1. Otu shi shii ngahelipi kutya oilonga yokuninga ovanhu ovahongwa otai xupifa eemwenyo?

OILONGA yokuninga ovanhu ovahongwa otai xupifa eemwenyo. Osho otu shi shii ngahelipi? Eshi Jesus a yandja oshipango osho tashi hangwa muMateus 28:19, 20, okwa ti: ‘Indeni mu ka ninge ovanhu ovahongwa noku va ninginifa.’ Otu shi shii ngahelipi kutya eninginifo ola fimana? Oli li oshiteelelwa kwaavo tava kongo exupifo. Omuninginifwa oku na okukala e na eitavelo kutya exupifo ole uya po ashike omolwekuliloyambo laJesus nenyumuko laye. Nomolwaasho omuyapostoli Petrus a lombwela Ovakriste vakwao a ti: “Eninginifo olo tali mu xupififa kunena okupitila menyumuko laJesus Kristus.” (1 Pet. 3:21) Onghee hano, ngeenge omuhongwa mupe okwa ninginifwa, kungaho oha kala e na eteelelo loku ka kala nomwenyo fiyo alushe.

2. Metwokumwe na 2 Timoteus 4:1, 2, otu na okukala ovahongi va tya ngahelipi?

² Opo tu pondole moilonga yokuninga ovanhu ovahongwa, otu na okukala ‘ovahongi vawa.’ (Lesha 2 Timoteus 4:1, 2.) Omolwashike mbela? Omolwaashi Jesus okwe tu lombwela a ti: ‘Indeni mu ka ninge ovanhu ovahongwa noku va honga.’ Omuyapostoli Paulus okwa ti natu ‘kendabale’ okuwanifa po oilonga oyo, ‘molwaashi ngeenge otwa ningi ngaho, ohatu ke lixupifa fye vene nosho yo ovo tave tu pwilikine.’ Omolwetomheno olo okwa weda ko a ti: “Pashukila . . . ehongo loye.” (1 Tim. 4:16) Otwa hala okuhonga kwetu ku kale kwa denga mbada, molwaashi okwa pambafana noilonga yokuudifa.

3. Oshike hatu ka kundafana moshitukulwa eshi shi na sha nokuninga omakonakonombiibeli?

³ Ohatu hongo pandjikilile ovanhu omamiliyona oshili oyo tai  hangwa mOmbiibeli. Ngaashi twa kundafana moshitukulwa sha tetekela, otwa hala okushiiva nghee hatu dulu okukwafela vahapu vomuvo fiyo osheshi va ninginifwa nova ninge ovahongwa vaJesus Kristus. Moshitukulwa eshi ohatu ka kundafana oinima itano ya wedwa po oyo omuhongi keshe wOmbiibeli a pumbwa okuninga, opo a kwafele omukonakoni waye a ninge exumokomesho fiyo osheshi a ninginifwa.

4. Omolwashike omuhongi a pumbwa elipangelo ngeenge ta kwatele komesho ekonakonombiibeli? (Tala yo eshangelo lopedu.)

⁴ Otu hole osho hatu hongo kombinga yEendjovo daKalunga. Otashi dulika tu yelekwe tu popye unene kombinga yaasho tu hole. Onghee hano, ou ta kwatele komesho ekonakono lOshungonangelo, Ekonakonombiibeli lEongalo, ile ta konakona Ombiibeli naumwe, haye e na okukala ta popi unene. Omuhongi opo a longife Ombiibeli ngeenge ta hongo okwa pumbwa elipangelo. Ina pumbwa okuyelifa okanima keshe oko e shii kombinga yovelishe ile yoshitukulwa osho tava kundafana. * (Joh. 16:12) Yelekanifa eshiivo lOmbiibeli olo wa li u na eshi opo wa ninginifwa naalo u na paife. Eshi opo wa ninginifwa, naave owa li ashike u shii omahovelohongo Ombiibeli. (Heb. 6:1) Oshe ku pula oule womido opo u kale u na eshiivo olo u na paife. Onghee hano, ino kendabala okundubila omukonakoni mupe ouyelele aushe poshikando.

5. (a) Metwokumwe no 1 Ovatessaloniki 2:13, otwa hala omukonakonimbiibeli wetu a ude ko shike eshi hatu konakona naye? (b) Ongahelipi hatu dulu okuladipika omukonakoni a kale ha lombwele vamwe oinima oyo te lihongo?

⁵ Otwa hala ovakonakoni vetu va ude ko kutya osho tave lihongo osha dja mEendjovo daKalunga da nwefwa mo. (Lesha 1 Ovatessaloniki 2:13.) Ongahelipi hatu dulu okuninga ngaho? Ladipika omukonakoni woye a kale ta lombwele vamwe oinima oyo te lihongo. Ponhele yokukala ashike oove alushe to yelifile omukonakoni woye Omishangwa, mu pula a kale ta yelifa dimwe. Kwafela omukonakoni a mone nghee Eendjovo daKalunga tadi dulu oku mu kwafela pauhandimwe. Pula omapulo a wedwa po, opo u mone osho omukonakoni ta diladila ile e uditile omushangwa oo mwa lesha. (Luk. 10:25-28) Pashihopaenenwa, oto dulu oku mu pula kutya: “Omushangwa ou otau ku kwafele ngahelipi shi na sha nomaukwatya aJehova?” “Oinima oyo we lihonga mOmbiibeli otai ku kwafele ngahelipi?” “Ou uditile ngahelipi osho to lihongo?” (Omayel. 20:5) Osho sha fimana oshosho kutya ongeenge omukonakoni e hole osho te lihongo noku shi tula moilonga, ndele kashi na sha naasho e shii.

6. Omolwashike shiwa okuya nomuudifi e na owino komukonakonimbiibeli woye?

 ⁶ Ngeenge to konakona Ombiibeli naumwe, mbela oho i ko ngoo novaudifi ovo ve na owino? Ngeenge osho ho ningi, oto dulu okukala ho va pula va konenene onghedi omo ho konakona novakonakoni voye. Va pula yo nghee ho longifa Ombiibeli ngeenge to hongo. Owa pumbwa okukala omulininipiki ngeenge owa hala okuxwepopaleka ounghulungu woye wokuhonga. (Yelekanifa nOilonga 18:24-26.) Konima yaasho, pula omuudifi oo ngeenge omukonakoni oku udite ko ngoo osho te lihongo. Oto dulu yo okupula omuudifi oo a konakone nomukonakoni oo ngeenge owa di po oule woshivike shimwe ile i dulife po. Osho otashi ka kwafela omukonakoni a kale ha konakona pandjikilile, nota ka mona kutya osha fimana okuninga ngaho. Ino kala u udite kutya oku li omukonakoni “woye,” nokape na vali umwe ta dulu okukonakona naye. Osho sha fimanenena, owa halela omukonakoni osho sha denga mbada, opo a ninge exumokomesho eshi te lihongo oshili.

7. Oshike tashi ka kwafela omukonakoni a kale a tunhukwa kwaasho te lihongo?

⁷ Omukonakoni okwa pumbwa okumona exwamo loye nonghee wa tomhwa keshiivo olo tali hangwa mOmbiibeli. (1 Tes. 1:5) Osho otashi ke mu kwafela a kale a tunhukwa kombinga yaasho te lihongo. Ngeenge otashi shiiva mu lombwela nghee omafinamhango Ombiibeli e ku kwafela pauhandimwe. Osho otashi ke mu kwafela a mone kutya Ombiibeli oi na omayele taa longo, oo taa dulu yo oku mu kwafela.

8. Oshike vali to dulu okuninga opo u kwafele omukonakonimbiibeli woye, nomolwashike u na okuninga ngaho?

⁸ Eshi tamu konakona, lombwela omukonakoni woye oihopaenenwa yashili yomonghalamwenyo yaavo va li va taalela omashongo a faafana naao a taalela, nanghee ve a pondola. Oto dulu okuya ko naumwe oo oshihopaenenwa shaye tashi dulika shi ka etele ouwa omukonakoni oo. Ile oto dulu okulongifa oimoniwa ya pambafana tai tungu oyo i li ko-jw.org i na oshipalanyole “Ombiibeli ohai lundulula onghalamwenyo yovanhu.” * Oitukulwa ya tya ngaho nosho yo ouvidio otai ka kwafela omukonakoni woye a mone nghee shi li pandunge okutula moilonga omafinamhango Ombiibeli monghalamwenyo yaye.

9. Ongahelipi to dulu okuladipika omukonakoni woye a lombwele ovapambele nookaume kaye osho te lihongo?

⁹ Ngeenge okwa hombola ile okwa hombolwa, mbela kaume kaye kopahombo naye ota  konakona? Ngeenge iha konakona, naye mu shiva a kale pekonakono. Ladipika omukonakoni woye a lombwele ovapambele nosho yo ookaume kaye osho te lihongo. (Joh. 1:40-45) Ngahelipi mbela? Oto dulu oku mu pula kutya: “Ongahelipi to dulu okuyelifila ovapambele voye oshitwa eshi?” Ile omushangwa ulipi to ka longifa opo u tomhe kaume koye shi na sha naasho?” Kungaho, oto ka deula omukonakoni woye a kale omuhongi. Opo nee ngeenge okwa wana ota dulu okukufa ombinga moukalele e li omuudifi ina ninginifwa. Oto dulu oku mu pula ngeenge oku shii vali omunhu umwe oo a hala okukonakona Ombiibeli. Ngeenge okwa ti oku shii umwe, moneni omunhu oo diva opo a konakone naye. Mu ulikila okavidio Oshike hashi ningwa pekonakonombibeli? *

10. Ngaashi sha popiwa mo 1 Ovatessaloniki 2:7, 8, ongahelipi omuhongi ta dulu okushikula oshihopaenenwa shaPaulus?

¹⁰ Ovahongi ove na okuulika kutya ove na ko nasha novakonakonimbiibeli vavo. Kala ho va tale ko ve li ovamwatate novamwameme vomonakwiiwa. (Lesha 1 Ovatessaloniki 2:7, 8.) Itashi ka kala shipu kuvo okweefa po ookaume kavo, ovo vehe fi Eendombwedi, nokuninga omalunduluko opo va longele Jehova. Otwa pumbwa oku va kwafela va konge ookaume kashili meongalo. Kala kaume kovakonakoni voye, nokukala navo efimbo, ndele hangeenge ashike tamu konakona navo. Oto ka ulika kutya ou na ko nasha navo ngeenge owa kala ho va dengele ongodi, ho va tumine etumwalaka, ile ho va talele po pauxupi.

11. Otwa hala ovakonakoni vetu va mone shike meongalo, nomolwashike?

¹¹ Eyeletumbulo limwe ola ti: “Okaana kake fi ashike kaina oo e ka dala otyanghu.” Onghee ohatu dulu okutya: “Eongalo alishe ohali kufa ombinga mokuninga omunhu omuhongwa.” Nomolwaasho ovaudifi ovo hava pondola ohava shiivififa ovakonakonimbiibeli vavo kuvamwe meongalo ovo tava dulu oku va nwefa mo nawa. Ovakonakoni otava dulu okuhafela eendafano noshiwana shaKalunga, osho tashi dulu oku va pameka pamhepo nosho yo pamaliudo. Otwa hala omukonakoni wetu keshe a kale e udite kutya oku li oshitukulwa sheongalo nosho yo shoukwaneumbo wetu wopamhepo. Otwa hala va nanwe kohole yovamwatate novamwameme. Kungaho, otashi ke va kwafela va efe po okweendafana naavo itave ke va kwafela va kale ve hole Jehova. (Omayel. 13:20) Ngeenge ookaume kavo, ovo vehe fi Eendombwedi, ova kala ihava endafana vali navo, otashi ke va kwafela va mone ookaume kashili mehangano laJehova. — Mark. 10:29, 30; 1 Pet. 4:4.

12. Omolwashike tu na okulombwela omukonakoni wetu shi na sha neliyapulo lopaKriste neninginifo?

¹² Kala ho popi alushe kombinga yeliyapulo lopaKriste neninginifo. Komesho yaaishe, elalakano letu li na sha nokukonakona Ombiibeli naumwe olo oku va kwafela va longele Jehova nokuninginifwa. Konima yeemwedi dinini, eshi omukonakoni a hovela okukonakona pandjikilile nosho yo eshi a hovela okukala pokwoongala, na shiive kutya elalakano lokukonakona Ombiibeli oku mu kwafela a longele Jehova noku ninge Ondombwedi yaye.

13. Eenghatu dilipi omukonakoni a pumbwa okukatuka opo a kale a wana okuninginifwa?

¹³ Ope na oinima imwe yonhumba oyo omukonakonimbiibeli oo a hala okuninginifwa a pumbwa okuninga. Shotete, omukonakoni okwa pumbwa okushiiva Jehova nokukala e na eitavelo muye. (Joh. 3:16; 17:3) Opo nee, okwa pumbwa okupanga oukaume naJehova nokuhovela okweendafana neongalo. (Heb. 10:24, 25; Jak. 4:8) Mokweendela kwefimbo, omukonakoni okwa pumbwa okweefa po oilonga inai koshoka nokulivela ombedi komanyono aye. (Oil. 3:19) Oku na yo okulombwela vamwe shi na sha naasho a itavela paife. (2 Kor. 4:13) Opo nee okwa pumbwa okuliyapulila Jehova, noku shi ulika moipafi eshi ta ninginifwa. (1 Pet. 3:21; 4:2) Olo otali ka kala efiku litunhula kukeshe umwe. Ngeenge omukonakoni okwa wanifa po oinima aishe oyo ya pumbiwa, mu pupula kombuda noku mu ladipika a twikile okuninga ngaho.

14. Ongahelipi omuhongi ta dulu okukonakona exumokomesho lomukonakoni waye?

¹⁴ Otwa pumbwa elididimiko ngeenge hatu kwafele omukonakoni a ninge exumokomesho e liyapulile Jehova noku ninginifwe. Ashike otwa pumbwa yo okumona kutya okwa halelela ngoo shili okulongela Jehova Kalunga. Mbela omukonakoni oha ulike ngoo kutya okwa hala okudulika koipango yaJesus? Ile oku na ashike ohokwe mOmbiibeli?

15. Oshike tashi ka ulikila omuhongi kutya omukonakoni okwa wana okuninginifwa?

¹⁵ Kala ho konakona pandjikilile exumokomesho olo omukonakoni ta ningi. Pashihopaenenwa, mbela oha ulike ngoo kutya oku hole Jehova? Oha ilikana ngoo kuJehova? (Eps. 116:1, 2) Oha lesha ngoo Ombiibeli? (Eps. 119:97) Ohe uya ngoo kokwoongala pandjikilile? (Eps. 22:22) Okwa ninga ngoo omalunduluko  oo a pumbiwa monghalamwenyo? (Eps. 119:112) Okwa hovela ngoo okulombwela ovapambele nosho yo ookaume kaye kombinga yaasho te lihongo? (Eps. 9:1) Naasho sha fimanenena, mbela okwa hala okuninga Ondombwedi yaJehova? (Eps. 40:8) Ngeenge omukonakoni ina ninga exumokomesho mushimwe shomwaayo, kendabala noukeka u mone kutya omolwashike, ndele tamu kundafana kombinga yaasho nolukeno nosho yo nombili. *

16. Oshike tashi ka ufa kutya owa pumbwa okweefa po okukonakona Ombiibeli naumwe?

¹⁶ Efimbo nefimbo, tala ngeenge owa pumbwa okweefa po okukonakona Ombiibeli naao ita ningi exumokomesho. Lipula kutya: ‘Mbela omukonakoni ihe lilongekida komesho yefimbo? Oha faula omafimbo amwe okwoongala? Oku na natango elihumbato inali koshoka? Oku li natango oshilyo shelongelokalunga loipupulu?’ Ngeenge enyamukulo komapulo oo oheeno, okutwikila okukonakona nomunhu a tya ngaho, osha fa ashike to hongo omunhu okuyowa oo ina hala okututa. Ngeenge omukonakoni ke na olupandu laasho te lihongo, noina hala okuninga omalunduluko, omolwashike u na okutwikila okukonakona naye?

17. Metwokumwe na 1 Timoteus 4:16, oshike osho ovahongi vOmbiibeli aveshe ve na okuninga?

¹⁷ Oshinakuwanifwa shokuninga ovanhu ovahongwa osha fimana, notwa hala oku va kwafela va ninge exumokomesho fiyo va ninginifwa. Nomolwaasho tu na okulongifa Ombiibeli eshi hatu hongo, hatu shi ningi nexwamo notwa tomhwa. Otu na okuladipika omukonakoni a konge ookaume meongalo. Otu na okudivilika elalakano lokuliyapulila Jehova nokuninginifwa, nokukonakona kanini nakanini exumokomesho olo omukonakoni ta ningi. (Tala oshimhungu pepandja 13, “ Osho ovahongi va pumbwa okuninga opo va kwafele ovakonakoni va ninginifwe.”) Otwa hafa eshi hatu kufa ombinga moilonga ei tai xupifa eemwenyo. Natu kale twa tokola toko okuninga ngaashi hatu dulu opo tu kwafele ovakonakonimbiibeli va kale va wana okuninginifwa.