“Onda ninginifwa ndi na omido 15, nokonima yeemwedi hamano onda hovela okukufa oukwafelikokolindjila. Konima yomudo umwe, onda li nda ninga eindilo lokuninga omukokolindjila wondjikilile. Eshi nda mana ofikola, onda li nda pula ndi ka longe koitukulwa oko ku na omhumbwe inene yovaudifi vOuhamba. Onda li nda hala ndi fiye po odoolopa omu nda dalelwa nameekulu wange oo nda kala naye ehe fi Ondombwedi yaJehova. Onda li ndi udite nai neenghono eshi omupashukilishikandjo a lombwela nge kutya ohandi ka longela moshitukulwa shetu, nonda li nda kendabala ndihe mu ulikile kutya onda uda nai. Onda kala handi lipula naasho a lombwela nge. Onda lombwela ou hatu longo naye moukalele nda ti: ‘Ondi wete kutya ohandi katuka eenghatu da fa daJona. Ashike lwanima Jona okwa ka ya kuNinive. Onghee hano, naame ohandi ka longela moshitukulwa osho nda pewa.’

Onda kala handi kokola ondjila oule womido nhee modoolopa omu nda dalelwa, nonda mona nghee sha li shi li pandunge okutambula ko ewiliko olo nda li nda pewa. Etaleko lange lii ola kala oupyakadi wa kula kwaame. Paife onda hafa lela. Momwedi umwe, ohandi dulu okukala ndi na ovakonakonimbiibeli ve li 24. Ohandi pandula Jehova eshi paife nda hovela nokuli okukonakona Ombiibeli nameekulu wange oo a li ha pataneke nge.”

Omukonakonimbiibeli umwe koFiji okwa li e na okuhoolola pokati kokuya koshoongalele shopaKriste nokuya pamwe nomushamane waye koshivilodalo shomupambele. Omushamane waye okwa li a dimina kutya ota dulu okuya koshoongalele. Omukulukadi okwa li a lombwela omushamane waye kutya ote ke va waimina konima yoshoongalele. Eshi a dimbuka koshoongalele, okwa li e udite kutya oshixwepo okuhenuka onghalo oyo tai dulu okutula moshiponga oupamhepo waye, nokwa li a tokola aha ye ko.

Eshi omushamane a ka lombwela ovapambele vaye kutya omukulukadi waye ote uya oku va waimina ngeenge a dimbuka “koshoongalele shavo shEendombwedi,” ova li ve mu nyamukula va ti: “Ite uya ko oku; molwaashi Eendombwedi daJehova ihadi dana omadalo.” *

Omushamane okwa li e udite etumba eshi omukulukadi waye a katuka metwokumwe neitavelo laye neliudo laye. Omolweitavelo laye, okwa li a dula okuyandja oundombwedi komushamane waye nosho yo kuvamwe. Oshidjemo, omushamane okwa li a tambula ko ekonakonombiibeli nokwa hovela okukala hai kokwoongala pamwe nomukulukadi waye.