1. Omolwashike hatu dulu okukala noushili kutya Eendjovo daKalunga odi neenghono? (Tala efano pehovelo loshitukulwa.)

TU LI oshiwana shaJehova otu shii kutya Eendjovo daKalunga odo a pa ovanhu odi “nomwenyo neenghono.” (Heb. 4:12) Vahapu vomufye otwa mona oushili wanghee Ombiibeli i neenghono dokulundulula eenghalamwenyo. Ovamwatate novamwameme vamwe ova li eembudi, ovahaeli ile va pikwa koingangamwifi. Vamwe ova li hava hafele osho va pondola mounyuni ou, ashike ova kala ve udite kutya ope na shimwe sha kambela monghalamwenyo yavo. (Omuud. 2:3-11) Ovo va kala ve udite ngaho ova ka mona ondjila oyo tai twala komwenyo waalushe kekwafo leenghono dOmbiibeli oyo hai lundulula okukalamwenyo kwovanhu. Otashi dulika ho lesha noho hafele oimoniwa yavamwe mOshungonangelo oyo hai kala moitukulwa “Ombiibeli ohai lundulula onghalamwenyo yovanhu.” Otashi dulika yo wa mona kutya Ovakriste ohava twikile okuninga exumokomesho lopamhepo kekwafo lEendjovo daKalunga, nokonima nokuli eshi va tambula ko oshili.

2. Ongahelipi Eendjovo daKalunga da li di neenghono mefelemudo lotete?

² Mbela oshi noku tu kumwifa eshi vahapu kunena va konakona Eendjovo daKalunga ndele tava ningi omalunduluko a didilikwedi?  Hasho nandenande. Oimoniwa oyo otai tu dimbulukifa ovamwatate novamwameme vomefelemudo lotete, ovo va li ve neteelelo lokuya meulu. (Lesha 1 Ovakorinto 6:9-11.) Konima eshi omuyapostoli Paulus a tumbula ovo itava ka fyuulula Ouhamba waKalunga, okwa weda ko vali a ti: “Ndele omwa li mu li ngaha, vamwe vomunye.” Ashike ova li va ninga omalunduluko kekwafo lEendjovo daKalunga nosho yo lomhepo iyapuki. Nokuli nokonima eshi va tambula ko oshili, vamwe ova li ve nokufinda omaunghundi opamhepo. MOmbiibeli omwa popiwa Omukriste umwe omuvaekwa womefelemudo lotete oo a li a kondwa nokonima yefimbo okwa li a alulilwa meongalo. (1 Kor. 5:1-5; 2 Kor. 2:5-8) Mbela itashi tu omukumo okumona nghee ovaitaveli vakwetu va li va shakeneka nokufinda omaupyakadi a yoolokafana kekwafo lEendjovo daKalunga?

3. Oshike hatu ka kundafana moshitukulwa eshi?

³ Molwaashi Eendjovo daKalunga odi li oshilongifo shi neenghono notu di na kunena, otwa halelela oku di longifa noukeka. (2 Tim. 2:15) Onghee hano, moshitukulwa eshi ohatu ka kundafana nghee hatu dulu okweefa Eendjovo daKalunga di longe (1) monghalamwenyo yetu, (2) ngeenge hatu kufa ombinga moukalele nosho yo (3) ngeenge hatu hongo tu li komutune. Omadimbulukifo oo otae ke tu kwafela tu ulikile Tate wetu womeulu omunahole ohole nolupandu letu, oo he tu hongo osho tashi tu wapalele. — Jes. 48:17.

4. (a) Oshike twa pumbwa okuninga ngeenge otwa hala Eendjovo daKalunga di tu kume? (b) Ongahelipi ho kongo efimbo lokulesha Ombiibeli?

⁴ Ngeenge otwa hala Eendjovo daKalunga di tu kume, otwa pumbwa oku di lesha pandjikilile ile tu tye efiku keshe. (Jos. 1:8) Osho shili kutya vahapu vomufye otu nonghalamwenyo ye lipyakidila. Ndele nande ongaho, inatu efa nande oinakuwanifwa oyo tu wete ya fimanenena i ye moshipala elesho letu lOmbiibeli. (Lesha Ovaefeso 5:15, 16.) Ovapiya vaJehova vahapu ohava ningi eenghendabala di lili noku lili opo va dule okulesha Ombiibeli efiku keshe, kutya nee ongula, omutenya ile okonguloshi. Ohava kala ve udite ngaashi omupsalme, oo a shanga a ti: “Omhango yoye ondi i hole shi fike peni! Efiku alishe ohandi i dilonga.” — Eps. 119:97.

5, 6. (a) Omolwashike okudilonga kwa fimana? (b) Ongahelipi hatu dulu okudilonga nawanawa? (c) Ongahelipi wa mona ouwa pauhandimwe mokulesha Eendjovo daKalunga nokudilonga kudo?

⁵ Shimwe vali shi na sha nokulesha Ombiibeli, osha fimana tu kale hatu dilonga kwaasho twa lesha. (Eps. 1:1-3) Opo ashike hatu ka dula okutula moilonga ounongo oo wa denga mbada. Kutya nee ohatu lesha Eendjovo daKalunga mOmbiibeli mwoovene ile omoshikwaelektronika, elalakano letu oku di tula moilonga.

⁶ Ongahelipi hatu dulu okukala hatu dilonga nawanawa? Vahapu ova mona hashi kwafele  okufuda po konima va lesha omishangwa donhumba nokudiladila komapulo ngaashi: ‘Eshi otashi lombwele nge shike kombinga yaJehova? Omeenghedi dilipi handi tula nale moilonga efinamhango olo li li mEendjovo daKalunga monghalamwenyo yange? Openi nda pumbwa okulundulula?’ Eshi hatu dilonga pamwe neilikano kEendjovo daKalunga, otashi ke tu kwafela tu tule moilonga omayele ado pauyadi. Ohatu ka mona eenghono dEendjovo daKalunga monghalamwenyo yetu ngeenge otwa kala hatu ningi ngaho. — 2 Kor. 10:4, 5.

7. Ongahelipi hatu dulu okulongifa noukeka Eendjovo daKalunga moukalele?

⁷ Oshike tashi dulu oku tu kwafela tu longife noukeka Eendjovo daKalunga moukalele wetu? Onghedi yotete, oku i longifa unene ngeenge hatu udifa ile hatu hongo vamwe. Omumwatate umwe okwa popya a ti: “Ngeno owa li to longo naJehova eumbo neumbo, mbela ngeno ove ashike to kala to popi ile oto ke mu pa ngo omhito naye a popye?” Okwa li a hala okutya: Ngeenge hatu lesha Eendjovo daKalunga odikilila moukalele, kungaho ohatu efa Jehova a popye nomuneumbo. Omushangwa oo wa hoololekeka nawa otau ka kala u neenghono u dulife keshe osho tashi dulika tu popye. (1 Tes. 2:13) Lipula kutya, ‘Mbela ohandi kongo ngoo omhito keshe ndi longife Eendjovo daKalunga ngeenge handi popi naavo nda twaalela onghundana iwa?’

8. Omolwashike twa pumbwa okuninga shihapu shihe fi ashike okulesha omishangwa moukalele?

⁸ Otwa pumbwa okuninga shihapu shihe fi ashike okuleshela ovo hatu kundafana navo omishangwa mOmbiibeli. Mbela omolwashike? Omolwaashi vahapu ka ve neudeko ile ve na ashike eudeko linini lOmbiibeli. Ngaashi ashike sha li mefelemudo lotete, nokunena osho shi li ngaho. (Rom. 10:2) Onghee hano, katu nokudiladila kutya omunhu okuudite ko nawanawa ovelishe oyo molwaashi ashike twe i mu leshela. Otwa pumbwa okukala hatu divilike  nawa oitukulwa yovelishe, tashi dulika tu leshulule oitya oyo ya fimana nokufatulula eityo layo. Okuninga ngaho ohaku kwafele etumwalaka lEendjovo daKalunga li kume omadiladilo nomitima dovapwilikini vetu. — Lesha Lukas 24:32.

9. Ongahelipi hatu dulu okuyelifa nawa omishangwa monghedi oyo tai fimanekifa Ombiibeli? Yandja oshihopaenenwa.

⁹ Otwa pumbwa okuyelifa nawa omishangwa monghedi oyo tai fimanekifa Ombiibeli. Pashihopaenenwa, ohatu dulu okutya, “Natu tale osho Omushiti wetu ta ti kombinga yoshikundafanwa eshi.” Ngeenge hatu popi naumwe oo ehe fi Omukriste, ohatu dulu okutya, “Didilika osho Omishangwa Diyapuki tadi tu lombwele.” Ile ngeenge hatu udifile umwe oo ina itavela muKalunga, ohatu dulu oku mu pula kutya, “Mbela owa uda ngoo nande onale eyeletumbulo e li lonale?” Otu na ko nasha nakeshe umwe pauhandimwe nohatu ungaunga naye nawa. — 1 Kor. 9:22, 23.

10. (a) Hokolola oshimoniwa shomumwatate umwe osho a li a mona. (b) Ongahelipi wa mona eenghono dEendjovo daKalunga moukalele woye?

¹⁰ Vahapu ova mona kutya okulongifa Eendjovo daKalunga moukalele ohaku dulu okukuma ovo hava udifile. Diladila koshihopaenenwa eshi. Omumwatate umwe okwa li a ya kelishuneko lomushamane omunamido oo a kala ha lesha oishangomwa yetu oule womido. Ponhele ashike yokuyandja Oshungonangelo osho opo sha piti, omumwatate okwa li a tokola oku mu leshela omushangwa umwe oo u li moshifo osho. Okwa li a lesha 2 Ovakorinto 1:3, 4, ovo tava ti: “OXe yefilonghenda naKalunga kehekeleko alishe, ou te tu hekeleke moudjuu wetu aushe.” Omuneumbo oo okwa li a kumwa keendjovo odo nokwa li a pula omumwatate a leshulule vali omushangwa oo. Omulumenhu oo okwa li a popya nghee ye nomukulukadi waye va pumbwa ehekeleko, nopaife okwa ulika ohokwe metumwalaka lOmbiibeli. Mbela ito dimine kutya Eendjovo daKalunga odi neenghono moukalele? — Oil. 19:20.

11. Ovamwatate ovo hava hongo ve li komutune ove noshinakuwanifwa shashike?

¹¹ Atusheni ohatu hafele okukala pokwoongala kwopaKriste nosho yo poyoongalele inini naayo yakula. Etomheno letu lokwoongala, olo okulongela Jehova. Ohatu mono yo ouwa muhapu mewiliko lopamhepo olo hatu pewa. Ovamwatate ovo hava popi komutune poiningwanima ya tya ngaho ohava hafele oufembanghenda munene. Pomhito opo tuu opo, ove nokudimbuluka kutya oinakuwanifwa yavo oya fimanenena. (Jak. 3:1) Ove na alushe okushilipaleka kutya osho tava hongo oshe likolelela filufilu kEendjovo daKalunga. Ngeenge owa pewa oshinakuwanifwa shokuhonga u li komutune, ongahelipi to dulu okuulika kutya Ombiibeli oi neenghono moshipopiwa shoye?

12. Ongahelipi omupopi ta dulu okushilipaleka kutya oshipopiwa shaye oshe likolelela filufilu kOmishangwa?

¹² Shilipaleka kutya oshipopiwa shoye oshe likolelela filufilu kOmishangwa. (Joh. 7:16) Osho osha hala okutya ngahelipi? Otu na okulungamena onghedi omo hatu yandje oipopiwa, ile oimoniwa nomafaneko oo hatu longifa aha ningife ovapwilikini vaha yandje elitulemo komishangwa. Natango, dimbuluka kutya okulesha omishangwa donhumba itashi ti kutya oto hongo lela okudja mOmbiibeli. Okulongifa omishangwa dihapu otashi dulika ku ningife ovapwilikini voye vaha ka dimbuluke nande omushangwa umwe. Onghee hano, hoolola noukeka omishangwa odo da fimana ndele to kongo efimbo loku di lesha, okuyelifa, lokuninga omafaneko nosho yo okuyelifa etulomoilonga lado. (Neh. 8:8) Ngeenge oshipopiwa oshe likolelela koshipopiwadutilo sha dja kehangano, oshiwa oku shi konakona nosho yo omishangwa odo da etwa mo. Kendabala u ude ko ekwatafano olo li li pokati koshipopiwadutilo nosho yo omishangwa  odo. Longifa omishangwa odo opo u yelife nawa oitwa oyo i li moshipopiwadutilo. (Oto dulu okumona omaetepo ta wapalele moshitukulwa 21 fiyo 23 membo Mona ouwa mOfikola yOukalele woPauteokratika.) Pula Jehova meilikano e ku kwafele u yelife omadiladilo oo e li mEendjovo daye. — Lesha Esra 7:10; Omayeletumbulo 3:13, 14.

13. (a) Ongahelipi omumwameme umwe a li a kumwa komishangwa odo da li da longifwa pokwoongala kwopaKriste? (b) Ongahelipi wa mona ouwa mehongo lopamishangwa pokwoongala kwetu?

¹³ Omumwameme umwe wokoAustralia okwa li a kumwa neenghono komishangwa odo hadi longifwa pokwoongala kwopaKriste. Kakele komaupyakadi oo a li e na, okwa li a tambula ko etumwalaka lOmbiibeli nokwa li e liyapulila Jehova. Ndele nande ongaho, okwa li ha mono shidjuu okwiitavela kutya Jehova oku mu hole. Mokweendelako kwefimbo, okwa li a tomhwa kutya Jehova oku mu hole. Oshike sha li she mu kwafele opo a fike pexulifodiladilo olo? Okwa li a dilonga komushangwa umwe oo wa li wa longifwa pokwoongala kwetu noku u faafanifa neevelishe dimwe mOmbiibeli. * Mbela naave owa li ngoo wa kumwa nande onale kEendjovo daKalunga odo da li da longifwa pokwoongala, poyoongalele inini naayo yakula? — Neh. 8:12.

14. Ongahelipi hatu dulu okuulika olupandu letu omolwEendjovo daJehova?

¹⁴ Mbela inatu pandula Jehova omolwEendjovo daye, Ombiibeli? Ine di shanga ashike molwaashi e hole ovanhu ndele otadi wanifa po yo eudaneko laye kutya otadi kala po fiyo alushe. (1 Pet. 1:24, 25) Ohatu ningi nawa ngeenge hatu lesha Eendjovo daKalunga pandjikilile, hatu di tula moilonga monghalamwenyo yetu nosho yo oku di longifa ngeenge hatu kwafele vamwe. Ohatu ulike ohole nolupandu omolwoshali yEendjovo odo, ndele unene tuu omushangi wado, Jehova Kalunga.