1, 2. Ovapiya vaJehova ova taalela omashongo elipi?

OVALONGELIKALUNGA ovadiinini ova kala nokukondja fiyo okunena, okudja ngoo kuAbel. Omuyapostoli Paulus okwa li a lombwela Ovakriste Ovaheberi kutya ove ‘lididimikila omahepeko madjuu’ eshi va kala nokukondja opo va kale va hokiwa kuJehova nokunangekwa noupuna kuye. (Heb. 10:32-34) Paulus okwa li a yelekanifa ekondjo lOvakriste nomaudano oo a li haa ningwa muGreka, ngaashi efiyafanepo lovalotoki, oudano wonghondja nosho yo weengonyo. (Heb. 12:1, 4) Kunena, otu li mefiyafanepo lomwenyo, notwa taalela ovatondi ovo va hala oku tu piyaaneka, oku tu inda po, oku tu denga poshi noku tu kanififa ehafo nondjabi yomonakwiiwa.

² Shotete, otu na okukondja twa mana mo eshi hatu lwifa Satana nounyuni waye wa kolokosha. (Ef. 6:12) Otu na okulungama tuha nwefwe mo ‘keenguluhote’ dopafaneko dounyuni ou, oo a kwatela mo omahongo opalongelokalunga, ounongo wopanhu neenghedindjikilile ngaashi okuya moluhaelo, okunwa omakaya, okulongifa nai oikolwifa nosho yo okulongifa oingangamifi. Otu na yo okukondjifa  alushe eamo letu loulunde nosho yo etekomukumo. — 2 Kor. 10:3-6; Kol. 3:5-9.

3. Kalunga ohe tu deula ngahelipi opo tu dule okukondjifa ovatondi vetu?

³ Mbela otashi shiiva ngoo okufinda ovatondi ovo ovanaenghono? Heeno, ashike otashi pula okukondja twa mana mo. Paulus okwa popya kombinga yaye mwene, ta longifa omupopyofano we likolelela kovadengingonyo vonale, a ti: “Ihandi kondjo nda fa handi denge momhepo.” (1 Kor. 9:26) Ngaashi ashike omudengingonyo ha kendabala okudenga omukondjifi waye, nafye otu na okuninga lipopila to lika. Jehova ohe tu deula noku tu kwafela eshi hatu kondjo. Ohe tu pe omalombwelo okupitila mEendjovo daye, oo tae tu kwafele monghalamwenyo. Ohe tu kwafela yo okupitila moishangomwa yetu yopaMbiibeli, mokwoongala kwetu kwopaKriste nosho yo moyoongalele. Mbela oho tula ngoo moilonga osho to lihongo? Ngeenge oho dopa okuninga ngaho, owa fa ashike omunhu ta shekuna omukondjifi waye, ta “denge momhepo.”

4. Ongahelipi hatu dulu okuhenuka okufindwa kowii?

⁴ Ovatondi vetu otashi dulika ve tu vakele inatu shi teelela noku tu inda po ngeenge twa teka omukumo. Onghee, otu na okukala oupafi efimbo alishe. Ombiibeli oye tu londwela ya ti: “Ino findwa kowii, dula owii [nouwa].” (Rom. 12:21) Eladipiko olo kutya “ino findwa kowii” otali ulike kutya ohatu dulu okufinda owii. Ohatu dulu okufinda owii ngeenge otwa kala hatu u kondjifa. Ashike ngeenge otwa efa okulwa nokukala oupafi, ohatu dulu okufindwa kuSatana nounyuni waye wa kolokosha nosho yo kombelela yetu inai wanenena. Ino efa nandenande Satana e ku tilife ndele to efa omaoko oye a we poshi nokuliyandja. — 1 Pet. 5:9.

5. (a) Oshike tashi dulu oku tu kwafela tu twikile okukondjela omanangeko noupuna aJehova? (b) Oihopaenenwa yopaMbiibeli ilipi hatu ka kundafana?

⁵ Ovo ve li mekondjo kave na okudimbwa etomheno molwaashi tava kondjo, ngeenge ova hala okufindana. Opo va kale va hokiwa kuKalunga nokunangekwa noupuna kuye, ova pumbwa okukaleka momadiladilo eshilipaleko olo tali hangwa mOvaheberi 11:6, tali ti: “Ou ta ehene kuKalunga e nokwiitavela nokutya, oko e li, naava tave mu kongo, ote va pe ondjabi.” Oshityalonga shOshigreka osho sha tolokwa ‘okukonga’ otashi yandje ediladilo lokuninga oshinima nelitulemo nokuninga eenghendabala da mana mo. (Oil. 15:17) MOmishangwa omu na oihopaenenwa iwa yovalumenhu novakainhu ovo va li va ninga eenghendabala da mana mo opo va punikwe kuJehova. Jakob, Rakel, Josef naPaulus ova pita meenghalo didjuu nodinyikifa oluhodi, ashike omolwoudiinini wavo ova li va mona omanangeko noupuna mahapu. Ongahelipi hatu dulu okuhopaenena ovalongelikalunga vane ovo va kondja noudiinini?

6. Oshike sha li sha kwafela Jakob a kondje noudiinini, nokwa li a pewa ondjabi yashike? (Tala efano pehovelo loshitukulwa.)

⁶ Tatekulululwa Jakob okwa li ha kondjo noudiinini molwaashi okwa li e hole Jehova, a lenga oinima yopamhepo, nokwa li e na eitavelo filufilu kutya Jehova ota ka nangeka noupuna oludalo laye ngaashi a udaneka. (Gen. 28:3, 4) Osho otashi tu kwafele tu ude ko kutya omolwashike Jakob a li a kendabala ngaashi ta dulu opo a mone omanangeko noupuna aJehova eshi a li e na omido 100 lwaapo; okwa li nokuli a kondja nomweengeli oo a li e mu holokela molupe lopanhu. (Lesha Genesis 32:24-28.) Mbela Jakob okwa li ngoo shili e na elididimiko nosho yo eenghono dokukondjifa omweengeli oo omunaenghono? Paulelalela, hasho. Ashike okwa li a tokola okukondja tau pu mo; ka li a shuna omutwe moipeta. Noshidjemo, okwa li a pewa ondjabi omolwokukondja noudiinini. Okwa li a lukwa edina le mu yeleka, Israel, (tali ti,  “Omukondjifi waKalunga,” ile “Kalunga ta kondjo”). Jakob okwa li a mona ondjabi inene, oyo nafye twa halelela, sha hala okutya, okuhokiwa nokunangekwa noupuna kuJehova.

7. (a) Onghalo inyikifa oluhodi ilipi Rakel a li muyo? (b) Okwa kala ta kondjo ngahelipi, nokwa li a punikwa nashike?

⁷ Rakel, omukulukadi waJakob omuholike, naye okwa li a halelela okumona nghee Jehova a li ta ka wanifila omushamane waye eudaneko olo e mu udanekela. Ashike osha li tashi monika sha fa itashi shiiva, molwaashi Rakel ka li e na oludalo. Pefimbo olo, okukala uhe na oludalo osha li oshinima shififa ohoni neenghono. Mbela Rakel okwa li a hanga peni eenghono dopalutu nodopamaliudo opo a dule okulididimikila eenghalo odo dinyemateka nodinyenga? Ka li a tula omutwe kepepe. Ponhele yaasho, okwa kala ta kondjo noudiinini, ta ilikana a mana mo. Jehova okwa li a uda omailikano aRakel taa di komutima, nohauxuuninwa okwa li e mu nangeka noupuna noludalo. Oshi shii oku u diwa ko eshi Rakel a li a lila te lipandula ta ti: “Ame nda kondja . . . neenghono di dule dovanhu, ndele nda findana.” — Gen. 30:8, 20-24.

8. Josef okwa li a taalela eshongo lilipi oule womido dihapu, nokwe tu tulila po oshihopaenenwa shiwa shilipi?

⁸ Kape nomalimbililo kutya oudiniini waJakob naRakel owa li wa kuma neenghono omona wavo Josef, osho she ke mu kwafela a dule okuungaunga nomayeleko eitavelo oo a ka shakeneka. Onghalamwenyo yaJosef oya ka lunduluka neenghono ombadilila eshi a li e nomido 17. Ovamwaxe ova li ve mu landifa po moupika omolwondubo. Lwanima okwa li a tulwa modolongo muEgipti oule womido shihe li pauyuki. (Gen. 37:23-28; 39:7-9, 20, 21) Josef ka li a teka omukumo noka li a handuka nokukwata onghone. Ponhele yaasho, okwa li ha kala ta dilonga kekwatafano laye lopofingo naJehova. (Lev. 19:18; Rom. 12:17-21) Oshihopaenenwa shaJosef otashi dulu oku tu kwafela. Pashihopaenenwa, ngeenge otwa tekulwa meenghalo didjuu, ile otu udite tu li poupatekenedi, otwa pumbwa okukondja noudiinini. Ngeenge otwa ningi ngaho, ohatu dulu okukala noushili kutya Jehova ote ke tu nangeka noupuna. — Lesha Genesis 39:21-23.

9. Ngaashi Jakob, Rakel naJosef, oshike tu na okuninga opo Jehova e tu nangeke noupuna?

⁹ Diladila kulimwe lomomashongo oo wa taalela paife. Otashi dulika u diladile koshinima shonhumba osho wa ningilwa shihe li pauyuki, okuungaungiwa naave nonhondo ile okushekwa. Ile otashi dulika pe na umwe oo he ku popile mowii molwaashi e ku twila ondubo. Ponhele yokweefa omaoko oye a we poshi nokutula omutwe kepepe, dimbuluka osho sha li sha kwafela Jakob, Rakel naJosef va twikile okulongela Jehova nehafo. Jehova okwa li e va pameka noku va punika molwaashi ova li va lenga oinima yopamhepo. Ova li hava kondjo noudiinini nokukatuka metwokumwe nomailikano avo taa di komutima. Molwaashi otu li popepi elela nexulilo longhalelo ei youkolokoshi, otu na omatomheno a kola okukala neteelelo la twa li na sha naasho twa udanekelwa. Mbela oto kendabala ngoo nokukondja wa mana mo opo u kale wa hokiwa kuJehova?

10, 11. (a) Ongahelipi tashi dulika tu na okukondja opo Kalunga e tu punike? (b) Oshike tashi ke tu kwafela tu ninge omatokolo e li mondjila notu finde etekomukumo nosho yo oinima oyo tai dulu oku tu imba tu longele Jehova?

¹⁰ Eenghalo dimwe dilipi tashi dulika tadi tu pula tu kondje opo Kalunga e tu nangeke noupuna? Onghalo imwe ongaashi okukala hatu kondjo tu pangele eamo letu loulunde. Vamwe otava kondjo opo va kale ve na etaleko liwa li na sha noukalele. Vamwe otashi dulika tave lididimikile ouyahame ile owike. Vamwe natango ohava mono shidjuu okudimina po ovo ve va udifa nai ile va nyona kuvo. Kashi na nee mbudi kutya  otwa kala hatu longele Jehova efimbo li fike peni, atusheni otu na okukondjifa oinima oyo opo ihe tu imbe okulongela Jehova, oo ha pe ovapiya vaye ovadiinini ondjabi.

¹¹ Oshi li lela eshongo okuninga omatokolo e li mondjila nokudulika komifikamhango dopaKriste, naunene tuu ngeenge omutima wetu, oo u na omakoto, tau tu hongaula. (Jer. 17:9) Ngeenge owa didilika kutya ope na oshinima shonhumba omo ito shi endifa nawa, ilikana kuJehova e ku kwafele okupitila momhepo iyapuki. Eilikano nosho yo omhepo iyapuki otai dulu oku ku pameka opo u ninge omatokolo oo e li mondjila, nokungaho Jehova ote ke ku punika. Kala ho katuka metwokumwe nomailikano oye. Kendabala u kale ho lesha Ombiibeli efiku keshe, ho ningi ekonakonombiibeli lopaumwene nokukala alushe pElongelokalunga lOukwaneumbo weni. — Lesha Epsalme 119:32.

12, 13. Ovakriste vavali ova li va kwafelwa ngahelipi va pangele omahalo avo mai?

¹² Ope na oihopaenenwa ihapu yanghee Eendjovo daKalunga, omhepo yaye iyapuki nosho yo oishangomwa yetu yopaKriste ya kwafela Ovakriste va finde omahalo mai. Omunyasha umwe okwa lesha oshitukulwa “How Can You Resist Wrong Desires?” mo-Awake! yo 8 Desemba 2003. Mbela okwa li e linyenga ngahelipi? Okwa ti: “Ohandi kondjo nda mana mo opo ndi kandeke omadiladilo mai. Eshi nda lesha moshitukulwa osho kutya ‘vahapu ohava kondjo noudjuu lela opo va pangele omahalo mai,’ onda li ndi uditile oumwainafana wetu oukwao wananghali. Onda li ndi udite kutya haame andike handi kondjo.” Omunyasha oo natango okwa mona ouwa moshitukulwa “Alternative Life-Styles—Does God Approve?” shomo-Awake!  yo 8 Oktoba 2003. Ota dimbuluka oshitwa shimwe osho sha popiwa mo kuvamwe kutya ekondjo olo oli li “ekiya mombelela.” (2 Kor. 12:7) Nonande otava kondjo opo va kale ve na elihumbato la koshoka, otava dulu okukala ve na omukumo kutya otave ke shi pondola monakwiiwa. Omunyasha oo okwa ti: “Omolwetomheno olo, efiku keshe ohandi kala ndi na omukumo kutya ohandi dulu okukala omudiinini. Ohandi pandula Jehova neenghono eshi ta longifa ehangano laye oku tu kwafela tu pondole efiku keshe monghalelo ei yoinima youkolokoshi.”

¹³ Natu ka taleni yo koshimoniwa shomumwameme umwe wokoAmerika. Okwa ti: “Ohandi mu pandula eshi hamu tu palula alushe neendja odo twa pumbwa pefimbo la wapala. Luhapu ohandi kala ndi udite kutya oitukulwa ei aame ya shangelwa. Oule womido, onda kala handi kondjo nomahalo oo taa fininike nge ngeno ndi longe osho inashi yuka koshipala shaJehova. Omafimbo amwe, onda li handi kala nda hala okusholola nokweefa okukondja. Ondi shii kutya Jehova oku nonghenda noha dimine po, ndele molwaashi ohandi hangwa komahalo oo a puka naasho handi kala nda hala okuninga kandi shi tonde, ohandi kala ndi udite kutya inandi wana okukwafelwa kuJehova. Ekondjo olo tali twikile ola kuma okukalamwenyo kwange akushe. . . . Konima eshi nda lesha oshitukulwa ‘Ou na ngoo “omutima wokushiiva” Jehova?’ mOshungonangelo yo 15 Marsa 2013, onda li ndi udite lela kutya Jehova okwa hala okukwafela nge.”

14. (a) Paulus okwa li e udite ngahelipi eshi a li ta kondjo neamo laye loulunde? (b) Oshike tashi ke tu kwafela tu finde eamo letu loulunde?

¹⁴ Lesha Ovaroma 7:21-25. Paulus okwa li e shii kutya ohashi kala shidjuu okukondjifa omahalo a puka nosho yo eamo loulunde. Ashike okwa li e na elineekelo kutya ota dulu okufindana molwoodi olo hali kala momalutu etu mokukala ha pula ekwafo kuJehova meilikano nokukala neitavelo tali longo mekuliloyambo laJesus. Ongahelipi shi na sha nafye? Nafye ohatu dulu okupondola eshi hatu kondjifa eamo letu loulunde. Ngahelipi mbela? Itatu dulu okupondola kufye vene, ndele ongeenge ashike hatu hopaenene Paulus, mokukala twe lineekela muJehova nokukala tu na eitavelo mekuliloyambo.

15. Omailikano ohae tu kwafela ngahelipi tu kale ovadiinini notu lididimikile omayeleko?

¹⁵ Omafimbo amwe, Kalunga otashi dulika a efe manga tu ulike kutya otu uditile lela ngahelipi oshinima shonhumba osho hatu lipula nasho. Pashihopaenenwa, ohatu ka ninga po shike ngeenge fye ile oshilyo shoukwaneumbo wetu otashi vele, ile ngeenge otwa longelwa okuhenouyuki kwonhumba? Otu na okuulika kutya otwe lineekela filufilu muJehova mokukala hatu mu ilikana e tu nghonopaleke opo tu kale ovadiinini, tuha kanife ehafo letu notu kale twa pama pamhepo. (Fil. 4:13) Oimoniwa yavahapu ovo va li ko pefimbo laPaulus nopefimbo letu otai ulike kutya eilikano otali dulu oku tu pameka noku tu kwafela tu kale hatu kondjo nomukumo nonelididimiko.

16, 17. Oshike wa tokola toko okuninga shi na sha nekondjo olo tu li mulo?

¹⁶ Ondiaboli oya halelela ngeno u sholole, ove u liyandje. Ndele kala wa tokola toko ‘okudiinina osho shiwa.’ (1 Tes. 5:21) Kala wa shilipalekwa kutya oto dulu okufinda Satana, ounyuni waye wa kolokosha nosho yo eamo loulunde. Oto dulu okufindana ngeenge owa kala we lineekela filufilu kutya Jehova ota dulu oku ku pameka. — 2 Kor. 4:7-9; Gal. 6:9.

¹⁷ Onghee hano, twikila okukondja. Ino sholola. Kala omudiinini. Kala u nelineekelo kutya Jehova ote ‘ke ku lokifila enangekonoupuna la wanenena.’ — Mal. 3:10.