OSHITUKULWA SHOKUKONAKONWA 43
EIMBILO 90 Tu twaafaneni omukumo
Nghee hatu dulu okufinda omalimbililo
“Konakoneni oinima aishe.” — 1 TES. 5:21.
ENENEDILADILO
Ohatu ke lihonga osho hatu dulu okuninga po, ngeenge otwa kwatwa komalimbililo, oo taa dulu okukuma okulongela kwetu Jehova.
1-2. (a) Ovapiya vaJehova otashi dulika va kwatwe komalimbililo amwe elipi? (b) Oshike ohatu ka kundafana moshitukulwa eshi?
OVANHU vomido adishe ohava kwatwa komalimbililo a omafimbo amwe. Pashihopaenenwa, omuudifi omunyasha otashi dulika a kale a limbililwa, ngeenge Jehova oku na ko ngoo nasha naye. Omolwetomheno olo, otashi dulika li mu ningife a kale e wete ina wana okuninginifwa. Ile diladila komumwatate womido dopokati, oo a li a hoolola okupitifa komesho okulongela Jehova mounyasha waye, ponhele yokulalakanena oilonga oyo hai futu nawa. Ashike mokweendela ko kwefimbo, ouxupilo owa hovela tau kande omapunya, naasho oshe mu ningifa a kale e na omadiladilo opavali. Diladila vali kombinga yomumwameme omunamido oo ehe na vali eenghono. Otashi dulika a kale e udite a teka omukumo, molwaashi iha dulu vali okulonga ngaashi a li ha ningi nale. Mbela owe lipulile ngoo nale omapulo ngaashi: ‘Mbela Jehova oku na ko ngoo nasha naame? Mbela omaliyambo ange oo nda ninga otaa ti sha ngoo kuye? Mbela ohandi dulu ngoo vali okulongifwa kuJehova?’
2 Ngeenge otwa kala inatu mona omanyamukulo komapulo a tya ngaho, otashi dulu okukuma ekwatafano letu naJehova. Moshitukulwa eshi, ohatu ka kundafana nghee omafinamhango Ombiibeli taa dulu oku tu kwafela, ngeenge twa kwatwa komalimbililo (1) kutya Jehova oku na ko ngoo nasha nafye, (2) eshi ohatu livele ombedi omolwomatokolo oo twa ninga monakudiwa, ile (3) kutya ohatu dulu ngoo vali okulongifwa kuJehova.
OSHO TASHI DULU OKU TU KWAFELA TU FINDE OMALIMBILILO
3. Omonghedi imwe ilipi hatu dulu okufinda omalimbililo?
3 Onghedi imwe omo hatu dulu okufinda omalimbililo, omokulesha Eendjovo daKalunga opo tu mone omanyamukulo komapulo etu. Ngeenge otwa ningi ngaho, ohatu ka kala tu na ekwatafano la kola naJehova nohatu ka kala ‘twa pama meitavelo.’ — 1 Kor. 16:13.
4. Ongahelipi hatu dulu ‘okukonakona oinima aishe’? (1 Ovatessalonika 5:21)
4 Lesha 1 Ovatessalonika 5:21. Ombiibeli otai tu ladipike tu ‘konakone oinima aishe.’ Ongahelipi ohatu dulu okuninga ngaho? Ohatu dulu okushilipaleka kutya osho twa itavela oshi li metwokumwe naasho Ombiibeli tai hongo. Pashihopaenenwa, diladila kombinga yomunyasha, oo te lipula ngeenge Kalunga oku na ko ngoo nasha naye. Mbela oku na ashike okumwena ina mona enyamukulo kepulo laye? Ahowe, oku na ‘okukonakona oinima aishe,’ opo e lihonge ngeenge Kalunga oku na ko nasha naye, ile hasho.
5. Jehova oha nyamukula ngahelipi omapulo etu?
5 Ohatu “udu” Jehova ta popi nafye, ngeenge hatu konakona Eendjovo daye. Ashike otwa pumbwa okuninga shihapu shihe fi ashike okulesha Ombiibeli, ngeenge otwa hala Jehova a nyamukule omapulo etu. Otwa pumbwa okukonga nokukonakona kombinga yomishangwa odo tadi dulu oku tu kwafela tu mone enyamukulo lepulo letu. Ohatu dulu okuninga omapekapeko, hatu longifa oishangomwa yetu. (Omayel. 2:3-6) Otwa pumbwa okwiilikana kuJehova hatu mu pula e tu kwafele tu mone enyamukulo lepulo letu. Opo nee, ohatu dulu okukonga omafinamhango Ombiibeli nosho yo ouyelele oo tau dulu oku tu kwafela monghalo yetu. Ohatu dulu yo okulesha omahokololo opaMbiibeli ovanhu ovo va pita monghalo ya fa yetu.
6. Ongahelipi okwoongala haku tu kwafele tu finde omalimbililo etu?
6 Ohatu “udu” yo Jehova ta popi nafye okupitila pokwoongala. Ngeenge ohatu kala pokwoongala pandjikilile, otashi dulika tu ka ude oshinima shonhumba okupitila moshipopiwa, ile metyekosha laumwe, osho tashi tu kwafele tu finde omalimbililo. (Omayel. 27:17) Paife natu ka kundafaneni osho tashi dulu oku tu kwafela tu finde omalimbililo.
MBELA JEHOVA OKU NA KO NGOO NASHA NAAVE?
7. Epulo lilipi tashi dulika tu lipule?
7 Mbela owe lipulile ngoo nale kutya, ‘Mbela Jehova oku na ko ngoo nasha naame?’ Ngeenge oho kala u udite uhe na oshilonga, otashi dulika u diladile kutya ito dulu okuninga kaume kOmushiti. Ohamba David nayo otashi dulika ya li i na omadiladilo a tya ngaho. Ashike oya li ya kumwa eshi ya mona kutya, Jehova oku na ko nasha novanhu, noya pula ya ti: “Omwene, omunhu oku li ngahelipi, ye eshi to mu shipulula, nomona womunhu, eshi we mu tala?” (Eps. 144:3, KB-13) Openi to dulu okuhanga enyamukulo lepulo olo?
8. She likolelela ku 1 Samuel 16:6, 7, 10-12, Jehova oha didilike shike movanhu?
8 Ombiibeli oya popya kutya Jehova oha didilike ovanhu ovo va talika ko inava fimana. Pashihopaenenwa, Jehova okwa li a tuma Samuel keumbo laIsai, opo a ka vaeke umwe womovanamati vaIsai, a ninge ohamba yOvaisrael yomonakwiiwa. Isai okwa li a ifana ovanamati vaye vaheyali opo ve uye kuSamuel, ashike ka li a ifana David, oo a li munini kuvakwao. b Ndele David oye a li a hoololwa kuJehova. (Lesha 1 Samuel 16:6, 7, 10-12.) Jehova okwa li a mona osho sha li momutima waDavid, omulumenhu omunyasha, oo a li e hole Jehova.
9. Omolwashike to dulu okukala u na oushili kutya Jehova oku na ko nasha naave? (Tala yo efano.)
9 Diladila kunghee Jehova a ulika nale kutya oku na ko nasha naave. Okwe ku pa omayele a denga mbada e na sha nonghalo omo wa li. (Eps. 32:8) Osho otashi ulike kutya oku ku shii nawa. (Eps. 139:1) Ngeenge owa tula moilonga omayele aJehova, nokumona nghee e ku kwafela, oto ka kala wa tomhwa kutya Jehova oku na ko nasha naave. (1 Omaf. 28:9; Oil. 17:26, 27) Jehova oha didilike eenghendabala doye. Oku shii omaukwatya oye mawa nokwa hala a ninge kaume koye. (Jer. 17:10) Nota ka kala a hafa neenghono, ngeenge naave owa ningi kaume kaye. — 1 Joh. 4:19.
‘Ngeenge owa kongo Jehova, ota ka efa u mu mone.’ — 1 Omaf. 28:9 (Tala okatendo 9) c
NGEENGE WA LIMBILILWAOMATOKOLO O WA NINGA MONAKUDIWA
10. Ngeenge ohatu diladila kombinga yomatokolo oo twa ninga monakudiwa, omapulo elipi tashi dulika tu lipule?
10 Omafimbo amwe, vamwe otashi dulika va diladile kombinga yomatokolo oo va ninga monakudiwa nongeenge oku li tuu mondjila. Otashi dulika va li va efa po oilonga hai futu nawa, ile va li va tokola okuha tameka ongeshefa, opo va dule okulongela Jehova pauyadi. Otashi dulika va diladila kombinga yavamwe ovo va li va ninga omatokolo a yooloka ko kwaao avo, nopaife otava monika ve na oimaliwa ihapu nove na onghalamwenyo youdjeko. Naasho otashi dulika shi va ningife ve lipule kutya: ‘Mbela omaliyambo oo nda ninga otaa ti sha ngoo kuJehova? Ile okwa ningifa nge ndi fyaale konima?’
11. Oshike sha li sha teya omukumo omushangi wEpsalme 73?
11 Ngeenge naave oho lipula omapulo a tya ngaho, diladila komushangi wEpsalme 73. Okwa li a mona ovo ihava longele Jehova ve na omalutu e na oukolele, va hepuluka noihava hangika koiponga. (Eps. 73:3-5, 12) Eshi a li e va mona va fa tava tyapula onghalamwenyo, osha li she mu ningifa a diladile kutya eenghendabala daye dokulongela Jehova odongaho. Okwa li a “hepekwa omutenya aushe” komadiladilo mai. (Eps. 73:13, 14, KB 13) Ongahelipi a li a ungaunga nomaliudo a tya ngaho?
12. She likolelela kEpsalme 73:16-18, oshike sha li sha kwafela omushangi wEpsalme a ungaunge netekomukumo?
12 Lesha Epsalme 73:16-18, KB 13. Omupsalme okwa li a ya mouyapuki waJehova. Naasho osha li she mu kwafela a diladile nawa. Okwa li a mona kutya, nonande ovanhu vamwe ova li tava monika va fa ve na onghalamwenyo iwa, kava li ve na eteelelo li na sha nonakwiiwa. Naasho osha li she mu kwafela a kale e na ombili yopamadiladilo, e shii kutya okupitifa tete Jehova monghalamwenyo osho etokolo la denga mbada. Oshidjemo, okwa li vali a tokola toko okutwikila okulongela Jehova. — Eps. 73:23-28.
13. Ongahelipi to dulu okumona ombili yopamadiladilo, ngeenge oto livele ombedi omolwomatokolo oo wa ninga monakudiwa? (Tala yo efano.)
13 Naave oto dulu okumona ombili yopamadiladilo kekwafo lEendjovo daKalunga. Ngahelipi mbela? Diladila kombinga yoinima iwa oyo u na, mwa kwatelwa omanangeko noupuna aJehova, nokudimbuluka kutya ovo ihava longele Jehova ihava mono ekwafo lasha kuye. Otashi dulika va kale ve lineekela mwaasho va pondola monghalamwenyo, molwaashi kave na eteelelo li na sha nonakwiiwa. Ashike ove, Jehova okwe ku udanekela oinima ihapu itunhula. (Eps. 145:16) Natango, diladila kwaashi: Ngeno owa li ino ninga etokolo la fa olo wa ninga paife, ngeno onghalamwenyo yoye oya tya ngahelipi? Oushili oyoo kutya: Ovo hava ningi omatokolo, molwaashi ve hole Jehova nosho yo ovanhu vakwao, ihava kanifa sha.
Kala ho diladila komanangeko noupuna oo Jehova te ke ku pa monakwiiwa (Tala okatendo 13) d
NGEENGE TO DILADILA KUTYA OTASHI DULIKA UHE NA OSHILONGA KUJEHOVA
14. Vamwe ova taalela eenghalo dilipi, nepulo lilipi tashi dulika ve lipule?
14 Ovapiya vamwe vaJehova ihava longo vali ngaashi tava dulu, molwaashi va ninga ovanamido, vehe na oukolele, ile ve na oulema wonhumba. Osho otashi dulika shi va ningife va kale ve udite kutya kave na oshilonga kuJehova. Otashi dulika ve lipule kutya, ‘Mbela ondi na ngoo vali oshilonga kuJehova?’
15. Omushangi wEpsalme 71 okwa li a tomhwa kushike?
15 Omushangi wEpsalme 71 naye okwa li a taalela onghalo ya fa oyo. Okwa ilikana a ti: “Ino efa nge, ngee eenghono tadi fii nge po.” (Eps. 71:9, 18, KB-13) Ashike nonande ongaho, omupsalme okwa li a twikila okukala a tomhwa kutya, ngeenge okwa longele Kalunga noudiinini, ote ke mu wilika noku mu yambidida. Omupsalme okwa li e lihonga kutya, Jehova oha kala a hokwa ovo hava ningi ngaashi tava dulu opo ve mu longele, kashi na nee mbudi kutya ove na omangabeko elipi. — Eps. 37:23-25.
16. Omeenghedi dilipi ovanamido ve na oshilonga kuJehova? (Epsalme 92:12-15)
16 Ovanamido, diladileni kunghee Jehova e mu tala ko. Ota dulu oku mu kwafela mu twikile oku mu longela noudiinini, nonande ka mu na vali eenghono. (Lesha Epsalme 92:12-15, KB 13.) Ponhele yokuyandja elitulemo kwaasho itamu dulu vali okuninga, yandjeni elitulemo kwaasho tamu dulu okuninga. Pashihopaenenwa, otamu dulu okukwafela vamwe noshihopaenenwa sheni shoudiinini nokuulika kutya omu na ko nasha navo. Otamu dulu okupopya kombinga yanghee Jehova e mu kwafela oule womido, nonokutya omaudaneko Ombiibeli elipi mwa teelela a ka wanifwe monakwiiwa. Natango, inamu dimbwa kutya omailikano eni ohaa kwafele vamwe. (1 Pet. 3:12) Kashi na nee mbudi kutya otwa taalela eenghalo dilipi, atusheni ohatu dulu okuningila sha Jehova nosho yo vakwetu.
17. Omolwashike tu na okuhenuka okuliyelekanifa navamwe?
17 Ngeenge owa nyemata, eshi ito dulu okulongela Jehova shihapu, shilipalekwa kutya keshe shimwe osho to ningi oshi na ondilo kuye. Otashi dulika u kendabale okuyelekanifa osho to ningi naasho vamwe tava ningi. Ashike henuka okuninga ngaho. Omolwashike? Omolwaashi Jehova ihe tu yelekanifa navamwe. (Gal. 6:4) Pashihopaenenwa, Maria okwa li a pa Jesus oshali yomaadi edimba liwa. (Joh. 12:3-5) Mepingafano naasho, omufiyekadi ohepele, okwa li a yandja omayambidido motembeli, a tula mo oumaliwa vavali vongushu inininini. (Luk. 21:1-4) Ashike Jesus okwa li a tala ko eeshali adishe odo di li euliko leitavelo. Jesus okwa li a hopaenena filufilu Xe, naave oto dulu okukala u na oushili kutya Jehova oku wete ashishe osho to ningi, molwaashi ou na eitavelo muye nou mu hole, naasho to ningi oshi na ondilo kuye, nokuli nonande ou wete shinini neenghono.
18. Oshike tashi dulu oku tu kwafela tu finde omalimbililo? (Tala yo oshimhungu “ Eendjovo daJehova otadi dulu oku ku kwafela u finde omalimbililo.”)
18 Atusheni omafimbo amwe ohatu kwatwa komalimbililo. Ashike ngaashi twe shi mona, Ombiibeli otai dulu oku tu kwafela tu a finde. Onghee ninga ngaashi to dulu u mone omanyamukulo komapulo oo u na. Jehova oku na ko nasha naave pauhandimwe. Oha pandula omaliyambo oye nokwa udaneka oku ku nangeka noupuna. Kala u na oushili kutya Jehova oku hole noha file oshisho ovapiya vaye aveshe ovadiinini.
EIMBILO 111 Otu na omatomheno okukala twa hafa
a OUTUMBULILO WA YELIFWA: Moshitukulwa eshi, ohatu kundafana kombinga yomalimbililo oo hae tu ningifa tu diladile kutya katu na oshilonga kuJehova, ile tu kale twa limbililwa omatokolo oo twa ninga. Omalimbililo oo hao oo a popiwa mOmbiibeli, haa ningifa omunhu a kale ehe na eitavelo muJehova nomomaudaneko aye.
b Nonande Ombiibeli inai popya kutya David okwa li e na omido ngapi, eshi Jehova e mu hoolola, otashi dulika a li omunyasha natango. — Tala oshitukulwa mOshungonangelo she 1 Septemba 2011, ep. 29, okat. 2.
