Ovakonakoni vOmbiibeli ova li ve na okukala ovaladi, opo va wanife po oilonga yavo yokuudifa. Inava pumbwa ashike okuudifila omapongo, ile tu tye ovalininipiki “ondaka yehafo,” ndele ova pumbwa yo okuudifila ovakolokoshi kombinga ‘yefiku longhone.’

Omumwatate J. H. Hoskin, oo a li ha di moCanada, okwa li ha udifa nouladi, nonande opa li omapataneko. Lwopehovelo mo 1921, okwa li a shakena nomufita wongeleka yoMethodist. Omumwatate Hoskin okwa li a hovela eenghundafana a ti: “Onda hala tu hafele eenghundafana di na sha nOmbiibeli. Nonande itatu ka twa kumwe moinima aishe, ohatu dulu okuxulifa po eenghundafana detu nombili notu kale natango ookaume.” Ashike osho hasho sha li sha ningwa. Omumwatate Hoskin okwa ti: “Otwa popya ashike ominute dinini, opo nee omufita okwa denga po omuvelo neenghono nonda li nokuli ndi shii ekende lao linene otali u mo.”

Omufita okwa li a ingida mokule ta ti: “Omolwashike ito i kovanhu ovo vehe fi Ovakriste, opo u ka popye navo?” Omumwatate Hoskin ka li e mu nyamukula, ndele eshi a dja po opo, okwe lipopila a ti, ‘Onda fa ashike nda li handi popi nomunhu ehe fi Omukriste!’

Eshi omufita oo a li ta udifile mongeleka yavo mefiku la shikula ko, okwa li a popila mowii omumwatate Hoskin. Omumwatate Hoskin okwa ti: “Okwa li a lombwela ovakwaneongalo lavo kutya ame ondi li omunaipupulu a shiya ko, oo ina monika mo nale modoolopa yavo nonda pumbwa okudipawa.” Ashike osho kasha li sha shololifa omumwatate Hoskin. Okwa li a twikila okuudifa nokwa popya novanhu vahapu. Okwa ti: “Onda hafela neenghono okuudifila modoolopa oyo. Ovanhu vamwe nokuli ova popya va ti: ‘Otu shii kutya ove omupiya waKalunga,’ nova li va pa nge oinima oyo nda li nda pumbwa.”

Opo Ovakonakoni vOmbiibeli va kwafele ovo ve na ohokwe va ninge exumokomesho, ova li va nyanyangida omapulo nomanyamukulo opaMbiibeli moshifo The Golden Age. * Omwa li mu na omapulo opaMbiibeli e na sha novanyasha, oo ovadali tava dulu okukundafana nounona vavo. Ovadali ova li tava dulu “okupula ounona vavo omapulo oo, noku va kwafela va mone omanyamukulo mOmbiibeli.” Omapulo amwe ongaashi, “Ombiibeli oi na omambo angapi?” Epulo olo ola popya oinima imwe i na sha  nOmbiibeli paunafangwa. Likwao ongaashi, “Mbela Omukriste keshe washili okwa teelela omahepeko monghedi yonhumba, ile yongadi?” Epulo olo ola kwafela ovanyasha va kale ovaudifi ovaladi.

Omwa li yo omapulo opaMbiibeli nosho yo omanyamukulo aavo ve na nale eshiivo lihapu lOmbiibeli. Omanyamukulo okwa li taa hangwa membo Studies in the Scriptures. Ovaleshi omayovi ova li va mona ouwa momapulo a tya ngaho, ashike oshifo The Golden Age sho 21 Desemba 1921, osha li sha popya kutya omapulo aeshe oludi olo itaa ka nyanyangidwa vali. Omolwashike mbela pa li pa ningwa elunduluko olo ombadilila?

Ovo va li tava kwatele komesho ova li va mona kutya Ovakonakoni vOmbiibeli ovo vape ova pumbwa okulihonga omahovelohongo monghedi ya unganekwa nawa. Onghee hano, muNovemba 1921, opa li pa nyanyangidwa embo The Harp of God. Ovo va li va ulika ohokwe ova li va tambula ko embo olo nova li ve lishangifa, opo va konakone kuvo vene embo The Harp Bible Study Course. Ekonakono la tya ngaho, ola li la kwafela ovanhu ve lihonge kombinga “yelalakano laKalunga li na sha nokupa ovanhu omwenyo waalushe.” Ola li hali longo ngahelipi?   

Ngeenge omunhu a li a tambula ko embo olo, okwa li ha pewa okakalata kanini, oko ka yelifa kutya omapandja elipi e na okulesha membo olo. Opo nee moshivike sha shikula ko, okwa li ha pewa okakalata ke na omapulo a pambafana, a kanghamena komapandja oo a li a fiilwa. Pexulilo lokakalata oko ope na omapandja, oo e na oku ka lesha moshivike sha shikula ko.

Omukonakoni okwa li ha tuminwa okakalata kape, oko haka tuminwa keongalo olo li li popepi naye, oshivike keshe moule woivike 12. Luhapu, ovanamido meongalo, ile ovo ve na omangabeko, ova li hava tuminwa oukalata vavo. Pashihopaenenwa, Anna K. Gardner, wokoMillvale, Pennsylvania, sha U.S.A., okwa ti: “Eshi embo The Harp of God la pita, ola kwafela omumwamemekadona Thayle, oo iha dulu okweenda, a dule okukala e lipyakidila nokutuma oukalata vomapulo oshivike keshe.” Ngeenge omunhu okwa mane ko oukalata ovo, okwa li ha talelwa po kuumwe, opo e mu kwafela e lihonge shihapu kombinga yOmbiibeli.

Pexulilo lomudo, omumwatate J.F. Rutherford okwa li a tumina omaongalo aeshe onhumwafo. Okwa li a didilika kutya “ovanhu vahapu ova udifilwa etumwalaka lOuhamba omudo oo, nole va kwafela shi dulife omido da pita.” Opo nee okwa weda ko, ta ti: “Ope na natango shihapu osho shi na okulongwa. Ladipikeni vamwe va kufe ombinga moshilonga eshi shitunhula.” Ovakonakoni vOmbiibeli ova li va ninga ngaashi a popya. Mo 1922, ova li va udifa nouladi kombinga yOuhamba shi dulife nale.