Ngeenge owa kala u na onghenda, ho ulike ohole, noho hongo to longifa Eendjovo daKalunga, oto ka pondola, molwaashi oto hopaenene Omuhongi Munene, Jesus. — Mat. 11:​28-30; 2 Tim. 2:24.

TWIKILA OKULITULILA PO OMALALAKANO

17. (a) Oshike tashi dulu okukwafela ovayakuliongalo va twikile okulitulila po omalalakano? (b) Mbela ovakulunhuongalo ove na okukaleka shike momadiladilo, ngeenge tava tale kutya omumwatate wonhumba okwa wana okuninga omukulunhuongalo? (Tala oshimhungu “ Kaleni mu na ondjele, eshi tamu tale kutya vamwe ova wana tuu okuninga ovakulunhuongalo.”)

¹⁷ Ovayakuliongalo vamwe, otashi dulika va  diladile kutya kave na efiku va ninge ovakulunhuongalo, molwaashi ope na omaukwatya mahapu va pumbwa okulongela ko. Ashike, dimbuluka kutya Jehova nosho yo ehangano laye inava teelela mu kulike omaukwatya oo monghedi ya wanenena. (1 Pet. 2:21) Omhepo yaJehova inaenghono otai ke ku kwafela u kulike omaukwatya oo. (Fil. 2:13) Mbela ope na oukwatya wonhumba wa hala okuxwepopala muo? Ilikana kuJehova shi na sha nao. Ninga omapekapeko kombinga youkwatya oo, ndele to pula umwe womovakulunhuongalo e ku kwafele nghee to dulu okuxwepopala muo.

18. Ovayakuliongalo aveshe otava ladipikwa va ninge shike?

¹⁸ Atusheni, mwa kwatelwa ovo ve li nale ovakulunhuongalo, natu twikile okukulika omaukwatya oo a kundafanwa moshitukulwa eshi. (Fil. 3:16) Mbela ou li omuyakuliongalo? Litulila po elalakano lokukwafela ovamwatate. Pula Jehova e ku deule noku ku me, opo u dule oku mu longela nou longe shihapu meongalo. (Jes. 64:8) Kape na omalimbililo kutya, Jehova ota ka nangeka noupuna eenghendabala odo to ningi, opo u kale wa wana okuninga omukulunhuongalo.