JOSEF OMUARIMATIA ka li e shi shii kutya okwa hanga peni ouladi opo a popye nomupangeli waRoma. Pontius Pilatus okwa li a shiivika nawa e li omutangalali neenghono. Opo Jesus a fudikwe monghedi yefimaneko, omunhu umwe okwa li e nokupula ko oshimhu shaye kuPilatus. Ashike kasha li shidjuu okupopya naPilatus ngaashi Josef a li ta diladila. Konima eshi Pilatus a u da komukulunhu omunefele kutya Jesus okwa fya, okwe mu pa oshimhu shaye. Josef, oo a li a nyika oluhodi natango, okwa li a endelela nokuya konhele oko kwa dipaelwa Jesus. — Mark. 15:42-45.

• Mbela Josef Omuarimatia okwa li lyelye?

• Okwa li e nekwatafano lashike naJesus?

• Oshike sha ningifa ehokololo laye li kale lihokwifa kwoove?

Evaengeli la nwefwa mo laMarkus ola ifana Josef e li “omukwashiongalele shovakulunhu a fimana.” Moshinima eshi, omukwashiongalele shovakulunhu ota dulu ashike okukala oshilyo shOmhangu yoPombada yOvajuda ile olutu lomhangu yopombada. (Mark. 15:1, 43) Josef okwa li umwe womovawiliki voshiwana shaye, osho tashi ulike kutya okwa li ta dulu okuninga oshoongalele nomupangeli waRoma. Kashi noku tu kumwifa kutya Josef naye okwa li oshipuna. — Mat. 27:57.

Omhangu yoPombada yOvajuda i li ongudu oya li i tonde Jesus. Oilyo yayo oya li ya unganeka opo i mu dipaife. Josef okwa li a ifanwa “omulumenhu muwa omuyuki.” (Luk. 23:50) Ka li a fa ovanailonga vakwao vOmomhangu yoPombada yOvajuda, okwa li omunashili, e nonghalamwenyo yopaenghedi ya koshoka nokwa li a ninga keshe osho ta dulu opo a dulike koipango yaKalunga. Okwa li yo a “teelela ouhamba waKalunga,” nomolwaasho tashi dulika a li a ninga omuhongwa waJesus. (Mark. 15:43; Mat. 27:57) Okwa li e nohokwe metumwalaka laJesus molwaashi okwa li e hole oshili nouyuki.

Johannes 19:38 okwa ti kutya Josef okwa “kala omulongwa waJesus meholeko, osheshi a tila Ovajuda.” Josef okwa li a tila shike? Okwa li e shii kutya Ovajuda ove tonde Jesus nova li va tokola toko okukonda mo keshe umwe moshinagoga oo a itavela muye. (Joh. 7:45-49; 9:22) Ngeenge owa kondwa mo moshinagoga, Ovajuda vakweni otave ke ku tonda noku ku tala ko uhe li umwe womuvo. Nomolwaasho Josef a li a ongaonga oku va lombwela kutya okwa itavela muJesus. Ngeno okwe va lombwelele ngeno okwa kanifa efimano laye nosho yo ondondo yaye.

Josef hae aeke a li monghalo ya tya ngaho. She likolelela kuJohannes 12:42, “vahapu vomovakulunhu ve mu [Jesus] itavela, ndelenee vo inave shi hepaulula omolwOvafarisai, vaha kondwe mo moshinagoga.” Umwe oo a li naye monghalo ya faafana oNikodemus, oo naye a li oshilyo shomOmhangu yoPombada yOvajuda. — Joh. 3:1-10; 7:50-52.

Nonande Josef okwa li omuhongwa, ka li ta dulu oku shi popya moipafi. Osho osha li oupyakadi wa kwata moiti unene tuu eshi Jesus a ti: “Keshe tuu ou ta hepaulula nge povanhu, naame ohandi mu hepaulula puTate meulu. Ndele ou te lidimbike nge povanhu, naame ohandi mu lidimbike puTate meulu.” (Mat. 10:32, 33) Josef ka li e lidimbika Jesus, ashike ka li e nouladi woku mu hepaulula moipafi. Mbela ove oho mu hepaulula ngoo moipafi yovanhu?

Josef okwa li a ninga oshinima shiwa nOmbiibeli oya popya kutya ka li a yambidida Omhangu yoPombada yOvajuda eshi ya li i li omhinge naJesus. (Luk. 23:51) Vamwe ova  ti kutya Josef ka li po e shi Jesus a twalwa komhangu. Kashi na nee mbudi kutya oshike, Josef okwa li a uda nai omolwokuhenouyuki oo, ashike ka li ta dulu okuninga po sha.

Pefimbo lefyo laJesus, Josef okwa li a finda oumbada waye nokwa li a tokola okuyambidida ovahongwa vaJesus. Etokolo olo a li a ninga otali hangwa meendjovo daMarkus 15:43 odo tadi ti: “Okwe uya, e linyatipalifa komwenyo, ndele ta i kuPilatus, ndele ta indile ko oshimhu shaJesus.”

Josef okwa fa opo a li eshi Jesus a fya. Okwa li a uda kombinga yefyo laJesus ofimbo Pilatus ine li uda. Nomolwaasho eshi Josef a pula ko oshimhu shaye, omupangeli ‘okwa kala a kumwa, ngeenge ye [Jesus] okwa fya nale nokuli.’ (Mark. 15:44) Ngeno Josef okwa li a mona efyo linyanyalifi laJesus komuti womahepeko, mbela ngeno osho inashi mu linyengifa a konakone eliudo laye nokutokola a kanyatela omufika waye? Heeno, ngeno osho oshe mu linyengifa. Xuuninwa, Josef okwa ka katuka onghatu. Inaka kala vali omuhongwa womeholeko.

Omhango yOshijuda oya ti kutya ovo va tokolelwa efyo ove nokufudikwa ofimbo etango inali ningina. (Deut. 21:22, 23) Ovaroma ka va li ve na ko nasha, nova li hava efa oimhu yovakolokoshi ovo va dipawa yoolele komuti womahepeko ile ve i ekele moshovafi. Ashike Josef ka li a hala osho shi ningilwe Jesus. Josef okwa li e na ombila ipe ya  hokwa memanya, popepi nonhele oyo Jesus a dipaelwa. Molwaashi ombila oyo inai longifwa nande onale, osho otashi ulike kutya Josef opo ashike a tembukile kuJerusalem okudja koArimatia * nokwa li a hala okulongifa ombila oyo i li onhele yokupaka ovapambele vaye. (Luk. 23:53; Joh. 19:41) Eshi Josef a paka Jesus mombila yaye yomonakwiiwa osha li tashi ulike kutya okwa yandja nehalo liwa nosha li sha wanifa po exunganeko olo kutya Messias ota ka pakwa pamwe ‘noshipuna.’ — Jes. 53:5, 8, 9.

Omavaengeli aeshe ane okwa popya kutya konima eshi Jesus a kufwa ko komuti womahepeko, Josef okwa mangela oshimhu shaye moshiyata sholiina ndele te shi tula mombila yaye mwene. (Mat. 27:59-61; Mark. 15:46, 47; Luk. 23:53, 55; Joh. 19:38-40) Nikodemus, oo a li a eta omuvavo wedimba liwa, oye ashike a tumbulwa kondadalunde a kwafela Josef. Molwaashi ovalumenhu ovo vavali ova li ve neenghono, osha fa shi li ngaha kutya ovo aveke va li va humbata oshimhu. Ova li tava dulu okulongifa ovapiya va humbate oshimhu noku shi paka. Nonande ovalumenhu ovo ova li tava dulu okulongifa ovapiya, oshilonga osho va li va longa ka sha li sha nafangwa. Keshe umwe oo ta kwata oshimhu oku na okukala ina yela omafiku aheyali, nohashi ningifa keshe shimwe osho tava kwata shi kale inashi yela. (Num. 19:11; Hag. 2:13) Ovanhu va tya ngaho ova li ve na okukala kokule novanhu pefimbo loshivike shopaasa noka va li ve na oku i dana. (Num. 9:6) Eshi Josef a li ta unganeke epako laJesus, natango okwa li ta shekwa kovashikuli vakwao. Ashike pomhito opo okwa li e lilongekidila oilanduliko i na sha nokupaka Jesus monghedi yefimaneko nokwa li a ulika kutya oku li umwe womovashikuli vaKristus.

Kakele komahokololo Omavaengeli e na sha nepako laJesus, Josef Omuarimatia ina tumbulwa mo vali mOmbiibeli konima yepako laJesus, naasho osha etifa po epulo olo kutya: Oshike she mu ningilwa? Katu shi shii. Ashike okutala kwaasho twa kundafana, ope na oumbangi tau ulike kutya okwe lipopya e li Omukriste moipafi yovanhu. Pefimbo olo a li a taalela omayeleko nomapataneko, ouladi neitavelo laye ola enda tali pame shi dulife nale. Osho osha li oshihopaenenwa shiwa.

Ehokololo olo ola etifa po epulo olo atushe tu nokudilonga moule kulo, olo kutya: Mbela ope noshinima shonhumba osho hatu yandje unene elitulemo kusho, ngaashi ondondo, eifano, oiniwe, ekwatafano novapambele ile nokuli emanguluko letu, shi dulife ekwatafano letu naJehova?