1. Jehova oha kala e uditile ngahelipi ovapiya vaye?

 JEHOVA oha kala e wete shike ngeenge ta tale ovapiya vaye kombada yedu? Oha kala e tu wete ngeenge twa hafa nongeenge twa nyika oluhodi. (Eps. 37:18) Oha kala a hafa, ngeenge e wete hatu ningi ngaashi hatu dulu, eshi hatu mu longele, kashi na nee mbudi kutya ohatu piti meenghalo da tya ngahelipi. Kakele kaasho, okwa halelela oku tu yambidida noku tu hekeleka.

2. Jehova oha ningile shike ovo ve na omitima da tekauka, nongahelipi hatu dulu okumona ouwa mefiloshisho laye?

² Epsalme 147:​3, KB-13 ola popya kutya Jehova oha “mange oipute” yaavo ve na omitima da tekauka. Omushangwa oo otau ulike nghee Jehova ha file oshisho ovo va yahamekwa pamaliudo. Oshike tu na okuninga, opo tu mone ouwa mefiloshisho laJehova? Natu ka taleni kefaneko. Ndokotola, oo e na owino, ota dulu okuninga shihapu opo a kwafele omunhu, oo a mona oshiponga, a veluke. Ashike opo omunhu oo a dule okuveluka okwa pumbwa okushikula omalombwelo a ndokotola. Sha faafana, otwa pumbwa okushikula ewiliko laJehova opo tu veluke pamaliudo. Moshitukulwa eshi, ohatu ka tala osho Jehova a popya mEendjovo daye shi na sha naavo va yahamekwa pamaliudo, nanghee hatu dulu okutula moilonga omayele aye opahole.

JEHOVA OKWE TU DIMBULUKIFA KUTYA OTU NA ONDILO MOMESHO AYE

3. Omolwashike vamwe hava kala ve udite vehe na oshilonga?

³ Otu li mounyuni omo mu na ovanhu vehe hole vakwao. Shinyikifa oluhodi, osha ningifa ovanhu vahapu va kale ve udite kutya kave na oshilonga. Omumwameme wedina Helen a  okwa ti: “Onda putukila moukwaneumbo uhe na ohole. Tate okwa li ha longifa elongifo leenghono nokwa li ha lombwele nge alushe kutya ame oshikwafangudu.” Ngaashi Helen, naave otashi dulika wa ungaungiwa nai kuumwe, e ku ula omalaka mai, ile e ku ningifa u kale u udite uhe na oshilonga. Notashi dulika u mone shidjuu okwiitavela kutya ope na umwe e na ko nasha naave.

4. She likolelela kEpsalme 34:​18, Jehova okwe tu pa eshilipaleko lilipi?

⁴ Nonande vamwe ova ungaunga nai naave, kala u na elineekelo kutya Jehova oku ku hole noku na ko nasha naave. Oku li “popepi nomitima da teyauka.” (Lesha Epsalme 34:​18, KB-13.) Ngeenge ou udite wa ‘teka omukumo’ dimbuluka kutya Jehova okwa mona sha shiwa mwoove nokwe ku nanena kuye. (Joh. 6:44) Okwe li longekida alushe oku ku kwafela, molwaashi oku ku hole neenghono.

5. Oshike hatu dulu okulihonga konghedi omo Jesus a li a ungaunga naavo va talika ko vehe na oshilonga?

⁵ Ohatu dulu okulihonga nghee Jehova ha kala e udite mokukonakona oshihopaenenwa shaJesus. Eshi Jesus a li kombada yedu okwa li ha kenukile ovanhu ovo va talika ko vehe na oshilonga. (Mat. 9:​9-12) Eshi omukainhu, oo a li e na elineekelo kutya ota veluka ngeenge a kwata koshikutu shaJesus, Jesus okwa li e mu hekeleka noku mu pandula omolweitavelo laye. (Mark. 5:​25-34) Jesus okwa li a hopaenena filufilu omaukwatya aXe. (Joh. 14:9) Onghee oto dulu okukala nelineekelo kutya Jehova oku na ko nasha naave noha didilike omaukwatya oye mawa, mwa kwatelwa eitavelo loye nosho yo ohole yoku mu hola.

6. Oshike u na okuninga po, ngeenge ou udite kutya ku na oshilonga?

⁶ Oshike to dulu okuninga po, ngeenge ou udite kutya ku na oshilonga? Lesha eevelishe mOmbibeli odo tadi ku shilipaleke kutya  ou na ondilo kuJehova, nokudilonga kudo. b (Eps. 94:19) Ino liyelekanifa navamwe noino pumbwa okuyandja elitulemo kwaasho ito dulu okuninga. Jehova ina teelela u ninge osho ito dulu okuninga. (Eps. 103:​13, 14) Ngeenge owa ungaungiwa naave nai monakudiwa, ino lipa oushima mwaasho she ku ningilwa. Dimbuluka kutya Jehova oha tokola ovo hava ungaunga nai navamwe, ndele havo ovo va ninga oihakanwa. (1 Pet. 3:12) Sandra, oo a li a ningilwa omunyonena eshi a li okaana, okwa ti: “Ohandi pula Jehova pandjikilile, opo a kwafele nge ndi mone omaukwatya mawa oo a mona mwaame.”

7. Ongahelipi eenghalo didjuu omo twa pita tadi dulu oku tu kwafela tu kwafele vamwe?

⁷ Dimbuluka kutya Jehova ota dulu oku ku longifa u kwafele vamwe. Okwe ku pa oufembanghenda wokulonga pamwe naye moilonga yokuudifa. (1 Kor. 3:9) Omolwonghalo idjuu, oyo wa pita muyo, otashi dulika shi kale shipu kwoove okuuda ko omaliudo avamwe ovo tava mono oixuna. Oto dulu okuninga shihapu u va kwafele. Helen, oo a popiwa metetekelo, okwa li a kwafelwa kuJehova nokovamwatate novamwameme, nopaife ota dulu okukwafela vamwe. Okwa ti: “Onda li handi kala ndi udite ndihe na oshilonga, ashike Jehova okwa kwafela nge ndi kale ndi udite ndi holike, nokwa longifa nge ndi kwafele vamwe.” Paife Helen oku li omukokolindjila wondjikilile nokwa hafa.

JEHOVA OKWA HALA TU TAMBULE KO EDIMINEPO LAYE

8. Eshilipaleko lilipi tali hangwa muJesaja 1:18?

⁸ Ovapiya vaJehova vamwe ohava kala tave livele ombedi neenghono omolwomapuko oo va ninga monakudiwa, tashi dulika ofimbo inava ninginifwa, ile konima eshi va ninginifwa. Ashike otwa pumbwa okudimbuluka kutya Jehova okwa yandja ekuliloyambo molwaashi oku tu hole neenghono. Natu kale tu na oushili kutya okwa hala tu tambule ko oshali yaye. Jehova okwe tu shilipaleka kutya ngeenge otwe ‘lihokolola’ c kuye, omatimba etu ihaa dimbuluka vali. (Lesha Jesaja 1:​18, KB-13.) Otwa pandula neenghono eshi Tate yetu omunahole, Jehova, iha dimbuluka omatimba etu. Nopefimbo opo tuu opo, iha dimbwa oilonga iwa oyo twe mu longela. — Eps. 103:​9, 12; Heb. 6:10.

9. Omolwashike tuhe na okukala hatu diladila komanyono oo twa ninga monakudiwa?

⁹ Ngeenge oto livele unene ombedi omolwomanyono oo wa ninga monakudiwa, ninga ngaashi to dulu u yandje elitulemo kwaasho to ningi paife nokonakwiiwa, ponhele yokuyandja elitulemo konakudiwa. Diladila koshihopaenenwa shomuyapostoli Paulus. Okwa li ha kala e udite ondjo, molwaashi okwa hepeka Ovakriste, ashike oku shii kutya Jehova okwe mu dimina po. (1 Tim. 1:​12-15) Mbela okwa kala nokudiladila komanyono aye omonakudiwa? Ahawe. Ka li yo ha diladila koinima oyo a li a ninga opo a kale a fimanekwa kovanhu. (Fil. 3:​4-8, 13-15) Ponhele yaasho, okwa li a twikila okuninga ngaashi ta dulu moilonga yokuudifa nokuyandja elitulemo konakwiiwa. Ngaashi Paulus, ito dulu okulundulula onakudiwa. Ashike oto dulu okutanga Jehova noku mu hafifa paife nokudiladila konakwiiwa itunhula oyo e ku udanekela.

10. Oshike hatu dulu okuninga, ngeenge otwa li twa udifa vamwe nai monakudiwa?

¹⁰ Otashi dulika u kale u udite nai omolweenghatu dimwe odo wa li wa katuka da udifa  vamwe nai. Oshike tashi dulu oku ku kwafela? Ninga ngaashi to dulu u ninge eshi sha yuka noku va pa ombili. (2 Kor. 7:11) Pula Jehova a kwafele ovo wa udifa nai. Ota dulu oku mu kwafela mu lididimike nomu kale vali mu na ombili yopamadiladilo.

11. Oshike hatu dulu okulihonga moshihopaenenwa shomuprofeti Jona? (Tala yo kombada yoshifo.)

¹¹ Lihonga komapuko oye omonakudiwa nokukala wa halelela okulongifwa kuJehova monghedi keshe oyo a hoolola. Natu ka taleni koshihopaenenwa shomuprofeti Jona. Ponhele a ye kuNinive, ngaashi Kalunga e mu lombwela, okwa li a ya konhele imwe i lili. Jehova okwa li e mu pa outekuduliko nokwa li e lihonga kepuko laye. (Jona 1:​1-4, 15-17; 2:​7-10) Jehova ka li a efa okulongifa Jona. Natango Jehova okwa li e mu lombwela a ye kuNinive, nopomhito opo okwa li a dulika. Ka li a efa omapuko aye omonakudiwa e mu imbe a tambule ko oshinakuwanifwa osho a li a pewa kuJehova. — Jona 3:​1-3.

JEHOVA OHE TU PE OMHEPO YAYE IYAPUKI OPO E TU HEKELEKE

12. Jehova ohe tu pe ngahelipi ombili, ngeenge tu li moudjuu? (Ovafilippi 4:​6, 7)

¹² Jehova ohe tu hekeleke okupitila momhepo yaye iyapuki, ngeenge hatu piti monghalo idjuu. Natu ka taleni koshimoniwa shaRon naCarol. Omonamati wavo okwa li e likufa omwenyo. Ova ti: “Otwa pita meenghalo didjuu, ashike onghalo oyo oya li idjuu neenghono. Molwaashi katwa li hatu kofa, otwa kala hatu ilikana notwa li twa mona ombili oyo ya popiwa mOvafilippi 4:​6, 7.” (Lesha.) Ngeenge owa taalela onghalo idjuu, mbubulila Jehova omutima woye okupitila meilikano, to mu lombwele omaliudo oye. (Eps. 86:3; 88:1) Pula Jehova omhepo yaye iyapuki. Okwe lilongekida alushe oku ku kwafela. — Luk. 11:​9-13.

13. Ongahelipi omhepo iyapuki tai dulu oku tu kwafela tu twikile okulongela Jehova noudiinini? (Ovaefeso 3:16)

¹³ Mbela owa teka omukumo omolweshongo olo wa pita mulo? Omhepo iyapuki otai dulu oku ku pa eenghono, opo u twikile okulongela Jehova noudiinini. (Lesha Ovaefeso 3:16.) Natu ka taleni koshimoniwa shomumwameme wedina Flora. Ye nomushamane waye ova li ovatumwa, eshi omushamane waye a ya moluhaelo nova teya ohombo. Omumwameme okwa ti: “Onda li nda uda nai neenghono eshi a kengelela nge. Onda li nda ilikana kuJehova a pe nge omhepo yaye iyapuki opo ndi dule okulididimika. Jehova okwa li a hekeleka nge, nonande potete onghalo oya li tai monika idjuu, onda li nda mona eenghono nonda dula okulididimika kekwafo laye.” Flora okwa li a mona kutya Kalunga okwe mu kwafela, opo a kale e lineekela muye note ke mu yambidida momashongo oo ta ka shakeneka. Omumwameme okwa weda ko a ti: “Eendjovo dEpsalme 119:32 oda yelifa nghee Jehova a kwafela nge: ‘Onda hala ndi lotoke mondjila yoipango yoye, osheshi Ove to mbwalangadjifa omutima wange.’”

14. Ongahelipi omhepo yaKalunga tai dulu ku tu kwafela?

¹⁴ Oshike u na okuninga konima eshi wa pula Jehova e ku pe omhepo yaye iyapuki? Ninga oinima oyo tai dulu oku ku kwafela u pewe omhepo iyapuki yaKalunga. Oinima oyo oya kwatela mo okukala pokwoongala nokuudifila vamwe. Lesha Eendjovo daJehova efiku keshe, otashi ke ku kwafela u dilonge komadiladilo aJehova. (Fil. 4:​8, 9) Eshi to lesha, didilika ovanhu ovo va tumbulwa mOmbiibeli va li va shakeneka omashongo, nokudilonga kunghee Jehova e va kwafela ve lididimike. Sandra, oo a tumbulwa metetekelo, okwa li a shakeneka eenghalo didjuu  monghalamwenyo yaye. Okwa ti: “Ehokololo laJosef ola twa nge omukumo. Ka li a efa omashongo nosho yo okuhenouyuki oko a li a ningilwa ku nyone po ekwatafano laye naJehova.” — Gen. 39:​21-23.

JEHOVA OHE TU HEKELEKE OKUPITILA MOVAITAVELI VAKWETU

15. Oolyelye tava dulu oku tu hekeleka, nongahelipi tava dulu oku tu kwafela? (Tala yo efano.)

¹⁵ Ngeenge hatu mono oixuna, ovaitaveli vakwetu ohava kala ‘ondjo yehekeleko neenghono.’ (Kol. 4:11) Jehova ohe tu ulikile ohole yaye okupitila movamwatate novamwameme. Ovaitaveli vakwetu otava dulu oku tu hekeleka mokupwilikina kufye noukeka, ile mokukala pamwe nafye. Otashi dulika ve tu leshele omushangwa okudja mOmbiibeli, ile va ilikane pamwe nafye. d (Rom. 15:4) Omafimbo amwe, omumwatate, ile omumwameme otashi dulika e tu dimbulukife etaleko laJehova, naasho ohashi tu kwafele tu twikile okulididimika. Ovakriste vakwetu otashi dulika ve tu kwafele vali meenghedi dimwe, ngaashi oku tu telekela, ngeenge twa wililwa po.

16. Oshike twa pumbwa okuninga, opo tu kwafelwe kuvamwe?

¹⁶ Opo tu kwafelwe kuvamwe, otashi dulika twa pumbwa oku va pula. Ovamwatate novamwameme ove tu hole nova hala oku tu kwafela. (Omayel. 17:17) Otashi dulika va  kale vehe shii nghee tu udite, ile osho twa pumbwa. (Omayel. 14:10) Ngeenge owa teka omukumo, owa pumbwa okulombwela ookaume koye, ovo we lineekela, nghee u udite. Va lombwela osho tashi dulu oku ku kwafela. Otashi dulika u hoolole okulombwela omukulunhuongalo umwe, ile vavali, ovo wa mangulukila. Ovamwameme vamwe ohava mono tashi hekeleke, ngeenge ova lombwele ovamwameme vakwao omaliudo avo.

17. Omashongo amwe elipi tashi dulika e tu imbe tu mone etwomukumo, nongahelipi hatu dulu oku a finda?

¹⁷ Henuka eamo lokulikalela. Omafimbo amwe, otashi dulika u kale wa nyemata neenghono noino hala okweendafana novanhu. Omafimbo amwe, ovamwatate novamwameme otashi dulika vaha ude ko omaliudo oye, ile va popye oinima oyo tai ku udifa nai. (Jak. 3:2) Ashike ino kala kokule navo, Jehova ota dulu oku va longifa ve ku twe omukumo. Omukulunhuongalo wedina Gavin, oo e na epolimano, okwa ti: “Ihandi kala nda hala okweendafana nookaume kange.” Ashike Gavin oha ningi eenghendabala opo a kale pamwe novamwatate, nohashi mu kwafele. Omumwameme wedina Amy okwa ti: “Omolwonghalo omo nda pita monakudiwa, ohandi mono shidjuu okulineekela vamwe. Ashike ohandi lihongo okukala ndi hole nonde lineekela ovamwatate novamwameme, ngaashi Jehova. Ondi shii kutya ohashi hafifa Jehova nohashi hafifa nge yo.”

OMAUDANEKO AJEHOVA OMONAKWIIWA OHAE TU HEKELEKE

18. Oshike twa teelela nodjuulufi monakwiiwa, noshike hatu dulu okuninga paife?

¹⁸ Mafiku, Jehova ota ka kufa po oinima aishe oyo hai tu nyemateke nohai tu etele ouyahame. (Eh. 21:​3, 4) Oinima aishe oyo hatu shakeneke itatu ke ‘i diladila vali momitima detu.’ (Jes. 65:17) Ngaashi twe lihonga, Jehova oha ‘mange oipute’ yetu, nokuli nokunena. Jehova ohe tu pe oinima ihapu, oyo tai tu hekeleke noku tu kwafela. Nopehe na omalimbililo, ‘oku na ko nasha nafye.’ — 1 Pet. 5:7.