STEFANUS okwa li a shakena nongudu yovalumenhu ovakwanyanya. Ovalumenhu ovo ova li oilyo yOmhangu yoPombada yOvajuda, ya fikama po movapanguli 71, nova li ve na eenghonopangelo dinene mokati koshiwana. Ova li va ongalekwa kOmupristeri Omukulunhu Kajafas, oo a li a kwatela komesho omhangu eemwedi dinini eshi Jesus a li a tokolelwa efyo. (Mat. 26:57, 59; Oil. 6:8-12) Eshi va twikila nokweeta ovapataneki ovanaipupulu, ova li va didilika sha shikumwifi kombinga yaStefanus, oshipala shaye osha li sha “foshipala shomweengeli.” — Oil. 6:13-15.

Ongahelipi Stefanus a li a dula okukala a ngungumana monghalo oyo ya li itilifi? Ofimbo Stefanus ina twalwa kOmhangu yoPombada yOvajuda, okwa kala e lipyakidila pauyadi noilonga yokuudifa nomhepo yaKalunga oya kala tai mu wilike. (Oil. 6:3-7) Eshi a li momhangu, omhepo oyo oya li tai longo muye, i li omuhekeleki nosho yo omudimbulukifi waye. (Joh. 14:16) Eshi Stefanus a li te lipopile nouladi, omhepo iyapuki oya li ye mu dimbulukifa oitukulwa 20 ile i dulife po yOmishangwa dOshiheberi, ngaashi sha shangwa mOilonga etukulwa 7. (Joh. 14:26) Ashike eitavelo laStefanus ola li la pamekwa eshi a li a mona memoniko Jesus e li ofika kolulyo laKalunga. — Oil. 7:54-56, 59, 60.

Otashi dulika nafye efiku limwe tu ke lihange twa taalela omatilifo nosho yo omahepeko. (Joh. 15:20) Ngeenge otwa kala hatu lipalula pandjikilile nEendjovo daKalunga nokukala twe lipyakidila moukalele, ohatu ka efa omhepo yaKalunga i longe mufye. Ohatu ka mona yo eenghono dokufinda omapataneko fimbo hatu kaleke po ombili yetu yokomutima. — 1 Pet. 4:12-14.