OSHITUKULWA SHOKUKONAKONWA 41
Nghee to dulu okukwafela omukonakonimbiibeli a ninge exumokomesho — Oshitukulwa shotete
“Osha yela kutya onye onhumwafo yaKristus ya shangwa kufye tu li ovapiya vaKalunga.” — 2 KOR. 3:3.
EIMBILO 78 ‘Okuhonga Eendjovo daKalunga’
EXUKU LOSHITUKULWA *
Mbela eongalo alishe ihali kala la hafa ngeenge li wete omukonakonimbiibeli oo ohole yaye ya enda tai kulu ta ninginifwa? (Tala okatendo 1)
1. Ongahelipi 2 Ovakorinto 3:1-3 tave tu kwafele tu kale twa lenga oufembanghenda wokukonakona Ombiibeli novanhu fiyo osheshi va ninginifwa? (Tala efano kombada yoshifo.)
OHO kala u udite ngahelipi ngeenge u wete omukonakonimbiibeli womoshitukulwa omo hamu longele eongalo leni ta ninginifwa? Osha yela kutya ohashi ku hafifa neenghono. (Mat. 28:19) Ngeenge oove wa konakona nomuhongwa oo mupe, iho kala tuu wa tunhukwa eshi ta ninginifwa! (1 Tes. 2:19, 20) Ovahongwa ovo opo va ninginifwa ove li “eenhumwafo depopilo,” kadi fi ashike daavo va konakona navo, ndele odeongalo alishe. — Lesha 2 Ovakorinto 3:1-3.
2. (a) Epulo la fimana lilipi hatu ka kundafana, nomolwashike? (b) Ekonakonombiibeli oshike? (Tala eshangelo lopedu.)
2 Oshihafifa neenghono okuuda kutya omido nhee da pita, omuvalu wovakonakonimbiibeli * owa li hau kala 10 000 000 lwaapo mounyuni aushe omwedi keshe. Meedula odo tuu odo, ovanhu ve dulife 280 000 ova li va ninginifwa ve li Eendombwedi daJehova, nove li ovahongwa vape vaJesus Kristus. Ongahelipi hatu dulu okukwafela ovakonakonimbiibeli ovo eemiliyona fiyo osheshi va ninginifwa? Jehova okwa yandja omhito kovanhu va ninge ovahongwa vaKristus, nomolwaashi hatu ningi ngaashi hatu dulu tu va kwafele meendelelo va ninge exumokomesho fiyo osheshi va ninginifwa. Efimbo otali endelele neenghono! — 1 Kor. 7:29a; 1 Pet. 4:7.
3. Oshike hatu ka kundafana moshitukulwa eshi shi na sha nokukwatela komesho ekonakonombiibeli?
3 Molwaashi okuninga ovanhu ovahongwa oshinima sha endelela, oitaimbelewa oya ninga omapekapeko e na sha nanghee hatu dulu okukwafela ovakonakoni va ninge exumokomesho diva fiyo osheshi va ninginifwa. Moshitukulwa eshi, naashi tashi shikula ko, ohatu ka tala nghee hatu lihongo koimoniwa yovakokolindjila, yovatumwa nosho yo yovapashukilishikandjo. * (Omayel. 11:14; 15:22) Ova popya osho ovahongi vOmbiibeli nosho yo ovakonakoni ve na okuninga opo ekonakonombiibeli li pondole neenghono. Moshitukulwa eshi ohatu ka kundafana oinima itano oyo omukonakoni keshe e na okuninga, opo a dule okuninga exumokomesho meendelelo fiyo osheshi a ninginifwa.
KALENI HAMU KONAKONA OSHIVIKE KESHE
Pula omukonakoni ngeenge otamu dulu okukala hamu konakona Ombiibeli mu li omutumba (Tala okatendo 4-6)
4. Oshike twa pumbwa okushiiva shi na sha nekonakonombiibeli loposhivelo sheumbo?
4 Ovamwatate novamwameme vahapu ohava ningi ekonakonombiibeli poshivelo sheumbo. Nonande osho ohashi kwafele omunhu a kale e na ohokwe mOmbiibeli, eenghundafana odo ohadi kala pauxupi noihadi ningwa oshivike keshe. Opo ovamwatate va kulike ohokwe yovanhu ovo, vamwe ohava kufa ko omauyelele ovanhu ovo ve na ohokwe noku va dengela ile oku va tumina omatumwalaka, opo va kundafane navo Omishangwa donhumba pauxupi. Vamwe otashi dulika va kale hava kundafana oule weemwedi nopehe na okukonakona Ombiibeli. Mbela omukonakoni a tya ngaho ota ka ninga ngoo exumokomesho fiyo osheshi e liyapulila Jehova nokuninginifwa ngeenge ohava lesha po ashike oule wokafimbo kanini? Otashi dulika hasho.
5. Metwokumwe naLukas 14:27-33, Jesus okwa divilika shike osho tashi tu kwafele moilonga yokuninga ovanhu ovahongwa?
5 Pomhito imwe, Jesus okwa longifa efaneko olo tali kwafele omunhu osho e na okuninga opo a ninge omuhongwa waye. Okwa popya kombinga yaumwe oo a hala okutunga oshungongulu nosho yo nohamba oyo ya hala okuya koita. Jesus okwa popya kutya omutungi oku na okukala “omutumba tete ndele ta valula a tale ngeenge oku na oitungifo ya wana” yokumanifa oshungongulu, ofimbo ohamba oi na okukala “omutumba tete nokukundafana navakwao” opo i tale ngeenge etangakwaita layo ole lilongekidila ngoo olwoodi nawanawa. (Lesha Lukas 14:27-33.) Sha faafana, Jesus okwa ti kutya omunhu oo a hala okukala omuhongwa waye oku na okukonakona nawa osho sha kwatelwa mo mokukala omushikuli waye. Omolwetomheno olo, otwa hala okuladipika ovakonakonimbiibeli vetu tu kale hatu konakona navo oshivike keshe. Ongahelipi hatu dulu okuninga ngaho?
6. Oshike twa pumbwa okuninga opo tu kale tu na ovakonakoni tava xumu komesho?
6 Enda to weda ko kefimbo olo hamu konakona poshivelo sheumbo. Otamu dulu yo okukala hamu kundafana naye eevelishe donhumba efimbo keshe tamu mu talele po. Ngeenge omuneumbo ke na oupyakadi u na sha nokukala hamu kundafana oule wefimbo, oto dulu oku mu pula mu konge onhele opo tamu dulu okukonakonena. Enyamukulo lomuneumbo otali ka ulika ngeenge okwa hala ngoo shili okukonakona Ombiibeli ile hasho. Mokweendela ko kwefimbo, oto dulu oku mu pula mu kale hamu konakona luvali moshivike opo a ninge exumokomesho diva. Ndele osha fimana mu kale hamu konakona lumwe ile luvali oshivike keshe.
KALA HO LILONGEKIDILE EKONAKONO KESHE
Kala ho lilongekidile ekonakonombiibeli, nokuulikila omukonakoni nghee e na okulilongekida (Tala okatendo 7-9)
7. Ongahelipi omuhongi wOmbiibeli ta dulu okulilongekidila ekonakono keshe?
7 U li omuhongi wOmbiibeli, owa pumbwa okukala ho lilongekidile ekonakono keshe. Oto dulu okuhovela okulilongekida moshishangomwa osho hamu lesha, nokutala omishangwa odo da etwa mo. Kaleka momadiladilo oitwa ya fimana. Diladila koshipalanyole, oupalanyole, omapulo, omishangwa odo tadi ‘leshwa,’ omafano nosho yo ouvidio ovo va yelifa oshikundafanwa. U na omukonakoni momadiladilo, dilonga komesho yefimbo nghee to ka honga ouyelele oo monghedi ipu noya yela, opo e ke u ude ko nawa noku u tula moilonga. — Neh. 8:8; Omayel. 15:28a.
8. Eendjovo domuyapostoli Paulus odo tadi hangwa mOvakolossi 1:9, 10, otadi tu hongo shike shi na sha nokwiilikanena ovakonakonimbiibeli vetu?
8 Eshi to lilongekida, ilikana kuJehova shi na sha nomukonakonimbiibeli woye nosho yo eemhumbwe daye. Pula Jehova e ku kwafele u honge monghedi oyo tai hange omutima womukonakoni. (Lesha Ovakolossi 1:9, 10.) Kendabala okumona ngeenge ope na oinima yonhumba oyo tai ka kala idjuu komukonakoni okuuda ko ile itaa ka twa kumwe nayo. Kaleka momadiladilo kutya elalakano loye oku mu kwafela fiyo osheshi a ninginifwa.
9. Ongahelipi omuhongi wOmbiibeli ta dulu okukwafela omukonakoni a kale he lilongekidile ekonakono keshe? Shi yelifa.
9 Otu na elineekelo kutya omukonakoni oo ha konakona pandjikilile ohashi mu kwafele a pandule Jehova naJesus mwaashishe osho e tu ningila noha kala a hala okulihonga shihapu. (Mat. 5:3, 6) Opo omukonakoni a kale ha mono ouwa pekonakono, okwa pumbwa okulipakamo mwaasho te lihongo. Opo u mu kwafele a ninge ngaho, mu ulikila nghee e na okulilongekidila ekonakono keshe mokukala ha lesha komesho yefimbo, nokutala nghee ta dulu okutula moilonga ouyelele wa tya ngaho. Ongahelipi to dulu oku mu kwafela a kale he lilongekida? Lilongekida oshileshwa pamwe nomukonakonimbiibeli, noku mu ulikila nghee e na oku shi ninga. * Mu yelifila nghee e na okumona omanyamukulo omapulo oshikundafanwa, nanghee okudivilika oitwa ya fimana nomautumbulilo taku ke mu kwafela a dimbuluke enyamukulo. Opo nee, to mu pula a yandje enyamukulo noitya yaye mwene. Ngeenge okwa ningi ngaho, oto ka mona kutya oku udite ko ouyelele oo tamu kundafana. Ashike ope na vali oshinima shimwe osho to dulu okuninga opo u ladipike omukonakonimbiibeli woye.
MU HONGA A KALE HA POPI NAJEHOVA EFIKU KESHE
Honga omukonakonimbiibeli nghee e na okupopya naJehova (Tala okatendo 10-11)
10. Omolwashike sha fimana komukonakoni okulesha Ombiibeli pandjikilile, noshike a pumbwa okuninga opo a mone mo ouwa pauyadi?
10 Kakele kokukonakona oshivike keshe, omukonakoni ota dulu okumona ouwa mokukala ha ningi oinima imwe kuye mwene oshivike keshe. Okwa pumbwa okukala ha popi naJehova. Ngahelipi mbela? Omokupwilikina kuJehova nokupopya naye. Ota dulu okupwilikina kuKalunga mokulesha Ombiibeli efiku keshe. (Jos. 1:8; Eps. 1:1-3) Mu ulikila nghee e na okulongifa “Elandulafano lokulesha Ombiibeli” olo li li ko jw.org. * Opo u mu kwafele a mone ouwa melesho lOmbiibeli, mu ladipika a kale ta dilonga kwaasho e lihonga kombinga yaJehova, nanghee e na okutula moilonga osho e lihonga monghalamwenyo yaye. — Oil. 17:11; Jak. 1:25.
11. Ongahelipi omukonakoni ta dulu okuhongwa nghee e na okwiilikana kuJehova, nomolwashike sha fimana okwiilikana kuye pandjikilile?
11 Ladipika omukonakonimbiibeli woye a kale ha ilikana kuJehova efiku keshe. Kala ho ilikana tashi di komutima pehovelo nopexulilo lekonakono keshe, noku mu kwatela meilikano. Eshi ta pwilikine komailikano oye, ote ke lihonga nghee e na okwiilikana kuJehova Kalunga tashi di komutima, te shi ningi medina laJesus Kristus. (Mat. 6:9; Joh. 15:16) Diladila nghee okulesha Ombiibeli efiku keshe (okupwilikina kuJehova) nosho yo okwiilikana (okupopya naJehova) taku ka kwafela omukonakoni woye a ehene popepi elela naKalunga! (Jak. 4:8) Ngeenge okwa kala ha ningi ngaho efiku keshe, otashi ke mu kwafela a ninge exumokomesho fiyo osheshi e liyapulila Jehova nokuninginifwa.
MU KWAFELA A PANGE OUKAUME NAJEHOVA
12. Ongahelipi omuhongi ta dulu okukwafela omuhongwa a pange oukaume naJehova?
12 Osho omukonakoni te lihongo pekonakonombiibeli itashi ka kuma ashike omadiladilo aye, ndele otashi ka kuma yo nomutima waye. Omolwashike mbela? Omutima wetu, oo wa kwatela mo omahalo nosho yo omaliudo, ohau tu linyengifa tu katuke eenghatu. Jesus okwa li a honga ovanhu oinima ihapu, nova li ve hole okupwilikina kuye. Ashike ovanhu ova li have mu shikula molwaashi ehongo laye ola li hali kumu omitima davo. (Luk. 24:15, 27, 32) Omukonakoni woye okwa pumbwa okutala ko Jehova e li Omunhu wolela, oo ta dulu okupanga oukaume naye noku mu tala ko e li Xe, Kalunga naKaume kaye. (Eps. 25:4, 5) Eshi tamu konakona Ombiibeli, mu kwafela a mone omaukwatya mawa aKalunga. (Ex. 34:5, 6; 1 Pet. 5:6, 7) Efimbo keshe tamu konakona, kala ho divilike omaukwatya mawa aJehova. Mu kwafela a kale a lenga omaukwatya mawa aJehova ngaashi ohole, olune nosho yo olukeno. Jesus okwa popya kutya “oshipango shinenenene noshotete” osho ‘okuhola Jehova Kalunga.’ (Mat. 22:37, 38) Kwafela omukonakoni woye a kale e hole neenghono Kalunga.
13. Yandja oshihopaenenwa shanghee umwe ta dulu okukwafela omukonakoni e lihonge komaukwatya mawa aJehova.
13 Kala ho yelifile omukonakoni eshi tamu konakona kutya omolwashike u hole Jehova. Osho otashi ka kwafela omukonakoni a mone kutya okwa pumbwa okuninga kaume kaKalunga nokupanga oukaume naye. (Eps. 73:28) Pashihopaenenwa, mbela moshishangomwa omu na etumbulo ile omushangwa oo wa kuma omutima woye, tau ulike komaukwatya aJehova ngaashi ohole, ounongo, ouyuki ile eenghono? Lombwela omukonakonimbiibeli woye ouyelele oo noku mu yelifila kutya olo olo limwe lomomatomheno mahapu eshi u hole Tate yetu womeulu. Ope na vali oshinima shimwe osho omukonakoni keshe e na okuninga opo a ninge exumokomesho fiyo osheshi a ninginifwa.
MU LADIPIKA A KALE HA ONGALA PANDJIKILILE
Ladipika omukonakoni woye diva ngaashi tashi dulika a kale he uya kokwoongala! (Tala okatendo 14-15)
14. Ongahelipi Ovaheberi 10:24, 25 tava kwafele omukonakoni a kale a lenga okwoongala opo a ninge exumokomesho?
14 Atusheni, otwa hala ovakonakoni vetu va ninge exumokomesho fiyo va ninginifwa. Onghedi imwe omo hatu dulu oku va kwafela omoku va ladipika va kale hava ongala pandjikilile. Ovahongi vOmbiibeli ovanawino ova ti kutya ovakonakoni ovo hava ongala pandjikilile ohava ningi exumokomesho meendelelo. (Eps. 111:1) Ovahongi vamwe ohava yelifile ovakonakoni vavo kutya kokwoongala ohave lihongo ko oinima ihapu oyo ihave lihongo pekonakonombiibeli. Lesha Ovaheberi 10:24, 25 pamwe nomukonakoni woye, noku mu yelifila nghee sha fimana okukala pokwoongala. Mu ulikila okavidio Oshike hashi ningwa pOlupale lOuhamba? * Kwafela omukonakoni woye a kale iha faula kokwoongala.
15. Oshike tu na okuninga opo tu twe omukumo omukonakoni a kale ha ongala pandjikilile?
15 Oshike u na okuninga ngeenge omukonakoni woye ina enda ko nale kokwoongala ile iha ongala pandjikilile? Mu lombwela nexwamo osho we lihonga pokwoongala opo kwa di ko. Osho otashi ke mu twa omukumo neenghono shi dulife ashike oku mu shiva kokwoongala. Mu pa Oshungonangelo nosho yo okafo Onghalamwenyo yopaKriste noilonga yokuudifa, oishangomwa oyo tai longifwa omwedi oo. Mu ulikila osho tashi ka kundafanwa pokwoongala kwa shikula ko, noku mu pula osho e na ohokwe musho unene. Osho omukonakoni woye ta ka uda pokwoongala oshikando shotete otashi ke mu kuma shi dulife osho a uda nokumona komalongelokalunga amwe. (1 Kor. 14:24, 25) Ota ka mona ko vamwe ovo a hala okuhopaenena, notave ke mu kwafela a ninge exumokomesho fiyo a ninginifwa.
16. Oshike tu na okuninga opo tu kwafele omukonakoni wetu fiyo a ninginifwa, nohatu ka kundafana shike moshitukulwa tashi shikula ko?
16 Ongahelipi hatu dulu okukwafela omukonakonimbiibeli wetu fiyo a ninginifwa? Ohatu ka kwafela omukonakoni keshe a kale a lenga ekonakono moku mu ladipika a kale ha konakona oshivike keshe nokukala he lilongekidile ekonakono keshe. Otwa hala yo oku mu ladipika a kale ha popi naJehova efiku keshe nokupanga oukaume naye. Otwa hala oku mu twa omukumo a kale he uya kokwoongala. (Tala oshimhungu pepandja 12 “ Osho ovakonakoni va pumbwa okuninga opo va ninge exumokomesho fiyo va ninginifwa.”) Onghee hano, oshitukulwa sha shikula ko otashi ka kundafana oinima itano oyo ovahongi vOmbiibeli va pumbwa okuninga, opo va kwafele ovakonakoni vavo va ninge exumokomesho fiyo va ninginifwa.
EIMBILO 76 Oho kala u udite ngahelipi?
^ okat. 5 Okuhonga omunhu oku mu kwafela a kale “ha diladila, e udite nokukatuka shimwe shi lili.” Omushangwa womudo womo 2020, oo wa kanghamena kuMateus 28:19, otau tu dimbulukifa oshinakuwanifwa sha fimana shokukonakona Ombiibeli novanhu, noku va honga fiyo osheshi va ninga ovashikuli vaJesus Kristus va ninginifwa. Moshitukulwa eshi, naashi tashi shikula ko, ohatu ka tala nghee hatu dulu okuxwepopala moilonga oyo ya fimana.
^ okat. 2 OUTUMBULILO WA YELIFWA: Ngeenge ohamu kundafana pandjikilile tamu longifa Ombiibeli, kungaho oto ningi ekonakonombiibeli. Oho lopota omunhu e li omukonakonimbiibeli konima eshi mwa kundafana naye oikando ivali okudja eshi we mu ulikila nghee ekonakonombiibeli hali ningwa, nou shii kutya ekonakonombiibeli olo otali twikile.
^ okat. 3 Moitukulwa ei omwa kwatelwa yo omaetepo a pambafana oo e li koshi yoshipalanyole “Nghee to dulu okuninga omakonakonombiibeli taa xumu komesho” oyo ya pita mokafo Oukalele wete wOuhamba kOshiingilisha kaJuli 2004 fiyo Mei 2005.
^ okat. 9 Taleni okavidio kominute nhee Honga omukonakonimbiibeli nghee e na okulilongekida. Inda ko jw.org®, ndele to findi opo pa shangwa ONGULUMAMBO > OUVIDIO > OKWOONGALA NOUKALELE WETU > OKUXWEPOPALEKA OUNGHULUNGU WETU.
^ okat. 10 Finda opo pa shangwa ONGULUMAMBO > OMAMBO NOUMBO.
^ okat. 14 Inda ko jw.org®, ndele to findi opo pa shangwa KOMBINGA YETU > OKWOONGALA > OSHIKE HASHI NINGWA POLUPALE LOUHAMBA?
