1. Omweengeli okwa popya shike, naasho osha hala okutya shike kufye?

 MBELA ngeenge ngeno omweengeli okwa popi naave, mbela ngeno oto ka pwilikina ngoo kwaasho ta ti? Kunena omweengeli ota popi ‘noiwana, omihoko, omalaka nomaludi aeshe.’ Ota ti ngahelipi? Ota ti: ‘Tileni nokufimaneka Kalunga, longeleni ou a shita eulu nedu.’ (Eh. 14:​6, 7) Jehova oye aeke Kalunga kashili, oo keshe umwe e na okulongela. Inatu pandula tuu eshi e tu pa omhito tu mu longele motembeli yaye inene yopamhepo!

2. Otembeli yaJehova yopamhepo oshike? (Tala yo oshimhungu “ Otembeli yopamhepo kai fi shike?”)

² Otembeli yopamhepo oshike naanaa, nopeni hatu dulu okuhanga ouyelele muhapu oo we i yelifa? Otembeli yopamhepo kai fi etungo lolelalela. Oyo elongekido laJehova loku mu longela monghedi oyo a hokwa olo la kanghamena kekuliloyambo laJesus. Omuyapostoli Paulus okwa yelifa elongekido olo monhumwafo oyo a li a shangela Ovakriste vomuJudea, ovo va li ko pefimbo lovayapostoli. b

3-4. Paulus okwa li te lipula nashike shi na sha nOvakriste Ovaheberi vomuJudea, nongahelipi a li e va kwafela?

³ Omolwashike Paulus a li a shangela Ovakriste Ovaheberi vomuJudea? Otashi dulika omolwomatomheno avali a fimana. Lotete, opo e va twe omukumo. Vahapu vomuvo ova kulila melongelokalunga lOshijuda. Ovo va li nale ovawiliki vavo velongelokalunga, otashi dulika va li have va sheke, eshi va ninga Ovakriste. Omolwashike? Omolwaashi kava li ve na otembeli oko va li tava dulu oku ka longela Kalunga, kava li ve na oaltari  oko tava yambele omayambo avo Kalunga nokava li ve na ovapristeri ovo tave va yakula. Osho osha li tashi dulu okuteya omukumo ovahongwa vaKristus nokunghundipaleka eitavelo lavo. (Heb. 2:1; 3:​12, 14) Vamwe vomuvo otashi dulika nokuli va li va yelekwa va shune kelongelokalunga lOshijuda.

⁴ Oshitivali, Paulus okwa li a lombwela Ovakriste Ovaheberi kutya kava li tava ningi eenghendabala va ude ko omahongo mape, ile omoule, ile tu tye “eendja da pama” odo di li mEendjovo daKalunga. (Heb. 5:​11-14) Shikwao vali, vamwe vomuvo ova li natango va kanyatela kOmhango yaMoses. Ashike Paulus okwa yelifa kutya omayambo, oo a li taa pulwa paMhango, kaa li taa dulu okukufa po filufilu oulunde. Omolwetomheno olo, Omhango oya li ya “xulifwa po.” Onghee Paulus okwa li e va honga oshili imwe yomoule. Okwa li a dimbulukifa Ovakriste vakwao “eteelelo” olo la kanghamena kekuliloyambo laJesus, olo tali dulu oku va kwafela va “ehene popepi naKalunga.” — Heb. 7:​18, 19.

5. Oshike twa pumbwa okuuda ko membo lOvaheberi, nomolwashike?

⁵ Paulus okwa yelifila ovamwaxe Ovaheberi kutya omolwashike onghedi omo Ovakriste hava longele Kalunga ya denga mbada i dule onghedi omo va li have mu longele mefimbo lonale. Onghedi omo Ovajuda va li hava longele Kalunga metwokumwe nOmhango, oya li “omudidimbe waayo tai ke uya, ndele olutu lo vene oKristus.” (Kol. 2:17) Omudidimbe ou li ashike olupe loshinima shonhumba, ndele kau fi oshinima sho lela. Onghee onghedi omo Ovajuda va li hava longele Kalunga oya li ashike omudidimbe woshinima sho lela osho sha li tashi ke uya. Otwa pumbwa okuuda ko elongekido olo Jehova e tu tulila po li na sha nokudima po omatimba etu, opo tu dule oku mu longela monghedi oyo a hokwa. Natu yelekanifeni “omudidimbe” (onghedi omo Ovajuda va li hava longele Kalunga) noshinima ‘sho vene’ (onghedi omo Ovakriste hava longele Kalunga), ngaashi sha yelifwa mOvaheberi. Ngeenge otwa ningi ngaho, ohatu ka uda ko nawa otembeli yopamhepo nanghee twa kwatelwa mo.

6. Etwalihangano ola li hali longifwa ngahelipi?

⁶ Onghedi omo Ovajuda va li hava longele Kalunga. Paulus okwa li a kanghamekela eenghundafana daye ketwalihangano olo la li la tungwa po kuMoses mo 1512 K.O.P. (Tala oshimhungu “Onghedi omo Ovajuda va li hava longele Kalunga — Onghedi omo Ovakriste hava longele Kalunga.”) Etwalihangano ola li li na omudutilo wa fa wetwali olo Ovaisrael  potete va li hava ende nalo, eshi tava tembuka. Ova li ve li longifa oule womido 500 lwaapo fiyo osheshi otembeli ya tungwa muJerusalem. (Ex. 25:​8, 9; Num. 9:22) ‘Etwali olo leongalo’ ola li onhele opo Ovaisrael va li hava ongala va longele Kalunga nokuyamba omayambo. (Ex. 29:​43-46) Ashike etwalihangano ola li yo li lile po oshinima shimwe sha denga mbada osho Ovakriste va li tava ka mona.

7. Onaini otembeli yopamhepo ya totwa po?

⁷ Onghedi omo Ovakriste hava longele Kalunga. Etwalihangano lonale ola li ‘omudidimbe woinima yomeulu’ notali faneke otembeli yaJehova yopamhepo inene. Paulus okwa popya kutya “etwali olo [ile, etwalihangano] ola li tali faneke oinima oyo tai ningwa paife.” (Heb. 8:5; 9:9) Eshi Paulus a shangela Ovaheberi, otembeli yopamhepo opo ya hangwa nale. Oya totwa po mo 29 O.P. Momudo oo omo Jesus a ninginifwa, a vaekwa nomhepo iyapuki nokwa hovela okulonga e li “omupristeri munenenene” waJehova motembeli yopamhepo. c — Heb. 4:14; Oil. 10:​37, 38.

8-9. Metwokumwe nOvaheberi 7:​23-27, eyooloko la kula lilipi li li pokati kovapristeri vanene vOvaisrael nosho yo Omupristeri Munenenene Jesus Kristus?

⁸ Onghedi omo Ovajuda va li hava longele Kalunga. Omupristeri munene okwa li ha kalele po oshiwana moipafi yaKalunga. Omupristeri munene wotete wOvaisrael okwa li a nangekwa po kuJehova, eshi etwalihangano la li la yapulwa. Ashike ngaashi Paulus a yelifa, “ovapristeri ohava fi noihava dulu vali okutwikila noilonga yavo, nomolwaasho hava pingenwa po.” d (Lesha Ovaheberi 7:​23-27.) Ve li ovanhu inava wanenena, ovapristeri ovo vanene ova li ve na okuyamba omayambo omolwomatimba avo vene. Olo oli li eyooloko lididilikwedi olo li li pokati kovapristeri vanene vOvaisrael nOmupristeri Munenenene Jesus Kristus.

⁹ Onghedi omo Ovakriste hava longele Kalunga. E li Omupristeri Munene wetu, Jesus Kristus, “ota yakula metwali lashili olo la dikwa po kuJehova, ndele hakovanhu.” (Heb. 8:​1, 2) Paulus okwa yelifa kutya “molwaashi [Jesus] ota kala po fiyo alushe ita pingenwa po e li omupristeri.” Paulus okwa weda ko vali kutya Jesus okwa “koshoka, a yooloka ko kovalunde,” nomepingafano novapristeri vanene vOvaisrael, “ina pumbwa okuyamba omayambo efiku keshe,” omolwomatimba aye mwene. Natu ka taleni omayooloko oo e li pokati keealtari nosho yo omayambo e na sha nonghedi omo Ovajuda va li hava longele Kalunga nosho yo e na sha nonghedi omo Ovakriste hava longele Kalunga.

10. Omayambo oo a li haa yambwa koaltari yongopolo otaa ulike kushike?

¹⁰ Onghedi omo Ovajuda va li hava longele Kalunga. Kondje yoshivelo shetwalihangano okwa li ku na oaltari yongopolo, oko omayambo oinamwenyo a li haa yambelwa Jehova. (Ex. 27:​1, 2; 40:29) Ashike omayambo oo kaa li ta dulu okudima po filufilu omatimba ovanhu. (Heb. 10:​1-4) Okuyamba omayambo oinamwenyo taa twikile ketwalihangano okwa li taku ulike keyambo olo la li tali ka dima po omatimba ovanhu filufilu.

11. Jesus okwe liyandja e li eyambo koaltari ilipi? (Ovaheberi 10:​5-7, 10)

¹¹ Onghedi omo Ovakriste hava longele Kalunga. Jesus okwa li e shii kutya Jehova okwe mu tuma kombada yedu, opo a yambe po omwenyo waye u li ekuliloyambo, a kulile ovanhu.  (Mat. 20:28) Onghee peninginifo laye, Jesus okwa li e liyandja, opo a longe ehalo laJehova. (Joh. 6:38; Gal. 1:4) Oaltari oko Jesus e liyandja kaya li ya tungwa kovanhu, ndele oi lile po ehalo laKalunga. “Ehalo” laJehova ololo kutya Omona waye oku na okuyandja po omwenyo waye wopanhu wa wanenena. Jesus okwa li a yandja omwenyo waye “palumwe,” opo a futile po, ile a tuvike fiyo alushe oulunde wovanhu aveshe ovo ve na eitavelo tali longo muKristus. (Lesha Ovaheberi 10:​5-7, 10.) Xuuninwa, ohatu ka kundafana eityo loinima yomeni letwalihangano.

12. Olyelye a li ha i medimo keshe letwalihangano?

¹² Onghedi omo Ovajuda va li hava longele Kalunga. Etwalihangano nosho yo eetembeli odo da ka tungwa lwanima muJerusalem oda li di na oinima meni ya faafana. Meni omwa li mu na omadimo avali, “Onhele Iyapuki” nosho yo “Ouyapukielela,” nokwa li a tukulwa ketukulifolapi. (Heb. 9:​2-5; Ex. 26:​31-33) Meni lOuyapuki omwa li oshikwatelwalamba shoshingoli, oaltari yokuxwikila omatwimino nosho yo oshitaafula shomungome wetaliko. “Ovapristeli va vaekwa” ovo ashike va li va pitikwa okuya meni lOuyapuki, opo va ka longe oilonga yavo iyapuki. (Num. 3:​3, 7, 10) MOuyapukielela omwa li mu na oshikefa shehangano shoshingoli, osho sha li shi lile po okukala po kwaJehova. (Ex. 25:​21, 22) Omupristeri munene oye ashike a li a pitikwa okutauluka elapi olo nokuya mOuyapukielela lumwe momudo mEfiku lEkwatakanifo. (Lev. 16:​2, 17) Omudo keshe okwa li ha i mo nohonde yoinamwenyo, opo  a kwatakanife omatimba aye mwene nosho yo oshiwana ashishe. Mokweendela ko kwefimbo, Jehova, okupitila momhepo yaye iyapuki, okwa li a yelifa kutya oinima oyo yometwalihangano otai faneke lela shike. — Heb. 9:​6-8. e

13. Ouyapuki nosho yo Ouyapukielela wetwalihangano otau ulike kushike monghedi omo Ovakriste hava longele Kalunga?

¹³ Onghedi omo Ovakriste hava longele Kalunga. Omuvalu munini wovahongwa vaKristus owa vaekwa nomhepo iyapuki nove na ekwatafano le likalekelwa naJehova. Ovo ve li 144 000 otava ka longa ve li ovapristeri pamwe naJesus meulu. (Eh. 1:6; 14:1) Ouyapuki oo wa li metwalihangano otau faneke okuvaekwa kwavo nomhepo, ofimbo ve li kombada yedu ve li ovana vaKalunga. (Rom. 8:​15-17) Ouyapukielela wometwalihangano otau faneke eulu omo mu na Jehova. ‘Etukulifolapi’ olo la tukula Ouyapuki kOuyapukielela otali faneke olutu laJesus lopanhu olo la li tali mu imbi a ye meulu e li Omupristeri Munenenene wotembeli yopamhepo. Eshi Jesus a yamba po olutu laye lopanhu omolwovanhu, okwa yeululila omhito Ovakriste aveshe ovavaekwa va ka kale nomwenyo meulu. Navo ove na okufiya po omalutu avo opambelela, opo va ka pewe ondjabi yavo yomeulu. (Heb. 10:​19, 20; 1 Kor. 15:50) Konima eshi Jesus a nyumunwa, okwa ya mOuyapukielela wotembeli yopamhepo, omo ovavaekwa aveshe xuuninwa tave ke mu waimina.

14. Metwokumwe nOvaheberi 9:​12, 24-26, oshike sha ningifa elongekido lotembeli yaJehova yopamhepo li kale la denga mbada?

¹⁴ Ohatu dulu okumona nawanawa nghee elongekido laJehova li na sha nelongelokalunga la koshoka, olo la kanghamena kekuliloyambo nosho yo komupristeri Jesus Kristus, la denga mbada. MuIsrael, omupristeri munene okwa li ha i nohonde yomayambo oinamwenyo mOuyapukielela oo wa tungwa kovanhu, ashike Jesus okwa ya “meulu,” onhele oyo iyapuki elela kuhe na vali, opo a ka holoke moipafi yaJehova. Okwa yamba po ongushu yomwenyo waye wa wanenena omolwetu, “opo a xulife po oulunde eshi a yamba po omwenyo waye.” (Lesha Ovaheberi 9:​12, 24-26.) Ekuliloyambo laJesus oli li eyambo la denga mbada olo tali dimi po omatimba fiyo alushe. Ngaashi hatu ke shi kundafana, atushe ohatu dulu okulongela Jehova motembeli yaye yopamhepo, kashi na nee mbudi kutya otu na eteelelo lokuya meulu, ile olokukala kombada yedu.

15. Oolyelye va li hava longo moshihale shetwalihangano?

¹⁵ Onghedi omo Ovajuda va li hava longele Kalunga. Etwalihangano ola li li na oshihale shimwe, onhele ya kula ya dingililwa kodalate omo ovapristeri va li hava longele oilonga yavo. Moshihale omo omwa li mu na oaltari yongopolo ya kula yokuxwikila omayambo nosho yo oshiyaxa shongopolo omo ovapristeri va li have likoshele, ofimbo va li inava longo oilonga yavo iyapuki. (Ex. 30:​17-20; 40:​6-8) Ashike eetembeli odo da ka tungwa lwanima oda li di na oshihale shokombada omo ovo va li vehe fi ovapristeri va li hava kala nokulongela Kalunga.

16. Oolyelye hava longo moshihale shomeni, noolyelye hava longo moshihale shokombada shotembeli yopamhepo?

¹⁶ Onghedi omo Ovakriste hava longele Kalunga. Fimbo inava ya meulu va ka longe ve li ovapristeri pamwe naJesus, ovavaekwa ohava longo noudiinini oku kombada yedu moshihale shomeni shotembeli yopamhepo.  Oshiyaxa shinene shomeva, osho sha li hashi kala metwalihangano nosho yo meetembeli, oshi li edimbulukifo la fimana kuvo nokOvakriste aveshe kutya ove na okukala va koshoka paenghedi nopamhepo. Ndele mbela ongudu inene, oyo hai yambidida noudiinini ovamwaxe vaKristus ovavaekwa, openi hai longele Kalunga? Omuyapostoli Johannes okwe i mona i li “ofika komesho yolukalwapangelo,” osho tashi ulike koshihale shokombada omo “tave mu longele oilonga iyapuki motembeli yaye omutenya noufiku.” (Eh. 7:​9, 13-15) Inatu pandula tuu onghandangala oyo hatu dana melongekido laJehova lelongelokalunga la koshoka!

17. Otu na oufembanghenda wokuyandja omayambo elipi kuJehova?

¹⁷ Kunena, Ovakriste aveshe ove na oufembanghenda wokuyandja omayambo kuJehova mokulongifa efimbo lavo, eenghono nosho yo oiniwe yavo, opo va xumife komesho oinima yOuhamba waKalunga. Ngaashi omuyapostoli Paulus a lombwela Ovakriste Ovaheberi, ‘natu kaleni alushe hatu yambe omayambo kuKalunga, hatu shi ningi mokuhepaulula edina laye moipafi hatu longifa omakanya etu.’ (Heb. 13:15) Ohatu dulu okuulika kutya otwa pandula oufembanghenda wetu wokulongela Jehova moku mu longela ngaashi hatu dulu.

18. Metwokumwe nOvaheberi 10:​22-25, oinima ilipi tu na okukala hatu ningi alushe, noshike tuhe na okudimbwa okuninga?

¹⁸ Lesha Ovaheberi 10:​22-25. Lwopexulilo lonhumwafo oyo a shangela Ovaheberi, Paulus okwa popya oinima oyo tu na alushe okukala hatu ningi, eshi hatu longele Jehova. Osho osha kwatela mo okwiilikana kuJehova, okushiivifila vamwe kombinga yeteelelo letu, okwoongala pamwe nokutwaafana omukumo, “unene tuu eshi tu wete efiku [laJehova] tali ehene popepi.” Lwopexulilo lehokololo olo tali hangwa mEhololo, omweengeli waJehova okwa divilika outumbulilo tau shikula, eshi e u endulula luvali, a ti: “Linyongamena Kalunga!” (Eh. 19:10; 22:9) Onghee inatu dimbwa nandenande oshili oyo yomoule yopamhepo i na sha notembeli yaJehova yopamhepo inene nosho yo oufembanghenda oo tu na wokulongela Kalunga ketu munene!