1. Omuyapostoli Paulus okwa li a tala ko ngahelipi ovayakuliongalo?

 OVAYAKULIONGALO ohava longo oilonga ya fimana momaongalo. Omuyapostoli Paulus okwa li a lenga neenghono ovamwatate ovo vadiinini. Pashihopaenenwa, eshi a shangela Ovakriste vomuFilippi, okwa tumbula kondadalunde ovayakuliongalo pamwe novakulunhuongalo. — Fil. 1:1.

2. Omumwatate wedina Luis, okwa tala ko ngahelipi oshinakuwanifwa shaye e li omuyakuliongalo?

² Ovamwatate vahapu ovo va ninginifwa, kashi na nee mbudi kutya ove na omido ngapi, ohava mono ehafo olo hali di mokukwafela eongalo ve li ovayakuliongalo. Pashihopaenenwa, Devan okwa li a nangekwa po e li omuyakuliongalo, eshi a li e na omido 18. Natango, omumwatate wedina Luis, okwa li a nangekwa po, eshi a li e na omido 50. Okwa popya nghee e uditile oshinakuwanifwa shokukala omuyakuliongalo, a ti: “Oshi li oufembanghenda okukala omuyakuliongalo, unene tuu ngeenge handi diladila kohole oyo ovamwatate novamwameme va ulikila nge.”

3. Omapulo elipi hatu ka kundafana?

³ Ngeenge ou li omumwatate a ninginifwa, ndele ku fi natango omuyakuliongalo, mbela ito dulu oku shi ninga elalakano loye? Mbela oshike tashi dulu oku ku linyengifa u ninge ngaho? Oiteelelwa yopaMishangwa ilipi wa pumbwa okuwanifa po? Moshitukulwa eshi, ohatu ka kundafana omanyamukulo omapulo oo. Ashike tete, natu ka kundafaneni kutya omuyakuliongalo oha dana onghandangala ilipi.

OMUYAKULIONGALO OHA DANA ONGHANDANGALA ILIPI?

4. Onghandangala ilipi omuyakuliongalo ha dana? (Tala yo efano.)

⁴ Omuyakuliongalo, omumwatate oo a ninginifwa a nangekwa  po komhepo iyapuki, opo a kwafele ovakulunhuongalo moinima ihapu ya fimana meongalo. Ovayakuliongalo vamwe ohava shilipaleke kutya ovaudifi ove na oshitukulwa oko tava ka longela nove na oishangomwa yomoukalele. Vamwe ohava kwafele mokuwapaleka nokukaleka Olupale lOuhamba monghalo iwa. Natango, ovayakuliongalo ohava longo ve li ovayakuli nohava longo koikwamawi pefimbo lokwoongala. Oilonga ihapu yovayakuliongalo oya kwalukeshe. Ndele nonande ohava longo oilonga ya tya ngaho, ove hole Jehova nohava kala metwokumwe nomifikamhango daye douyuki. Ove hole yo ovamwatate novamwameme neenghono. (Mat. 22:​37-39) Ongahelipi omumwatate a ninginifwa ta dulu okulitulila po elalakano lokuninga omuyakuliongalo?

5. Oshike omumwatate e na okuninga, opo e litulile po elalakano lokuninga omuyakuliongalo?

⁵ Ombiibeli oya popya oiteelelwa oyo omumwatate e na okuwanifa po, opo a ninge omuyakuliongalo. (1 Tim. 3:​8-10, 12, 13) Oto dulu okulitulila po elalakano olo, mokukonakona oiteelelwa yopaMishangwa noku i wanifa po. Ashike tete, owa pumbwa okuyandja elitulemo komalinyengotomheno oye.

OSHIKE TASHI KU LINYENGIFA U NINGE OMUYAKULIONGALO?

6. Oshike shi na oku ku linyengifa u hange elalakano lokukwafela ovamwatate novamwameme? (Mateus 20:28; tala yo lokombada.)

⁶ Diladila koshihopaenenwa sha denga mbada shaJesus Kristus, keshe osho a li ha ningi, okwa li he shi ningi, molwaashi oku hole Xe nosho yo ovanhu. Ohole oyo, oye mu linyengifa a longe noudiinini nokulongela ovanhu oilonga oyo ya talika ko i dinifa. (Lesha Mateus 20:28; Joh. 13:​5, 14, 15) Ngeenge oto linyengifwa kohole, Jehova ote ke ku nangeka noupuna note ke ku kwafela u hange elalakano loye lokuninga omuyakuliongalo. — 1 Kor. 16:14; 1 Pet. 5:5.

7. Omolwashike omumwatate e na okuhenuka oikala yokulihola mwene?

⁷ Ovanhu mounyuni ohava fimaneke ovo ve na eendodo. Ashike mehangano laJehova hasho mu li ngaho. Omumwatate oo e hole ovanhu, ngaashi Jesus, iha kala a hala okupangela vamwe, ile a kale e litala ko a fimana. Ngeenge umwe, oo he litale ko a fimana, okwa nangekwa po meongalo, ota ka anya okulonga oilonga oyo i dinifa. Otashi dulika a diladile kutya ina wana okulonga oilonga ya tya ngaho.  (Joh. 10:12) Jehova ita ka nangeka noupuna eenghendabala domunhu oo e na ounhwa, ile e lihole mwene. — 1 Kor. 10:​24, 33; 13:​4, 5.

8. Jesus okwa li a pa ovayapostoli vaye omayele elipi?

⁸ Omafimbo amwe, nokuli nookaume kopofingo vaJesus ova li tava lalakanene oinakuwanifwa nomalinyengotomheno a puka. Diladila kwaasho ovayapostoli vaJesus vavali, Jakob naJohannes, va li va ninga. Ova li va pula Jesus e va pe ondodo ye likalekelwa mOuhamba waye. Jesus ka li e va pandula, eshi ve lihalela ondodo oyo. Ndele ponhele yaasho, okwa yelifila ovayapostoli aveshe 12, a ti: “Keshe ou a hala a kale munene mokati keni, na kale omuyakuli weni, naau a hala okukala komesho mokati keni, na kale omupiya waaveshe.” (Mark. 10:​35-37, 43, 44) Ovamwatate ovo tava lalakanene okuninga ovayakuliongalo nelinyengotomheno la yuka, lokukwafela vamwe, otava ka kala enangeko noupuna keongalo. — 1 Tes. 2:8.

OSHIKE TASHI DULU OKU KU KWAFELA U KALE WA HALA OKUKWAFELA OVAMWAXO?

9. Oshike tashi dulu oku ku kwafela u kale wa hala okukwafela vamwe?

⁹ Kape na omalimbililo kutya ou hole Jehova nowa hala okukwafela vamwe. Ashike nonande ongaho, otashi dulika u kale ino hala okulonga oilonga ya wedwa po, oyo hai longwa komuyakuliongalo. Oshike tashi dulu oku ku kwafela u kale wa hala okukwafela vamwe? Omolwashike ito diladila kehafo, olo hali di mokukwafela ovamwatate novamwameme? Jesus okwa ti: “Okuyandja ohaku eta ehafo shi dulife okupewa.” (Oil. 20:35) Jesus okwa li ha kala metwokumwe nefinamhango olo. Jesus okwa li ha kala a hafa, molwaashi okwa li ha kwafele vamwe, naave oto dulu okumona ehafo, olo hali di mokukwafela vamwe.

10. Jesus okwa ulika ngahelipi kutya okwa li ha kala a hafa, ngeenge ta kwafele vamwe? (Markus 6:​31-34)

¹⁰ Diladila koshihopaenenwa sha nghee Jesus a ulika kutya okwa li ha hafele okukwafela vamwe. (Lesha Markus 6:​31-34.) Pomhito imwe, Jesus novayapostoli vaye ova li va loloka. Ofimbo va li ve li mondjila tava i konhele ye likalela, opo va ka fude po, ongudu yovanhu oya li ye va tetekela ya hala okuhongwa kuJesus. Jesus okwa li ta dulu okukala ine va honga, molwaashi ye nookaume kaye ‘kava li va mona omhito yokulya.’ Ile e va lekele, konima eshi e va honga oinima inini. Ndele molwaashi okwa li e linyengifwa kohole, okwa li a “hovela oku va honga oinima ihapu.” Nokwa twikila oku va honga fiyo osheshi ‘etango la toka.’ (Mark. 6:35) Okwa li a ninga ngaho, molwaashi ‘okwa li e va uditile olukeno.’ Okwa li a hala oku va honga, molwaashi oku va hole. Jesus okwa li ha mono ehafo eshi ta kwafele vamwe.

11. Jesus okwa li a kwafela ngahelipi ovanhu? (Tala yo efano.)

¹¹ Eshi Jesus a li ta udifile ongudu, ka li ashike e i honga. Okwa li yo e i fila oshisho palutu. Okwa li a yandja oikulya pashikumwifilonga, ndele ta pe ovahongwa vaye ve i tukule. (Mark. 6:41) Eshi Jesus a ninga ngaho, okwa honga ovahongwa vaye nghee sha fimana okukwafela vamwe. Okwe va ulikila yo kutya oilonga yakwalukeshe, ngaashi oyo tashi dulika hai longwa kovayakuliongalo, oya fimana. Diladila kehafo olo ovayapostoli va li ve na, eshi va longa pamwe naJesus mokutukula oikulya oyo ya ningwa pashikumwifalonga fiyo osheshi ‘aveshe va lya nova kuta.’ (Mark. 6:42) Osho oshihopaenenwa ashike shimwe, sha nghee Jesus a li a pitifa komesho eemhumbwe davamwe, ponhele yeemhumbwe daye. Okwa li a kwafela ovanhu onghalamwenyo yaye aishe, eshi a li kombada yedu. (Mat. 4:23; 8:16) Jesus okwa li ha kala a hafa, ngeenge ta hongo vamwe nokufila oshisho eemhumbwe davo, te shi ningi nelininipiko. Naave oto ka mona ehafo linene, ngeenge owe litulile po elalakano lokuninga  omuyakuliongalo nopehe na okuliholamwene.

12. Omolwashike tuhe na okudiladila kutya itatu dulu okukwafela vamwe meongalo?

¹² Ngeenge ou udite kutya ito dulu okuwanifa po oiteelelwa, ino teka omukumo. Kape na omalimbililo kutya ou na omaukwatya mawa, oo taa dulu oku ku ningifa u longifwe meongalo. Otashi dulika u mone ouwa, ngeenge owa pula Jehova e ku kwafele, eshi to lesha eendjovo daPaulus odo tadi hangwa mo 1 Ovakorinto 12:​12-30. Eendjovo daPaulus ode shi yelifa nawa kutya, ngaashi ashike ovapiya aveshe vaJehova, naave oto dana onghandangala ya fimana meongalo. Ngeenge ito dulu okuninga omuyakuliongalo paife, molwaashi natango wa pumbwa okulongela ko komaukwatya amwe, ino sholola. Omolwashike ito ningi ngaashi to dulu, opo u longifwe kuJehova nokukwafela ovamwatate? Shilipalekwa kutya ovakulunhuongalo otave ke ku kaleka momadiladilo, notave ke ku pa oinakuwanifwa oyo to dulu okuwanifa po. — Rom. 12:​4-8.

13. Oiteelelwa yovalumenhu ovo hava nangekwa po, oya faafana ngahelipi noiteelelwa yOvakriste aveshe?

¹³ Diladila kwaashi, omaukwatya mahapu, oo a popiwa mOmbiibeli e li oiteelelwa yovayakuliongalo, oo omaukwatya oo Ovakriste aveshe ve na okukala ve na. Ovakriste aveshe ove na okweehena popepi naJehova, ve na okukala va hafa, ngeenge tava kwafele vamwe, nokuninga oinima oyo tai hafifa Kalunga. Onghee otashi dulika to wanifa po nale omaukwatya oo a pumbiwa, opo u ninge omuyakuliongalo.

NGHEE TO DULU OKUHANGA ELALAKANO LOKUNINGA OMUYAKULIONGALO

14. Osha hala okutya shike ‘okukala omulineekelwa’? (1 Timoteus 3:​8-10, 12)

¹⁴ Paife natu ka kundafaneni oiteelelwa oyo i li mu 1 Timoteus 3:​8-10, 12. (Lesha.) Omuyakuliongalo oku na okukala ‘e shii okulineekelwa.’ Outumbulilo oo, otau dulu yo okutolokwa “e lipaka mo,” “e udite e na oshinakuwanifwa,” ile “e shii okufimanekwa.” Osho inashi hala kutya ku na okukala ho yolo, ile ho hafele omashendjo. (Omuud. 3:​1, 4) Ndele ou na okukala ho longo noudiinini, opo u wanife po oinakuwanifwa yoye. Ngeenge ou li omulineekelwa, oto ka kala wa fimanekwa meongalo.

15. Osha hala okutya shike ‘okuhakala neendaka mbali’ nosho yo ‘okuhakala u na olwisho loimaliwa noiho kongo ouwa woye mwene’?

¹⁵ ‘Okuhakala neendaka mbali,’ osha hala  okutya oho popi oshili nou shii okulineekelwa. Oho kala metwokumwe neendjovo doye noiho lombwele ovanhu oipupulu. (Omayel. 3:32) ‘Okuhakala uhe na olwisho loimaliwa noiho kongo ouwa woye mwene,’ osha hala okutya ove omunashili, ngeenge to ningi ongeshefa navamwe nongeenge to ungaunga noimaliwa. Ito ka nyokoma ovamwatate novamwameme meongalo, opo u likongele oimaliwa.

16. (a) Osha hala okutya shike ‘okuhanwa oikolwifa sha pitilila’? (b) Osha hala okutya shike ‘okukala neliudo la koshoka’?

¹⁶ ‘Okuhanwa oikolwifa sha pitilila,’ osha hala okutya iho nu oikolwifa sha pitila noku shiivikile ho nu oikolwifa sha pitilila. Okukala ‘neliudo la koshoka,’ osha hala okutya oho kala metwokumwe nomifikamhango daJehova. Nonande ino wanenena, oto ka hafela ombili oyo hai di mokukala u na ekwatafano liwa naKalunga.

17. Osha hala okutya shike ‘okutalika tete ngeenge owa wana okuyakula’? (1 Timoteus 3:10; tala yo efano.)

¹⁷ Ou na ‘okutalika tete, ngeenge owa wana okuyakula.’ Osho osha hala okutya ovakulunhuongalo ova mona kutya oho wanifa po nawa oinakuwanifwa yoye, notava dulu oku ku lineekela. Onghee hano, ngeenge ovakulunhuongalo ove ku pe oshinakuwanifwa, shikula noukeka ewiliko lavo, olo la dja kehangano. Shilipaleka kutya ou udite ko osho sha kwatelwa mo moshinakuwanifwa osho nosho yo kutya oshi na okupwa naini. Eshi to wanifa po oshinakuwanifwa shoye noudiinini, vamwe meongalo otave ke shi didilika notave ke ku pandula. Ovakulunhuongalo, shilipalekeni kutya omwa deula ovamwatate, ovo va ninginifwa. (Lesha 1 Timoteus 3:10.) Mbela meongalo leni omu na ovamwatate va ninginifwa, ovo ve na omido omulongo nasha, ile ve na omido dinini? Mbela ohava lesha ngoo Ombiibeli paumwene nokulilongekidila okwoongala? Mbela ohava yandje ngoo omatyekosha pokwoongala pandjikilile nokuya moukalele? Ngeenge osho, va peni oinakuwanifwa oyo otai wapalele omido davo neenghalo davo. Kungaho, ovamwatate ovo ovanyasha otava dulu ‘okutalika tete ngeenge ova wana okuyakula.’ Opo nee, eshi tava ka kala ve na omido 17 fiyo 19 otashi dulika va kale va wana okuninga ovayakuliongalo.

18. Osha hala okutya shike ‘okukala nelihumbato liwa’?

¹⁸ ‘Okupopilwa mouwa,’ osha hala okutya ku na okutokolelwa enyono la kwata moiti. Oshoshili kutya Ovakriste otashi dulika va lundilwe. Ovanhu ova li va lundila Jesus, nokwa  popya kutya ovashikuli vaye navo otava ka ningilwa oshinima sha faafana. (Joh. 15:20) Ashike ngeenge owa kala u na elihumbato liwa, ngaashi Jesus, oto ka kala u na edina liwa meongalo. — Mat. 11:19.

19. Oshike sha kwatelwa mo mokukala “omushamane e na omukulukadi umwe”?

¹⁹ “Omushamane e na omukulukadi umwe.” Ngeenge ou li mohombo ou na okudulika komufikamhango waJehova wopehovelo u na sha nohombo; okukala omushamane e na omukulukadi umwe nosho yo omukulukadi e na omushamane umwe. (Mat. 19:​3-9) Omulumenhu Omukriste ke na okuya moluhaelo. (Heb. 13:4) Ashike osho osha kwatela mo shihapu. Ou na okukala omudiinini komukulukadi woye noiho yandje elitulemo kovakainhu vamwe. — Job 31:1.

20. Omumwatate oha ulike ngahelipi kutya oha ‘file oshisho nawa’ oukwaneumbo waye?

²⁰ “E shii okufila oshisho nawa ovana novaneumbo laye aveshe.” Ngeenge ou li omutwe woukwaneumbo kala ho wanifa po nawa oinakuwanifwa yoye. Kala ho kwatele komesho elongelokalunga loukwaneumbo pandjikilile. Kala ho udifa pamwe nomukulukadi woye nosho yo ovana voye pandjikilile, ngaashi to dulu. Kwafela ovana voye va kale ve na ekwatafano liwa naJehova. (Ef. 6:4) Omumwatate, oo ha file oshisho nawa oukwaneumbo waye, ota ulike kutya ota dulu okufila oshisho eongalo. — Yelekanifa 1 Timoteus 3:5.

21. Ngeenge natango ku fi omuyakuliongalo, oshike to dulu okuninga?

²¹ Ovamwatate, ngeenge natango kamu fi ovayakuliongalo, alikana konakoneni pamwe neilikano oshitukulwa eshi. Konakoneni oiteelelwa yokuninga ovayakuliongalo nokulonga noudiinini, opo mu i wanife po. Diladileni kunghee mu hole Jehova, ovamwatate novamwameme. Hapupalifeni ohole yeni yoku va kwafela. (1 Pet. 4:​8, 10) Ngeenge owa kala ho kwafele ovamwatate novamwameme oto ka kala wa hafa. Jehova na nangeke noupuna eenghendabala deni dokuhanga elalakano lokuninga ovayakuliongalo. — Fil. 2:13.